א נייע מקובל איז אנדעקט געווארן אין ארץ ישראל ווי ער איז ערשינען ביי די חתונה פון זיין זוהן פארגאנגענע דאנערשטאג אנגעטוהן אין ווייסן באדעקט מיט א טלית, לויט ווי זיינע נאכפאלגער זאגן האט ער שוין נישט ארויסגעקוקט פון אונטער א טלית פאר 40 יאר און נישט געזען קיין צורת אנוש.

וואשינגטאן - די מאמר חז"ל פון כל מתפלל בעד חבירו הוא נענה תחילה האט באקומען נאך א פשט ווען צוויי אידן וואס האבן געהאלפן שתדל'ן ביי קאנגרעסלייט אין וואשינגטאן פאר די ’האופ אקט’ געזעץ געצילט ארויסצוהעלפן פארפעלקער וואס ווארטן אויף זרע של קיימא פאראויסגעשטופט דורך ’צדק’, זענען ב”ה געהאלפן געווארן.

וואשינגטאן - א גרופע סענעטארן האבן אפגעשיקט א בריוו צו די דירעקטאר פון די פעדעראלע צענטערס פאר מעדיקער און מעדיקעיד סערוויסעס, פרוי ברוקס לאזשור צו אויפאדערן אז די פעדעראלע אינשורענס פירמעס זאלן דעקן די וויכטיגע אינשורענס קאסטן פאר קינדערלאזע פארפעלקער אין אמעריקע, די בריוו איז געקומען נאך וואס די וואילטעטיגע עסקנים פון די 'צדק' ארגאניזאציע אין שפיץ פון רבי משה מארגארעטן האבן שווער געארבעט אויף די סענעטארן צו איבערצייגן די וויכטיגקייט דערפון.

סענאטאר קארי בוקער וואס איז א לאנגיאריגע שטיצער פון צדק האט ארויסגעשטעלט א סטעיטמענט זיך צו באדאנקן פאר צדק פאר זייער שווערע ארבעט, ער האט קלאר געשטעלט אז דער בריוו איז צו די ’פעדעראלע’ אינשורענס פירמעס אז זיי זאלן דעקן די טייערע קאסטן פון די אינשורענס.

אויפן אנדערן פראנט זעצט ווייטער פאר די העפטיגע שתדלנות צו פארהאנדלען מיט געזעצגעבער פון ביידע פארטייען צו אריבערפירן א געזעץ וואס זאל צווינגען פריוואטע אינשורענס פירמעס צו דעקן די קאסטן.

אנטווערפן - אידן אין אנטווערפן זענען שוין לאנג נישט געווען אזוי אנגעצויגן דעם פארגאנגענעם פרייטאג און שבת ווען די גאנצע שטאט איז געווען אויף מיט די נייעס אז די עירוב האט זיך צוריסן, שפעט פרייטאג צונאכטס איז דער עירוב געווארן פארראכטן.

די עסקנים זענען שוין געווען פארנומען א גאנצע וואך צוליב וואס א הויכע אייזערנע שטאנג וואס האלט די עירוב שטריק איז אומגעפאלן, מען האט געארבעט אויף דעם גאנץ פרייטאג אבער נאכמיטאג איז עס ווידער איבערגעריסן געווארן דורך די ׳טראם׳ (די ארטיגע שטאטישע באן סיסטעם).

די רבנים פון די קהילות, הגאון רבי אהרן שיף שליט"א גאב"ד מחזיקי הדת, און הגאון רבי פינחס לייבוש פאדווא שליט"א גאב"ד שומרי הדת, האבן ביידע ארויסגעגעבן מעלדונגען מיט די פונקטליכע הלכות וויאזוי זיך צו אומגיין אין א פאל וואס עס איז נישט דא קיין עירוב, פון מאכן עירובי חצרות, ווען מ׳מעג נוצן א גוי צו מטלטל זיין, און וויאזוי צו איינבינדן די שליסלעך אינעם גארטל.

שפעט פרייטאג צונאכטס איז אנגעקומען די נייעס אז די טראם באאמטע האבן צוריק פארראכטן דעם עירוב שטריק און איינע פון די רבנים זענען אהינגעגאנגען צו זיכער מאכן אז עס איז כשר, דערנאך איז ארומגעגאנגען די הודעה פאר אלע אידישע איינוואוינער וואס האבן אפגעאטעמט מיט פרייד.