Қўй ёғи суриб қўй, яхши бўлиб кетади

"Агар сизда мавжуд ягона асбоб — болға бўлса, сиз ҳар қандай муаммони — мих сифатида кўрасиз", деган эди психолог Маслов.

Яъни бир дона формула ўрганиб оламиз-да, кейин уни, барча муаммолар ечими сифатида қабул қиламиз.

Масалан, устозларда телефон ёшларни бузяпти деган тушунча мавжуд.

Энди эса ўқувчи дарс қилмаса ҳам — телефон;

Ўқувчи характери ўзгарса — телефон;

Ўқувчи гап қайтарса — телефон;

Ўқувчи дарсда ухласа — телефон;

Баҳолари тушиб кетса ҳам — телефон;

Ўқувчи севишиб қолса ҳам телефон айбдор, деб ҳисоблаймиз.

Вазиятга осон ечим бериб, чуқурроқ киришишга эринамиз. Натижада тўғри ташхис қўёлмай — касални даволай олмаймиз.

Балки талаба касалдир, балки оилавий муаммоси бордир, балки молиявий қийинчиликдадир? — чуқурроқ таҳлил қилиб кўринг.

Қиссадан ҳисса:

Бир муаммони ўрганиб олиб, ҳаммани ҳаётини шу муаммога мосламанг!

@Ustoz_kundaligi