امير المؤمنين علي عليه السلام

ارحم حالنه وحال اليتامه
گول ان شالله تكوم بسلامه
.............

جيت اسأل يبويه عليك.   جرحك ياعلي شلونه
شگال شسولف الجرّاح.    لمّن شافه بعيونه
يبچون الحسن وحسين.   ليش وما يضمدونه
اذا جرحك سهل چا ليش.  وجهك منخطف لونه

وليش الكون متغيّر نضامه
گول ان شالله تكوم بسلامه
.............

طمّن گلبي وحچي وياي   وفتح عينك بعيني
ياريت العمـر ينــــدار.    ونّطي لعمرك سنيني
لتگول اخــر الكلمات.    هاي البينك وبينـي
گول ان شالله اتعافه.    وبأيـدج تگوّمينـي

يالدوم عله وجهك ابتسامه
گول ان شالله تكوم بسلامه
.............

هاي ايتامك عله الباب.   انهض يا علي ليهه
تبچي وتنحـب ابّابك.     تنتظـرك يواليهه
اطفال ويتامه زغار.    من غيرك يراعيهه
لتيتّمها يابوحسين    والعيد اگبل عليهه

لا تكسر گلب بيك اهتمامه
گول ان شالله تكوم بسلامه
.............

شد جرحك يبويه وگوم.  تمم ياعلي صيامك
لا تفجعنه يابوحسين  لا تختمهن ايامك
شاهد حالة اولادك.  بويه وشوف ايتامك
كلها تصيح يا كرار.   انهض ومسح آلامك

لتگول العمر گرّب ختامه
گول ان شالله تكوم بسلامه
.............

آني الدلّلتهه هواي.  زينب ياعلي يمك
لا تتركني اترجّاك   لا ينزف بعد دمك
اگعد والجرح داويه  خل نتشرف نخدمك
يالنورك يشع بالكون.  ياگبر اللذي يضمك

لتگول الفجر اخر علامه
گول ان شالله تكوم بسلامه
.............
آخـر كلمه وي زينب.  حاچاها بدموع العين
هيّن جرحي ومصابي  صبري يگلها لا تبچين
باجر بالطفوف هناك.    اعظم فاجعه تشوفين
گبالچ ينگطع راسه.     ويتگطع اخوج حسين

ودّعها علي وسمعت كلامه
گول ان شالله تكوم بسلامه

سيد زيد الفحام
__

.
               لاويــن رايــــح يا علــي
               وتدري المرادي الجاهلي
               ايتانيك خصمك يالولـي
               وايطبـــرك بمحرابــــك

حيـدر يعـــايــن للفضــا ــ لــون السمــاء اتغيـر
والكــون أظلــم منظـره ــ وجه الوسيعه اتكدر
حس ابو الحمله بالأجل ــ وأمــر المنيّــه اتقـرر
من يطر مصباح الفجــر ــ دم هــامِتـــه يتنثــر

ساعة منيتــه والأجــل
                 ماتخفه عن خير العمـل
                 ايتانيك خصمك يالولي
                  وايطبـــرك بمحرابــــك

من داره للمسجد طلع ــ وَيّـــه النفس يتكلـــم
اشدد حيازيم الأجــل ــ ياعلي المــوت اتحتم
آنه العليم ابكـل أمـــر ــ بليلـــة مصابــي أعلم
وابسيف فاجر شيبتي ــ تتخضب بسيــل الدم

آخـــر صلاة ابهالفــجُـر
              وتتلاشــه أيـــام العمُــر
              ايتانيك خصمك يالولي
             وايطبـــرك بمحــرابـــك

طيــر الإِوَز خلفه مشت ــ ظلـــت تصيح الطيره
چنهــا تودعـــه وحيدره ــ لــن وجها الهـا ايديره
اعرف اسباب امصايحچ ــ واسباب هذي الحيره
من عگب صوتچ يرتفــع ــ صوت البچي بالديره

لطيـــور تنعاه او تِـــوِن
                واتردد اصــوات الحزن
                ايتانيك خصمك يالولي
                وايطبــــرك بمحرابــــك

ناوي المرادي عالغــدر ــ بزينــة الدنيــه يطمـــع
ظل يبــرد بسيفه شهر ــ وسيفـــه بالسم اتشبع
والمسجد الكوفه مشه ــ خافــي الوجه وامگبع
صمــم وثَبّـــت نيِّتَــــه ــ الچتل البطيـن الأنزع

هذا علـــي واللا فتـــه
              يعلم بموتـــه وساعتــه
              ايتانيك خصمك يالولي
              وايطبـــرك بمحرابــــك

للمسجــد الوالي دخل ــ من طرف بــاب السَدّه
شاهـــد اگبالـــه قاتلـه ــ حيدر اليــدري بوعده
لن شافه نايم عالوجه ــ وخافي بتــاره ابسـده
حاچاه عدل نومتـــك ــ ومن جنبــه مر واتعده

عالوجه مينـــام البشــر
                لو عالجنــب لو عالظهـر
                ايتانيك خصمك يالولي
                وايطبـــرك ابمحــرابــك

استقبــل القبله للفرض ــ كمـــل أذانـــه وصلــه
لن ابن ملجم هالرجس ــ بسيف الغدر گاصدلـه
صاب الامــام ابهامتـــه ــ مـا نطه الحيدر مهله
دمه نزف مـــن طبرتــه ــ ويلاه ليــث الحملــه

ونــادى جبرائيل ابألــم
              ركن الهدى اليوم انهدم
              ايتانيك خصمك يالولي
             وايطبــــرك بمحرابــــك

كلمات الشاعر عمار الراشدي

(ليلة استشهاد الإمام علي ابن أبي طالب عليه السلام ٢١ /رمضان /١٤٤٤هج الأربعاء 12 \4 \2023)

**علي مولا علي         علي مولا علي
ــــــــــــــــــــــــــــــــــــــ
الماشهد بأذانه          عايش بحرمانه    
آخره ودنيانه         بس علي مـولانه

علي ديوان الضيافه وعلي شيخ الساده
علي والكعبه ابكبرهه طلگت ابميلاده
ابو اتراب ومن تراب الناس كلهم صارو
يعني بس حيدر ابونه واحنه صرنه اولاده

علي مولا علي         علي مولا علي
ــــــــــــــــــــــــــــــــــــــ
علي يوم المحشر       بيده كل المعبر
والكتابه امزوّر       يوگع ويتعثر

الـمايوقعله كتابه حيدر بتأييده
يعني في يوم القيامه محد ايكض ايده
كلمه للتاريخ گلنه وما نعيد الكلمه
الـما يريدك ياامامي احنه هم منريده

علي مولا علي         علي مولا علي
ــــــــــــــــــــــــــــــــــــــ
علي هوه الحاكم       علي شيخ وعالم
علي ملك الدايم       علي منه القائم

علي نتباهه بخلفته بالحسن واحسينه
علي والماواله حيدر يعني ناقص دينه
علي شمس الله الچبيره الـــمحّد ايغطيهه
علي عالي وعلي هوّه ابصايته امعلينه

علي مولا علي         علي مولا علي
ــــــــــــــــــــــــــــــــــــــ
مو أخير الاول          حاضر ومستقبل
آيه ما تتأوّل          وطلّسم ما ينحل

خطبه عنده ابلايه باء ولا الف حاچيهه
ارتجالاً ما امحضّر لا گبل قاريهه
وخطبه عنده الشقشقيه بالنهج موجوده
وباختصار الدنيه وحشه وهوه الامحليهه

علي مولا علي         علي مولا علي
ــــــــــــــــــــــــــــــــــــــ
علي يحيي الموته         الله يحچـي بصوته
سافر اللاهوته        ماغفه ابتابوته

علي ربي والعواذل خلهم ايكفروني
انه احبّه مو اعبده غلط لتفهموني
عالصراط ابكيفه يعزل شيعته امن اعدائه
وانه كاتب بالوصيه بالنجف دفنوني

علي مولا علي         علي مولا علي
ــــــــــــــــــــــــــــــــــــــ
علي لا منعوفه      كعبــه واحنه انطوفه
الليله اجينه انشوفه      ابمسجدچ يالكوفه

گالو ابسيف الـمُرادي علي طبرو راسه
وعله زينب ظل يوصي بالگمــــر عبّاسه
واحنه خانگنه وداعه والهوه ابلا معنه
بالله ياموت اعله مهلك لاتبوگ انفاسه

علي مولا علي         علي مولا علي

محمد الجماسي**#اللهم_عجل_لوليك_الفرج

نزله....  لأستشهاد امير المؤمنين علي عليه السلام

حگها زينب لا تگول شبيهه
للگبر شالوا نعش واليهه
.......

حگها زينب لو دمعها دم جرَه
الليله فاركها ابوها حيدره
راح ابوها يندفن تحت الثره
للمناحه والعَزَه مخلّيهه
........

حگها زينب لو تون ليل وصبح
جرح ابوها يختلف عن كل جرح
وين مثل المرتضى والد يصح
مثل روحه واكثر يباريهه
.......

مو شخص عادي وتهون مصيبته
حيدر الكرار زينب فگدته
نفس اوصاف الرسول وهيبته
بالمصايب حيدر يواسيهه
.......

انشال نعش المرتضى عنها ورحل
وزينب تمنّت يوافيها الاجل
حتى ويّاه تندفن نفس المحل
ولا تظل بجروحها التاذيهه
......

الدار ظلمه بلا ابو ما تنسكن
حگها زينب لو تظل تبچي وتون
عكب ابوها تعيش آلام وحزن
والدهر يافاجعه يراويهه
.....

حسين واساها ويصبّرها الحسن
عيونها مو من دمع من دم بچن
تصيح ميته ولا اظل ساعه عسن
عكب ابوي جروحي من يشفيهه
......

ويلي ما تمم علي فرض الصيام
العيد اجاني وعالفرح بعده السلام
واليتامه تنوح يم باب الامام
من يعايدها بعد حاميهه

سيد زيد الفحام
_______

فزاعيات  توديع الامام علي عليه السلام

ينور العين مو وكتك يوالينه
يبويه فراك وجهك حيل ياذينه
انته عيون زينب ياعلي والشوف
هاي الدنيه ظلمه صارت علينه

((  الدنيه والبيه   ظلمه عليك بويه ))
__

كلبي عليك كلبي ولابطل ونه
وحشه الدار بعدك ياابو الضنه
اضلم كلشي صاير ياعلي بفركاك
انته الروح ليش تروح منعدنه

((  موحش علينه    الدار خلاف وجهك  ))
____

ملائكة السمه والعرش كله تنوح
يمك ياعلي يابويه يالمطروح
يالمفتوح راسك فتحت القرأان
ركن الدين حيدر عمت عيني تروح

((  طاح والينه   ركن الدين حيدر  ))
__

اون والروح مكسوره يبعد الحيل
يالمبخوت بعدك شفت انه الويل
رافكني الحزن والهضم من صباي
يبويه الدمع حار عللخدود يسيل

((  علي يابويه    حدب ظهري بعدك  ))
___

چبير البيت طايح هاي موبالهون
موش دموع نبجي عليك كون عيون
مو وكت الموادع ياشريج الروح
يتيمه ياعلي زينب تضل شلون

((  والحزن بيه   زينب ياابو زينب  ))
_
#وداد #البخاتري

استشهاد الامام علي ع

غمض اعيونك يحيدر  لا تهمك كربله
بشارب العباس صارت  بويه هاي العايله

انته لختاريته كافل  والنعم من الگمر
بالمهد بايس چفوفه  بيه ينشد الظهر
لا تفكر بينه نعطش  هوه ابو فاضل نهر
دللتني وراح اضلن   ويه اخوي امدلله

امودع ابالله يحيدر   ما يطر گلبي الالم
سلمت عباس سيفك   وانته لنطيته العلم
لابس الريشات اخويه  منهو يحرگلي الخيم
الكافلي كلشي نطيته  شيمتك والمرجله

بويه لا ينخطف لونك  ما اضل امحيره
الحالي لا تنزل دمعتك  ما اروح اميسره
حل وداعك بس عفتلي  يمي سبع الگنطره
چا بعد دمعك يغالي  گلي ليش اتنزله

للمتون اتصد عيونك  بيويه لا ما انضرب
الينوي يرفع سوطه يمي  يبدي ناقوس الحرب
مثل ما طبيت خيبر  هيچي عباسي يطب
والله طف الغاضريه  اهناك راح ايزلزله

اله بستئذانك انته  ايمر علي چان الهوه
ابعمره ما شايف خيالي يبو الحسنين الضوه
يدنه منهو الراد مني وعندي شيال اللوه
انهضم لتضن يحيدر  شيل هاي المسئله

يحمي خدري ابو فاضل  يالحميت انته النبي
لا تگول العيله باچر  بويه بالطف تنسبي
ترفرف الرايه علينه  يعني محميه العبي
گمر هاشم كله غيره  وهاي مشهوده اله

اتصد عله حسين اوريده  وغرگت عيونك دمع
لا شمر يوصله يگدر  ولا يطحنوله ضلع
اله كافل خدري بالطف  چفه منه ينگطع
ينغدر لازم كفيلي  وينزل اعلينه البله

الشاعر اياد الديراوي

العرش ينـــــزف دمه    من رحل حامي الحمه
وصاحت املاك السمه            واعلياه

شال عن اهله الصميده  مرتحل عن بيته
غمض اعيونه بوداعه   امعصب ابجفيته
منعصر كلبه اعله ولده  ياكـــــبر حنيته
فركت احبابــــه وعياله  حيـــدره مـاذيته
مات واعيونه تصب       موقف الوالد صعب
واهله تبجي أمألمه                 وا علياه

الليله محراب الكرامه  اتهدمــــت اركانه
الليله دين الله وعروته  اتفصـــمت بيبانه
ومسجد الكوفه وجلاله  اتفطرت حيطانه
اسبل ايدينه وتوجــــه   للأجل مــــولانه
ودع الليلــــه الاهل         طاوع بروحه الأجل
الليله كلـــهه اميتمه               وا علياه

قرر الوالي يســـــــــافر   مرتحـــل هالساعه
التمت العيله اعله نعشه    اتهــــــيأت لوداعه
واحد ايقبلـــه بلحيـــــته    وذاكــه فك اذراعه
وهذا الي ايكله اعله هونك   يلي حلوه اطباعه
كلهه ملتمه وتون              تنعه وتنادي بحزن
ريت العيون اتعمه                  وا علياه

واحد ايكله يبــــــويه  كون يومك بعده
منهو يوكف بالكلافه  لو طحتلي ابشده
يالمكانك بويه خالي  كلــي منهو ايسده
نكطع الضنه يغالي   لو إلك هـــم رده
يكله الدموع البجن            ذني بويه للحسن
والأحزان امخيــمه              وا علياه

واحد يكســــر الخواطر   فاض منه المدمع
ايحبب ابرجل الصميده  والكَــــــلب يتكطع
يالحنين ايكلـــــــه بويه   روحي هالتتوجـع
صدك رايح هاي هـــيه  وبعــــد لاماترجع
آنه الحســـــين وعـــلي    حزنــــــــي لاماينجلي
كلبي جن ضاك الضمه             وا علياه

واليتيمه التبجي يمه   اتنوح تنعه بحضنه
شابكه اجنازة ابوهه   اشلون تبعــــد عنه
من تون زينب تكله    وين شـــــــايل منه
لاتيتمنـــــــــــــي تكله   يبو حسين اتمنه
خفف اعلــــــيه الألم           حيلي يابويه انهدم
بداعت امــي فاطمه               وا علياه

أبو علي الركابي

ميمر
(( ابليلة قدر ))

أبـلـيـلـة قَــدر         وكـت الـفـجـر
راسـه انـطـبر          فــارس بـــدر

لمصابه يهتف جبريل اركان السمه هزاهه

-----------------------------------------------*

جـن وانـس للمـرتـضـى مـفـجـوعـه
مـا ضـل مـلـك ما نـزلاهـه ادمـوعـه
حـگـه الـينـوح ابحسرتـه وابـلـوعـه

تـنـعـه الـسـمـه       الـحـامـي الحمه
وعـيـن الـوحي       ســالــت دمــه

چـف المرادي بأحقـاد هـامت علي صاباهه

--------------------------------------------*

الـلـيـلـه السمـاء اتـحـوّلـت تـعـزيّـه
اتـشـاركـت وي الــكــرة الارضـيــه
نـصـبـن منــاحه الـحيـدره ولطميّه

الـكـون ارتـجـن      يا ابـو الـحـسـن
بـأرض وسـمـه        الـنـوح انـعـلـن

شيبت امـام الكونين حمـرة أوتسيل ادماهه

--------------------------------------------*

صـوت المـلائـك مـا سـكـت هالليلـه
طـاح الصمـيـدة والـسـمـه تـنـعـيـلـه
تـبـچـيلـه مـعـذوره الـخـلگ تبچيلـه

هـذا الــولــي           حـيـدر عـلـي
لجـلـه الفلـك           دمـعـه ايـهلـي

نصبت عـزيـه الاملاك وناح العرش وياهه

-------------------------------------------*

حامي الـحـمـيـه وهـامـتـه مهشومـه
خـلـي الـيـلـوم ابــرآحـتــه وبـلـومـه
مـعلـومـه هـاي وتوصل الـمـعـلـومـه

انـطـالـب تـره         ابـدم حـيـدره
نـنـسـى ابـد          هــذا الــجــره

تبقى المدامع يا ناس الحيدر علي مجراهه

---------------------------------------------*

حـيـدر عـلـي مـا تـمـماهـه صيـامـه
انـشـلـت ايــده الـصوّبــه بـالــهـامـه
ايـتـامـه خـلانـه ابـغـيـابـه ايـتـامـه

كـلـش صـعـب         جـرح الـگـلـب
دمـــه نـــزف          لـيـث الـحـرب

تجري المدامع بـدمـوم كـل شيعته خلاهه

----------------------------------------------*

ثــابـت عـهــدنــه ولـلأبــد وفـايّــه
نـنصـب عـزيـه الـحيـدره وقـرايـه
هاي الـعـقيـده وما نـزل بـحـچايـه

يـبـقـه الـعـهـد          مـنـزل ابــد
طـول الـعـمـر          هـل مـعـتـقـد

كلمتنه وحده وللموت الحامي الحمه انطيناهه

--------------------------------------------*

خادم امير المؤمنين ((ع))
✍الشاعر رعد الجريخي

وي زينب ايتامك بچو
لاتمـشي وي الي مشو  
لاتجفي گـــلبي ادخيلك
من حيلي فدوه الحيلك

حيلي رك وي الفجر   للباب اگومن ونهطر
شبيهه روحي انشدهت وكلشي صفن
غير الحگ عالــدمع    چفي عالگصه انطبع
من شفت شيباته بالدم نگــــــــــــطن
هايبويه عيوني ماشبعن حــــنينك
طشرو عشگ امي ونباگت سنينك
واصل الدم يابو زينب لحد عينك
نشفته بيدي وماگــــطع
دمك مسحته وهم رجع
گـــــابلتك وابچــــيلك
لاتجفي گلبي ادخيلك

بيك فك ريجه الصبح   روحك ترافه وتنجرح
والبگه من عـمرك ابعمر اليتيم
مره دافــــــن فاطمه    ومره كل راسك دمه
مرّتين اتردلي وتشبعني ضيم
امسك امــن الموت مو من الكلام
بويه اذا تمشي عليه اقره السلام
الباب والمــــحراب ناتجهن خيام
صار العـــــمر سفرة ألم
يوم بسبي ويوم بخيم
اسمع چلمتي اشكيلك
لاتجفي گلبي ادخيلك

ساكت وعينك حچت    اختنگ كلما بچت
ضام چلمة بويه وين اتوسلك
بويه يالكـــــــلك دفو   تدري بيتامك غفو
لو بعدهم كاضـــين الباب الك
گـــلبي كسرين انكسر والدنيا تفتر
توها راحت فاطمه ويلحگها حيدر
دللـــــــوني اثنينهم ياگـلبي شصبر
كلما اچــــذبها العيون
ارجع وگولن مايجون
كلــــهم طفو وي ليلك
لاتجفي گلبي ادخيلك

اليفگد امن الدنيا أب   حگه لو عــــمره نحب
اه شيكض گــلبه من يشتاك اله
ليله يتگــــــلب سهر    اجفونه يعصرهن عصر
كل صبح ماجاب ابوه بي لاهله
الله لاينطيك يالــــــــــــجارح حنانه
روحي امانه وخــــــذ ياربي الامانه
البيت فاهي ابلا علي وخالي مچانه
شماســولف بطاري علي
الحايط يرد صوتي الي
رايح ترا خليــــــــــلك
لاتجفي گلبي ادخيلك

شابگــه اثيابك وون     نايم اگبالي واحن
هسه يگعد هسه يشفه گلبي رف
يطلع ويدخل عليك   الحسن مفجوع بيك
هازينب جـــــــرحه مابطل نزف
شهگ شهگه وضل يأشرلي ابيمينه
گلي چلمة وغمضاها اگــبالي عينه
شدي حيلچ بويه زينــب للضعينه
شلت ايده بس مابي نفس
والبيت بالبـــــويه انترس
باوعلي انه اومــــيلك
لاتجفي گلبي ادخيلك

شاكر الصيمري