يا ربي اشهد بضعة محمد
اود كلمن يودها
واعادي الي يضدها
_________________________

ربي أشهد عليّه آنه اهوى الزچيه
ابقه حد المنيه بيها هايم

هيّه نبضة فؤادي هيّه هيّه مرادي
الليله اهوس وانادي هلا ابفاطم

اهلن يروح المصطفى يا ريحة الجنه
اهلن يكوثر يا نبع ما ينشبع منه

نور الجلاله ابوجهچ تلاله
يفردوس او وردها
اعادي الي يضدها
_________________________

انولدت او شع ضواها يسبحان البراها
اشمس صارت وراها والگمر تاه

بيها حط كل بهائه بيها ضوّه سمائه
ربي او كبريائه بيها خلاه

مالـِكَـتي يوم الحشر سلطانه عل وادم
اكبر ملائكة السمه يمها وگف خادم

كلشي بديها منها او اليها
نعم هيه او ولدها
اعادي الي يضدها
_________________________

الها اقدم ولائي وايتعله ندائي
خادم الحد فنائي يمچ آني
گلبي بسمچ نشيده ابعيدچ ايخط قصيده
بيها انتي الوحيده ماكو ثاني

او هاذي اصابيعي اوج في مولدج شمعه
او صوتي ابتهاني يعتلي حته السمه اتسمعه

امبارك يزهرا امبارك يزهرا
اضل للصبح اردها
اعادي الي يضدها
_________________________

يميلادچ فرحنه يا شمسنه او صبحنه
يلي قاصر مدحنه عنچ اهواي

ما يكفـّي شِعرنه لو دواوين كتبنه
يا أملنه . يا امنه يا طعم ماي

يامن ابعيدچ عيّدت اهل السمه كلها
حور او ملائك والرسل آخرها و اولها

افلاك او كواكب جو ابمواكب
شغف هل ليله عدها
اعادي الي يضدها
_________________________

قرة اعيون ابيها سور متنزله بيها
ما كو الها شبيها كوثر الله

وين مريم تِصلها ؟ ولا ام موسى الها
او لا خديجه اوفضلها حاشا والله

فاطمه الاولى عل خلگ بارض وسمه اتلالي
هل بيها دنيا او آخره متعلگه آمالي

وابهل مسيه ارسل تحيه
تهاني من عبدها
اعادي الي يضدها
_________________________

ابو فاطمة الطائي

اعادة نشر
لمولد سيدتي ومولاتي فاطمة الزهراء عليها السلام .

صلاوات صلاوات على الزچيه فاطمه
____________________________

هالليله ميلاد الضوه والفرحه ما توسعنه
كوثر محمد اشرقت للدنيا اصبح معنى
لولا ضياء أم الحسن چا بل مهالك ضعنه

هيه نوراََ . . وسروراََ . وطهوراََ .. للگلب
هي نبعه .. هي شمعه .. هي رِفعه الكل محب

مقامات مقامات يعرفها بس رب السمه
صلاوات صلاوات على الزچيه فاطمه
____________________________

بزغت مثل وجه الشمس والدنيا ضوت بيها
خضّر دربها بالهلا او رب السما امحييها
مولدها چن زفة عرس ورد او شمع يضويها

ابحضن ابوها .. من لگوها .. شبهوها بالضوه
ماي صافي .. وجه دافي .. لليوافي ..چن دوه

ينادون ينادون مبروك عيد الغانمه
صلاوات صلاوات على الزچيه فاطمه
____________________________

ابّيت النبوه ازهرت واتعطرت اركانه
قرآن چنها اتنزلت يمدحها ضل قرآنه
كوثر يسميها الوحي بعناد كل عدوانه

هيه آيه .. وحكايه .. وهدايه .. للبشر
هيه رحمه .. هيه نعمه .. هيه نسمه بالسَحر

عطر هيل عطر هيل بيها العقيده سالمه
صلاوات صلاوات على الزچيه فاطمه
____________________________

محلاه يا هذا الفرح يجمع شمل خدامچ
امبارك يزهره مولدج يسعد جميع ايامچ
ارواح جبنه مو ورد يا فاطمه گدامچ

يا فرحنه .. يا املنه .. يا وطنه النعشگه
يا ضوانه .. يا دوانه .. يا هوانه النشهگه

عبيدچ عبيدچ وانتي الاميره الحاكمه
صلاوات صلاوات على الزچيه فاطمه
____________________________

ليچ التهاني من گلب مابي دغش مولاتي
رايات عليت ابفرح رفّت عله اولاياتي
واقرالچ ابيات الفرح وايهلهلن ابياتي

ذوله ربعي .. كلها تدعي .. واتتي سمعي هل دعا
يا أملنه .. ذا حفلنه ... قِبله منه .. اجمعا

بلياچ بلياچ منشوف حسن الخاتمه
صلاوات صلاوات على الزچيه فاطمه
____________________________

ليلة ولادة كوثرك يا ربي ليلك طوله
حد مطلع الفجر تضل صفگتنه والهلهوله
والما يعجبه هل فرح كون ابسقر گلوله

هل شعائر .. والمنابر .. كلشي ساهر للفجر
ما تعبنه .. اشما نشدنه .. هيه عدنه ابهل عمر

يزهراء يزهراء انتي فرحتي الدايمه
صلاوات صلاوات على الزچيه فاطمه
____________________________

أبو فاطمة الطائي

لميلاد سيدتي الزهراء عليها السلام

من الله هديه ميلاد الزچيه
مبروك يا شيعة علي ميلاد الزچيه
_________________________

رب السماء اعلينه منً وانطانه دُرّه
مامش مثلها بل ارض لا بل مجره
حوراء أنسية طبع سماها زهره
الماس او زبرجد ينحسب من عدها شذره

جل الي براها والطاها هداها
والحور گلها هلهلي ميلاد الزچيه
_________________________

كامل حسنها بل وصف ما بيها لوله
لا مريم او لا آسيا زهرتنه الاولى
قرآن چنها عل نبي ابليلة نزوله
ميلادها ايفرح الگلب كل هم يزوله

ابمولدها انتغنه جنه الزهره جنه
همي بسمها ينجلي ميلاد الزچيه
_________________________

ابميلادها انعيش الفخر وانعلي الراس
هيبه او بهاء امجلله ما تشبه الناس
متروسه حنيه او وفه والطاف واحساس
الازهار منها تستحي والجوري والياس

فرحتنه الچبيره زهرتنه الأميره
موت ابحقد يا عاذلي ميلاد الزچيه
_________________________

نزلت مثل ماي المطر مولدها افراح
او يا صباح البيه هلت احلى مصباح
بل مهد ويشمها ابوها . او بل فخر صاح :
بعد عيني أم ابوها اتطيب الاجراح

تفاحه او يشمها والصدره يضمها
وداها المعبود الي ميلاد الزچيه
_________________________

بل مهد يزهر ضواها مثل الاقمار
فاطمه الـ لولاها ابدن ما فلك دار
ابعيدها الليله نغني او ننثر ازهار
او نقرالها ابهاذه الحفل هوسات و اشعار

وانردد سويه صلوات او تحيه
وانبارك الطاها او علي ميلاد الزچيه
_________________________

ابو فاطمة الطائي

عاهدناچ يم البنين ماننساچ يم البنين
_______________________________

نقسم ابدمعة عيونچ يا چبيرتنا
اسمچ ايضل بل شعائر وابعقيدتنا
اعگال انتي وانتي كشخه وانتي هيبتنا
يلي علّمتينه أَنَّ الخدمه عِزتنا

يامن دمعتچ خاليه امن الدغش
او مرفوع گدرچ عد أيمه اثنعش
چن ماي اسمچ ليه وكت العطش

يا نبراس للمخلصين ماننساچ يم البنين
_______________________________

هل وفه منچ تعلم والصبر دارس
وغده للتاريخ اسمچ بل فخر تارس
احنه خدام اعله دربچ صرنه چن عابس
كل فرد من عدنه امسه ابحبچ اينافس

ام البنين اويا علو المنزله
عالي مقامچ يا بشر يوصله
ام الاقمار الخالده ابكربلا

اسمچ لاح بالخاففين ماننساچ يم البنين
_______________________________

عهد دربچ ما نعوفه او لا نمل منه
للحسين الدمعه تبقه او باقيه الونه
ابدرب هل خدمه الشريفه لو تگطعنه
وحگ عباس ابو فاضل ما نزل عنه

هاي الخلايق كلمن او مرجعه
واحنه عهدنه بالدم انوقعه
أم البنين . المنهجچ نتبعه

وبالدماء اموقعين ماننساچ يم البنين
_______________________________

والتبع دربچ تعلّه والفخر ناله
ايعيش بالدنيا مهاب او شانه يتعاله
او لو دنت ساعة منيته او گربت آجاله
ايموت مرتاح ابرهاوه او منتعش باله

واحسابه يوم اليبتدي ابحفرته
او لمن ينشدونه على دنيته
تشغعه ام الاربعه او دمعته

ميحاسبوه لمن تجين ماننساچ يم البنين
_______________________________

انتي منهج للخدامه وانتي القدوه
دون ابو السجاد گلتي الدنيا ماتسوه
فدوه روحي او فدوه عيني والولد فدوه
كلشي يرخص في سبيله . الغالي بس هوه

هو العزيز الغيره ابد ما ردت
الوطن هوه من هجرني ضعت
چم موته يوم الما أشوفه منت

هو الحبيب هو الحنين ماننساچ يم البنين
_______________________________

عهد يام عباس يبقه هل ذكر دايم
لحد ما يرضه ابو سكنه او تقتنع فاطم
خدمته انضل انتوارث خادم الخادم
لحد ما يمسح دمعنه المهدي القائم

او تبقين انتي للخدم مدرسه
الهاي المواكب والعزه امأسسه
اليوم الحشر اسمچ فلا ينّسه
ننساه حيف لا والحسين ماننساچ يم البنين
_______________________________

ابو فاطمة الطائي

قصّة روح كلها اجروح
بـِچت الها العوالم
أُم عباس عن عباس
انشدت كل الفواطم
________

ما أنسى لوعة فاجده منّ اَگـبَلت بالدمعه
عل باب نشدنها منو ؟ ما حچت گامت تنعه
ذيچ النعاوي اليوجعن لو صخر هم اتصدعه
يا زينب آنه ام الِولِد الراحو ولا من رجعه

انتي اهنا ؟ زينب ها
أشو ضعتي عليه
ارسومچ وين؟ خدرچ وين ؟
اشخبر بدر الهواشم ؟
________

گالت تنشديني على ارسومي اشعجب ما هنه
اليسمع ابو اسكينه يون گليلي شيضل منه ؟
مو زين باقي لي گلب او زين الهوه اشتمنه
وآنه الي شفته اعله الثره خيل العده ايگلبنه

ابهاي العين شفت احسين
يون . واشفافه تنزف
أيأشر بيد ماي ايريد
او شمر عد صدره جاثم
________

انذهلت أم الاربعه او صاحت اويلاه يمه
الحسين عطشان انذبح !! والخيل طحنت عظمه !!
زينب انشدچ عل گمر والحچي مابي ضمه
خو ما توانه ابكربلا او بوجوده هتكو حرمه ؟

صاحت حيف لو بل طيف
ولا وصلو خيامي
لاچن مات والخيمات
ألوف اعليها هاجم
________

يم البنين اشيوصفه واشكثر بي محنه
عباس ينطي ارويحته للحرم لو ينخنه
عباس حصني ابكربلا او بل معركه عسكرنه
عباس عگبه اتمرمت عزنه او تفرهد عزنه

والعز راح لمن طاح
صرت عدهم أسيره
والچتال صال او جال
ابسياطه او بل شتايم
________

حنت او ونت واگعدت ام البنين ابسدها
امدنگه يم زينب تون خجلانه چن من عدها
انطيتكم بس اربعه او تلطم وجهها او خدها
لو ادري عشره خلفت كلمن جِربته اوحدها

چان الماي صار اهواي
ولا تعطش سكينه
چان احسين ردلي الحين
واشوفه اگبالي سالم
________

اتگللها وفيتي او كفو منچ او من ابنينچ
لاكن المگدر جره عينني وآنه اعينچ
ابچي اعله عباسي ابهظم وانتي انعي اعله حسينچ
خل ينعمن من الدمع يا يمه عيني او عينچ

اليوم الدين تجري العين
من الشفناه وراهم
ون او نوح حد منروح
الحشرنه ابهل مضالم
________

ابو فاطمة الطائي

تگول ام البنين

تِنام المِسعده يمها .......... وِلِدها
وانه المتوذر اعله الشط .. وَلدها
اويلي والاشد واكلف .... والادهى
راسه اعله الرمح جابوه اليه ......

ابيات ابوذيه لشهادة الامام العسكري عليه السلام

يمن لولاك هاذه الفلك ... مادار
ويمن مثلك جفن يعگوب .. مادار
سامره اصبحتلك جرح .... ما دار مو دار
يمهدي او بيها شفت اچم رزيه ؟؟.

من سم العده ؟ من سيف ؟ ... من حر ؟؟
تنوح . او مثلك ابهل ناس ... من حار ؟
الك في كربلا مگطوع .......... منحر
وبرض سامره الك چبده فريّه .....
_________________________

العسكري عليه السلام

ابعيني اعليه ما ضلت ... وشاله
يويلي السم نخر عظمه ... وشاله
واجاه الغسله . او لفّه ... وشاله
ماخلوه اتلاثه اعله الوطيه ....

الدهر عجداته أيسنه ... نحلها
خله الشيعه هل ليله ....نوح الها
سم العسكري اعظامه ....نحلها
او مات ابهظم مثل امه الزچيه

الدهر للعسكري يا ناس ... ما طاب
تسمم والچبد لليوم ....... ما طاب
لچن العدو وسط الدار ... ما طاب
ولا ماخذ اخت منه سبيه ....

ابو فاطمة الطائي

يا صاحب الزمان يامولاي

الگلب نار اشتعل
خلص دمع المُقل
يثار الله العجل ابوك اتسمم
__________________________

ننادي والگلب نار
يثار الله او وعيده
ترد مغتاض يايوم
تصيح الثار اريده
ثار الچبده مسموم
بل اچفوف العنيده

ترد الها
تزلزلها
تخلي الدنيا ترتج

تروط الگاع تحتك
تصيح ادخيل بختك

يبن طاها
تولاها
يمينك الله علاها

اخذ حگك مُربّع
على كلشي تربع

يسر الله او بهائه
جلاله او كبربائه
الوجود الك ندائه يقائد اعظم
________________________

العجل مولاي مولاي
تعال ابعينك انظر
تعال او شوف الهموم
علينه اغيوم تمطر
مصايب تشده البال
او للدلال تفطر

يوالينه
تره اغدينه
صگر مكسور جنحه

دوانه بيدك انت
يوجه الله او كشخته

منو النه
يخلصنه
يبلسمنه يواهسنه
الهجر طول يغالي
انولينه ابلايه والي

نواظرنه تِـصب
دمعها امن الگلب
تعال امن الغرب ابعباتك نلتم
__________________________

الك چم ثار مولاي
يتاني الطلعه ويعد
جمعه جمعه عل باب
چم معصوم يگعد
يقره الندبه بدموع
ينشدك يمته وترد

امانيها
تشافيها
جروح البيها تدي

چم معصوم ينطر
ترد الكسره تجبر

يهيبتنا
يشيمتنه
تعال او شوف لچمتنه

يمته ابجيش تزحف
او بيدك سيف مرهف

يعدل كل عوج
يفرح هل مهج
يحل عيد الفرج او يصير البلسم
__________________________

من الكعبه يايوم
خبر عاجل يصلنه
او نشاهد عج الخيول
او نصيح اهنا فرجنه
تلفي لارض الاعراگ
ايتلگونك اهلنه

خواطرها
نواظرها
تصب ادموع فرحه

زحف عل روس نِقدم
على شخصك نسلّم

نذل الها
نقبلها
چفك ننحني الها

نقدم لك مناحر
يكحلة هل نواظر

تمر بينه
تودينه
لارض سامره تحدينه

تزور العسكري ابهم
تصيح اهنا تسمم

على گبره تون
عزه اتقيم ابحزن
تون . تبچي . تحن عليه تتألم
__________________________

نطوي اصفاح الاعتاب
او نار الهجر تطفه
انتسامر ليلنه اوياك
او جروح البينه تشفه
نسولفلك على الراح
اشفنه ايام كلفه

على العبره
على الحسره
عن الطف والمها

نگلك بينه غصه
او عله شط عدنه قصه

تچوينه
تأذينه
هجر عباس لسكينه

المشه الصوب النهر
او كسر منها الظهر
اشبعت ون او قهر عگب الموزم
__________________________

او تگوم او تاخذ الثار
كل احگوگ هاشم
تبدي ابحرگة الباب
او كسر اضلوع فاطم
المات ابسم . واذا سيف
عدوه اتجيبه نادم

تحاكمها
تصلبها
علوج اهل السقيفه

واحد واحد اترد
لجل احسابه يگعد

خليفتها
اميتها
بني العباس جَمعتها

للاحساب اتحظر
او لهم تصبح سقر
خلودن او مقر قرارك محكم
__________________________

ابو فاطمة الطائي

لسان حال سيدي ومولاي الامام المهدي المنتظر مع والده الامام العسكري صلوات الله عليهما

بويه تدري .. آنه عايش بس جرح
هاذه عمري .. ابكل مغربيه انذبح
يل حسن گوم        شوف الهموم
______

يل حنين       بس أنين
عمري گّضّيته مصيبه ابسد مصيبه
ارد اجيك       اشكي ليك
بويه روحي ابهل خلگ امست غريبه

أنه اليبچي صباح او ليل  أنه الدمعاته تهمل دم
أنا المن دفنتك لليوم  عايش وحدي اتألم

من عفتني .. ما نامت ساعه ابرغد
مرمرتني .. دنيتي او گلبي انمرد
حيلي مهدوم        شوف الهموم
______

لالي دار        لا قرار
عايش الغربه او سلوتي بس مدامع

وين اروح         بس جروح
روحي خلصت من حزنها والمواجع

علي مرن هموم اثگال غربه . او غيبه عن ربعي
انا المحد يون وياه گاعد وحّدي او انعي

ابچي وحدي .. لا گرابه او لا وطن
كلها ضدي .. صرت دنيا امن المحن
گلبي مالوم               شوف الهموم
______

ليك اجيت          واعتنيت
هل مسيه واعله گبرك اشكي همي

امن التّراب         فكلي باب
بويه ارد اگعدلي ساعه وانت يمي

اسولفلك عله الشوغات واراويك الجفن الاحمر
مصاب اتلطعش معصوم ضلت بالگلب تسعر

چم رزيه ...  بويه بعيوني شفت
امن الزچيه .. لحد ما انت طحت
انعه كل يوم         شوف الهموم
______

چم عذاب         چم مصاب
شلن احوالي او همت بين البراري
اعله القبور       بس ادور
او دمعي كل ساعه ابكتر يابويه جاري

نوب اگصد عليك او نوب للطف امشي واتعثر
آنه او أمي الزهراء نتگابل عله المنحر

جمعه جمعه .. اهناك موعدنه نجي
يَمه ننعه .. لحد ما نشبع بچي
ابسود الهدوم         شوف الهموم
______

او للكفيل        بل عويل
انروح يمه كلمن ابونّه او نحيبه

عمنه ضاع        ابلا وداع
راح والحره اصبحت عگبه غريبه

دمع الي جراه يعگوب طول اسنين هجرانه
منه ازيد بچت زينب من راووها ذرعانه

يا ألمها .. يوم فارگها الگمر
يا هظمها .. والله يكسر للظهر
ضلت اتحوم           شوف الهموم
______

هل سنين          ابهل حنين
مره ابچي امصابك او مره اعله زينب

ما غفيت      او لا هديت
بويه من عاشور گلبي او راسي شيب

الشايف ابو مسموم  واحسين انسحگ صدره
هم يرتاح؟  هم اينام؟  هم ايفارگ العبره ؟

مالي راحه ..  ولا تهنيت ابعذب
بس مناحه .. عله الخدر المنسلب
اهنا يمسموم        شوف الهموم
______

ابو فاطمة الطائي

موشح الليله العاشره

الليلة آخر ليله مضويه الخيام
الليله اشِبعن شوف من وجه الامام
___________________________

الليله ملتمات ربّات الخدور
ابخيمة الحره او گلبهن ضل يفور
كلمن ابكتر الولي گامت تدور
الليله طاب النوح ما طاب المنام
__________________________

زينب او سكنه او رقيه نايحات
واعله ابو السجاد كلهن فازعات
يمه وگعتهن مثل وگعة ممات
فرفحن عنده شبه طير الحمام
__________________________

هاي بيده چلّبت واتقبله
هاي شابگته او دمعها تهمله
هاي تنحب يم وليها او تسأله
اشلون بينه لو رحت يبن الكرام
__________________________

زينب العباسها اتدير النظر
اتگله يمي بعدك او ظهري انكسر
اشلون بيه من تطيح اعله النهر
العيش من عگبك عله اعيوني حرام
__________________________

او يم مهد عبدالله ملتويه الرباب
عله ارگبته حبته او شدت حجاب
اتگله باچر عمك ايجيب الشراب
نام نوم العافيه يوليدي نام
__________________________

او ليلى تنظر عله ولد متحيره بيه
ساعه وجهه اتشمه ساعه اتشم اديه
الليل كله ايخر دمعها او تدعي ليه
ربي دونه خل تلوعني السهام
__________________________

او جاسم امه امجابلتّه او ذاهله
گامت اتنازع وديها امسبله
اتگله يمه امنين اجتني بكربلا
هرش گلبي انشلع يابدر التمام
__________________________

ابو فاطمة الطائي