​Issiqxonalarda limon daraxti uchun qanday sharoit zarur?

Davomi. Boshlanishi bu yerda.

Sovuqdan himoya qilish uchun issiqxonalarni 2 yoki 3 qavat qilib selofan plyonka bilan yopiladi. Bu usulni termos usuli deyiladi. Issiqxona bunday yopilganda birinchi va ikkinchi qavatlar orasida 10-20 cm, ikkinchi va uchinchi qavatlar orasida esa 0,5-1,5 cm oraliqda boʻshliq hosil qilinadi. Shunda qishning eng sovuq kunlarida ham koʻp issiqlik sarf qilmasdan limon daraxtlarini sovuqdan asrash mumkin. Chunki tunda tushadigan qirov va sovuq havo birinchi va ikkinchi qavatdan oʻtib, koʻchatlarga yetib kelguncha taʼsiri kamayadi.

Issiqxona ichidagi harorat, namlik va havo normal darajada boʻlishi uchun, sentabr – oktabr oyidagi kuzgi sugʻorishlar miqdorini kamaytirish kerak. Tajribalar shuni koʻrsatadiki limonzorni sentabr oyida ikki marta va oktabr oyining boshlarida, yaʼni plyonka yopishdan 20-25 kun avval bir martagina sugʻorilsa, issiqxona tuprogʻining namligi kam boʻladi (deyarli quruq) va namlik taʼsirida bugʻlanib, tomchi hosil boʻlishi kam hamda havosi tozaroq boʻladi.

Qish kunlarida issiqxona havosini kunduz kunlari quyosh chiqqan paytda yoki havo nisbatan iligan paytda 1-2 soatgina rom va tuynuklarni ochib shamollatib turish kerak boʻladi. Bunda tuynuk va romlar issiqxonaning yuqori qismida boʻlsa sovuq havo kirmaydi, zararli havo va gazlar chiqib ketadi.

Odiljon Yakubov

tayyorladi.

@mirishkoruz

​Issiqxonalarda limon daraxti uchun qanday sharoit zarur?

Boshqa sitrus oʻsimliklar singari limon ham sovuqqa chidamsiz hisoblanadi. Shuning uchun yurtimizda limon yetishtirish uchun maxsus issiqxonalar va transheyalar tashkil qilinib, ularda limon yaxshi oʻsishi va moʻl hosil berishi uchun yetarli boʻlgan ob-havo sharoiti yaratiladi.

Limon mevalari +1+3℃ haroratgacha yaxshi saqlanadi, 0℃ dan past haroratda sovuqdan zararlanadi. – 5℃ dan past haroratda esa novdasi va tanasi yorilib quriydi. Natijada keyingi yilda ildizidan yangitdan chiqadi. Buning oqibatida koʻpgina zarar koʻrilib, 3-4 yil hosil olinmasligiga sabab boʻladi. Shuning uchun issiqxonaning bir nechta joyiga termometr ilib qoʻyish va tez-tez undan xabardor boʻlib turish zarur.

Sovuq olgan mevalar oʻzining foydali xususiyatlarining koʻp qismini yoʻqotadi. Achchiq taʼmga ega boʻlib qoladi va tez orada chirishni boshlaydi. Buning uchun mevalarni iloji boricha noyabr-dekabr oylarida sovuq tushishidan avvalroq issiqxona ichida qoldirmasdan uzib olish kerak. Agarda mevalarni daraxt ustida saqlanadigan boʻlsa +5℃ dan kam boʻlmagan harorat talab qilinadi. Yuqori harorat yaratish uchun esa maxsus isitgichlar zarur boʻladi.

Davomi bor...

Assalomu alaykum!Bogʻdorchilik, dehqonchilik, gulchilik, asalarichilik, xullas, yerdan daromad olish sirlarini oʻrgatuvchi sahifamizga xush kelibsiz.

Maqsadimiz – bilganimizni oʻrgatish, bilmaganimizni oʻrganish. Kanalda siz ham maqolalaringiz, tajribalaringiz bilan qatnasha olasiz. Sifatli, mualliflik huquqiga rioya qilingan materiallar uchun sahifamiz ochiq.