#мулоҳаза

Бугун телеграмда канал очганимга бир йил тўлибди. Канал очишдан мақсад одамларни яхшилик ва яхшиликка далолат қилиш эди. Бугунги кунгача каналга 500га яқин ҳар хил мавзудаги пост (#мулоҳаза, #учрашув, #парча, #мақола)ларни жойлабман. Каналда қолиб, мени қўллаб келаётганларга раҳмат айтаман. Бу постлар сабаб кимдир яхшилик топса, умид қиламанки бунда сизнинг ҳам ҳиссангиз бўлади...

@abdulkarim_hasan

#мулоҳаза

Мақсад

11 ёшли боланинг қўл-оёқлари қийшайиб кетгани учун ўзига бўйсунмас ва мустақил юра олмас экан. Уни отаси кўтариб юрибди. Сафда ўтирганимизда боланинг қўли ногаҳон менга тегиб кетди. Бола менга қараб "кечирасиз" деб қўйди. Мен унинг бошини силаб, ҳечқиси йўқ деб қўйдим. Шу аҳволда бўлишига қарамай истараси иссиқ бу бола хижолат бўлди. Бироз у билан гаплашдим. У лотин, кирил алифбосида ҳам китоб ўқий оларкан. Кўп китоб ўқишга қизиқаркан. Мен буни билганимдан кейин ташқаридаги китоб дўкони олдида ота-болани кутиб туришимни айтдим. Отаси хижолат бўлди. Лекин, мен уларни албатта кутиб туришим ҳақида айтдим. Китоб дўкони олдида учрашиб, унга иккита-учта китоб олиб бердим. Улар орасида "Қандай қилиб етук муҳандис бўлиш мумкин" деган китоб ҳам бор эди. Китобга дастхат қўйиб бераётганимда отаси "Машаллоҳ" дейишга тушиб кетди. Отаси ўғли катта бўлганида муҳандис бўлишни орзу қилишини айтиб қолди. Боланинг ўзи ҳам китобни кўриб хурсанд бўлди. Шу аҳволда бўлишига қарамай ўз олдига мақсад қўя олган бу болага нисбатан ҳурматим янада ошди...

@abdulkarim_hasan

#мулоҳаза

Вақт баракаси.

Атрофимизда шундай одамлар борки, тўшакка михланиб қолганига қарамай биздан кўра кўп илм ўрганишади ва амал қилишади. Улар вақт баракаси неъматига эришган одамлардир. Тўрт мучали соғ одамлар борки, ҳеч нимага улгуролмаяпгани ёки вақтини ўтказолмай, зерикиб қолаётгани ҳақида тинмай шикоят қилишади. Ҳа, вақт баракасига эришиш бу катта неъмат экан...

@abdulkarim_hasan

#мулоҳаза

2005 йилда мактабни битирган ўқувчилар ўз устозларига қуйидаги шеърни йўллашибди. Мураббийларини эъзозлаган ўқувчилар иншааллоҳ кам бўлишмайди...

Адо этиб виждоннинг бурчин,
Кўрсатдингиз билимнинг кучин,
Сизга ҳамма - ҳаммаси учун,
Таъзимдамиз устоз, муаллим!

Билим олмоқ динимизда фарз,
Сиздан асло узилмайди қарз,
Жонфидолик - бир соатлик дарс,
Таъзимдамиз устоз, муаллим!

Зар қадрини билган заргарсиз,
Мўъжизасиз, сиз сеҳргарсиз,
Сиз биолог, сиз кимёгарсиз,
Таъзимдамиз устоз, муаллим!

Гўзалликка боғлаб ҳаётни,
Ёдлатдингиз шеъру-баётни,
Ўргандик тил - адабиётни,
Таъзимдамиз устоз, муаллим!

Ранжиманг ҳеч биздан илтимос,
Шўхлигимиз қийнади бироз,
Сиз тарихчи, сиз ҳуқуқшунос,
Таъзимдамиз устоз, муаллим!

Ҳаёт лавҳи эмас битиксиз,
Битикларда мудом етуксиз,
Сиз физиксиз, математиксиз,
Таъзимдамиз устоз, муаллим!

#2005 yil bitiruvchilaridan

@abdulkarim_hasan

#мулоҳаза

Одамзод ўзлигини унутиб, миллий қадриятларидан чекина бошласа, бир пайтлар ота-боболари қадрият деб билган нарсаларни инкор қилиб, унга қарши чиқа бошларкан...

@abdulkarim_hasan

#мулоҳаза

Ҳилол журналининг муҳаррири Шуҳрат ака китобларимга муносабат билдирсалар, эринмасдан қоғозга кўчириб берадилар. Китобларнинг ютуқлари билан бирга, камчиликларини ҳам санаб ўтадилар. Қуйида уларнинг "Виртуал олам ўсмирлари" (Жиноят сари) китобига ёзган ижобий фикрлари:
Асар ютуқлари. Жуда кўп яхши, одамларни ўйлантирадиган мавзулар кўтарилган. Айниқса интернет орқали ўйналадиган ўйинлар, онлайн қимор, келин томондан яхши кийим талаб қиладиган куёвлар каби мавзулар... Китобни ўқиган ўқувчи асар қаҳрамонлари йўл қўйган хатоларни такрорламасликка ҳаракат қилиши аниқ.
Юра даври динозаврлари мультфильмида қиз боланинг бошқа қизни яхши кўриб қолишига оид факт мен учун кутилмаган янгилик бўлди. Очиғи, шок ҳолатига тушиб қолдим. Зеро, бир қарашда динозаврлар мавзуси одамларнинг шахсий муносабатларидан анча йироқ мавзудек кўринади.
Асарнинг яна бир ютуғи – муаллиф ўқувчини Элнур ҳамроҳига айлантириб қўйганида! Элнурнинг қобилиятидан огоҳ бўлган ўқувчи вазият нима ҳақида бораётганини тушунади.
Асар охирларида Элнурнинг тушига кирган воқеалар, яъни унинг хавфсизлик хизмати ходими сифатида ишлаши – муаллифнинг асар давомига (кейинги қисмларига) қўйилган дастлабки қадами бўлса ажабмас...

Каналга уланиш учун: @abdulkarim_hasan

#мулоҳаза

Баъзида ижтимоий тармоқлардаги изоҳларни кўриб ажабланаман. "Яхшиям улар бизни босиб олиб одам...", "Бизларга илм...", "Бизларга маданият олиб келишган...". Лекин, мен яққол айта оламанки мени бобокалонларим шундоқ ҳам маданиятли, илмли ва одоби гўзал одамлар бўлишган...

@abdulkarim_hasan

#парча

Еттинчи давр. Сиз маслаҳат берадиган, тўғри йўл кўрсатадиган “уй пари”си ёшидасиз. Ишдан нафақага чиққансиз, ёшликни қўмсайсиз, ота-онам тирик бўлса эди, дея армон қиласиз. Энди кўп нарсани ўйлаб кўрадиган ва тушунадиган вақтингиз. Аммо... фурсат бой берилган, вақт ортга қайтмайди... Бир пайтлар сизлар учун куйиб-пишган ота-онангизни, бува-бувингизни нафақат тушиндингиз, балки ўрнини эгалладингиз. Нима қилсангиз ҳозирги афсус, армонлар, пушаймонларни чекмаган бўлардингиз? Айниқса ҳудудий, маънавий, ахлоқий, миллий чегаралар деярли амал қилмаётган ҳозирги даврда қандай йўл тутган маъқул?..

@abdulkarim_hasan

#мулоҳаза

Анча олдин қуйидаги постни саҳифамга қўйган эканман. Сал қўполроқ чиққан бўлсада ҳали ҳам долбзарб деб ҳисоблайман. Шанба-якшанба куни «Dream park»да бўлиб ўтадиган китоб кўргазмасига, албатта, вақт ажратиб, фарзанд ва невараларингизни олиб боринг.

"Азизлар, чойхона, кафе ёки бошқа байрам тадбирлари учун вақт ва пул топамиза. Шунингдек болаларга инвестиция қилиш яхши эканлигини ҳам биламиз. Шундай экан болаларимизни китобсевар қилиб тарбиялайлик. Бу ҳозирги вақтда осон эмас. Бунинг учун болаларни кўнгилочар ёки байрам тадбирларидан кўра китоб дўконлари ва кўргазмаларига олиб бориш катта манфаат беради. Улар китобларни ҳилма хиллигини кўриб, китобларни яхши кўришни бошлашади. Китоб ўқиган бола келажакда камида инсонларни бошқаради, тафаккур қиладиган инсон бўлиб камол топади. Китоб ўқимаса ўзи бошқарилувчи бўлиб юраверади. Буни ўзгартириш вақти келди азизлар. Баъзиларимиз китоб ўқиб эплолмадик, энди болаларимизни китоб ўқийдиган қилайлик..."

@abdulkarim_hasan

#мулоҳаза

АНЪАНА
Темур чет элда ўқиб ўша ерда бир неча йил ишлаб ҳам келди. Бўш юрмай деб бир корхонага жойлашди. У ишини қилиб ўтираркан бошлиқ ҳаммани мажлисга чақираётгани ҳақида хабар олди. Бошлиқ мажлисни бошлади:
– Бунақа ишлаб бўлмайди. Биттанг ҳам ишингни билмайсан. Ҳамманг ўзингни ишдан олиб қочасан. Ораларингда ўғри- муттаҳамлар ҳам йўқ эмас...
Бошлиқ бир нечта одамни турғизиб қўйиб, хунук гаплар билан ҳақорат қилиб, ишдан ҳайдаб юборишини ҳам айтди.
Темур чет элда бошқача иш юритиш услубини кўргани учун бу ердагисига кўниколмаётган эди. Бу гапларни эшитиб у ичида:
"Ана энди корхонада катта ўзгаришлар бўлар экан" деб қўйди
Орадан бир ой ўтди. Ҳамма ўз жойида ва иш юритиш ҳам эски услубда кетаверди. Катта ўзгаришни кутган Темур бундан ҳайрон бўлди. Яна бошлиқ ҳаммани мажлисга чақирди. Бошлиқ яна олдинги мажлисдаги гапларини қайтарди. Яна бир нечта одамни ҳақорат ҳам қилди. Тимур бу нарсаларга тушунолмай қолди. У ўз хонасига кирганидан кейин бўлим бошлиғидан сўради:
– Бир нарсани сўрасам майлими?
– Бемалол.
– Ўтган мажлисда бошлиғимиз "Биттанг ҳам ишингни билмайсан", "Ҳамманг ўзингни ишдан олиб қочасан", "Ораларингда ўғри- муттаҳамлар ҳам йўқ эмас" деб айтганди. Яна баъзи ишчиларни ҳақорат ҳам қилганди. Мен бир нарсага тушунмаяпман. Бошлиқ ишчиларни қанақалигини яхши билар экан, нега уларни ишдан бўшатиб юбормайди? Нега уларни ўрнига ишини яхши биладиган ходимларни олмайди?
Бўлим бошлиғи мийиғида кулиб қўйиб, деди:
– Яна озгина ишлаганингдан кейин бунга кўникиб кетасан. Мен ҳам бошида тушунмаган эдим. Бу анъана олдинги бошлиқдан қолган экан.
Темур бир неча кундан кейин ишдан бўшаш бўйича аризасини ёзиб, бошлиқнинг олдига кирди...

@abdulkarim_hasan