Шуҳрат Абдураҳмонов яна 10 йилдан кейин ҳокимликдан кетади, агар... Андижон вилояти ҳокими Шуҳрат Абдураҳмонов 5 йилдан икки муддатга қайта тайинланади ва яна камида 10 йил лавозимида қолади. Агар 27 октябрдаги сайловдан кейин ишдан олинмаса. Президент имзолаган…

Банкларнинг алдамчи рекламалари кўпчиликни куйдиряпти

Банклар микроқарз бўйича алламбало рекламаларни ижтимоий тармоқларда айлантириб, одамларни чалғитишни зўр эплаяпти.

Рақобат қўмитаси бир неча банкларнинг ана шундай алдамчи ҳаракатларини ўрганиб, молиявий жарималар қўлламоқда.

Яқинда Даврбанк ва Ҳамкорбанк рекламаларини ўрганиб, аслида рекламада тилга олинмаган, аммо амалда анча юқори фоизларни фош этганди.

Бундай банклар ҳали кўп. Масалан, TBC банк ҳам шундайлардан бири. Грузия банки 100 млн сўмгача микроқарзни йиллик 49 фоиз билан ажратади. Аммо кредит расмийлаштириб, пулни олиб бўлмагунингизча бу фоиз ҳеч қаерда кўринмайди.

Ана шу алдамчи ҳаракат(сизлик) оқибатида кўп одамлар чув тушяпти. Албатта, ўзбек тили бўйича қонунларни ҳурмат қилмайдиган хорижий банкдан бундан ортиғини ҳам кутиш мантиқсизлик.

@media24uz

Дераза-эшикларни синдиринг!

Ўзавто Моторс компанияси янги Кобалт дея аталаётган чироғи қорайтирилган машинани 155 млн сўмдан сотувга чиқаришни бошламоқда.

Монополистлиги етмагандек, магнитофонсиз чиққани камдек, қиммат бўлишига қарамай, халқ бойкот қилмайди, аксинча автосалонларнинг ойнаю эшикларини синдирар даражада талашадилар.

Хўрозқанд чет элники деса ялайдиган одамлар битта машинани шунчаки "мойка" қилиб, яна уни 9 ой куттириб сотса-да, талашиб олаверади.

Шунинг учун ҳам Ўзавто Моторс касодга учрамайди.

Бошқа иложимиз йўқ, дейдиганларни тўғри тушунамиз, ҳатто Шевроле машиналари бозорини синдирган электрокарлар ҳам монополлаштириб юборилди.

@media24uz

Қарор чиқармасданам халқ қарғишини олиш мумкин

Шу пайтгача чиқарган қарори сабабли кўп танқидга учраган ҳокимлар энди бунинг аксини исботлаяпти.

Шундай совуқда иситиш мавсумини бошлаш ҳақида қарор чиқармаган Тошкент шаҳар ҳокими буни исботламоқда.

Веолиа компанияси ҳам осон қутулди, ҳаммасини ҳокимиятга тўнкаб қўя қолди.

Иситиш тизимини қачон ёқишини кутамизми ёки қарғаб ўтирганимиз яхшироқми?

Сайланмаган ҳоким бўлса, шу аҳвол, дардингни ҳеч ким эшитмайди.

@media24uz

Энди ёш боламассизлар

Мустақил Ўзбекистон 34 ёшга қараб кетяпти, энди ёш боламас. Ўйин ўйнашни йиғиштириб, сал жиддий ишларни ҳам қилиш керак.

Бир неча кундан бери Тошкентдаги отишма бўйича турли гап-сўзлар, ҳар хил талқинлар юрибди. Аммо бирорта ишончли хабар йўқ.

Бош прокуратура қуролли ҳужум бўлгани, улардан бири ушланганини айтиб чиқди. Аммо кимга суиқасд экани ҳамон очиқланмаган.

Кеча тармоқларда видеолар тарқалиб, 2 гумондор шахс айбига иқрорлигини тан олган. Шунда прокуратуранинг биттасини ушлагани ёлғонми?

Энг ёмони, бош прокуратура ёлғон хабар тарқатмасликни сўраб, жавобгарлик борлигини айтиб, таҳдид қилди. Унда рости нима эканини ўзлари ҳам айтмаган.

АОКА деган ташкилот бу баёнотга қўшилиб, журналистларни огоҳликка чақирган ва огоҳлантирган. Бироқ гап нима ҳақдалигини ҳеч ким ошкор қилмаяпти.

Ҳаммаси мавҳум: ёлғон хабар тарқатманглар, бунга жавобгарлик бор. Хўп, гап қайси ёлғон хабар ҳақида кетяпти? Ким, нима, қачон, қаерда?

Бўлди энди, ёш боламассизлар! Тошкентда бемалол қуролли ҳужум бўлиши катта воқелик ва хавфсирайдиган ҳолат! Кимдан нимани яширяпсизлар?

Аввал ўзинглар ёлғон хабар тарқатишни бас қилинглар!

@media24uz

Шуҳрат Қўшақбоевич охирги кундан унумли фойдаланмоқда

Эртага парламент сайлови ва ҳокимларнинг маҳаллий кенгашларга раислик қилиши бекор бўлади. Қарорлар имзолаб олиш учун бугун охирги кун.

Андижон вилояти ҳокими миллиардлаб пуллар ажратиш ҳақидаги кенгаш қарорларини айнан бугун имзолаган. Эртага дам олиш куни, қарорлар имзоланмаслиги мумкин (лекин имзоланишиям мумкин, олдин бунақасини кўрганмиз).

Хўш, андижонлик депутатлар кенгаши бугун нималарга пул ажратишга қарор қилишди?

▪️Футбол ассоциацияси вилоят бўлимининг иш ҳақи учун 260 миллион сўм;
▪️вилоят паралимпия бўлимининг иш ҳақи учун 200 миллион сўм;
▪️вилоят кураш федерацияси бўлимининг иш ҳақи учун 260 миллион сўм;
▪️вилоят иқтисодиёт ва молия бош бошқармаси ходимларини мукофотлаш учун 300 миллион сўм;
▪️ёқилғи харажатлари учун 150 миллион сўм;
▪️мулкий зарарларни компенсация қилиш жамғармасига 8,3 миллиард сўм;
▪️Болаларни соғломлаштириш ва аҳоли саломатлигини тиклашга кўмаклашиш жамғармасига 800 миллион сўм;
▪️вилоят ҳокимлиги қўриқлаш хизматидан бўлган қарздорлиги учун 500 миллион сўм;
▪️Ҳарбий маъмурий сектор жамғармасига – миллий гвардия учун 150 миллион сўм;
▪️болалар майдончаси қуриш учун 850 миллион сўм ва лойиҳа ҳужжатлари тайёрлаш учун 50 миллион сўм;
▪️вилоят прокуратураси ҳудудида “Меҳмонхона” бино иншоотларини қуриш учун 500 миллион сўм;
▪️“Динамо” спорт мажмуасини қуриш, таъмирлаш, лойиҳалаш ишлари учун 300 миллион сўм.

Хуллас, бугуннинг ўзида ҳокимият 11,7 млрд сўмдан кўп ажратиб ташлаган. Ҳали кечгача вақт бор, балки яна чиқиб қолар. Агар яшириб қўйишмаса.

Адлия вазирлиги яширмасликни ва эртага қарор чиқмаслигини назорат қилади деган умиддамиз.

@media24uz

Сенат қонунларга зид қонун лойиҳасини ниҳоят қайтариб юборди

Ички ишлар ходимларини тасвирга олганларни 15 суткагача қамаб қўйиш ҳақидаги ИИВнинг бир қатор қонунларга зид қонун лойиҳаси сенатда кўриб чиқилди ва қайта ишлашга юборилди.

Энди қонунчилик палатаси депутатлари ҳам сал каллаларини ишлатиб, бу қоидани лойиҳадан олиб ташлаши, кейин эса тезроқ яна сенатга юборишларига умид қилиб қоламиз.

Чунки айнан ўша лойиҳада йўл ҳаракати қоидабузарликлари учун жарима баллари бериш ҳақидаги меъёр ҳам бор эди.

ИИВнинг қайсидир эркатойи кўчаларда бемалол машина босиб юриши ёки бирор каттаконнинг ўзбошимча "Малибу"лари қоидаларни бир тийинга олмай ҳаракатланиши учун лойиҳа атайлаб тасдиқланмаяпти, деган ёмон гумонимиз бор.

@media24uz

Ростанам қўлимиздан балоям келмаяпти

Нафақат бизнинг, балки ҳуқуқни муҳофаза қилувчи органлар ва ҳукуматнинг ҳам қўлидан ҳеч нима келмаяпти.

Гап Андижон вилояти ҳокими Шуҳрат Абдураҳмонов ҳақида кетяпти. Эсингизда бўлса, у Хонободдаги тадбирга йиғилган журналистларга қарата "қўлларингдан балоям келмайди барибир" деган эди.

Халқ ва ҳукумат олдида ҳисобдор амалдорнинг журналистларга қарата айтган бу гапи бошқа қонун устувор давлатда дарров истеъфо ёки ҳайдалиш билан якун топар эди. Аммо унга нисбатан ростанам қўлимиздан ҳеч нарса келмас экан.

11 йилдан бери ҳокимиятда ўтиришнинг фойдаси шу бўлса керак балки.

Айтганча, унча-мунчага садо чиқармайдиган (айниқса, журналистлар ҳимояси борасида) Журналистлар уюшмаси тегишли органлардан муносабат беришни сўраганди.

@media24uz

Рақобат қўмитаси барча ТВ каналларга кўрсатма юборди

Барча турдаги телеканаллар орқали рекламаларни тарқатишда қонунчилик талаблари бузилиши бўйича Рақобат қўмитаси кўрсатма юборган. Биз бу ҳақда кўп ёзгандик.

Айтилишича, қўмита рақамли телевидение хизматларини кўрсатувчи провайдерларга (телерадиоканаллар) кўрсатма хати юборган. Кўрсатмада телеканаллар 1 ой ичида рекламага оид ўз фаолиятини амалдаги қонунчилик талабларидан келиб чиқиб мувофиқлаштириши ва қайта кўриб чиқиши сўралган.

Ушбу кўрсатма хати талабаларидан келиб чиқиб, қўмита ўз ваколатлари доирасида белгиланган тартибда соҳага оид мониторинг таҳлиллари ўтказади ва ўрганишларда қонун бузилиши аниқланган тақдирда, ушбу ҳолатга йўл қўйган субъектларга нисбатан қатъий таъсирчан чоралар, шу жумладан, молиявий санкциялар қўлланилиши айтилган.

Бизни эшитаётган раҳбарлар борлиги қувонарли. Ҳокимлар ва вазирлар ўрнак олса бўларди.

@media24uz

101, 102, 103 ва 104 рақамлари энди ягоналаштириляпти
Жуда узоқ кутилган қарорлардан бири деб айтиш мумкин: пойтахт ва Тошкент вилоятида 1 июндан, водийда 1 июлгача ва бошқа ҳудудларда йил охиригача 112 ягона диспетчерлик хизмати ишга туширилади.

Аслида президентнинг бу топшириғини бажариш шундоғам 5 ойга кечиккан. Чунки 1 январдан жорий этилиши керак эди.

Хуллас, энди нима бўлади? Биз бу мавзуни олдин кўтаргандик. Ўта шошилинч ва фавқулодда ҳолатларда одамлар қайси рақамга уланиб, кимни чақиришни билмас эди.

Энди мана шундай ҳолатга алоқадор барча идора ва ташкилотлар ягона 112 рақамига бирлаштирилади. Уйингиз ёнсаям, мазангиз қочсаям, ўғрилик бўлсаям, газ портласаям, сув тошсаям, тоғда адашиб қолсангиз ҳам, 112 рақамини терасиз.

Ва унутманг, бу хизмат 1 июндан Тошкент шаҳри ва Тошкент вилоятида, 2024 йил биринчи ярим йиллигида Андижон, Наманган ва Фарғона вилоятларида, 2024 йил якунига қадар Қорақалпоғистон ва қолган вилоятларда жорий этилади.

Айтганча, тоғда адашиб ёки жароҳатланиб туролмай ёлғиз қолганингизда телефон антеннаси чиқмайди. Бу ҳолатда кимни ёрдамга чақиришни билмайсиз. Аммо бунга алоҳида тўхталамиз.

@media24uz