سَـــفرْكُم طوَّل هواي
اشْتيــاقِي شَيَّب ويـاي
إجه مــوتي ... أريـدنكم
____
هَلـي يحچــاية الكلفه...التزيح الهَمْ عَنِ جفوني
يبيت البَخَتْ و النعمه...بثـوب الزهره شَـرفوني
أقره الفاتحه لـ روحي...عســه بالمـوت تلفــوني
علَّگت اعله بـاب الدار... وَي كِــلمة هـلا عيوني

كِـتَبــت بـأول البـيت
شحــلاته بيكم البيت
إجه موتي ... أريدنكم
_____
لفاني الموت بجـروحه...و لا عاف الگلب حِـلمه
تِردولي بخـلِگ مِشتاگ...بيكــم يا حــلو اللـــمّه
طـبُع بـ الســافراو عنـها...تــظَل ابـ عــازَةِ الكلمه
إجه موتي و ردت اسمع...شــلونـچ يمـه يا يمــه

يغــزِر والله بالــروح
حچيكم كلّه ممــلوح
إجه مـوتــي ... اردينكم
______
يمُر بيّــه سحــاب الهَم...يعانِق جرحي والالامي
يمطــر فرگـه و اتــمنّه...أشوف حســين گدامي
البعُد خَضبني بدموعي...و أهو بدمِّ النحر دامي
المَثَل لايگــلي بفــراگه...بنُص الماي بس ظامي

صرت من ذاكه عاشور
بحياتي كلـشي مكسور
إجه مــوتي ... اريدنكم
_____
بِشِر يـومـيه بـ احلامي ...مات حسـيــن أنْشَـدني
و گلتله ما يـزال بخـيــر...بعد چم ساعـــه يحضنّي
بلا راس بصدر مسحوگ...و أحسّه يقتــرب منّــي
قَبْلي بكــربله شُبــگت ...الحوافر كل ضلوع أبني

و لا واحــــد بالســنــين
يعوِّض رِمـــش حسين
إجه مــوتي ... أريدنكم
_____
صــح ماتو لچن أحيـــاء...ما چِهبـوا مـراسيلي
بفــراش المنيـــــه و لــو...أشوفَنهُم يرد حيلي
أشـــبگهُم و خَلي المــوت...يطــفيـــها قناديلي
أهم شي عندي ذاك اليوم...بيد حسين تغسيلي

اويه إخوته بصوت الاحساس
يشـــيّــع نَــعـــشـــي عــباس
إجه موتي ... أريدنكم
______
أسمَـــع عالگــبر يُمّــــه...تفَزِز كل جرح بيّــه
صوت الـ مانســيته أنه...يــترس گبري حنيـه
مَرَه و هواي أحبـنها...بعمر خمسين مَحنيه
امْشيـبه روحي نادتها ... يا زينــب الـ مسبيّه

بعد تعبي الـ و لا راح
أنام بگــبري و ارتـاح
إجه موتي ... اريدنكم

الشاعر حاتم صبري الكاظمي

أسمع رسـايل دمـع .. و تبَچي أهـل السمه
بين الوفه و الضلع .. من فاطمه لـ فاطمه
______
الزهراء :
الىٰ أم الوفه المتروســه حنــيّه
المْــشَرْفه عَشــيرتها الكِــلابـيّـه
أولادي أمــانه ابگــلبچ إخذيهم
و خصوصاً دَلليها هـــاي البنيّـه

إنطيها حُـبْ و دِفو ... بس أنتي گدها و كفو
شانــچ غَــداً يرتفِع ... من فاطمه لـ فاطمه
______
أم البنين :
شكبُر بَخْتِي عليّه بولــدچ اتوصين
الله قَـدْ خِلَـقـني إلچ خَـد و عـيـــن
زينب (يمه) ما اصيح إلَّه (مولاتي)
مو (أُم) إقبـلــينـي خادمه لحسين

من فدوه لحچــايِته ... أتشـرَّف بخِــدمِــته
أشعِل چفوفي شمع ... من فاطمه لـ فاطمه
______
الزهراء :
اعرفچ بالوفـه اتأديــن تَوصيتي
هذوله چانو من الدنيــه عافيتي
لَتخـليـهـم ايشعــرون بـ فــراگـي
أريد ابگلبچ ايحسُّونْ اَنَه ابيـتـي

بْـلا أُم يتـيم الظَنَـه ... خَلْ يشوفـونـچ اَنَـه
أولادي من تِجـتِمِـع ... من فاطمه لـ فاطمه
___
أم البنين :
قَسَـم بحجــابچ ايظل هالعهد وياي
إذا عِطشوا أصبْ اعيوني إلهم ماي
و لَخَلُّفلـه أخو لـ حسـيـن من گلبچ
مَـيـگـلّه يـخـويـه ايگـلّـه يا مـولاي

مِثل البـدُر مِنْ يــهِل ... يصيحوله يا أبا الفَضِل
وجها ضوه من يشِع ... من فاطمه لـ فاطمه
_____
الزهراء :
طوله احْجاب صار لزينب من الناس
گمــر يشــبه علي مــن الجِـدم لراس
أبو الغيره الي باع اچفوفه لـ الخـوّه
أحبّــه هــواي سلـمـيلي عله العـباس

امسمِيته و بمَعرفه ... استاذ العَطش و الوفه
مِثــلچ عليه انفِجِع ... من فاطمه لـ فاطمه
____
أم البنين :
الحَمِد للٓه رضيتي اثلاثه و بـكافل
أولادچ عيـــوني و الله تِــســتاهِل
الله برحمــتــه ودانــي يم حيــدر
و خَلّه بكربلـه لـ زينــب أبو فاضل

صِرْت برفيـع الفـخر ... أم الشمس و الگـمـر
تـاج الأســم ينوضِع ... من فاطمه لـ فاطمه
_____
أم البنين :
من يوگــف أگــباله ايذب العمامه
و إذا طاح الحسين ايطيح گدامه
مملــوح بكــثــر ما زيــنب اتحـبّه
يشم عطرچ اذا يفتر عله اخـيامه

چفوفه بگطع لو حِضَت ... معناها زينب رِضَت
( شـكراً أخي ) يستِمِـع ... من فاطمه لـ فاطمه

الشاعر حاتم صبري الكاظمي

أضناني الشوقُ إليكْ .. خُذنِي ما بينَ يَديكْ
يا مهدي
إرحَـمْ قَـلبــاً يدعوك .. أينَ مكـانُــكَ أرجوك
يا مهدي
طش عطفك و ألزم أديه ... يا بو الليالي الفاطميه
_
عدينـي باب النسيان
دليني بيت الأحزان
وازرقني من عينك دمع
سويني بي خوش انسان

شما ينزل اعليك اغروب
يالمهدي أحسك متعوب
ما شايف الراحه و بچه
بعيونك اشچم يعگوب

ســلام الله علـيك بگد دمع عمتـك
و سلام الـ ما عيونه بيوم شايفتك
أعــذرني إذا مِـنْ شــوگي عذبــتك

يا مَنْ تعلَمُ بالغيبْ ... قل لي أ غزاكَ الشَيبْ
يا مهدي
تبكي ضلعاً مكسور ... تبكي خداً مسطور
يا مهدي
الله يـصــبرك عالرزيــه ... يا بو الليالي الفاطميه
_
سامحني من كلشي الچان
من عندي خو ما زعلان
گد ما يدگ گلبي الك
ظليت ادگ بالبيبان

حالِف يمهدي امن الگاك
مثل اليتــيم اتلگاك
يشوفوني حي بس بالصدگ
ميت اهواي بفرگاك

أنه اباب المجــالس دوم يلگـوني
بقصيدة فاطمه ما غمض جفوني
بلكت عله الباب اتشـوفك عيوني

قالوا في كلِّ عَـزاء ... تأتي مَعكَ الزهراء
يا مهدي
تبكونَ طِوالَ الليل ... صَدراً سَحقتهُ الخيل
يا مهدي
و نسولف اعله الغاضريه ... يا بو الليالي الفاطميه
___
يالمــاكـو من حنــيتك
خــايـف على عافيتك
وخاف أغفَل اترجاك أنه
ما انطـرد من بيتـك

الـ بالغَيبَه ما مَدلَك إيـد
انگلّه انتظارك ميفيد
الما وِگف بالغيبه وتجي
تگلّه وگـفـتك ما ريد

و لو عَـفـوك قـديم الأزَل بل دايِم
اليحبك أغله شي ينطي الك لازِم
تِحِبْ العايش لـ أم الحسـن خادِم

أنْساكَ ؟ نَعمْ مَعقول ؟ ... قدْ كُنتُ بكَ مَشغول
يا مهدي
ارزُقني مِـنـكَ بُكـاءْ ... من عَيْـنـَيـكَ الحَـمـراءْ
يا مهدي
حتى اعرف شصار برقيه ... يابو الليالي الفاطميه
___
الخايف عليك من الريح
مِنْ عينك شلون يطيح
تستغفر انفاسك اله
يا من حِـروفـك تسبيح

بس عندي چلمات ثنين
ما گلت يمته و چا وين
تِـظـهر و اشـبگـك أنه يَم
يالمهـدي شباچ حسين

تسولفلي و دمعــتي اتطيح عالعلّه
طاحت زينـب شـگد من عله التــلّه
السوط متــون عد عمـاتي ما خَـلّه

رأسُ حـُسيـنٍ ضَـربـوه ... ما يَكفيهِمْ سَحَـقُـوه
يا مهدي
بالحَـجَـرِ أَشَـرُّ الناسْ ... ضَـربوا رَأسَ العــباسْ
يا مهدي
و تختنگ يم كلمة سبيــه ... يابو الليالي الفاطميه
__وشچم ضِلِع بيك انصاب
من طاحت أعليها الباب
داسوا عله المحسن صدگ ؟
لا سامح الله الاصحاب

چفوف الضوه بيها شصار
حرگتها يالمهدي النـار
گد ما نحيله أنه اعتـقد
واصل ظهـرها البسمار

چم مـرّه وصلت الموت عالزهره
مـثل لون الغـروب بعينها السطره
علي من شافها يمكن وگف عمره

حـتىٰ جَـدُّكَ نــاداكْ ... فـ مَتىٰ يا وَلَدِيِ أراكْ
يا مهدي
تَــقـرَأُ كُـلَّ الأرزاء ... بـزيـارةِ عــاشـوراء
يا مهدي
و ادلّي شيـعـتنه الزچيّه ... يابو الليالي الفاطميه

الشاعر حاتم صبري الكاظمي

زهرة نبيــنه ... إرضي عليــنه
___
يا خيــــمــة الله الأمِـنه ... الناشر حنانچ بيهـا
كل فاطــــميه برأفتــچ ... خدامــــچ اتلميــها
دعــوه اعله بابچ بالدمع ... وبكل عزه نخليها
هاي الگلوب الحبتچ ... يالزهره إرضي اعليها

لأن حبـــيـنــــاچ .. برحمته البــاري
رازقنه خيرچ
صحنه ما ننساچ .. و بدمـــع جاري
ما عدنه غيرچ

ابابچ دعيـــنه ... إرضي عليــنه
___
تـقديــر ربنــه برحـمته ... عالشيعه أنزَل نعـمه
گد ما نحبــچ من گلب ... الله رزقنـــه الخدمه
جاه البشر ما ينفعه ... و ميفيده ماله و أسمه
لو ما قِبَلتي فاطمه ... مَيقبــله رب الرحــمــه

بــاب نعمتنه .. اعلينه ما ينسَد
فاتحها ربـنه
بهاي خدمتنه .. و ثوبنه الأسود
أبيض گلبـنه

و لَطمَت إديــنه ... إرضي عليـنه
_
ما نوگف اباب العزه ... ليــلة قــدوم امصابچ
هذه مكانــچ فاطمه ... وشگد تعشگه احبابچ
نفسه لچن أثگل بعد ... لِـذتــي وراه بعتـابچ
طگ ضلعچ انسمعه لَمَن ... يالزهره دِفعوا بابچ

بخدچ المسطور .. و بحـَمــار العــيــن
و بحزن واضح
بضلعچ المكسور .. المحسن تشوفين
عالترب طايــح

يمنه الحزيـنـه ... أرضي عليــنه
___( ما أُذيــت بنتُ نبي ) ... مثلچ وضاگت حسره
گوه تجرين النفس ... من ضلعچ و من كسره
الله يعيــنك يا عــلي ... عالمُـغتسـل يالزهــره
بيدچ زراگ ايشاهده ... و يشوف عينـچ حمره

يصب بدموعه .. يغسلچ بهــيده
گــوه يرفــعــچ
يلطم اضلوعه .. لَمَن حَس بيده
مِنكسر ضلعچ

بكَسـرَت وليــنه ... إرضي عليــنه
___كل المصـــايب هوِّنـــت ... أصعبـــها مرّت عالكون
شفـــتي الحسين بكربله ... بالرمـــح راسه يرفعون
و زينب على باب الخيم ... رَد ليـــها خالي الميمون
مگلوب سرجك صاحته ... بلا خويه ترجعلي شلون

آنــه يالمــيـمـون .. بيدي جدمتك
و انخمش گلبي
من رحت بحسين .. بالله ودعتك
والباري حسبي

بگَطعت وتيــنه ... إرضي عليــنه

الشاعر حاتم صبري الكاظمي

إن من أعظم نعم الله هي نعمة الزهراء عليها السلام و وجودها التي كم أثخن الدهر بنا بالجراح و لم نتركها :

قصيدة : أعظم نعمه
الرادود : #علي_سعيد_الوائلي
@ali_saeed_alwaeli
الشاعر : #حاتم_صبري_الكاظمي
@hatam.s.k
_______________________
الليالي الفاطمية ليالي استشهاد مولاتنا السيدة فاطمة الزهراء عليها السلام

#الكاظمية_المقدسة #كربلاء_المقدسة #النجف_الأشرف #الليالي_الفاطمية
https://www.instagram.com/reel/DCoq4bDMFu1/?igsh=MWNvNTgydnI3dXEybA==

بجروحه باب ... دنيه العذاب
گلبـــــه علي ... تَحتِ التراب
عالزهره صحته بدمع العين
الله يعـيـــنك يا بو حــسين
____
هذاك الـ ينسِــــمِع يم العـرش صــوتــه
و نِجَد (خامسها بعد العَشرَه) من حُوته
الخـــيــبر مِـن قِــلـــعها ابعض من قوته
مــا شــايــل الزهــــره شـــــال تابــوتـــه

ويه الزهره عاش ... أحله حياة
و من عافـتــه ... چم مره مات
الساعه بعدها عنده سنين
الله يعـيـــنك يا بو حــسين
___
أدور بالبــــشــر محد وصـل صبره
علي گــــدام عـــينه مـــيته الزهره
يشم گوّه الهوه من شاف هالنظره
محـروگه أديــــها و عالوجه سطره

بحاله شيصير ... ايشوف بنياح
الباب الثگـيل ... فوگــاها طاح
صوت الصبر من ذاك الحين
الله يعـيـــنك يا بو حــسين ـ_
عالمـغتـــسل دمعاته حِچت چَنها
صـدگ بچفـــوفك الزهره تِچفنها
اشيگول لزينب و لو ناشدت عنها؟
مكـــسورة ضلــع بالليـل دافـــنها

مدري شيگول ... لو رَد وحيد
زينــب تصــيح ... أمـــي أريــد
اتهِـز گلبه كل ما گالت وين
الله يعـيـــنك يا بو حــسين
__
علي شِـيب المَــلامح بي ألِــف فاگِـد
اليگعِـد بالسِمــه بالمگــبــره گــــاعِد
ينــــاس صواب حيدر مِكلِف و چــايد
فُـگَـــد مَنْ چــان ويا بالنَفَـــس واحد

ذاك الجـِـــــبـَـــل ... المَتهزه ريـح
اعله الزهره صار ... يوگــف يطيح
الرايحله غالي يجيــبه منين
الله يعـيـــنك يا بو حــسين
_
علي ايفزِز الميت لو سِمَع نوحــه
غير الزهره ياهو اليعرُف جروحه
اعله خدها الازرگ اعله التُرُب مطروحه
علي يدفـــنها مدري يدفِن بروحه

نــــاداها آه ... يالروحي بيچ
من التراب ... خايــف عليچ
لا يلـــچم الخَـد و الضلعين
الله يعـيـــنك يا بو حــسين
__
رِجَـع واتخيّـــل يناديهــا من دونــچ
مكسور الظهر مِن غُمضَت اجفونچ
يلون العافــيــه و راح ابگبــر لونــچ
شسوي ابيــت ما بي فاطمه عيونچ

لو ما القضاء ... احچي بسكوت؟
يالزهره كون ... ويّـــــاچ أمــــوت
ما خَلّه عنده احباب البيــن
الله يعـيـــنك يا بو حــسين
___
الشاعر حاتم صبري الكاظمي

ثلث دگات | جرح المشاعر |

الرادود | #سيد_علي_الكيشوان |
الشاعر | #حاتم_صبري_الكاظمي |
________________________
شهادة السيدة رقيه عليها السلام
مضيف موسى و الجواد عليها السلام
#الكاظمية_المقدسة
#النجف_الأشرف
https://www.instagram.com/reel/C_dLs_eMSKM/?igsh=MW1zOWZrdXVodnl3eg==

نســألُ الله البُــكاء ... كل عُمرنه كربلاء

نرفع بأسمك عزاء ... يارسول الله مدد
_____
يارسول الــــباري يا تاج انبــيائه
صَفَـــر أعـــلن سيدي عن أنتهائه
حسين خِلصَت أربعينيتَه وعزائه
صحنه لا هــيهات نِـنسَه كربلائه

الحمد لله و الشِكُر ... بخدمتَه انطانه عُمُر
والـشكُر رَمز الوفاء ... يارسول الله مـــدد
____
انوَدِع الشَــهرين بالصَيحه الأصيله
أحنَه غير حسين ما عِدنه وســـيله
بروحنــه يبقه صَفَــــر شَهر العقيله
الخدمه أُمنَه انعوفهه لا مُـستحيله

نِـشـتريها بأي ثَــمَن ... خِدمةْ احسينك وَطن
رِزق من رب السماء ... يارسول الله مدد
______
بـ علي نقسِم يالگلتلَه أحله كلمه
أنه وانته ( أَبـَوىٰ هَـــذهِ الأُمــــه )
نِترُك الدنيــه و لا نترك الخـِدمَـه
ألحــياة انشوفها بحب أبو اليّمه

بالحَيا بس هالثِنــين ... لو حُسين و لو حُسين
كلشي من دونه هَباء ... يا رسول الله مدد
_____
عاشگين وشاهد الحُب دمعة الـــعين
و بعـِشِــگ إبـــنـك تِسَــمينَه مَجانيـن
وين نلگه يارسـول الله شَــــرف وين
الشَرَف شِفنا كِلّه كِلّه بخدمَة  حسين

والـيـحرُمهه انوصَف ... هذه ماعِنده شرف
وانته تاج الشُــــرفاء ... يارسول الله مدد
______
التـرضَه عَنّه بخـــدمته ( حازَ سُرورا )
نُطفَه چان بخَـلقَه بالــذَرْ ( كـانَ نُورا )
لذَّتْ الحُبْ تِبنِي ( في الحَشرِ قُصورا)
( فازَ بالـلــذّاتِ مَن كــــانَ جَـسُـــورا )

والجَسَاره اعله العِـده ... الشـيعه تبقه واحده
نهدي لحسين الدمـاء ... يارسول الله مدد
______
يارسول الله اليــحبكُم عِنـــدَك أجرَه
بالحـــــشُر لـَـقــبوه يا خــادم الزهره
برايته العبــاس يمــسَح فوگ صَدره
يصير يم قصر الحسين هناك قَـصره

فاطـمه تِـــشفَع إله ... بيه ريحَـــةْ كــربله
عَبد مسلوب الرداء ... يارسول الله مدد

الشاعر حاتم صبري الكاظمي

في وداع شهري محرم و صفر كان هكذا التوديع :

يعني هاهيه انتهينه؟
من مُــحرم واربعينه
بعد ما نسمع المقتــل عالمنابر
لا مــواكب تهتف تفضل يزاير
...............
يعني هاهيّــه انــتهت أيام عشره
يعني راح يظل محرم بيّه حسره
عام كامل گلبي يا ناس شيصبره
لا أدگ زنجـــــيل لا راسي أطبره

دمعتي بعيّــوني حابس
هيه كل عمري المجالس
أفتقد معــقوله ونّات الحناجر
لا مــواكب تهتف تفضل يزاير
................
من مُــــحرم ينتــــهي ينتهي عمري
بس اليفـــارگ محرم حَچيّي يدري
بليلة العباس أحب لطــمات صدري
اليوم تكتب فاطمه بالسـجل أجري

بأسمي ما بين المــآتم
أفـــتقد كلمة (يخادم)
أبقه مشدوه الفِكر ياناس حاير
لا مــواكب تهــتف تفضل يزاير
................
من يشــــيلون السـواد الروح تذبَل
والخدم تتوادع ب ( الله ايــتِقَبَّل)
الموكب الينسد عليه الگــاع تزَعل
صعبه ما نسـمعهه يا (زاير تِفضَّل)

أبچي و عيــوني تراقب
كربله تـــودع الــمواكب
والسواد انشال من فوگ المناير
لا مــواكب تهـــتف تفضل يزاير
.................
حروف حزني هالدمع خَــــدي يطرزه
بالمــــــــجالس لمن انــــــودع الأعـِزَه
روحي يم طــــــاري محرم بيـهه فَزّه
بنعي (سيد جـاسـم) و أطوار (حمزه)

أبچي و اهتـف آ يفاطم
لمن أسمع صوت (باسم)
وصوت حمزه من يون جابر يجابر
لا مــواكب تهـــــــتف تفـضل يزاير
.................
الرايه ترجع حــــَمره لذبحو علامه
والضوه الأحمر يـشـيلو من مقامه
تندعي دعوة عِشگ هاي الـخِدامه
يا مــحرم ترجـــــــــعلنه بالسلامه

بالسلامه ترجع ألنه
ربي لا تحرمنه منه
الروح مهمومه لأن مَتشوف باچر
لا مــواكب تهـــــتف تفضل يزاير
.................
خيمـته صحــــنه يلم الــــــحيدريه
بخدمته نطلب رضه الزهره الزچيه
بيت كل الخـــــــدم وادي الغاضريه
و بالگلب مو (بالخرابه) تظل رقيـه

حـسين حُـبه للبرايه
قـــصه ما ألهه نهايه
القصه ما تكمل إذا ماكو شـــعائر
لا مــواكب تهـــــتف تفضل يزاير

الشاعر حاتم صبري الكاظمي

نصيحه لي و لكل من سيذهب إلى طريق الاحرار إلى كربلاء

إلى كل شاب و كل فتاة حملوا حب الحسين عليه السلام

#حاتم_صبري_الكاظمي
@hatam.s.k
#علي_سعيد_الوائلي
@ali_saeed_alwaeli
#كربلاء_المقدسة
#الاربعين
https://www.instagram.com/reel/C-0ovuSMEdA/?igsh=dTU3NXo1dThmM2ho