اۏل بیر دلی، صوری بۇ طمأنینه‌نی یاندېر
اۏندان سۏرا عقل آدلی دواخانه‌نی یاندېر

عاقل قاچار اۏددان ولی من قاچمارام الله
عشقین اۏدونا من کیمی دیوانه‌نی یاندېر

وارلېقدا حقیقت وار اگر عشقدیر البت
باشینده‌ کی عقل آدلې بۇ افسانه‌نی یاندېر

ای قلبیمی ویرانه ائده‌ن هاردا قالېبسان؟
گل لطفی تمام ائیله بۇ ویرانه‌نی یاندېر

وئر یئل داراسېن ساچلارېنی قیزقانېرام من
اۏل زلفونو آغوشه چکن شانه‌نی یاندېر

سن آینایا باخدیقجا گۆلور اۏل یانېرام من
اۏلموش اۏ رقیبیم دور اۏ آیینه‌نی یاندېر

یۏخدور بیر اېشېق صحنه‌ده پروانه بیر اۇشسون
یارب اۏنا خاطر بئله بیر صحنه‌نی یاندېر

#یۇردسئور

دالغا اۏل، دریا کیمی بۇ انتهاسېز عشقیمه
اۏل یاغېش صحرا کیمی بۇ ادعاسېز عشقیمه

یئل کیمین هردن گذار ائت قۏیما سؤنسون عشق اۏدو
اۏلما آنجاق من یانارکن اعتناسېز عشقیمه 

بیلمیرم حتّی اؤزوم عاشق هاواخت اۏلدوم سنه
ابتدا گۆیا ازلدیر ابتداسېز عشقیمه

پارتلایار هر آن منیم قلبیمده مین آتش‌فشان
باخما سن ظاهرده کی سس‌سیزصداسېز عشقیمه

وارایکن وارلېق پۏزولماز لوح سینه‌مدن آدین
کیم ابد مؤهرو وۇرولموشدور فناسېز عشقیمه

هر نه اۏلسا منده آنجاق یۏخ تصنع‌لن ادا
اعتماد ائت سئوگیلیم خالص ریاسېز عشقیمه

#یوردسئور

هئچ‌کیم سنه تای کؤنلومو بیمار ائده‌بیلمز
بیمار اۏلان کؤنلومو تیمار ائده‌بیلمز

زلزال قیامت ده سنین اۏل یئریشین تک
گؤز یاشلارېمې گؤزلره آوار ائده‌بیلمز

چۏخ سېندېرېسان قلبیمی اۏلسون ولی هئچ‌کیم
سندن سورا من‌لن بئله رفتار ائده‌بیلمز

سن بیرداناسان معجزه‌سن شبه جمالېن
خلقت الی هئچ نوعیده تکرار ائده‌بیلمز

دریا کیمی پاک ائیله‌یه‌ر انسان اۆره‌ڲین عشق
نفس‌ایله هوس دای اۏنو مردار ائده‌بیلمز

جنت اۏلار انسان اۆره‌ڲی عشق‌ایله، شیطان
وارد اۏلا‌بیلمز اۏنا اضرار ائده‌بیلمز

#یوردسئور

قۏی شراب عشقیدن اۏلدوقجا ایشسین کلمه‌لر
عادی معناسین آتارکن اۆز ده‌ییشسین کلمه‌لر

یاری وصف ائتمکده قۏی خام اۏلماسین ابیاتېمیز
ذهن تندیرینده قۏی بیر آز دا پیشسین کلمه‌لر

یاریمین یادی بۇداغیندن قۏی آسلانسېن هله
اۏنلاری کال ده‌رمه قۏی کامل یئتیشسین کلمه‌لر

قۏیما گیرسین انکرالاصوات سؤزلر شعرینه
قۏیگونان بۆلبۆل کیمین اۏندا اؤتوشسون کلمه‌لر

عشق اۏدوندان شعریوین ابیاتینه اۏد وۇرگونان
قۏی قېغېلجېملار کیمین اۏندان آتېشسېن کلمه‌لر

عشق دردیندن درین بیر یاره واریدېر قلبیده
قۏیگونان بۇ یاره اۆستونده بیتیشسین کلمه‌لر

#یوردسئور

نئیلیرم سالم اۏلام هجرینده بیمار ائت منی
نئیلیرم مرهم آلام وصلین له تیمار ائت منی

من قادان آللام سنین حتی جهنم اۏلسا دا
نۏلار ای جانیم فدا گل باری غمخوار ائت منی

من سنین آزارینی حقیمده بیللم مرحمت
ائتمه‌دین بیر مرحمت گل باری آزار ائت منی

قېشدیر ای عیسی نفس یاریم منیم وضعییتیم
وصلین اعجازایله گل بیر بارلی گلزار ائت منی

گؤرمه‌دیم من بیر قېزیل گۆل کیم تیکانی اۏلماسېن
ای قېزیل گۆل حاضرم وصلینده گل خار ائت منی

#یوردسئور

سن ایسته فقط هر نه اوْلورسا ائله‌رم من
امر ائیله جهنمده ده اوْلسان گله‌رم من

بیر لحظه توجه ائله‌سن سن منه ای جان
قان یاشیمی شوْقوندا گؤزومدن اله‌رم من

گل آتما منی یوْخسا بۇ دنیاده دیرییکن
آردېنجا آناسېز قۇزولار تک مه‌له‌رم من

ائتدیم گؤزونون بحرینی مأوا منی ای جان
گل آتما گؤزوندن کی بالېق تک اؤله‌رم من

بیر باشقاسېنی گؤرسه گؤزوم جرمینه لائق
عدل‌ایله اوْنو مین یئره قطعا بؤله‌رم من

الله منی مختار ائله‌سه آرزولار ایچره
بیر آن سن‌ایلن اوْلماغی حتما دیله‌رم من

چوخ یاره یئدیم هجریدن آی بیر گۆجوم اۏلسا
بو کلمه‌نی تئز السنه‌لردن سیله‌رم من

یاندېر منی سېندیر منی اؤلدور منی اؤلدور
هر نئیلسن ای جان سنه بیر تک گۆله‌رم من

گل اعتماد ائت سن منه بو عشقیده چۆن کی
حجب‌ایله حیا رسمینی یاخشی بیله‌رم من

#یوردسئور

نه حکمتدیر خداوندا منی تنها یاراتدېن سن
نه‌دن‌دیر هاممینی عاقل منی شیدا یاراتدېن سن

چتین وضعییتیم واردیر بۇ خلق ایچره منیم سانکی
جهنم ایچره یا ربیم منی طوبی یاراتدېن سن

بو ایلقارسیز جماعت‌لن منیم روحییاتیم تۇتمور
بۇ خلقی واقعی گۆیا منی رؤیا یاراتدېن سن

الهی جاهل انسانین غم‌ایلن دردی اوْلماز کی
گرفتار غمم چۆن کی منی دانا یاراتدېن سن

کیمی سېرداش سئچیم یارب بیری‌لن اوْلمادیم راحت
کی گۆیا بۇنلاری سئرچه منی عنقا یاراتدېن سن

بو خلق‌ایلن نه ایش گؤردوم بۇ کؤنلوم اوْلمادی مأنوس
کی گۆیا بۇنلاری دنیا منی اخری یاراتدېن سن

دئییل مرسوم بۇ یئرلرده منیم تک بیر آدام الله!
بۇ خلقی سۇ منی گۆیا حرام صهبا یاراتدېن سن

من ایلن بۇنلارین سۇیو بیر آرخا گئتمز اوْندان کی
بۇلاری قۇب‌قوری بیر چؤل منی دریا یاراتدېن سن

#یوردسئور

یاشېل گؤزلریوین باغېندا آی قېز
جنت باغلارې لاپ دۆشدو گؤزومدن
سؤزلریوین محشر شرابی آی قېز
آپاردې حشره‌جن منی اؤزومدن

آل یاناغېندا وار تبرزه اریک
آل عمرۆمو‌ اۏنا منی ائت شریک
چۏخ‌ گؤزل اۏلوبدور ساچېندا هؤروک
سانکی سالخېم‌ دۇروب قارا اۆزومدن

گیزلینجه باخېرام سنه بایاقدان
بال تک سؤزلریوی یئدیم قۏلاقدان
یئریشیوی گؤردوم دۆشدوم آیاقدان
تاب و توانېمی آلدی دیزیمدن

گیزلین سئودیم سنی ائیله‌مه تحقیر
گیزلین سئومک اۏلوب کؤنلومه تقدیر
هر قدر ائتسه‌م ده اظهاره تدبیر
اۏلمادې نئیله‌ییم گلمیر اۆزومدن

#یوردسئور

نه‌جۆر اۆره‌ڲیمدن سنی آتېم من؟
یازېق اۆره‌ڲیمین آراسېسان سن
نئیله‌سین اۆره‌ڲیم سن‌لن کی اۏنون
هم درمانی هم‌ده یاراسېسان سن

سنی دعالارېم منه یئتیرمز
سندن هئچ بیر خبر منه گتیرمز
خان‌چۏبان اۏلسام‌ دا بره‌ بیتیرمز
هجران سئللرینین ساراسېسان سن

گؤزوم کویرینه سن یاش چیله‌دین
قارا گۆنلریمه سن نور اله‌دین
عمرۆم له بیر باخ گؤر سن نه ائله‌دین
اۏنون بیر آیرېلماز پاراسېسان سن

هر لحظه‌مده سنین سانکی ایزین وار
ضمیریم‌له سنین سۏنسوز سۆزون وار
رزقیم هرنه‌دیرسه اۏندا دۇزون وار
هر لحظه‌مین گؤزل سۏنراسېسان سن

ده‌رین بیر یاراایکن بیتیشمه‌دین سن
هر نئیله‌دیم من‌لن قاتېشمادېن سن
قسمتیمه گلیب یئتیشمه‌دین سن
تقدیر آغاجېنېن قۏراسېسان سن

سنسیز قارشېمدا وار بؤیوک بیر گئجه
گئجه‌ایلن سحریم اۏلمور اۆج‌اۆجه
سنسیز گله‌جه‌ڲی گؤروم من نئجه؟
گل کی گؤزلریمین قاراسېسان سن

#یوردسئور