_
انا انسان ما نسأل علي حد ولا نلوم علي حد ما سألش عليا ولا نحب من يلوم عليا مكتفي بـ اهلي و ناسي القريبة منّي وبس .
لو حد طلب منّي خدمة نخدمه بـ محبة و ود و بشكل سطحي و ما يقعد بيننا إلا الخير والكلمة الطيبة وسلامات .
ماعنديش عداوة مع حد ، بعيد عن القيل و القال لا نتكلم ف ظهر حد ولا نكره حد ولا نتدخل في خصوصيات حد ، متريح في حياتي والحمد لله على نعمة السلام الداخلي و البال المرتاح و الطبع اللي الله يديمه فيا 🤍 .

_ اڪمل معضم اوقـاتي في تفڪير قـاتل عن ماذا سيحصل ان ڪانو موجودين معـي في حياتي ولـم يرحلـو في منتصـف الطريق اتسأل هـل هـم مثـلي يفڪرون بي ام هذا لـي ومـن نصيبي انا لـ وحـدي 🤍 .

_
يــارب ماتحطنــاش في دعـوِة بـنـادم ضايقنــاه بكلامنـا وهوا مش نـاقص ، ولا تخلينــا فرحانيـن على حسـاب دموع غيرنــا ، يـارب ماتخليـنـاش من النــاس الـي ياڪلو في لحم بعض على حســاب العشرة ، وماتخلينــاش نرقـدو مبتسمـين على حرقـة قلب حد ، ماتعطينـاش حاجـة غيرنـا حتى ڪان روحنـا معلقـه فيهــا يارب 🤍 .

_
لما توجعك سن من اسنانك ، من كتر الوجع تبي بس تقلعها ، ولما تقلعها ، يقعد لسانك لا شعورياََ يمشي لهذاك الفراغ لي خلاته السن مع انه ما عاد توجعك !
بس هذا ما يعنيش انه ماخلاش فراغ ، او انك ما فقدتاش ، حتتعود عالفراغ ، بس حياخد من وقتك هلبا عشان تتعود و بينما انت تتعود حينزاحو باقي الاسنان و يملو جزء من الفراغ لدرجة ان مع الوقت ما عاد حتحس بيه ..
وهك المواقف في الحياة ، لازم تتخلى على امور وأشخاص و تكمل بلاهم ، رغم انهم كانو في يوم مصدر سعادة صح انهم حيخلو فراغ في قلبك ، بس يكفي انك ماعاد تتوجع و مع الوقت حتتعرف ع ناس جديدة و تصير تغييرات في حياتك حتسد جزء من هالفراغ ، وربي يدووم الناس الحلوا في حياتنا ✅*🤍 .*

_
اسلوبك المُحترم ، لبسك المستور ، عقلك الرزين ، ثقة اهلك فيك بدون خوفهم عليك ، سمعتك الطيبة ، بعدك عن التفاهات و صغار العقول .. ( قواعد غالية جداً ) ، و الحلو لما تكون ماشي و محافظ عليها و أنت فِ عمر صغير 🤍 .

_ ماني عليهم صالب
احمولي ولا منهم العينة طالب
ودور الخطأ مافيه واالي غالب
لا يكيدني لا نريد بيه انزابي
ماني عليهم عابي 🤍 .

_
وبالنهايه بكل صدقني صدقني حا توصل لمرحله مكنتش متوقع إنك توصلها بكل ، ح تتجاوز الي صار كله وكنت وقتها تقول مستحيل او ابدآ او مش ممكن نطلع من الي صاير وكيف ح نعيش ، ح تطلع من فترات التعب والنكد والاكتئاب ب صفه عامه لي فترات راحه وهدوء ونفسيه متريح ، ح تلز من قلبك ناس كنت تتمنى تبرد او تنتهي مشاعرك اتجاهم وح تمحي كل ذكريات الصعبه من حياتك وكأنهن مصارنش صدقني وحده وحده وكل شي يبي وقت والاهم من هضا كله إن ربي مستحيل يسيبك 🤍 .

_
"ماتخذلنيش فيك" الجملة هاذي متنقالش من فراغ تنقال بعد تنهيدة عميقة من شخص شبعان خذلان ف حياته لدرجة يبي يتعلق ف حد ميكسرش بخاطره حد يحس بالمعاناه اللي في داخل ، حد يكون قد الثقة اللي عطاها له ، حد معاه مش ضده ومتحمله في كل حالاته ، حد يبقي فاهم انه يتعامل مع شخص معش فيه حيل لاي حاجة 🤍 .

_
لما تجي تقمعز ع كراسي عقلك وتبحت في حياتك، تلقى نفسك كنت ديما الطرف اللي يعطي، الشخص اللي يسامح وينسى، كنت سند وظهر وقدع طول الوقت، تلقى نفسك طول الوقت كنت تضحي وتعطي ومترجش في مقابل، الشيء الوحيد اللي كنت تبيه انه يثمر فيهم ويقعدو، تجي تفرج تلقى نفسك فالاخير بروحك وكل اللي كنت معاهم توا مش معاك، كل حد فيهم خذا شيء معين حلو فيك وعدا، كأنهم كل حد فيهم كان قاعد بطريقة معينه يطفي فيك، وفعلاً نجحو فالشيء هذا، لدرجة انك مش فارق معاك ولا شيء حتى نفسك، قعدت زاهد وطافي، وكل عيبك انك كنت كويس ديما بس 🤍 .

_
‏ماتنزلش قدرك ✅*❗.
في حاجات متقدرش تعاتب عليها ، نفس انك تعاتب شخص لأنه نساك ، شن بتقوله؟ انتَ جديات نسيتني ؟هكِ تقلل من نفسك وتجبر فيه يعطيك مشاعر هو أصلا مش حاس بيها ، اللي يبيك مش ح ينساك صدقني ، ح يقعد متذكرك في يومه ، في حياته كلها، مش ح يقدر اصلا ينساك لأن زحمة وجودك موجودة بينه وبين نفسه ، ورد بالك تصدق موضوع الظروف كلنا عندنا ظروف ، التلفونات امعاهم حتى وهم في الحمام (حشى القارئ) 🤍 .*