(( نعي للعليله ))

يبويه اخلافكم مدري اشدهاني
وجـرح افــــــراگم غــــير ألواني
يبويه الشيب مـن زغـري غزاني
اتاني اضعــونكم وحسب ثواني

متى اتعـودون وعيــوني تراكم
ويلتــم الشـمل وگعــــد اوياكم
وكحل العيـــن وستورح هواكم
ترى ما غمضـــــت ليـله وراكــم

يهلي ادخـــــيل لا تنسون بتكم
زماني اردود ما ضــــني يردكم
شگل للــــدار لو ناشــدت عنكم
ظلمه اصـــبح ولاينطب محلكم

موحش صـار يهل الشيم. بتكم
عليه اشـلون ما ينگـــطع. بتكم
حزينه اواگفه اعله الباب. بتكم
وتناطــــر اضـــعون الغاظـــريه

الخادم
كامل السعيدي

#يابوصالح

اتخـــــــــــــيلك لمن  هاجـت آلامــك
تشوف حسين صدره نسحگ جدامك
تركض بالطفوف واحافـيه اجـــدامك
تغيث حســين ساعه اوساعه بيتامك

اتخـــــيلك لمـــن رحـــت لرقــــيه
تطيب خاطــر المبيوگه ترچـــــيه
اتخفف سيدي امن آلامها اشــويه
وتضمها الصــدرك المتروس حنيه

اتخيــــــــلك لمن تركض وتعـــثر
تلم بوصال جسم حسـين الموذر
ونار ابداخـلك لجل الطفل تسـعر
وللفـــرن عگب وليــــانهن بالبـــر

كامل السعيدي

مجاراة لصاحب الزمان الامام المهدي عج

#الناس_تنام وانت مگابل همــــــومك
اعله طاري الشام دوم مشگگ هدومك
ما تنلام. خـــــــــــدر الله بهزيل النوگ
الله يلوم كلمن سيـــــــــــــدي يلومك

✍️الشيخ حيدر الحميداوي
ـــــــــــــــــ

#الناس_اتنام وانت مساهره اعيونك
اوي ورد المخـــــــــــيم ذبلن اجفونك
مو بس زينب الضاگت عذاب السوط
احس اتزورگن وي زينب امتـــــــونك

✍️كامل السعيدي

نعي للاب ..

آخ الابو مـــــاكو بغلاته
ياسورنه ويالحلوه ذاته
يبجن اعيوني ورايداته

گاعد على دربه وتاني
بلچن يرد حلو المعاني
لبعيد راح ويتـــــماني

اليل اخلصـــنه ابونيني
عالراح مني ومايجيني
من البچي لعميلي عيني

وسفه النحس يمه ابمهابه
عنه مشه ومســــدود بابه
تدمــي الگلب لوعة غيابه

ريحت ابونه التارسه الدار
نلتــــم عليها ازغـار وكبـار
مايدري هسه بحالنه اصار

مالحـظه يالوالد نســـيتك
وحشه وعلي ليهسه بيتك
روحي اطلعت من ودعيتك

✍كامل السعيدي

نعي للاحبه.

خلص شهر الصيام وباچر العيد
ورگد ردني ابكثر مادمع مشيت

من حسره اعله حسره امخلص اليل
وصد للبيت ظلمه اخلافك البيت

ردت طيفك يمرني اتعطلت ليش
ناس اهواي اجت بس انته ماجيت

نحل جسمي ورگد بغيابك الحيل
وكثر ما عاتبك من روحي مليت

كامل السعيدي