#Jadidlar_izidan

*Kuni kecha tumandagi umumiy o‘rta ta’lim maktablarining o‘quvchilari o‘rtasida “Jadidlar izidan” respublika tanlovining tuman bosqichi bo‘lib o‘tdi. Ushbu tanlov o‘quvchilarni jadidlarimizning ma’rifiy merosini o‘rganishga chorlab, ularning hayoti va faoliyatini anglashga katta imkoniyat yaratmoqda.

Prezident Shavkat Mirziyoyevning 2024-yil aprel oyidagi Andijon viloyatiga qilgan tashrifida bildirilgan tashabbusga ko‘ra, mamlakatimiz ta’lim tizimida jadidchilik g‘oyalarini targ‘ib etish, o‘quvchilarga tarixiy qahramonlarimizning ta’lim-tarbiyaga qo‘shgan hissasini anglatish muhim yo‘nalish sifatida belgilangan edi. Shu munosabat bilan Maktabgacha va maktab ta’limi vazirligi tomonidan “Jadidlar izidan” tespublika tanlovi tashkil etilib, bu borada nizom ishlab chiqildi.

Tumandagi joylashgan 21-umumiy o‘rta ta’lim maktabi (1-sektor) va 11-umumiy o‘rta ta’lim maktabi (2-sektor) mezbonlik qilgan tuman bosqichida jami 200 ga yaqin o‘quvchi ishtirok etdi. Natijada 57 nafar o‘quvchi tanlovning keyingi bosqichida qatnashish uchun yo‘llanmani qo‘lga kiritdi.

Ma’lumot uchun, 3- va 4-sektor bosqichlari bugun, 30 oktabr kuni o‘tkazilishi belgilangan.

Shofirkon tumanidagi “Jadidlar izidan” tanlovi yoshlarimizni ajdodlarining ma’naviy merosi bilan tanishtirish va o‘quvchilarda tarixiy bilim va ma’naviy ongni mustahkamlash yo‘lida muhim qadam bo‘ldi. Bu yosh avlod uchun ma’rifatparvar jadidlarimizning qimmatli o‘gitlaridan o‘rganishga katta maktab bo‘lib xizmat qilmoqda.*
*✍️Shofirkon tumani hokimligi axborot xizmati*

#Ona_tilim

"O'ZBEK TILI - MEHR TILI"
Til - insoniyatga berilgan eng buyuk ne’mat, o‘tmish va kelajak orasidagi ko‘prikdir. Tillarning yo‘qolish xavfi oshib borayotgan bugungi globallashuv zamonida ona tilimizni asrab-avaylash, uning sofligini ta’minlab, kelajak avlodga yetkazish har birimizning fuqarolik burchimizdir.

Respublikamiz bo‘ylab "Davlat tili haqidagi" qonun qabul qilinganligining 35 yillik tantanalari har yilgidan-da fayzli va shukuhli o‘tkazilmoqda. Shofirkon tumanidagi ko‘zga ko‘ringan ta’lim muassasalaridan biri bo‘lgan 3-umumiy o‘rta ta’lim maktabida ham O‘zbek tili bayrami kuni yuqori saviyada tashkil etildi. Tadbir qadimgi turkiy til siymosining jozibali chiqishi bilan ochildi.

Maktab o‘quvchilarining ona tiliga bag‘ishlab ijro etgan she’riy chiqishlari va o‘qituvchilar tomonidan tayyorlangan sahnaviy ko‘rinishlar tomoshabinlarda o‘zgacha taassurot qoldirdi. Milliylikni o‘zida mujassam etgan kuy va raqslar, laparlar guldastasi tadbirga yanada ko‘rk bag‘ishladi.

Tadbirda O‘zbekiston Respublikasi Fan va ta’lim kasaba uyushmasi federatsiyasi Shofirkon tuman bo‘linmasi rahbari X.D. Hakimov ishtirok etib, yig‘ilganlarni O‘zbek tili bayrami kuni bilan muborakbod etdi. Tadbir yakunida maktab direktori B. Ahrorov so‘zga chiqib, G. Barotova boshchiligida tayyorlangan ushbu tadbir yosh avlodni ona tilimizga muhabbat ruhida tarbiyalashda muhim dasturilamal bo‘lib xizmat qilishini ta’kidladi.

*✍️***Shofirkon tumani hokimligi axborot xizmati

#Saylov_oldi_uchrashuv

*Shu kunlarda saylovoldi jarayonlari jadal sur'atda davom etmoqda va O'zbеkiston Xalq dеmokratik partiyasi ham mamlakat kеlajagini bеlgilashda muhim o'rin tutadi. Xususan, O'zbеkiston XDPning Shofirkon tuman Kеngashi tomonidan tashkil etilgan tadbirlardan biri qizgʻin oʻtdi. Tumandagi 9-son musiqa va san'at maktabida O'zbеkiston Xalq dеmokratik partiyasidan Oliy Majlis Qonunchilik palatasiga nomzod Bahodir Hayotovning ishonchli vakili hamda shu partiyadan viloyat Kеngashiga nomzod Dilorom G'afforovalarning saylovchilar bilan uchrashuvi bo'lib o'tdi.

Uchrashuv davomida saylovchilar nomzodlarning tarjimai holi va ularning saylovoldi dasturlari bilan tanishish imkoniyatiga ega bo'lishdi. Ushbu uchrashuv mazmunida xalqni qiziqtirgan asosiy masalalarga alohida e'tibor qaratildi. Bahodir Hayotov va Dilorom G'afforovalarning dasturlari mamlakatimizda kuchli ijtimoiy siyosat orqali ijtimoiy barqarorlikni ta'minlashga qaratilgan bo'lib, har bir inson uchun ijtimoiy tеnglik va adolat tamoyillari asosida munosib yashash sharoitlarini yaratishga yo'naltirilgan.

Mazkur dasturda nogironligi bo'lgan shaxslarning huquq va manfaatlarini himoya qilish masalasi ham katta o'rin tutadi. Nomzodlar pеnsiya yoshini o'zgartirmasdan, pеnsiya va ijtimoiy nafaqalarning insonning hayotiy ehtiyojlarini to'laqonli qondirishga еtarli bo'lishi uchun choralar ko'rishni maqsad qilib qo'ygan. Shuningdеk, aholini arzon uy-joy bilan ta'minlash, qurilish sohasida samarali nazoratni amalga oshirish, va fuqarolar uchun sifatli kommunal xizmat ko'rsatish darajasini oshirish kabi masalalar ham nomzodlarning saylovoldi dasturida aks etgan.

Uchrashuvda ta'lim sohasiga ham alohida e'tibor qaratildi. Nomzodlar barcha fuqarolarga ta'limning turli yo'nalishlarida tеng imkoniyatlar yaratishga qaratilgan choralarni amalga oshirish niyatida ekanliklarini bildirishdi. Bu esa Xalq dеmokratik partiyasining har bir insonning shaxsiy rivojlanishi va barqaror ijtimoiy hayotga erishishi uchun shart-sharoitlarni yaratish maqsadi bilan muvofiq kеladi.

Mazkur uchrashuv saylovchilar tomonidan katta qiziqish bilan qarshi olindi va ular nomzodlarning dasturlari haqida o'z fikr-mulohazalarini bildirishdi.
*✍️**Shofirkon tumani hokimligi axborot xizmati