بميلاده ونهني الدنيا بميلاده

هذا حسين الما ينسانه
بميلاده الوادم فرحانه
يوم المحشر هو حمانه
وين اليرفع ايده ويانه

ويهوس ويدگ چفوفه

ميلاد الجنه بهليله
وللمهدي الحجه نهنيله
يا زينه اليوم نخليله
ويا محفل راح نسويله

چكليت نطش بكل ديره

يا روح الروح ويلوالد
محتارين وربنه الشاهد
شلون انرد افضال القائد
بيش نضحي وبيش نجاهد

خدام وبسمك جنينه

بهلالك شعبان اعيادي
بايامك مولوده اسيادي
يا فرحه الطشت ببلادي
افرح هوس صفگ عادي

هاي الفرحه الما ننساهه

لو ما انته النار امچاني
دمك طهرني وخلاني
افخر خادم بين اقراني
اسمك يحسين السواني

لو ما انته الدنيه شبيهه

فظلك ما انساه وخادم
يمضحي بعبد الله وقاسم
يموذر والحبك سالم
دايم فضلك زودك دايم

شنوافي اعذرنه شسوينه

تمت ** رعد الفريجي

زينب صاحت عباس هل هلاله

يا شعبان بيك ارواحنه تهيد
ميلاد الشموس وچنك العيد
ذوله اهل الشرف ذوله الاجاويد

صارو رحمه الناس
هم حسين عباس

المهدي ونور السجاد هذا گباله
زينب صاحت عباس هل هلاله

صار اليوم كافل چنه الحسين
هذا ابن الهلا وابن الدواوين
هذا الشوف للدلال والعين

هذا اليعدل المال
لمن صار خيال

هذا وهو زغيرون شال دلاله
زينب صاحت عباس هل هلاله

يفرحة فاطمه بهالنور من صار
الزهره تهني اختهه بشمعة الدار
يكرار وصبح لحسين فقار

ذني چفوفه الاثنين
ذبهن قربه لحسين

هذا الساقي النهران تمشي بجاله
زينب صاحت عباس هل هلاله

من ارض المدينه لارض الطفوف
قصة خوه حلوه وعشرة چفوف
عشرة اخت حره وشهم موصوف

قصة ماي للماي
كفيل امبچي الهواي

هذا اليرعب عدوان بس خياله
زينب صاحت عباس هل هلاله

هذا حزام ظهر العتره عباس
اخوي من الچفوف الليله ينباس
هاي الليله طلعو شعدكم احساس

حيدر صارله انسان
يگله الماي عطشان

واخته الحره الحوراء تمشي بجاله
زينب صاحت عباس هل هلاله

كلمات الخادم / رعد الفريجي

هلا بشعبان واعياده هلا ومية هلا

----------------------------------------------

ميلاد الحسين وشمس ينشاف
ودمعنه من العيون اليوم ينشاف
الگلب صابه العشگ والنظر ين شاف
ابو السجاد صار بهلمسيه

گمر مولود رابع يوم شعبان
وضواه اعله الخلگ عباس شع بان
ابد لا مو شعب فرحان شعبان
شعب الارض وي شعب الثريه

يخامس يوم من شعبان هليت
ابو الباقر يشمس الكون هليت
الف اهلآ ينبض الگلب هليت
الف مبروك عيد الجعفريه

الك هذا النهر صاير والكبر
انته حسين اي والد والكبر
اهنيك انولد مهدي والاكبر
وحبيبة گلبك الطيبه رقيه

هذا ابن الحسن للخير قاسم
بالطف چم ظهر ليزيد قاسم
اذا گلنه الشجاعه انگول قاسم
واذا گلنه الكرم ما نجزي ابيه

الك شجرة عشگ بالروح مو عود
يمن بالنصر والتغيير موعود
نتاني ابكربله وهناك موعود
نشوفك يا أبن ضلع الزچيه

كلمات الخادم / رعد الفريجي

حنيتلچ مدري شكثر
من اذن بوكت الفجر
مشتاگلچ مر الصبر يمه

--------------------------------------------

مو سالفة أم وأبن
مو سالفة عين وجفن
انتي الوجود المندفن والله

خليتي عين بلا ضوى
تعبان محتاجچ دوى
مخنوگلچ وانتي الهوى والله

ما ينحمل ،، يمه الفراگ ادخيلچ
ما ينحمل ،، بيني الگبر ما بينچ
وين اتجه ،، ضيعت شوف عيوني
وين اتجه ،، وين الدرب دلوني

دمعاتي بغيابچ جمر
من اذن بوكت الفجر
مشتاگلچ مر الصبر يمه

----------------------------------------

تنام البشر بس آنه أظل
هذا الوداع الماله حل
تايه وآنه بدار الاهل بلوه

تگومني چلمة يا علي
واتوچه ما ظل حيل ألي
ميته وأحس ماتو هلي بلوه

يمه الالم ،، بالگلب ياكل بيه
يمه الالم ،، خشبه ابوصط جمريه
ما ظل حچي ،، هذا الدهر سواهه
ما ظل حچي ،، ضم ضحكتچ ضماهه

راح الدفو وراح العمر
من اذن بوكت الفجر
مشتاگلچ مر الصبر يمه

------------------------------------

ما نمت ساعه ولا هِدت
أذن بچيت وكبرت
بدموعي وين أمي صحت حيره

حاچيني مو حيلي إنهب
تعبانه ؟ لا شنهي التعب ؟
نوم الفجر يمه شعجب حيره

حان الفرض ،، السبحه وتربتچ هايه
حان الفرض ،، واضلوعي المصلايه
تحت الرمل ،، ما ينسمع تسبيحچ
تحت الرمل ،، گليلي يمه دخيلچ

آه يا دليلي المنكسر
من اذن بوكت الفجر
مشتاگلچ مر الصبر يمه

----------------------------------------

ما ينحمل يمه البعد
توجعني چلمة ما ترد
يم گعدتچ أوصل وأرد وينچ

واحظن عباتچ وانتچي
ويخلص بعيني البچي
واحچيلچ وكل الحچي وينچ

ماتت تره ،، صوت الوداع أذاني
ماتت تره ،، جثه بنعش خلاني
امك مشت ،، شيرجع المدفونه
امك مشت ،، آه يا اللهي العونه

مو شده ايام وتمر
من اذن بوكت الفجر
مشتاگلچ مر الصبر يمه

----------------------------------------

راحت بقت بس اسئله
ليش اليفارگ أم أله
يبچي بسماع البسمله صعبه

لن بيهه يومه اليبتدي
لو صاحت الغالي إولدي
يلطيبه أگعدي ورددي صعبه

وين الحظن ؟ ،، وين الهلا البعيونچ ؟
وين الحظن ؟ ،، مو مالت ايدفنونچ
عمري انتهى ،، يا يمه بس رديلي
عمري انتهى ،، خلصتي شوفي وحيلي

ظل الونين المستمر
من اذن بوكت الفجر
مشتاگلچ مر الصبر يمه

كلمات الخادم / رعد الفريجي
10/ جمادي الاولى / 1446
ثوابها الى روح والدتي

قريبا ،، لأستشهاد السيدة فاطمة الزهراء عليها الصلاة والسلام

قصيدة من اذن بوكت الفجر

مع اقتراب السنة الاولى لذكرى رحيل والدتي خادمة الزهراء أم رعد الفريجي

-----------------------------------------

دارت سنه بس كلشي تعبان
ظهري انحنى والشوف خلصان
كبرني موتچ بلوه فرگاچ
حسبالي أگعد ضني حلمان

مصباح چان شلون مصباح
نبدل صباح الخير بصياح
ميلوگلچ هلگد تنامين
سهرانه ليلچ واحنه نرتاح

گعديلي بالعباس مصدوم
يا يوم الاسود چان مو يوم
هذا الخبر موتني والله
آخر نفس بانسان معدوم

ظليت انازع لوني مخطوف
اركض عليچ وچني مچتوف
من البيت للمستشفى احاچيچ
لا چلمه لا من شيلت چفوف

گالولي ماتت والجدم مات
گمت وطحت مو مره مرات
چا غير دمعه اتطيح وارتاح
صار البچي بلراس شيبات

شحچي وشگلچ شده العتاب
مرت سنه متانيچ علباب
ها يمه الله يساعدك جيت
گوليهه يمه وليدچ تراب

خليتي بيتچ حيل بارد
واحد ينوح گبال واحد
ظل المكان البيه تگعدين
يجمعنه فاگد ويه فاگد

تمت / رعد الفريجي
12/11/2024 الاثنين

بعد انتهاء زيارة الاربعين وعودة كل خدمة وزوار الحسين الى ديارهم كأني رأيت الحوراء زينب وهي تخاطبنا جميعا فتقول :
......................................................

ها رجعتو من الزياره ؟    
كلمن يروح اعله داره !!
انه بله ويـــــــن اروح ؟     
بيتي خالي بلايــا روح

انه زيــنب  انه زيـــنب
____

طيحو كل المواكب والدرب وحشه انملى
وردو الخدام ردو كلمن يـــــــــروح لهله
چانت تواسيني دمعه وچلمـــة تفضل هلا
بالطريق وياي چانو والدمــــــوع مسبـله

بالمجالس والعـزاء      
من وصلنا لكربـــلاء 
    وانا ويــــاهم انوح    
  بيتي خالي بلايا روح
    انه زينب : انه زينب

رجعو الزوار وانا ياهو اليــــــردني لهلي
راح اهز شباچ گبره بلكي يـــــگعد كافلي
گوم يلكلك محنه گوم وديـــــــــــني لعــلي
ارد اگله شلون زينب تبقى بويه بــلا ولي

مو وكت عينك تنام  
ولو مصيوبه بسهــام
خويه چتاله الجروح  
بيتي خالي بلايا روح
انه زينب : انه زينب

شرد اجاوب علشماته السألو  يــــــعود الاخو ؟
والله وسفه وطلع صوته الچان لا گدهه وكفو
دنيا خلت بيتي خالي لا كفيــــــــــــــل ولا ابو
الفگدت الخوان بله هم تــــــــــــسولف علدفو

شرد اجاوب لو حچــيت     
يا علي وسفه بچيــت 
وين ابو الوجه الصبوح    
بيتي خالي بلايـا روح
انه زينب :: انه زينب

حظني خويه بلا رقيه وعيني والله بلا ضــــوى
حسين من بنتك جبتلك صوغة دموع وهـــــوى
خويه تعرف هالعبايه السوط من عـــدها ارتوى
اي نعم مالت رقيــــــــــــــه خلهه لجروحك دوه

غطي نحرك بالعبـــات     
  بلكي ترجع للحيـــــاة
   بيهه عطر الما يـروح     
  بيتي خالي بلايا روح
   انه زينب :: انه زينب

گلبي ما ينطيني اودعك واذكــر وداع الحــــــرب
بالطفوف الموت يخنگ والنفس كــلش صــــــعب
چان حتى الماي خاين شال سيفه وي الغـــــــرب
لمة الخوان راحـت راح عبــــــــــــــاس العـــــذب

طاح گلبي ويــــــا اللوى   
متنه يــــــــلكافل سوى 
راح ابو الگلب السموح   
بيتي خالي بلايـا روح
   انه زينب :: انه زينب

ودعتكم وامشي وحدي وانا كــل خطوه الـــتفت
ما يتركوني النشامى وما يعوفون الاخــــــــــت
والمسافه تطول وابچي والله يـــــــــــلكافل متت
گبل ممسويهه خويه ليش مو بسمك صـــحت ؟

شنهي ميــــت يلكفيـــل    
  اقتنـــــع الا بدليــــــــل 
صعبه اعيش بلا طموح    
  بيتي خالي بلايا اروح
    انه  زينب :: انه زينب

كلمـــات الخادم  / رعـد الفريجي

يخلص   محرم     ويروح
وابقه انه خادم    مجروح
غير  انته روح  وي الروح حبيبي

،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،

راح   الدمع    گالو   راح
وطاح الگلب يمكن طاح
چا بعد بيش انه   ارتاح 

بعده   بهدومي   العطر    من     المواكب
هنا   خدمنه  هنا  بچينه  اعله  المصايب
حسين ابونه حسين اخونه وهوه صاحب
آه   يا   لذت    محرم     وين        غايب

تجمعنه   لو     مختلفين
دربك دربنه       وماشين
شكرا  يبو الغيره حسين حبيبي

،،،،،،،،،،،،،،،،،،،،،،،،،

مو  شهر تأثيره  اعوام
دمعه ودروس واحكام
مختصر كل    الاسلام

والله   الك   حنيت  چنك  شيلة     أمي
خلصت   شبساع  ناوي   تزيد       همي
الرايه   ما    انزلهه اگل    للريح    شمي
بيهه  اسم   حسين  فدوه لأسمه  اسمي

ابقه    بسوادي    لعيناك
وي روحي مجلس اقراك
تقبلني     خادم      وياك حبيبي

،،،،،،،،،،،،،،،،،،،،،،،،،،،،،،،،،

كل ارض ارضك والله
وكل  الزمن   عاشورا
محله الحزن يا محلاه

حسين يا جرح الارض    شاهد   سمائك
برزخ     الميتين      ناح       الكربلائك
لهسه    تبقه    تفور    ما   تبرد   دمائك
الأ   امك    فاطمة      تحضر     عزائك

وتصيح  دلالي  انصاب
يوليدي ما همني  الباب
دم   بلحيتك    وتراب حبيبي

،،،،،،،،،،،،،،،،،،،،،،،،

رب  العرش    يا   مولاي
خليني     للعام     الجاي
وفقني  اخدم  بس  هاي

ما  اريد  جاه  ولا  ردت  سمعه  ومكانه
هوه  انه لوما  خدمته  ما  أصيرن    آنه
ارجع وادگ صدري  وأون  واصرخ هوانه
ضحه  ابنينه  وعيلته   ونحره   وحمانه

بس  گلي  هم  نوافيك ؟
منطينه كلشي شننطيك ؟
خافن   عملنه     يأذيك حبيبي

،،،،،،،،،،،،،،،،،،،،،،،،،،،،،،،،،،،،،،

علمت  الاحساس  احساس
يحسين    كلك        عباس
بس   بيك   لازم      تنقاس

هوه  انته وحدك  ما  الك  واحد  يشبهك
يحسين    حبيتك   لان   ربك       يحبك
اعذرني مو  بالمستوى وباقي اعله  دربك
بس  انته  خير   ما  ترد حتى   اليذبحك

يابو الهلا  وسهله تهون
يم بابك انطش  عيون
احسبني خادم مجنون حبيبي

كلمات الخادم / رعد الفريجي

لملمت دمعك محرم والمجالس غربــت
خلصت هاي الزياره بسرعه راحت وانتهت
وينكم :: ليهسه زينب يم اخوهه
وينكم :: يا شيعه ابـد لا تتـركوهه
وينكم ... وينكم
،،،،،،،،،،،،،،،،،،،،

لا تروح ابيش احلفك ابقه لآخر دنيتـــــي
يا محرم بيه حسره وانته تندل حسرتــــي
انه شيعي وگلبي يبرد شنهي نفعچ دمعتي
لو يكفون المجالس بيمن اطلب حاجتــــي

وداعتك ما عندي بس ايامك
وداعتك يخلص صفر گدامك

واگف بنص المدينه حتى الاعلام اختــــــفت
خلصت هاي الزياره بسرعه راحت وانتهت

،،،،،،،،،،،،،،،،،،،،،

يلتحبون المجــــــــالس اني دلالي انفطر
گلبي علردت وحيده ها يخــــواني انكسر
امشونه وياهه بدمعنه ونلطم ابصف النهر
لهسه تنتظر رجوعه وينه عبــاس الگمر

متانيه بلكي يرجع بالســـلامه
متانيه ويمهه منتظره اليتامه

صار دنيا غروب زينب اه يا وسفه أوبـچت
خلصت هاي الزياره بسرعه راحت وانتهت
،،،،،،،،،،،،،،،،،،،،،،،،،

بعد كل ذيچ المواكب والطريق المزدحم
هسه بردانه الشوارع والمدينه بلا اسم
وينكم ضعن العقيله هسه لازم ينخــــدم
ما تشوفون السبايه هل اجن موتى الزلـم

عيونهن بيهن ادموع وسؤال
عيونهن هذا حدنه ويه الدلال

چم يتيمه اليوم حضرت علحسيـــن وسلمت
خلصت هاي الزياره بسرعه راحت وانتهت
،،،،،،،،،،،،،،،،،،،،،،،،،،

زينب مقصرين والله شما نقدمــــلچ ترى
لا نحر لا چف يزينب لا جثثنه مـــــوذره
حيل نتأسف واجينه وردنه بس المعذره
احنه ردنه الدنيا وانتم النه ردتو الاخره

ذنوبنه ما يظلن لو خدمنــــه
ذنوبنه واحنه يا زينب ندمنه

الدنيا عشرتهه ثواني وتخلص شما طــولت
خلصت هاي الزياره بسرعه راحت وانتهت
،،،،،،،،،،،،،،،،،،،،

ترجع الضحكه لوجهنه وننسى كل ذاك الدمع
الف وسفه شلون زينب ما وفينه ويا الضــلع
كون نلطم عام واكثر صدر كـــــــــامل ينشلع
لحد مـــــا نتوفى كلنه بهيـــــــج منظر نرتفع

چفوفنه كون ننطيـــــهن ثواب
چفوفنه تشيل جثته من التراب

عمت عيني حسين جثته اعلى الرمال توذرت
خلصت هاي الزياره بسرعه راحت وانتـــهت

---------------------------------------

ياهو يضمن راح نخدم والعمر ما ينضمن
خاف جوه تراب كلنه وبعد مـــا نگدر نون
ونذكر ايام المجالس حيل نشتــــاگ ونحن
علحسين بطعم ثــــــاني آه يا محله الحزن

بدونكم ماكو لا راحه وهوى
بدونكم بليل مدفون الضوى

والكواكب بالمجره لا حمد لا سبــــــــــــحت
خلصت هاي الزياره بسرعه راحت وانتهت

كلمات الخادم / رعـــد الفريــجي

ياهو الگال ميت حارت الناس
علي رد للقتال وأسمه عباس
ابا الفضل ابا الفضل ابا الفضل علي

-------------------------------------------

حشمو الخيبري وحضروله بيبان
واذا موجود أبن ود لو عدل چان
گلوله رجعلك گمر عدنان
طلع حيدر جديد بغير عنوان

اسمه الفارس الأوحد
طبعه الحار ما يبرد
هوه ايفضهه من تشتد ابو فاضل

يا طف يا عطش طبهه
بخزرة عينه يگلبهه
رد الوادم الربهه ابو فاضل

زعل عباس والله اليستر بهايه
مو بالسيف لا تذبحهم الرايه
شرد نهر الفرات وما لگو مايه
شبيهم جيش كامل ما حچه احچايه

شد الراجل بالخيال وذبهم فوگ العسكر

--------------------------------------

الف هنيال حظنچ لبوة حزام
ابا الفضل الامير وكلهه خدام
تعالي وشوفي جيش اتحول اقزام
بس شافو الريشه وطاحت اعلام

صگار الحرب نادى
هذا الجيش وافراده
اريد اليوم تعداده ابو فاضل

اشوف ازلامهم قله
هيچ الحرب ما تحله
تخلص فورت الدله ابو فاضل

ها يحسين يمي وابد لا تهتم
من يم النهر للخيمه اخلي الدم
اخوك وطب عليهم غاضب امحزم
اخلي اصلابهم بالسطره تتكلم

الله اليستر من عباس الميت شارد بالطف

------------------------------------------

يا سبعين الف طب الهه عناي
وين الناس وين الگطعو الماي
قِسم ضَمه التراب الباقي حفاي
بس الخيل تركض مو حرب هاي

سكته ولا نفس منهم
وين الگاع التضمهم
كلهم خلصو كلهم ابو فاضل

رحى وتطحن بحرگه
ياهو الظال ما تلگى
حگه لو زعل حگه أبو فاضل

يحسبونه شجاع وسيد أيامه
اليوصل للكفيل وثابته أجدامه
علي بچفوف كافل زينب احزامه
ما موجود فارس يبقى گدامه

الكافل طم الوادم گبل الحيهم بالميدان

------------------------------------------

حراس الشريعه شلون حراس
كلهه تصيح يرهب طول عباس صاحو والهوى ميعين الانفاس
هذا الي يفرق الجسد علراس

هذا المحد ايرده
فقار الغضب عنده
واجب صارت الشرده ابو فاضل

اليسلم منه بالحومه
الما ذب روحه وهدومه
يصبح فارس الگومه ابو فاضل

وصل للماي هذا الكافل هنانه
صيف وبالظهر والناس بردانه
بعد ما شال سيفه وسرفن ردانه
صاحو عطوه بس خنشيل موتانه

ظل اليسمع بالعباس ايضم اچفوفه وراسه

-----------------------------------------

صوت گلوب ترجف صار مسموع
دخيلك يابو فاضل تحچي الضلوع
شبيهه اعيونهم بس صفنه ودموع
غير الموت بالطف ماكو موضوع

يبدي السالفه بكيفه
معلگ لو حچه بسيفه
معدل ما يرد ضيفه أبو فاضل

يدري وهو يختاره
يحصد روس بتاره
اهلا صاحب الشاره أبو فاضل

ملك ارض القتال وعلنهر ثنى
نطق ماي الفرات وگاله اتدنى
انه العطشان الك يا ريحة الجنه
مد ايدك عليه وخلي اتهنى

شلون حسين يظل عطشان اليوم اچفوفي اتطمك

كلمات الخادم / رعد الفريجي
محرم الحرام 1446
ثوابها الى روح والدتي