حمله دايره بخصوص بعض اللينكات تحت مسمي عروض ال CPA او أفكار من نوعيات ال SPAM.

عن عروض بلبن او منتجات شي إن يليهم بعض الروابط الأخري ممنهجه بنفس الطريقه.

نزلت 300 بوست سابقا عن المواضيع دي زي نظام العماله الغير منتظمه ومجموعه شركات فلان الفلاني ومنحه فلانيه من طال عمره وبعض العبث ده.

حاول تتجنب الوقوع في الفخ ده ولو انت عندي ع فيسبوك راجع تجميعه البوستات في البوست المثبت ع أول بروفايلي.

بالتوفيق ❤

سلام الله عليكم

فى أخبار متداوله إن بعض مستخدمي واتساب على أنظمه الأندرويد بيوصلهم إشعارات بالتحديث الجديد من واتساب.

بخصوص نظام الباك أب أو النسخ الإحتياطي على خدمه جوجل درايف.

من المتعارف عليه سابقا أو حتي وقتنا هذا عند البعض إن كل الداتا الخاصه بواتساب زي الصور والفيديوهات والشات بيتعملهم باك أب أو نسخ إحتياطي على خدمه جوجل درايف ولكن كانت منفصله بشكل كامل فى جزئيه المساحه أو إستهلاك المساحه المجانيه بقيمه 15 جيجا.

للتوضيح: عمليات الباك أب الخاص بواتساب كانت بتروح على جوجل درايف ولكن فى نفس الوقت مساحه الجى ميل الخاصه بيك منفصله عن حجم الباك أب اللى بيترفع على جوجل درايف.

--------------

الجديد واللى هيحصل كالأتي إن أى باك أب ع واتساب أو نسخ إحتياطي هيبتدي إنه يتحسب من ضمن إستهلاك الباقه المجانيه 15 جيجا.

فا بالتالى هيترتب ع ده بعض الأمور اللى لازم تاخد بالك منها

الصور والفيديوهات وغيره اللى ع موبايلك فعليا وبترفعهم ع الجي ميل الخاص بيك + الميديا الموجوده فعليا على واتساب لو حد بيبعتلك فيديوهات أو صور كل ده هيكون مشتمل ضمن الباك أب فا بالتالى ال 15 جيجا هيتملوا ومش هيبقى عندك مساحه على الجى ميل.

هيترتب على ده إن المساحه لو إتملت بعض الإيميلات مش هتجيلك ع الجى ميل > هيحصل أخطاء فى الباك أب > وهتضطر وقتها إنك تدفع إشتراك عشان تستخدم مساحه أكبر أو تتنازل وتحذف بعض الملفات من الجى ميل.

اللى مطلوب منك إنك تراعي الملفات وأحجامها واية اللى المفروض تحتفظ بيه وايه اللى المفروض تستغني عنه عشان تفضل محافظ على مساحه ال 15 جيجا المجانيه بدلا من دفع رسوم إشتراك لمساحه أعلي.

التحديث مستمر وهيوصل لكله بشكل تدريجي - متسناش تعرف غيرك.

بالتوفيق ♥️

اعتقد إن فى عطل فى خدمات شركه " ميتافيرس " حاليا إبتدي بإصابه فيسبوك ثم التالي...

تنويه هام:

قرار نهائي من شركه Google بحذف الحسابات الغير نشطه بشكل كامل.

بمعني ان لو عندك جي ميل بقالك فتره كبيره مش بتفتحه هيتحذف بكل الداتا اللي عليه سواء صور - فيديوهات - باك اب - جهات اتصال ...إلخ.

فا لو عندك حساب حاول تفتحه وتخليه نشط.

بالتوفيق ❤

تقرير شركه ( فوري ) النهارده بشكل نهائي.

الإجابه النهائيه إن تم تأكيد الإختراق وتسريب بيانات العملاء وده كان واضح من بدري ولكن مجرد هندله للوضع فقط لا غير.

معنديش أدنى مشكله إن يتم التعرض للإختراق وفي مئات الشركات حصل عليها هجوم من نوع الفديه خاصه الــ LockBit.

ولكن لازم تعترف بده بدلا من إنك تقول إحنا عندنا أعلي معايير الأمن السيبراني.

بالتوفيق ♥️

بأمر الله لما بيكون فى معلومه مؤكده وصحيحه ببتدي أشاركها مع الجميع هنا حتى لو كنت أخر شخص بيعلن عنها وده حفاظا ع توثيق المعلومه.

ولو المعلومه فيها نسبه شك بسيط ببتدي أحذفها حفاظا بردوة ع تشتيت الغير.

سواء كانت المعلومه دى مهمه للبعض أو حتى تافهه ( لكنها معلومه )

معنديش أدنى مشكله إن يكون فى تداخل فى المعلومات لدي البعض وأخطاء متوقعه ولكن مشكلتي فى ( إنتشار المعلومه الغلط ) دى الأزمه

المهم

فى بعض البوستات منتشره بخصوص ( فرض تقييد المحتوي ) بشكل عشوائي ومستخبي من فيسبوك فى قسم التايم لاين أو ال News Feed

أو بما تلقب بالــ Reduce أو تقليل التوزيع لبوستات الناس عند بعضهم البعض.

( الأوبشن مش جديد وقديم والهدف منه مرتبط بمعايير فيسبوك كما هو موضح فى الأسكرين لمعايير وقوانين فيسبوك البديهيه )

اللى بتقدمها كل منصه زى تويتر - تيك توك - يوتيوب وغيره من المنصات.

الأوبشن هدفه يأمنك وفى صالحك مش ضدك وهنا بكلمك من الجانب التقني.

أما من الجانب العاطفي فا إنت عايز تعمل شير لصور فيها ق*ل أو دم ومش عايز فيسبوك يحظر البوست أو يقلل توزيعه ؟

عايز تعمل شير لبوستات فيها لينكات Spam وإحتيال ع المستخدمين ولينكات بعض العروض المزيفه اللي بتطلب منك تحط بيانات الفيزا الخاصه بيك ويسيبهالك ؟

قيس ع كده كل اللى انا موضحهولك فى الاسكرين وهسيبلك اللينك فى أول كومنت

( اللى حصل إنه ساعد ع الحد من إنتشار النوعيات دى بدون تدخل منك )

لكن ليس له علاقه بالمحتوي المقترح أو المحتوي العشوائي اللى بيظهرلك

فى النهايه بشكر كل شخص بيحاول يقدم المساهمه فى توضيح المعلومات والحفاظ ع الوعي التقني لكن حاول تتحري الدقه قبل النشر.

بالتوفيق ♥️

أوبشن من فيسبوك كان متاح منه جزء والجزء الأخر لا ولكن نشرحه بشكل مبسط.

أوبشن إدارة البوستات اللى موجوده فى أكونتك متاح بشكل فعلي على الموبايل والويب.

تقدر من خلاله إنك تحدد على 50 بوست فى المره الواحده ع أكونتك وتحذفهم دفعه واحده بدل بوست بوست بشكل فردي.

المضاف على الأوبشن هو محاوله حذف البوستات اللى نزلتها على كل الجروبات اللى مشترك فيهم دفعه واحده.

البعض منكم ممكن يكون متاح عنده الأوبشن والبعض الأخر لا ولكن هيكون متوفر عن قريب للجميع.

تنويه: حاول تعمل أبديت للتطبيق لو إصدار قديم وشوف متاحلك ولا لا

بوست من نوع مختلف شويه كنت أتمنى إنى أقابله فى طفولتي بشكل عام.

عندى ع بروفايلي إخوات شباب وبنات والبعض منهم متزوج وعنده أطفال

بناء ع أنماط أهدافك فى تحديد عقليه إبنك هو طريقه تفكيرك إنت بشكل شخصي.

فا من ضمن الأشياء اللى بتساهم بتطوير التفكير المنطقي لمعظم الأطفال وبتساعدهم بشكل ترفيهي بعض الألعاب اللى مصحوبه بإفاده تعليميه.

مثال: الشطرنج , البرمجه وخلافه

فا هل طفل عنده 5 سنين أو 7 أو 8 مخه هيستوعب البرمجه ؟

فا هنا دوري إنى أعرفك عن لغه السكراتش أو scratch

واللى من خلالها يقدر إبنك ينشىء قصص أو ألعاب أو رسوم متحركه بطريقه برمجيه ترفيهيه.

منها طورت مهارته فى إستخدام الكمبيوتر وفى نفس الوقت مستمتع

https://scratch.mit.edu/ideas

بالتوفيق ♥️