Ўзбекистон миллий телерадиокомпанияси тизимидаги “O‘zbektelefilm” давлат муассасасидан хушхабар!
Аввал хабар берганимиздек, Болгария Телевидение, кино ва интернет коммуникациялари Академияси (АТКИК) нинг “Славян эртаги” ХII - халқаро кинофестивали ғолиблари тақдирланди. Академия кинофестивалнинг халқаро ҳакамлар ҳайъати “O‘zbektelefilm” телемаҳсулотлари бўлган “Она сурати-2” телесериали “Ҳакамлар ҳайъатининг махсус мукофоти”га сазовор бўлди, “Репетиция” бадиий фильми эса кинофестиваль лауреати дипломини қўлга киритди.
Кино-телефестиваль бош мукофоти режиссёр Музаффархон Эркинов томонидан суратга олинган “Пуанкаре” бадиий фильми учун ГРАН-ПРИ – “Бадиий фильм учун энг яхши режиссёрлик иши”, шунингдек, фильм бош оператори Равшан Мирзакамалов “Бадиий фильм учун энг яхши операторлик иши” ва мазкур фильмнинг сценарий муаллифи Абдуқаюм Йўлдошев “Бадиий фильм учун энг яхши сценарий” мукофотларига сазовар бўлишди.
Болгария Кино, телевидение ва интернет Академияси (Болгария), Европа аудиовизуал санъат ассоциацияси (Болгария – С. Македония), Париж Европа кино Академияси ESRA Скопье аудиовизуал санъат университети (Скопье – Париж – Нью-Йорк) томонидан “O‘zbektelefilm” давлат муассасасининг олий тоифали кинорежиссёри Музаффархон Эркиновга ва бир неча Академиялар ҳақиқий аъзоси академик , композитор Валентин Боевскийларга киноакадемияларнинг “ФАХРИЙ АКАДЕМИК” ва Doctor Hanoris Cauza унвонлари берилди, шунингдек улар алоҳида нишонли диплом билан тақдирландилар.
Ўзбекистон миллий телерадиокомпанияси ҳамда “O‘zbektelefilm” давлат муассасаси ҳурматли режиссёримиз Музаффархон Эркиновни ва барча ижодкорларни юксак мукофотлар билан табриклайди.