ОСРАШЫУ👩‍❤️‍👨🛤🎭

Осраштырҙы тағы таныш ҡала.
Тик икебеҙ ике замандан.
Әллә кемдәр булып хәбәр һаттыҡ,
Ә күңелдәр йөҙ ҡат ямалған.

Хәл һорашҡан булдыҡ әҙәп һаҡлап,
Гүйә, бына мөһим мәсьәлә.
Яуап бирҙек ғорур ғына итеп,
Донъя бөтөн, ҡулдар - кеҫәлә.

Хәл һорашыу кемгә кәрәк инде?
Унан килеп нимә үҙгәрһен?
Һинең ошо ғәмһеҙ хәбәреңде
Минән башҡа кем һуң үҙ күрһен?

Бергә булмаҫҡа ла бер сәбәп юҡ...
Тик ни өсөн бергә булырға?
Йылдың-йылы исемең дә һинең
Күсә бара моңһоу бер йырға...

Барыһы ла яҡшы. Яҡшы булыр.
Әүәлгесә яҡшы буласаҡ.
Осрашыуҙың бойоҡ таты булып,
Көндәремә һағыш ҡунасаҡ.

- Ярай, һау бул!.. Иҫән генә йөрө...
(Осрашырбыҙ, бәлки, бер ҡасан?)
Был донъяла бөтөн булалманыҡ..
Бәлки, тегеһендә?
Исмаһам...

#ЛарисаАбдуллина

🤍 Һин.Шиғыр.Донъя

🤐🫂❤️

Ҡаты әйткән саҡтар була,
Әйткән һүҙ - атҡан уғым.
Туғаныма тура әйтеп,
Йәнем өҙөлгән сағым.

Ағыу өсөн түгел дәһә
Асыулы минең һүҙҙәр.
Әрләһәм дә яратҡанды
Әйтеп тора бит күҙҙәр.

Туғанлыҡтың ептәрендә
Уйнаусылар етерлек.
Арҡаға арҡа терәһәк,
Булмаҫ елдәр үтерлек.

Туғанлыҡты ерҙә боҙа,
Тәккәберлек - бер дошман.
Туғандарҙы ят итергә
Намыҫым ғына ҡушмай.

#ФәнилБүләков

🤍 Һин.Шиғыр.Донъя

🩵💜❤️

Алпан-толпан атлап ҡаршы килә,
Ҡулын һуҙып, яҡты йылмая.
Шул минутта унан матурыраҡ
Бер кем дә юҡ кеүек донъяла.

Үҙ телендә ниҙер һөйләй-һөйләй,
Күҙен ҡыҫып, серле көлә ул,
Был донъяның бөтә мәшәҡәтен
Оноттороу серен белә ул.

Кескәй ҡыҙым ҡулдарымда саҡта
Бәхетемә, гүйә, донъя тар.
Балаларым шат йылмайһын өсөн,
Тыныс булһын, бер үк, донъялар!

#ФирүзәАбдуллина

🤍 Һин.Шиғыр.Донъя

КҮҢЕЛ  АПТЫРАЙ 💫❓🤷‍♀️

Буш тор(а) алмай күңел, йә шатлыҡты,
Йә һағышты өйҙәш итә һала.
Уйынсыҡтай күреп ул шуларға
Әүрәй һала, хас та сабый бала.
Берен ала ла ул, берен һала,
Өмөт кенә өҫтә, гел уртала.
Шатлыҡ менән һағыш араһында,
Күренмәйсә генә гел бутала.
Тик тор(а) алмай күңел, йә талпына,
Үҙен-үҙе этә упҡындарға.
Һәм көнләшеп ҡарай тәбиғәттә
Тыныслыҡтың йәмен тапҡандарға.
Күңел күҙе – ике яҡлы миҙал,
Тәгәрәй ҙә, ҡолай ул, туҡтаһа.
Шул миҙалды устарына йомоп,
Йылытыусы ғынаһы юҡ таһа.
Йә шатлығын, йә һағышын асып,
Ҡояш аҫтарында йән ялтырай.
Күләгәһе уның ҡояш түгел,
Күләгәһе уның яп-ялтыр ай.

Ниңә икән? Күңел аптырай..

#ГөлнараХәлфетдинова

🤍 Һин.Шиғыр.Донъя