?☀️?

Шундай матур донъяларҙа
Ыҙғышҡа ла урын бар.
Берәүҙәргә Йыһан етмәй,
Икенсегә урам тар.

Шундай бөтөн донъяларҙа
Көнсөллөккә урын бар.
Ҡара көйгән күңелдәрҙә
Һөрөм, тынсыу, урын тар.

Шундай йомарт донъяларҙа
Ҡомһоҙлоҡҡа урын бар.
Йомоҡ усын мүкләндереп,
Ҡалтырана һарандар.

Мөхәббәтле донъяларҙа
Нәфрәткә лә урын бар.
Араларҙа ҡыл өҙөлһә,
Олой дауыл, бурандар.

...Шундай матур донъяларҙа
Әлдә әле мин дә бар.
Һин дә барһың.
Һәм йәшәүҙе,
Һәр таңда ла танһыҡ иткән,
Һөйөү тигән билдә бар.

#НаиләХәмбәлиева

? Һин.Шиғыр.Донъя

??‍♀???‍♂

Мин фәрештә түгел. Ғәмәлдәрем
Дөрөҫ булмаҫ, бәлки, гел генә,
Үтәлмәйсә ҡалған вәғәҙәм бар,
Ҡайҙа осҡан – белә ел генә.

Ваҡ-төйәккә генә үпкә тотоп,
Һөйләшмәгәнем бар дуҫ менән,
Барып булған ергә бармаған бар,
Ышыҡланған булып эш менән.

Эҙләй китһәм, тағы таба алам!
Гөнаһтарым барҙыр тағы ла,
Был донъяла гөнаһһыҙҙар юҡтыр,
Ҡараһы ла барҙыр, ағы ла.

Зинһар өсөн артыҡ ҙур талаптар
Ҡуймағыҙсы миңә, кешеләр!
Мин фәрештә түгел - һеҙҙең кеүек,
Һеҙ ҙә, беләм, минең ишеләр!

#ФирүзәАбдуллина

? Һин.Шиғыр.Донъя

♥️⚡️✨?

Беҙҙең юлдар бер секундҡа
Бер - береһенә ҡағылып үтте.
Күҙ алдында алыҫ, яҡты
Ғәжәп бер нур сағылып китте.

Беҙҙең юлдар бер секундҡа
Ҡылыстарҙай сарпылып үтте:
Уты тейҙе йөрәктәргә,
Хистәр ҡапыл артылып китте.

Юлдар бергә, күптән бергә түгел,
Шашҡан хистәр тынып ҡалды.
Йөрәктәрҙә алыҫ бер нур,
Ҡылыста эҙ тороп ҡалды.

#РәшитНазар

? Һин.Шиғыр.Донъя

??☀️

Өфөм - яҡты нурлы өнөм.
Йәнем тамыр йәйгән ҡалам да.
Баш ҡаламда үҙ һуҡмағын яра
Минең тырыш ғәзиз балам да.

Таш юлында етеҙ тәгәрмәстәр
Ваҡыт менән бергә уҙыша.
Мең яҙмыштар бында ҡауыша ла,
Бәғзеләре бында аҙаша.

Өфөм, һинең ниндәй серле көсөң
Ғашиҡ итә йәнде мәңгегә?
Өфөм, минең йылы йортом,
Һиндә табам дауа йәнемә.

Өфөм, һинең төҫөң, мең балҡышың
Әсир итә, йәнде арбай ҙа.
Һыйыналар күкрәгеңә көн дә,
Яңы йорттар, бейек һарайҙар.

Ғәзиз Өфөм тере минең өсөн!
Ишетәмен йөрәк тибешен.
Һинең гүзәлеккә тиңләшерлек
Минең өсөн Ерҙә юҡ ишең.

#ФәнилБүләков

? Һин.Шиғыр.Донъя

??❤️‍?

Инде бөттө. Бүтән һинең алда
яна-яна шәмдәй иремәм.
Кистәрендә инде, һине эҙләп,
таныш һуҡмаҡтарҙа йөрөмәм.

Һин үҙгәрҙең. Ярай! Үҙгәр әйҙә!
Һин үҙгәрһәң, мин дә үҙгәрҙем!
Тик күҙҙәрем бына, тик күҙҙәрем
эҙләй һаман һинең күҙҙәрҙе.

Тик ҡулдарым бына, тик ҡулдарым
эҙләп йөҙәй һинең ҡулдарҙы.
Ирендәрем эҙләй иренеңде...
Нишләтәйем бына шуларҙы?
Нишләтәйем, әйтсе, шуларҙы?

#РафаэльСафин

? Һин.Шиғыр.Донъя

❤️‍??❤️‍?

Күпме ышанып мин,
Күпме алдандым!..
Өҙөлгән өмөттәр
Тағы ялғанды.

Дуҫым тип йөрөгән
Булды дошманым.
Тик яңғыҙ ҡалырға
Яҙмыш ҡушманы.

Һөйөү ул юҡ, тинем,
Бар тик ир тәне.
Ә мөхәббәт мине
Утта үртәне...

Үҙемдән ҡасырға
Бер мәл тырыштым,
Тик тере зиһене
Еңде тормоштоң!..

#РәмиҒарипов

? Һин.Шиғыр.Донъя

ГҮЗӘЛ ӨФӨМ - БАШ ҠАЛАМ ???

Тау башында балҡый бер ҡала,
Ул ҡала Өфө тип атала.
Яҡтыраҡ яна йондоҙҙары,
Матурҙар егет һәм ҡыҙҙары.

Алмалары бешә балланып,
Ағиҙел аға борғаланып.
Уға ҡушыла йәмле Диме,
Ах Өфөм, мин яратам һине!

Хуш еҫ бөрккән айлы кистәре
Тирбәлдерә йөрәк хистәрен.
Баҡсаһында иркен тын алам,
Ах Өфөм, минең гүзәл ҡалам!

Урамдары көҙгөләй асфальт,
Эшсән халҡы күңелле һәм шат.
Күргән һайын һине шатланам,
Ах Өфөм, гүзәл һин, баш ҡалам!

Һиндә үҫтем, эстем һыуҙарың,
Тыңланым йыр, ҡурай моңдарың.
Ҡайҙа барһам, һиңә ашҡынам,
Ах Өфөм, гүзәл Өфөм, баш ҡалам!

#РәғиҙәЯнбулатова

ҺӨЙӨҮ ЙЫРЫН ЙЫРЛА ҺӨЙГӘНЕҢӘ ?❤️?

Һөйөү йырын йырла һөйгәнеңә,
Күңелдәрең ихлас, саф икән.
Ул һөймәһә, әйҙә, һөймәһен дә,
Һөйөүҙәрең әгәр хаҡ икән,
Һөйөү йырын йырла һөйгәнеңә.

Һөйөү йырын йырла һөйгәнеңә,
Һөймәһә лә, йырҙан ебәрмә.
Алып китһен йырың күңелдәрҙе
Гүзәл ерҙән гүзәл ерҙәргә,
Һөйөү йырын йырла һөйгәнеңә.

Һөйөү йырын йырла һөйгәнеңә,
Мин бәхетһеҙ, тимә, бер уйлап.
Башҡа берәү һине тапмай ҡалмаҫ,
Бәхет килмәй ҡалмаҫ йыр буйлап,
Һөйөү йырын йырла һөйгәнеңә.

#НазарНәжми

? Һин.Шиғыр.Донъя

ЯРАТ МИНЕ ❤️?

Ҡалҡҡан ғына ҡояшымды ойотма,
Яратам, тип ҡабатларға онотма.

Яратам, тип өндәш миңә гел генә,
Шул һөйләмдән күңелкәйем гөл генә.

Йәлләмә һин, матур һүҙҙәр йәлләмә,
Хасил булыр күҙ алдыңда гөлләмә.

Мин булырмын "аһ" итерлек хозурлыҡ,
Ҡанатлы ҡош Һомайҙы ла уҙырлыҡ.

Яратам, тип әйт әле, әйт тағы ла,
Шул һүҙҙәрең йөрәгемә яғыла.

Шул тауыштан моңһоулығым юғала,
Ярат, тиеп, яраттырам шуға ла.

Яратам, тип ҡабатлаһаң, осонам,
Һүҙҙәреңдең сыҡмаһамсы осона
Һис ҡасан.

#ГөлнараХәлфетдинова

Күпте уйлап...???

Күпте уйлап, әҙҙән ҡалам кеүек,
Ниҙер өмөт итеп күктәрҙән.
Уйланиһәң, шөкөр, барыһы бар,
Кәм түгелмен әле күптәрҙән...
Таянырға күпме дуҫтарым бар?
Һыйынырға янда туғандар.
Эскерһеҙ ҙә улар, ярҙамсыл да,
Үҙем кеүек шаян, уңғандар.
Ең һыҙғанып эшләр эшем дә бар,
Арып - талып ҡайтыр өйөм бар.
Эс бошҡанда күңел баҫыр өсөн,
Үҙем генә белгән көйөм бар...
Күпте уйлап, әҙҙән ҡалам кеүек,
Ғәйеп эҙләп һаман үҙемдә.
Яраларҙы ваҡыт дауалаһа,
Онотолор әйткән һүҙең дә...

#МөхәмәтйәрМәғәсүмов

? Һин.Шиғыр.Донъя