وين الاعزاز  ودنت ساعة  موتي
أعله اجتافهم يطلع ردت تابوتي
كلهم احنان   والأجل حان    يروحي
________
بالدنيه ما دايم  عمر  لا اضن يخلص راحه
مايرحم بروحي الدهر  شج  بگفاي  رماحه
سهام الشماته  وغربتي للحزن سون ساحه
گلبي شكثر صاح وبجه  مانفع ذاك صياحه

ياهو اليسبل ايدي ويغمض عيوني
امتون الغرب مو حلوه لو شيعوني
گلبي نيران     والأجل حان    يروحي
_______
من اعتب اطيح السمه ومن صوتي فز كفالي
عباس  صاح  بكربله  يحسين طاح  اعگالي
أتوجه گوه  أمن الهظم  والحال ابد مو حالي
أشرت بيدي وما شفت واحد من اهلي گبالي

الجاب الشريعه وعل خيم بداهه
كون  أعله راسي  الفاتحه  يقراهه
ماكو دفان    والأجل حان    يروحي
_________
لو ساعه ياموت  انتظر  توادع اوي احزاني
من كربله ودرب النجف  طارش بعد ماجاني
كلهم گظوا  بالطف ذبح   بس  العيون اتاني
مو صعبه عالرد الشمس   ايرد عليه اخواني

إيست روحي  وما يجيني الغالي
وبالشام بس جرح  اليسر يبرالي
بس الاحزان.   والأجل حان     يروحي
______
هوه اليموت بنص هله  ماجن هله مضيعينه
بس اليظل  وي الغرب   لو طاح ياهو ايعينه
صعبه  اليدور  عن اخو  وللدرب يزرگ عينه
والأصعب  ايطر  الگلب  شماته   المشيعينه

راعي الحميه اوياي ريت الساعه
كاسر  گفاي  وگلبي  ذاك  اوداعه
كلها عدوان   .  والأجل حان.   .  يروحي
________
بروحي جرح  من كربله يلجمني كلما ذكره
من طاح الحسين وشفت الشمر يرفس صدره
ابن امي عطشان نذبح جدامي حزوا نحره
والخيل ما خلت  كتر   كلما تدوسه اطشره

هدلت عباتي وگوه أجر بنفاسي
من الرمح وحسين  شيب راسي
شفته عطشان . والأجل حان.   يروحي
_________
صوب الشريعه بدمعتي اركض وارد لخيامي
وناديت  لحگ  يا علي  ذبحوا هلي  جدامي
ليل اهدعش ما ينحمل. مو مثل ذيج  ايامي
يابويه كل رأس  برمح  مابين ضامي ودامي

مليت روحي وگعدتي  يم بابي
الموت اجاني ما اجوني احبابي
ماكو رجبان     والأجل حان.   يروحي
______
الشاعر صالح باشه الغرابي

يازينب  عيونج  بجن گبل  المنيه
اذكرتي ياصوره وجرح بالغاضريه
طبع البشر لو غرب ومات
ياخذ الكبره وياه علامات گبل المنيه
________
يا عالمه واسمج يضل. خيمه أعله كل الفقره
بيدج طبع روحه الحبل وانتي بدليلج حسره
جروح الشماته والسبي  والشام ضيمه اشگبره
غربه ودمعتج من تصب جنها أعله خدج حضره

يالما  رحم بيج  الدهر  وانتي  الاميره
وجروحج أعله المشرعه صارن عشيره
والماتن  أحلامه  العزيزات
ياخذ ألگبره اوياه علامات   گبل المنيه
________
بعيونج أمن التل صور  يحجن ألم مو دمعه
ياصوره مذبوحه بسهم  واعله الرمح مرتفعه
محتاره بالطف واخوتج  كلهم اگبالج  صرعه
يم  عون  والماتوا  هله. لومات ياهو ايشيعه

والماخذ احبابه الگبر شله بحياته
يتمنه  وياهم  دنت ساعة   مماته
واليگضن أيامه   جراحات
ياخذ الگبره اوياه علامات. گبل المنيه
_________
عنج   مضارب  كربله  يم عون موش ابعيده
عباس لويدري وعدل  جا  گطع   هاي البيده
متأكد انه  أمن الگمر    يدري اباخيته اتريده
مرتين ماضن يعتذر.    بس كون ترجع  ايده

جفه ودمعته أعله النهر طاحن سويه
وبعينه من طاح السهم  لجل الخويه
باب  الحوائج  والكرامات
ياخذ ألگبره اوياه علامات.  گبل المنيه
_________
بيج المصايب لو حجت  نار  الخيم  ترويهه
بالطف الج طاحت زلم   يكشخ  البيرغ  بيهه
قصة عذابج  من بدت  ليل  هدعش  يرثيهه
يحترگ  گلب  المنتظر.   من يسمع ابطاريهه

لا  هودج  ولا ضل  علم  وي  السبايه
وانتي أعله ناگه مضلعه بطرگ العبايه
بس  العرف  هاي المعانات 
ياخذ ألگبره اوياه علامات.   گبل المنيه
_________
لمصيبتج  يم   الخدر.  يا بيت  ما  بي رايه
اسمج حديث أهل الحزن كل حرف بسمج ايه
كون بمماتج مو لطم  الكبرج  نجي  مشايه
وكفالج ايجيب الضعن هوه اليسوي اقرايه

كون الحسن يبدي العزه يالهاشميه
ينصب مضيفه  ودلته اگبال البنيه
بس هوه ما گلج سلامات
ياخذ الگبره وياه علامات.   گبل المنيه
_______
الخادم صالح باشه الغرابي

نزله لعزاء ام البنين ع

صاحت ام عباس وين احبابي
راح اموت   وما   أجـوا  غيابي
_______
انه زود الاربعه. الثنوا أعله المشرعه  والهيمه
شدوا الجيش ابحبل جابو الشاطي سحل للخيمه

عفيه بولادي النشامه  جابوا  الماي  الهله
ادري گدهه ابو فاضل  تارس الطف مرجله
گتله بسمك كون تحلف   دوم  راية  كربله

أعله النهر عباس يقره اجوابي
راح  اموت  وما  اجوا  غيابي
_________
ونتي ابضهر الضعن. ضلت بطول الزمن. واحزاني
ياهو يوصل للنهر.  ينده اوليدي الگمر  ينعاني

ابن  حذلم  من اجاني  جاب كل اخباره
بالشريعه دگول حضره  والنبل. . زواره
والعساجر  من  اجاهه   حطها حدر اكتاره

صار  موضوع  الوفه  بكتابي
راح اموت وما أجـوا غيابي
______ 
همه طولي وكشختي المن اشرح قصتي هاليله
انه خلصت العمر  هسه ابواليمه يمر وحجيله

يمه من يوم المشيتوا  روحي والميت سوه
والسمه الما بيها نجمه تربتك  يبني  الضوه
يمه يوم الطر ضعنكم. ضهري يحسين التوه

ابهل وكت شيفيد هذا اعتابي
راح  اموت وما أجـوا غيابي
_______
كل  حلم  اذكره.  يلزم أعله الطف سره خليته
كون راسه أعله الرمح گبل أخيه الينذبح وصيته

انه  مو  همي بنيني      ولا   أهم  ابحالي
الوفه عنوان  صيتي    وراسي بيهم عالي
خلهم  يموتون  كلهم    بس   يضل  الغالي

وأنه هذا اليوم مو بحسابي
راح  اموت وما  اجو غيابي
________
راحو وكلشي رحل. دمعتي وصوت الأجل يبرالي
والگلب يا حسرته  ناره الأخضر حرگته للتالي

كون جدامي الاحبهم   كلهم  ابهل  عازه
فاگده  وگلبي  بعذابه   وما اجوه  اعزازه
كون الحسين واخوته.  اوي النعش جنازه

ياهو يقره التعزيه أعله امصابي
راح  اموت  وما  أجـوا  غيابي
_______
خادمكم / صالح باشه الغرابي

‏مقطع صوتي من راح كلشي وضيعتهم من أديه

وينك يعباس. مو طال الغياب
وينك يعباس. مل مني العتاب
اموتن.    ما تجيني
اصيحن. ما تجيني. وينك يعباس
__
بعدني انشد عليك ودمعي ما هود
وجروح الگلب خضره  وفلا  تنعد
صب حته الدمع  من غيبتك اسود
رجع ضعن  السبايه  وبيرغك  مارد

وينك يعباس. ما ضل بعد حيل
وينك يعباس  كلما  يجي الليل
اريدن.   تعتنيني
اصيحن ما تجيني.    وينك يعباس
_____
باجر خاف اموتن وانته مو يمي
ياهو  يصيح ماتت  يا علي امي
اريد امشي بعذابي الكربله وهمي
ويم گبر الحنين عيوني خل تدمي

وينك يعباس.  ما تنده حسين
وينك يعباس  محتاجته العين
اروحن.  يم بنيني
اصيحن ما تجيني. وينك يعباس
_____
الما عدهه ولد من تدنه ساعتها
اليسبل ايديها ياهو هاي حيرتها
امك  يبو  الغيره  الرايه  رادتها
تحطها اعله النعش بيدك يكبرتها

وينك يعباس  وين اختك ام  عون
وينك يعباس   عيني اعله الضعون
اذوبن  من ونيني
اصيحن ما تجيني   وينك يعباس
_____
كون الي يموت  وعمره  يتوازه
عد راسه  يشوف امنگبه اعزازه
لفاني الموت  يمه وعازتك  عازه
وريد حسين بيده يشيل الجنازه

وين يعباس  ضل گلبي مكسور
وين يعباس   ابجي اعله الگبور
اضيعن   ها يعيني   
اصيحن ما تجيني   وينك يعباس
___
جرح الطف مصيبه وجرحك شكبره
عصر گلبي وگظيت ايامي بالحسره
يمه حسين اخوك  اعظامه  متكسره
راسه  أعله الرمح  والحافر ابصدره

وينك يعباس. عن مهره من طاح
وينك يعباس  ياخويه  من  صاح
اطيحن    ما تجيني
اصيحن. ما تجيني. وينك يعباس
__

الشاعر صالح باشه الغرابي

يارب اني ابكي لبضعة الرسول

شنهي حاله وحياته اليفارگ ناسه
من  بعدهم دقيقه  ويشيب راسه
وبصورهم  يگلب غده اوي انفاسه
ماتوا اهل المحنه وهجرهم جاسه
الحياطين 
بجت من صورهم والعيون
تگلي  المشوا  ما  يرجعون
هظيمه   النحبهم   يموتون

يارب اني ابكي لبضعة الرسول
_________
أصعب  اوداع  وداع التعيش بروحه
يموت وضل عشرته الصدگ مملوحه
شلون اعيشن  غيابه  وعذابه ونوحه
وگلبي  كلما  يذكره  تلجمه  جروحه
     يدنياي
اخذتي الاحبه أمن أديه
اوي روحي اعيش الاذيه
ردت كون خذتني المنيه

يارب اني ابكي لبضعة الرسول
_________
گلبي مكسور يبويه اعله فگد عزازه
روحي  للموت يزينب صفت  تتوازه
المثلي  لو  مات حبيبه  يضل ابعازه
ويم  گبرها  اذا روح  اصير   اجنازه
    يزهراء
انادي ودمعتي اعله خدي
للهموم  تركتيني  وحدي
مماتج  اخذ كلشي عندي

يارب اني ابكي لبضعة الرسول
______
ياهو  فاگد  حبيبه وينزله  بلحده
وگبل التراب يشمه ويبوسه بخده
بين العيون يروحي يكون يوسده
البل گبر  نام  حسافه  بعد شيرده

اذا مات
الأحبه شيضل من غلاتي
حلم روحه خضره بحياتي
اموت  وتضل  ذكرياتي

يارب اني ابكي لبضعة الرسول
_________
بيت  الأحزان والأحزان صفه ابدلالي
وجرحج أعوام وره أعوام يضل يبرالي
امن اهلي كل يوم بالگبور أودع غالي
دمعة العين عله  الناس تسولف حالي

عشت نار
رمح فوگه روحي اجه يطوف
شريعه وعلم يمهن أجفوف
ضعن بي سبايه بالطفوف

يارب اني ابكي لبضعة الرسول
_________
الشاعر صالح باشه الغرابي

‏مقطع صوتي من هظيمه النحبهم يموتون

گعديه شور.

أويلاه    يافاطمه يايمه
اويلاه    يا فاطمه يايمه
________

أعله اغيابج بعد ما ترحم الفرگه
البيت أبلايه ام ما ينطب وخنگه
درب المگبره تخاوبنه انه اوياه
يوميه اعله گبرج روحي محترگه

انام ابحظنج  شلون
صحت وين اليدفنون
افك باب  الگبر كون   بديه

ييمه أبداعت ارباج
أريدن احجي وياج
التراب شماله غطاج.  بديه

اويلاه.    يا فاطمه يايمه
اويلاه.    يا فاطمه يايمه
______
ميته جفوف  أديه  وگعدتي گوه
الدنيه أبلا حنانج كلشي ماتسوه
هوه الفاگد امه ما يضل بي حيل
ماتت ضحكتج يم ضحكت الحلوه

بجيت الفگدج أدموم
ييمه ودمعي كل يوم
عشت بفراگج أهموم.   حزينه

اشوفج بس بالطيوف
ييمه  وهاي  الجفوف
بحبل  تنشد  بالطفوف  حزينه

اويلاه.     يا فاطمه يايمه
اويلاه      يا فاطمه يايمه
_________
مو مالت گبر والفرگه مو سهله
يا كعبة  حنان الما  حصل مثله
عمرج ما وصل يا يمه للعشرين
بعده أثمنطعش توه العمر يحله

الفگد امه صدگ مات
يعيش  اوي  المعانات
بعد  ترجعله.  هيهات   يروحي

يضل بالحسره  والنوح
وحلم  جدامه  مذبوح
ويشوف بعينه الجروح   يروحي

اويلاه       يا فاطمه يايمه
اويلاه.      يا فاطمه يايمه
_______
بين الباب  والحايط  أثر  عصره
رسمت يامصيبه طيحت الزهره
جنها بكربله وتنادي يمه حسين
ريت الينسحگ صدري ولا صدره

ضلع لو كسروا ضلاع
تسحگه الغاره كلساع
تطشر  جسمه  بالگاع   مصيبه

النحبه ايضمه التراب
لگيت  أبعتبة. الباب
جرح ويسولف اعتاب  مصيبه

اويلاه.     يا فاطمه.  يايمه
اويلاه       يا فاطمه   يايمه
________

حال الضامي يمه من يضل وحده
مسمار الكسر  ضلعج  يجي ضده
يتحول رمح  ويدور  اعله حسين
وهاي  النار  تحرگ خيمتي  بعده

يطيح وصدره مسحوگ
وصيحن   جابوا. النوگ
نموت  ابطبة    السوگ  هظيمه

عذابي بحرگ  الخيام
الشماته أنگلبت أسهام
سبيه  وامشي.  للشام   هظيمه

اويلاه      يا فاطمه يايمه
اويلاه.     يا فاطمه يايمه
_________
الشاعر صالح باشه الغرابي