"Рамазон илҳомлари" туркумидан

С А Б Р

Сўрадилар ҳаким зотдан: Сабр не от?
Ўйлаб туриб жавоб қилди муборак зот:
Не-ки бошга тушса дарров унутгайсиз,
Сабр бирлан хайрли кунни кутгайсиз.
Миқ этмайсиз: дил девона, юрак далли,
Бу сабр ва қаноатнинг энг гўзали!..

Нимаики содир бўлса, қабул қилиб,
Илтифот-ла юзларингиз турса кулиб.
Кўнглингиздан мудом тошса иймон иси,
Бу сабр ва қаноатнинг энг тўғриси!..

Яна бири: ҳаммасидан кечасиз воз,
Вужудингиз сабр билан қилиб пардоз.
Яшагайсиз тишни-тишга қўйиб кунни,
Бу сабр ва қаноатнинг энг қийини...

... Барча ишни Аллоҳ учун қилиб нисор,
Ким яшолса ҳатто мўр*га бермай озор.
Фақат Ҳаққа қарздай бўлса жон нафаси,
Бу сабр ва қаноатнинг энг каттаси!..

Аллоҳ Акбар!
Аллоҳ Малик!
Аллоҳ чевар!
Севса фақат сабр қилган зотни севар...

Акрамжон АЗИЗОВ,
Фарғона, Олтиариқ тумани.

Мўр* - форсчадан чумоли.

СЕВМАГАНСИЗ СИЗ МЕНИ ДИЛДАН...

Сув бўйида бир қиз битар хат,
Гўёки бўлгандай мосуво тилдан.
Қоғозга тўкилар изтироб ва дард,
"Демак, севмагансиз сиз мени дилдан!.."

... Синглим, ҳаётнинг ўз қонунлари бор,
Ўнқир-чўнқир, чағир сўқмоқлари кўп.
Баъзан пок дилларга етказар озор,
Кутилмаган жойдан тўқмоқлари кўп...

Севги ўзи нима?! Митти юракка,
Жойлана ололган каттакон дунё.
Гоҳо ўҳшаб кетар ширин эртакка,
Гоҳда ростга ўраб қўйилган рўё...

Майли, ҳар севган дил етсин тилакка,
Бир бевафо ёр деб ўксинтирманг жон.
"Мени дилдан севинг!", - дея юракка,
Буюриб бўлмайди, синглим, ҳеч қачон!..

Фақат муҳаббатдан бурманг сира юз,
Чин ошиқ хаёли, ёри - муҳаббат.
Севги йигит ори, ишқ - номусли қиз,
Ҳазрати Инсоннинг зори - муҳаббат!..

Акрамжон АЗИЗОВ,
Ўзбекистон, Фарғона, Олтиариқ.

👍

Офарин Ал Фарғоний суякларимгача жимирлаб кетди. Тасанно.

Ассалому алайкум!

"Рамазон илҳомлари" туркумидан

АРМОНЛИ ДУНЁ

Иккита эшикли уйга ўҳшайсан,
Ров кириб чиқади ҳар қандай инсон.
Гоҳида фусункор, гоҳо қақшайсан,
Армонли дунёсан синовларга кон...

Ким келар, ким кетар парво қилмайсан,
Бунда сен мезбону, бунда биз меҳмон.
Гоҳ меҳрибон, гоҳо шафқат билмайсан,
Армонли дунёсан синовларга кон...

Баъзида нодонни ўтқазиб тўрга,
Оқилу донони қилгайсан сарсон.
Ҳақ деганни тирик тиққайсан гўрга,
Армонли дунёсан синовларга кон...

Маддоҳ, лўттибозни этгайсан эъзоз,
Зоғни атагайсан булбулизабон.
Қиймати бир чақа ким бўлса жонбоз,
Армонли дунёсан синовларга кон...

Қачон юмшар замин, бўлгайми фурсат,
Қачон кўнглимизга яқинлар осмон?!
Меҳрга зорларга шу дейсан қисмат,
Армонли дунёсан синовларга кон...

Дунё!
Ҳар бандангнинг бор бир саволи,
Армонли бўлсанг ҳам топиб бер имкон.
То армон бўлмасин Тангрим жамоли,
Ризвон боғларини қилмагин армон!..

Акрамжон АЗИЗОВ,
Фарғона, Олтиариқ тумани.

Ассалому алейкум!
Барака топинг, офарин. Ижод килиб чарчаманг. Доимо сог-саломат булиб юринг.

O'tgan yili ham RAMAZON ILHOMLARIdan maza qilib o'qigandik. Shuning uchun niyat qilamizda. " Yanagi yil, yanagi oy, yanagi shu kunlarga eson- omon yetaylik" deb. Ollohimga behisob shukurlar bo'lsin. Yana she'rlaringizni o'qishga muyassar bo'lmoqdamiz. Ijodingizga omad tilaymiz.🤲🤲🤲🤲🤲🤲👏👏👏👏👏👏

Жуда ажойиб 👏👏👏👏👏👏

Ассалому алайкум устоз.
Жудаям чиройли шеър ёзибсиз. Офарин. 👍👍

Доимо хамнафасман. Одатда "омад тарк этмасин,ер булсин"ибораларини ишлатамиз,буни ма'носи кенг,айни холат у.н бошкачарок айтмокчиман уша "омад" сизга "калам"лик килсин узр .
Оташин саломимни Олтиарикка етказинг.