سلامي على اللي تسرق الروح والاعجاب
‏فدتها العرب والروح والصاحب الخيّب

‏مطر صوتها لا داهم السمع والاعصاب
‏هنا أحسّ بـ ان الموت لـ انفاسي قريّب

‏لها في خيالي رش ديمه وقرع أبواب!
‏ولها في خفوقي حب لا يمكن يشيّب

‏أنا ، من ينجّيني ليا سلّت الاهداب !
‏وهدبها : كلام الحق لا قيل من طيّب?

يقولون العرب أن الأوادم ماعليها وسوم
وأنا لو أدري أنك من نصيبي ما أنكسر ساقي

يمر الشعر في درب الجديد ولا يجيب علوم
بقى عندي كلام من رحلت يدور إعتاقي

فمان الله وجّه للغياب وخلني موهوم
أبعّصر الحنين بغيبتك وأعتق أشواقي
- صالح السكيبي

يغويني الليل لا خيّم عليه السكون
‏ويصير للحزن صوت وللفكر دندنه

‏البارحه وين ودتني عليك الظنون
‏وانا احسبني تجاوزت الهوى من سنه

‏يغلبني الشوق وتفضفض عليه العيون
‏وانا بشر والاوادم ماهي محصّنه

‏الذاكره عيّت تخونك / أنا كيف اخون ؟!
‏فالعمر حاجات واجد ماهي بممكنه

مرحبا يامنوة اللي يوم خذك ونالك
‏عاف كل وجيه خلق الله وجاه جفالي
‏ㅤ
‏يوم لفيت السواد اللي زهاه بـ شالك
‏قمت اعدل غترتي واعدل ميل عقالي
‏ㅤ
‏انت مالك اربعين اشباه غير اظلالك
‏يا فديت اللي تعمد ضيعّتي وضلالي
‏ㅤ
‏سو ماتبغي وماودك ومايحلا لك
‏في عيوني لك ديار وفـ الحشا مدهالي

واهني اللي دموعه ماتجف من المحاجر
‏ما بعد جارت عليه الدمعه اللي ماذرفها

‏كن في كبدي مثل طعن الهنادي والخناجر
‏علةً عيا الطبيب من المداوي ما صرفها

‏اتوجد جعلني في كل ماجاني مواجر
‏كل يوم اشوف لي مهنة توجد واحترفها

‏ياوجودي كل ماعرض علي طيرً مهاجر
‏ودي اهاجر معه للديره اللي ماعرفها

- علي الدعيه

‏انا اصد عن شوفتك واغضي ليا مريت
‏اخاف اللتفت لك يذرف الدمع من عيني

‏اثابر واكابر و اتعزم ويابلفيت
‏ولو ان دمي واقف ٍ في شراييني

‏أنت عمرٍ لا سألوني وش تمنى؟ قلت أعيده
‏وأنت فرحة يوم جت لي ماتت أحزاني بعَدها

‏أنت لو للناس دنيا.. ! صرت لي دنيا جديده
‏ما حييت إلا عليها ولا أندفنت إلا فـ لحَدها

‏أنت خيرٍ جابه الله خصني به من عبيده
‏وأنت نعمة قلبي اللي كل ما ينبض حمَدها

‏أنت ضحكه ساندتني رغم الأوقات العنيده
‏مثل ماني بالوجود، وفوق هالدنيا سندها

‏أنت غيمة مرّت بـ قاعٍ، شكت للغيم بيده
‏وأرتوت فيك الصحاري من جفافٍ قد حصَدها

‏أنت حبٌ مع مرور الوقت يتزايد، و أزيده
‏وحدك اللي مكتفي بك، والبشر ينقص عددها

‏الله يديمك لـ قلبي، عمر، وأعوامك مديدة
‏أنت حاجة ما يعيش إنسان لو قلبه فقدها

‏أنفجر لأجلك شعوري لين صارت هالقصيدة
‏كل ما جا لك فضولك عن غلاك أقرأ وعدها
- عادل العصيمي

بين ضوّ الحياة وبين جمر الجهاد..
‏لفحة الدهر هبّت، واستشرّ الجمر..

‏وش بقى ينحرق بي؟ دام كلّي رماد
‏لو تزيد الرياح، يضيع باقي العمر

‏بي من الياس لوعة ما شفاها ضماد
‏لوعة الحر لا منّه تلقّى أمر!

‏لو يحدّون قلبه عالسهر والسهاد
‏كان عاف النجوم وكان ذبّ القمر

تحسب اني بنساك عشان الظروف ؟
يا حبيب قلبي لا يغرك كلام الجرايد

عندي خمسين قصيدة مثل الصفوف
ازعل و اعاتب و ارضى و ابارك و اعايد

"وأُقسِمُ أنك نورٌ لقلبي
وحُبٌّ أعادَ الحياةَ إليّا
وأنك حُلمٌ سرى في خيالي
وأشرق كالشمسِ في مُقلتَيا"