*ТАКЛИФНОМА

Бугун 17 октябр соат 15:00 да Ўзбекистон Ёзувчилар уюшмасида атоқли арузнавис шоир, асл сўз заргари, устозимиз Мавлоно Набихон Чустий таваллудининг 120 йиллиги муносабати билан ўтказиладиган адабий-мусиқий тадбир доирасида янги нашр қилинган "Чустий сайланмаси"нинг тақдимоти бўлиб ўтади.
Шу муносабат билан, барча ғазалхон ва арузнависларни мазкур замондаги маконга таклиф қиламиз.*

@Rustam_MIRVOKHID

Ривоятларга кўра, бир одам Александр Македонскийга савол берибди:
«Олампаноҳ, халқ орасида бир бахсли мақол юради - «Устоз отангдай улуғ» ва «Устоз отангдан улуғ»? Мана шу икки мақолдан қай бири тўғри, нима деб ўйлайсиз?»
Шунда тахт устида ўтирган буюк саркарда бир оз ўйга толиб шундай жавоб берибди:
«Биласизми, падари бузрукворим Филип 2 менинг осмондан ерга тушишимга сабабчи бўлган тенгсиз зот, устозим Арасту эса мени осмонлар қадар юксалишимнинг боиси бўлган буюк инсон, бас, «Устоз отангдан улуғ» деган ҳақли эътирофга қўшиламан!».
Балки, бу ривоятда бироз бўрттириш, муболаға бордир, лекин устозларнинг нақадар беназир зот эканлигига яна бир далил бўлса, ажаб эмас.
Азизлар, нима бўлганда ҳам, оталаримиздай бизга устоз бўлган, устозларимиздай бизга оталик қилган мунис МУАЛЛИМЛАРИМИЗ - УСТОЗЛАРИМИЗ ҳамиша бор бўлишсин!. Уларга бошимиз ерга теккунга қадар таъзимдамиз!.

БайраМуборак!!!

@Rustam_MIRVOKHID

Кел, чиқ, дарсдан ташқари,
Ойдан, Марсдан ташқари,
Севдим ҳаддан ташқари -
Мен сенга мутаассиб, деган сатрлар қанотида "Маданият ва маърифат" каналининг "Дарсдан ташқари" кўрсатувида меҳмон бўлдик. Унда Абдулла Қодирий номидаги Ижод мактаби ўқувчилари билан болаликка қайтиб дилдан суҳбатлашдик, шеърлашдик...
Фурсатдан фойдаланиб, таклиф учун гўзал, самимий бошловчимиз Муҳаббат Халиловага чуқур миннатдочилигимизни билдирамиз.
Қимматли вақтингизни аямай томоша қилсангиз хурсанд бўламиз, марҳамат!

@Rustam_MIRVOKHID

*“ИЛМСИЗ ШЕЪР АСОССИЗ ДЕВОРДИР..."

Куни кеча ёш олима Осиё Ҳошимова камина ва қадрли арузнавис биродарим – Азизбек Ҳакимов ғазаллари қиёсий таҳлилига бағишланган “РУСТАМ МИРВОҲИД ВА АЗИЗБЕК ҲАКИМОВ ИЖОДИДА ҒАЗАЛ ЖАНРИ” номли магистрлик диссертациясини 93 балл олиб, муваффақиятли ҳимоя қилди.
Мазкур ҳимоя жараёнида шахсан қатнашиб, қуйидаги хулосаларни чиқардим: Биринчидан, ёш олимларимиз сафи тобора кенгаймоқда; Иккинчидан, диссертациялар мавзуси ҳам “ёшармоқда”, яъни объект учун нафақат тарихга айланган, балки замондош ижодкорлар ижодига ҳам дадил мурожаат қилинмоқда; Учинчидан, анча вақтлардан бери узилиб қолган олимлар ва ижодкорларнинг илмий ҳамкорлиги тикланмоқда; Тўртинчидан, ҳаёт ижодкорлар ижоди тадқиқ қилиниши улар учун кўзгу мисоли бўлиб, ютуқлари ўз йўлига, айниқса, камчиликларининг илмий таҳлил қилинишига омил бўлмоқда. Бу эса биз каби қаламкашлар учун нақд ибрат ва маҳорат мактабидир.
Бир сўз билан айтганда, бу тадқиқот наинки биз, балки аруз тақдирига бефарқ бўлмаган барча ғазалхонларга муборак ва давомли бўлсин! Зеро, биз ҳам тадқиқ қилаётган муҳташам шоир Муҳаммад Фузулий айтмоқчи:
“Илмсиз шеър асоссиз девордир,
Асоси йўқ девор беэътибордир”.*@Rustam_MIRVOKHID