VAZIR O‘RINBOSARI ISHTIROKIDA TA’LIM MUASSASALARIDA MA’NAVIY-MA’RIFIY ISHLAR SAMARADORLIGINI OSHIRISH BO‘YICHA DOLZARB MASALALARGA BAGʻISHLANGAN OCHIQ MULOQOT O‘TKAZILDI

Uchqo‘rg‘on, Norin, Uychi, Chortoq, Yangiqo‘rg‘on, Yangi Namangan tumanlari va Namangan shahrida o‘tkazilgan uchrashuvlarda shahar va tuman hokimlari, sektor rahbarlari, maktab direktorlari hamda ularning o‘rinbosarlari, maktabgacha ta’lim tashkilotlari rahbarlari ishtirok etdi.

Yangi o‘quv yilida ustuvor vazifa sifatida amalga oshirilishi lozim bo‘lgan yoshlarning ma’naviy-axloqiy tafakkurini shakllantirish, ta’lim muassasalarida o‘quvchilar tomonidan maktabning ichki tartib va odob-axloq qoidalariga so‘zsiz rioya qilishlari samaradorligini oshirish, yoshlar o‘rtasida tashkil etiladigan tarbiyaviy jarayonlarni yanada takomillashtirish, iqtidorli o‘quvchilar bilan tizimli ishlarni tashkil etish, o‘quvchilarning davomati bilan bog‘liq dolzarb masalalar muhokamasi kun tartibida bo‘ldi.

Maktabgacha va maktab ta’limi vaziri o‘rinbosari Farhod Boqiyev rahbarligida o‘tgan uchrashuvda ta’lim muassasalarida ma’naviy-ma’rifiy ishlarni tizimli tashkil etish, ayniqsa yoshlarning intellektual salohiyati, ongu tafakkuri va dunyoqarashini yuksaltirish, mafkuraviy immunitetini mustahkamlash, vatanparvarlik, xalqqa muhabbat va sadoqat tuyg‘usi bilan yashaydigan barkamol avlodni tarbiyalash, o‘quvchining odobi, o‘qituvchining ma’naviy qiyofasi, yoshlar ta’lim-tarbiyasida “oila – mahalla – ta’lim muassasasi” doirasida amalga oshirrilishi lozim bo‘lgan ishlarga batafsil to‘xtalindi.

Hayotiy misollar, dalillar, amaliy faoliyatdan kelib chiqqan holda umumta’lim muassasalarida ma’naviy-ma’rifiy ishlar samaradorligini yanada oshirish, qutlug‘ dargoh bo‘lgan maktab va unda o‘quvchi va o‘qituvchilar rioya qilishi zarur bo‘lgan jihatlar, o‘qituvchi mavqeining daxlsizligi, ustoz-muallimlar va o‘quvchilar o‘rtasida, shuningdek, yoshlarning o‘zaro do‘stona munosabatda bo‘lishining ta’lim sifati va samaradorlik, o‘g‘il-qizlarning ma’naviy kamolotida o‘z ifodasini ko‘rsatishi aytib o‘tildi.

Voyaga yetmaganlar bilan manzilli ishlashni yo‘lga qo‘yish, ushbu jarayonlarga ota-onalar va hududdagi faol fuqarolarni keng jalb etish bo‘yicha aniq vazifalar amalga oshirish zarurligi ta’kidlandi.

Muloqot davomida ishtirokchilar fikri tinglanib, mavjud muammolar o‘rtaga tashlandi. Bildirilgan taklif va savollarga javoblar berilib, amalga oshirilishi lozim bo‘lgan ishlar yuzasidan vazifalar belgilandi.

Namangan viloyati maktabgacha va maktab ta'limi boshqarmasi Axborot xizmati