موبائل فکرِ آقا سے کرے غافل تو رکھ دینا
موبائل یادِ عقبٰی سے کرے غافل تو رکھ دینا

موبائل کی ضرورت سے نہیں انکار اک پل بھی
موبائل دین و دنیا سے کرے غافل تو رکھ دینا

موبائل مستقل ہاتھوں میں رہنا ایک فتنہ ہے
موبائل راہِ تقویٰ سے کرے غافل تو رکھ دینا

موبائل اک سہولت بھی موبائل اک مصیبت بھی
موبائل سر کو سجدہ سے کرے غافل تو رکھ دینا

موبائل وقتِ حاضر کی ضرورت ہے مگر لوگو!
موبائل عزمِ توبہ سے کرے غافل تو رکھ دینا

موبائل خیر کا دریا موبائل شر کا رستہ بھی
موبائل دین و اُمہ سے کرے غافل تو رکھ دینا

ہدہد الہ آبادی

لومڑی شیر ہے کتنا اندھیر ہے
معصیت خیر ہے کتنا اندھیر ہے

ترکِ دنیا کی تعلیم پاکر بھی وہ
مال پر ڈھیر ہے کتنا اندھیر ہے

جو جگایا کرے حاکمِ وقت کو
اُن سے ہی بَیر ہے کتنا ہے اندھیر ہے

ہر عدالت میں دیکھا کتابِ مبیں
آج بھی غیر ہے کتنا اندھیر ہے

باطلوں کے مقابل مسلمان کا
حوصلہ زَیر ہے کتنا اندھیر ہے

جابروں کے دلوں پہ ابھی تک وہی
جہل کا پیر ہے کتنا اندھیر ہے

ہدہد الٰه آبادی

توحیدِ محبت ہے کوئی دوسرا نہ ہو
اک رابطے کے بعد کہیں رابطہ نہ ہو

غیروں میں محبت کی جھلک ڈھونڈھنے والا
ممکن نہیں خود اپنے لئے بد دعا نہ ہو

گوشہ نشیں ہوں سنگ مِرے بس وہی رہے
دنیا سے رابطے کا جسے تجربہ نہ ہو

دل کے صحن میں رکھتا ہوں میں اُس گلاب کو
اغیار کے گملے میں جو آج اک دن کِھلا نہ ہو

دنیائے محبت کو یہی درسِ وفا دوں
چاہت کا توکل ہے کہیں آسرا نہ ہو

خواہش کی بے لگام سواری پسند ہے
اُس منتشر مزاج سے کیسے خطا نہ ہو

اک ہمنوا کے ساتھ ہوں لیکن ہوں بدگماں
اُس ہمنوا کے ساتھ کوئی ہمنوا نہ ہو

وہ دوست مانگتا ہوں دعاؤں میں آج بھی
کم علم و کم فہم ہو مگر بے حیا نہ ہو

ہدہد الہ آبادی

کَٹورا لیکے پِھرتے ہو یہی جمہوریت ہے کیا
ہر اک باطل سے ڈرتے ہو یہی جمہوریت ہے کیا

جنہیں قرآں نے مغضوبِ علیھم ہم سے فرمایا
انہی کے پاؤں گرتے ہو یہی جمہوریت ہے کیا

نہ دینی جوش و جذبہ ہے نہ دنیاوی ترقی ہے
اُجڑتے نہ اُبھرتے ہو یہی جمہوریت ہے کیا

مسلماں ہو کے بھی قرآن و سنت کے بجائے تم
دمِ آئین بَھرتے ہو یہی جمہوریت ہے کیا

جو فکرِ اُمت آقا کی خوشبو لیکے اُڑتے ہیں
اُنہی کے پَر کُترتے ہو یہی جمہوریت ہے کیا

یہ ٹیکسوں کا شکنجہ ہم پہ کَس کر اور خود سارے
دبئی میں عیش کرتے ہو یہی جمہوریت ہے کیا

ہدہد الہ آبادی

وقت کا فیل مقابل ہے ابابیل بنو
آج پھر سامنے باطل ہے ابابیل بنو

جنگی قوت سے ڈراتا ہے جہاں والوں کو
تہہ دل کانپتا بزدل ہے ابابیل بنو

جسکے سینےمیں عداوت ہے ابھی پھرہم پَر
حملہ آور وہی قاتل ہے ابابیل بنو

کفر کو ناز وسائل پہ تو اپنی طاقت
نورِ سنت کا میزاائل ہے ابابیل بنو

رب کے محبوب کی امت کو بتانا ہوگا
دیکھئے پاس ہی منزل ہے ابابیل بنو

ربِ کعبہ کی محبت میں گھروں سے نکلو
ابرہہ مشرک و جاہل ہے ابابیل بنو

ہدہد الہ آبادی

جس طرف بھی چل پڑوں دیوار میرے سامنے
دشمنوں سے بچ کے آؤں یار میرے سامنے

دین کے غلبے کی باتوں سے جنہیں مرچی لگے
بن رہے ہیں دین کے غمخوار میرے سامنے

محوِ حیرت ہوں میں سن کر نعت گانے کی طرح
نعت خواں صاحب ہیں یا فنکار میرے سامنے

جب کبھی حق کا علم تھامے رہوں تو آئے گا
پھول کا پوشاک پہنے خار میرے سامنے

جن کو اولوالامر سمجھا کر رہے ہیں جا بجا
مغربی تہذیب کا پرچار میرے سامنے

پڑھ رہا ہوں سیرتِ آقا کو دل کی انکھ سے
صبر میرے سامنے تلوار میرے سامنے

اُس طرف دشمن جری ہے مستعد ہے اِس طرف
ہر کوئی زیرِ ہوس بیمار میرے سامنے

اہلِ حق کے قافلے میں اہلِ باطل بھی چھپے
وقت کا ہدہد ہوں ہر مکار میرے سامنے

ہدہد الہ آبادی

کارواں بِک گیا راہ بَر بِک گیا
کون ہمراز ہو ہمسفر بک گیا

مجھکو تنہائیاں راس آئیں کہ جب
ہمنشیں مال و ذر دیکھ کر بک گیا

دوستی کے لبادے میں کی دشمنی
معتبر تھا، وہی معتبر بک گیا

چور بیباک پھرنے لگے روز و شب
پاسبانِ شہر اِس قدر بک گیا

منصفو! تم سے نفرت نہ کیسے کرے
فکرِ انصاف میں جس کا گھر بک گیا

کس سے اپنے جھلسنے کا شکوہ کروں
دھوپ کے ہاتھ گھر کا شجر بک گیا

ہدہد

کھونے کے لئے کچھ بھی نہیں ہے تو ڈریں کیوں
پَلے میں اپنے ذر نہ زمیں ہے تو ڈریں کیوں

کب تک ستمگروں کے ستم پر خموشیاں
معلوم ہے طاغوتِ لعیں ہے تو ڈریں کیوں

دنیا کو اپنا اصلی وطن ہم نہیں کہتے
جانا ہی ہمیں اور کہیں ہے تو ڈریں کیوں

خطرات کی تہہ میں چھپے ثمرات کو دیکھیں
دل کی نگاہ عرشِ بریں ہے تو ڈریں کیوں

موت و حیات ربِ دو عالم کے ہاتھ میں
اِس بات کا ہر وقت یقیں ہے تو ڈریں کیوں

جس سمت مَر کے ملتی رہی دائمی حیات
وہ سمت بہترین و حسیں ہے تو ڈریں کیوں

ہدہد الہ آبادی

فریب کھا کے شکایت سے اجتناب کیا
مگر دوبارہ محبت سے اجتناب کیا

تڑپتے دل کی تڑپ دیکھ کر بھی دانستہ
کمال ہے ناں! مذمت سے اجتناب کیا

محبتوں کے سفر میں مِلی خیانت کا
عذاب جھیل کے نفرت سے اجتناب کیا

جگر پہ تیرِ خیانت کا زخم ہے لیکن
مگر ہمیشہ خیانت سے اجتناب کیا

محبتوں میں بھی توحید پر رہے قائم
کسی نئے کی رفاقت سے اجتناب کیا

لبوں پہ ضبط کا تالا لگا دیا ہدہد
خموشیاں ہیں عداوت سے اجتناب کیا

ہدہد الہ آبادی

یہ کس بستی میں آکر ہم سکوں برباد کر بیٹھے
سمجھ کر ہم کِسے ہمدم سکوں برباد کر بیٹھے

بھروسہ توڑنے والو! تمہیں دنیا مبارک ہو
زباں خاموش ہے ہر دم سکوں برباد کر بیٹھے

وفاداری دکھا کر کیوں خیانت پر خیانت ہے
کرے شکوہ یہ چشمِ نم سکوں برباد کر بیٹھے

کلیجہ منہ کو آتا ہے جو ماضی یاد کرتا ہوں
دکھوں کا مستقل موسم سکوں برباد کر بیٹھے

وہ مرہم ہیں ہر اک زخمی بدن کے واسطے لیکن
مِرے حق میں نہیں مرہم سکوں برباد کر بیٹھے

لکھے ہیں جن کی خاطر وہ نہیں پہچانتے ہدہد
مِرے الفاظ کا ماتم سکوں برباد کر بیٹھے

ہدہد الہ آبادی