يالله بينه .. المدينه .. لنبينه وحيدر 
خل نبارك .. نشارك .. ولادة شبر 
كريم .. ياحسنّه
@@@
هالفرح من حينه .. للضنه تانينه 
بالمهد والينه .. گمر .. ياحسنه 
للنبي نتعنه .. وبالسعاده لنه  
يهدي إلنه الجنه .. گمر .. ياحسنه 
…
نگرگع جينه فرحه
 اعله اطيب حال .. حسن 
ينايم يالله اصحه 
انولد للآل .. حسن 
اليريدن منه منحه 
يصيح ابعال .. حسن 
…
الليله جانه .. املنه .. كريم العتره 
وطه فرحه .. ويه حيدر .. لوليد الزهره 
حليم  .. ياحسنّه
@@@
ياجماله ابمهده .. چنه طه جده 
الجنه كلها ابخده .. دلال .. ياحسنه 
كله هيبه وعزه .. شكله كشخه ورزه 
ومهده حيدر هزه .. دلال .. ياحسنه 
…
دلاله امن الثريه 
سكن بالروح .. حسن 
شمس صبح وزهيه 
علينه اتلوح .. حسن 
ابو الجود اللي بابه 
يضل مفتوح .. حسن 
…
منهو مثله .. تجله .. فجر عالامه 
والله جوده .. ابعروگه .. نبض من دمه
عظيم  .. ياحسنّه
@@@
احنه جينه احبابه .. بالعشگ طلابه 
ياللي ما سد بابه .. جليل .. ياحسنه 
كافل ابن الكافل .. ابد مارد سائل
وخيره ينطي واصل .. جزيل .. ياحسنه 
…
اذا اتشوفه تهابه 
عليّ الشان .. حسن 
ملاك ابكل صفاته 
ابشكل انسان .. حسن 
نزل وحي ابمهاده 
 انولد قرآن .. حسن 
…
نعمة الله  .. اجانه .. كحيله اعيونه   
واليشوفه .. يصافن  .. جمال شلونه 
وسيم   .. ياحسنّه
@@@
اشكبر دلاله .. مايرد الجاله 
وطاب گلبه وفاله .. حنون .. ياحسنه 
گبره ملگه الحاير .. حتى لوهو صاير 
لا گبك وامناير .. صحون .. ياحسنه 
…
فجر فوگ المدينه 
وگمر عالگاع  .. حسن 
اله گبره بنينه 
ابصدر وضلاع .. حسن 
شرينه حبه بالدم 
ولا ينباع .. حسن 
…
بالموده .. امامي .. سكن بفادي 
واعتنيله .. ازوره .. وضريحه مرادي 
نعيم  .. ياحسنّه
@@@
علي أحمد الحمود 
٢٦-٢-٢٠٢٥
مولد الحسن المجتبى ع 

ابسكون الليل .. ينعى جبرائيل 
حيدر تطبّر .. الله أكبر 
@@@
ليلة الضربه صفت ليله عصيبه 
وللفجر وحي الله اذن عالمصيبه 
صاح اشهد ان علي كبش الكتيبه 
اليوم من دم هامته شيبه خضيبه 
…
صايم ابمحراب .. راسه غيله انصاب
ودمه تفجر .. الله أكبر 
@@@
بعده ما فجر السمه طشر ضياءه 
حيدره ابمحرابه مطشره دماءه
او ويه صوت الوحي من زلزل نداءه  
الفلك شهگة حزن وگف سماءه 
…
النجم مگدور .. حيدره مطبور 
وضيه تكور .. الله أكبر 
@@@
اقتربة الساعه وطفه بالروح لحساس 
وفزت ابحس النعي امن النوم هالناس
الحسن وحسين ركضه ويه عباس 
لمسجد الكوفه ولفوا مطبور عالراس
…
حامي الجيره .. طبرته اكبيره 
ولونه تغير .. الله أكبر  
@@@
زينب ابابه وگفت وتنادي بالدار  
صوت جبرائيل ينعى شصار ماصار  
لن گلبها ام الصبر كالجمره بالنار 
تنادي ربي ايعود ليه علي الكرار 
…
بعينها الدمعه .. خايفه البضعه 
ابگلب التصبر .. الله أكبر  
@@@
آه من هامة علي ابسيف اضربوها 
للهدى ركنه انهدم من صوبوها 
واليتامه الفاجعه بس ينحبوها 
من يمسْح الدمع لمن راح ابوها 
…
فاجعة وآلام .. وشيعته ايتام 
ودعها حيدر  .. الله أكبر 
@@@
بعد طبرة حيدره سوده الليالي 
لان راح امن الارض اغله الغوالي
والسؤال اليطرحه گلب الموالي 
شعجب حيدر طايح ودمه يلالي 
…
فارس الاحزاب .. دمه بالمحراب
الماضر تضرر  .. الله أكبر 
@@@
ويه جبرائيل حسنه هالمسيه 
وداعة الله ياعلي حامي الحميه 
مو سهل حامي النبي فوگ الوطيه 
يفحص ابرجليه والونه خفيه 
…
 صيامه لا ماتم..  ابسيف لمسمم
وللهامه كسر .. الله أكبر 
@@@
العيد مجبل والارض طافي ضياها
واليتامه اهلال تنتظره ابسماها  
وياحلمها بس علي ايعيد معاها  

لان ماكو بس علي هو اباها 
…
راح حامي الجار .. وهالحلم ما صار 
شهالعيد لگشر  .. الله أكبر 
@@@
علي أحمد الحمود 
١٨-٢-٢٠٢٥
الضربه 
شهادة الامير ع 

شعشع منارك .. عيدك مبارك
ابيوم المولد جينه انبارك باجمل تحيه 
اهلا وسهلا يامهدينه يابن الزچيه 
@@@
عيد الله ابنص شعبان فرحه كبيره 
مولود امن الله جاي شمسه منيره 
محبوب ابروح الدين ينبض ضميره 
وكلمن حچه المحجوب گلبي اميره 
…
باجمل صفاته .. گلبي حياته 
نتباها جي سيدنه واحنه الرعيه 
اهلا وسهلا يامهدينه يابن الزچيه 
@@@
شما نزرع دربه ازهور وننثر رياحين 
مو كافي ولجله الروح نفرشها صوبين 
يامرنه هالمحجوب عالراس وعالعين 
يطلبنه وشما ايريد واحنه الموالين 
…
للحلوه طباعه .. سمعًا وطاعه
احنه بامره وبين ادينه خير البريه 
اهلا وسهلا يامهدينه يابن الزچيه 
@@@
ميلاد الحجه روح احية فرحنه 
وبلسم عجيب ادواه يشفي جرحنه
احنه بجماله انذوب هاللي ذبحنه 
ومن شوگه صدر الشوگ لجله فتحنه
…
ابشوگ الغالي .. بيرگنه العالي 
رفرفنه رايت وده صبح او مسيه 
اهلا وسهلا يامهدينه يابن الزچيه 
@@@
ألف ومتين اسنين منهو ايتصور 
حبيب او عالمحبوب هجرانه يگدر 
هالبسمه كلنه انعيش چا يمته يظهر 
ماضل بالصبر روح وما ضنتي نگدر 
…
جمرات اغيابه .. تلسع لهابه 
وابدونه الدنيه ماهي دنيه زهيه 
اهلا وسهلا يامهدينه يابن الزچيه 
@@@
حلم ونحلم بارض حجاز يظهر ولينه 
وشمسه الچانت خلف سحاب تطلع علينه
ونتعنه ابسرعه ليه ابمكه ومدينه 
انقبل اجدامه واديه وصفحة جبينه 
…
الوادم مسطفه .. واتقبل چفه 
من الله صار احضوره اعظم هذيه 
اهلا وسهلا يامهدينه يابن الزچيه 
@@@
علي أحمد الحمود 
١٤-٢-٢٠٢٥
مولد المهدي عج 

ياحبيبة الرسول يازچيه  
@@@
كوثر .. والنجم ازهر .. والنبي مستر 
ولدت خديجه 
جابت .. زاكيه طابت .. بالفخر ذابت
مكه العتيجه 
جتنه .. زهرة الجنه .. والفرح فنّه 
نسجت نسيجه 
… 
ياحبيبة الرسول يازچيه  
@@@
فاطم .. والوحي باسم .. بمحكمه قادم 
يتلو علينه 
اهلا .. والفرح يحلا .. والصلا تعله 
لطه وبنينه  
ابمولد ..  نوره ما يخمد .. ضيه متجدد
من الحنينه 
…
ياحبيبة الرسول يازچيه  
@@@
حوه .. آسيه ومريم .. عالمهد تلتم 
هالحور بالدور 
سيده .. عالنسا كلها .. واللي يجهلها 
ابجهله مكسور 
حوره .. للعلا عطره .. فاطمه الزهره 
انسيه من نور 
…
ياحبيبة الرسول يازچيه  
@@@
فاطم .. والگلب هايم .. لو حچه اللايم 
عشنه بحماها  
فرحه .. وكل محب يصحه .. يرفرف ابجنحه 
طير ابسماها 
ودها .. واحنه من عدها .. وروحنه انعدها
ابدمنه دماها 
…
ياحبيبة الرسول يازچيه  
@@@
ابمحشر .. تزهر الكوثر .. والملك يحضر
امره عليها  
والله .. يكلم الحوره .. والجمع حشره
ينطي إليها 
وديعه .. اتلگط الشيعه .. وجنه لوسيعه 
تودي بيديها 
…
ياحبيبة الرسول يازچيه  
@@@
علي أحمد الحمود 
١٨-١٢-٢٠٢٤
مولد الزهره ع 

٢- بلمبارك .. بلمبارك 
هالليله مولد فاطمه .. بلمارك 
@@@
الفضا وفلكه .. تشع مكه 
وضيه ارضها للسمه .. بلمارك 
@@@
الشمس چنها .. الگمر منها 
وتباهت بيها كل نجمه .. بلمارك 
@@@
مهد نوري .. ابورد جوري 
وعطر جنات نشتمه .. بلمارك 
@@@
الوحي نازل .. مهد شايل 
وينادي يانبي الرحمه  .. بلمارك 
@@@ 
من الزهره .. اجت بشرى
وتحقق للهدى حلمه .. بلمارك 
@@@
اجه الهادي .. ابفرح بادي 
ومهدها عالصدر ضمه .. بلمارك 
@@@
ابخديجه اليوم .. گضت لهموم 
وعليها الحور مزدحمه  .. بلمارك 
@@@
على الزهره .. الى العتره 
بسعاده الشيعه ملتمه .. بلمارك 
@@@
نناديهم .. نهنيهم
يطه وسادتي اليمه .. بلمارك 
@@@
هلا ابفاطم .. الى القائم 
نهني سيد الامه .. بلمارك 
@@@
علي أحمد الحمود 
١٦-١٢-٢٠٢٤
مولد الزهره ع 

بلمبارك .. بلمبارك 
على الميلاد يالزهره .. بلمبارك 
@@@
يإنسيه .. يحوريه 
يطيبه ابنور مبريه .. بلمبارك 
@@@
الفضا نوره .. وسنا طوره  
يشع من فاطمه نوره .. بلمبارك 
@@@ 

الحرم هلهل .. مع المنزل 
واسمها فاطمه رتل  .. بلمبارك 
@@@
امل طه .. الهدى اوياها 
عظيم وربها اعلاها .. بلمبارك 
@@@
رضا ربها .. وجب حبها
اميره وربها نصبها .. بلمبارك 
@@@
علي أحمد الحمود 
١٦-١٢-٢٠٢٤
مولد الزهراء ع 

ماتت امكم .. الشايله بالطف ألمكم
ماتت امكم .. يالله گوموا من محلكم

ماتت امكم .. ماتت امكم 
@@@
ناعي من ارض المدينه 
مجبل ابنوحه اونينه .. وراسه مكشوف
بالخبر لهل الشدايد 
حسين والعباس رايد .. وصدره ملهوف 
وهالخبر لمن اجازه 
ناده في يثرب جنازه .. امكم اطوف 
ماتت التنصب عزيه 
وخادمه عند الزچيه .. بنوح لطفوف 
…
گوموا إلها .. النعش عالي حملها 
گوموا إلها .. الشيعوها مو أهلها 
من تربكم .. ماتت امكم 
@@@
الشايل ابگلبه رساله 
نادى عبدالله تعاله .. لمكم اليوم 
ومن تجي عدل جروحك 
بالجسد مو بس بروحك .. وسيل لدموم 
امك ابدم المصيبه 
ناحت الشيبه الخضيبه .. وشالت اهموم
ومن تجي اسكب دموعك 
واحظن النعش ابضلوعك .. وخله ملچوم 
…
في چفنها .. قصة الطف الرهيبه 
في چفنها .. تروي آلام المصيبه 
وكل ألمكم .. ماتت امكم 
@@@
هاللي گضت كل مسيه 
تنحب اولاد الزچيه .. ابقرح لجفان 
صاحت اشهمني عيالي 
حسين بس العندي غالي .. ومات عطشان 
وافيه وربت وفايه 
للولي راحوا فدايه .. والاجل حان 
الغيره من عدها غريزه 
اليوم نادت هالعزيزه .. وين عثمان  
…
تنادي وينه .. العطر الجنه ابجناحه 
تنادي وينه .. يحمل النعش ابجراحه 
من شيمكم .. ماتت امكم 
@@@
يااسد بالحومه يزأر 
انثر اترابك يجعفر .. لطيبه بالحال
وعجل بهاي المسيره  
ودع امك للحفيره .. والنعش شال 
بهيده شيعها لگبرها 
اشعمل بيها صبرها .. لهدم اجبال 
ومحلوا جنازة ابمصيبه
تنحمل بيد الغريبه .. وانتوا لرجال 
…
ها يجعفر .. امك ابحسرة فراقك 
ها يجعفر .. ماتت وباقي اشتياقك 
ترد اسمكم  .. ماتت امكم 
@@@
العتب عالغالي حاله 
وبالاخص راعي الكفاله .. وراعي الزود  
لازم اعله امه يصلي 
والعزه لا ما يخلي .. وهذا مريود 
مو عذر سهم اعله عينك 
ولا عمد فاضخ جبينك .. وگطع لزنود
يابطل صان المحامل 
عالگبر انثر بوفاضل .. باجي الجود 
…
بگطع لچفوف .. هالنعش لازم تشيله 
بگطع لچفوف .. چنه محمل للعقيله 
وابعلمكم .. ماتت امكم 
@@@
المرسل بختم الرساله 
عد گبر طاهر اجاله .. وزاد لونين 
نادى هالخدمت مقامك 
تبعث لنحرك سلامك .. ام لبنين 
تگلك انهض عد دفاني 
اتصلي وتبارك مكاني .. سيدي يحسين 
امنيه عدها اشكبرها 
حسين يحضر لي گبرها .. بگلبه لحنين 
…
لقنوها .. يا ضحايه الغاضريه 
لقنوها .. باقيه بحسين حيه
وابدمعكم  .. ماتت امكم 
@@@
علي أحمد الحمود 
١٢-١٢-٢٠٢٤
وفاة ام البنين ع 

بمحنةٍ مريرةٍ شديده 
على اللذي قد مزقوا وريده
مضت الى رب العلا سعيده 

أم البنين الاربع شهيده  
@@@
معروف ام اربع بنين 
مذبوحه بس تبچي الحسين 
وبلطم الهامه والجبين 
لطمتها لمحزوز الوتين 
…
من بشر بأخباره نعى 
راحوا بالحومه الاربعه 
وعباسچ صوب المشرعه
مصيوب وچفه امگطعه
…
ماهمها من ولدها القتيل
وإن يكن ضنوتها الكفيل
بكت الى وفاتها وحيده
أم البنين الاربع شهيده  
@@@
شما تحفر بالغرقد قبور 
للزهره بالحسره تزور 
وتنادي وا قطع النحور
او يلي عالمرضوضة صدور
…
عالوجنه دمعتها تسيل
ولا يفتر من عدها العويل
وفايه هاي ام الكفيل   
بس تذكر بوالاكبر قتيل
…
قد بلغت من روحها التراقي 
مذ قرحت بدمعها الأماقي
وهي بجم حزنها رشيده
أم البنين الاربع شهيده  
@@@
وي زينب لو سوت عزاء 
مهجتها للعبره فداء 
ومن يثرب للعالم نداء 
مايوم ومثل كربلاء
…
كل مصرع تقراه وتعيد 
عاشورا يحيى من جديد 
عالوذر اعضاءه الحديد 
والجثه يلفحها الصعيد 
…
اذا رثت فالنعي عن بصيره 
حتى غدت من ونها شعيره  
ثاكلة بنهجها سديده 
أم البنين الاربع شهيده  
@@@
التبچي لو وصفتها الحروف 
في يثرب لو صارت تطوف 
ابعبرتها تتحطم سيوف 
ورايتها من گطع الچفوف 
…
مدمعها لو خدها يصب 
چن منحر بالدم منخضب 
الماعدها عالفرگه گلب 
ماتت خلوها بالترب 
…
لما قضت بلوعة الرزيه 
مضت الى رب العلا رضيه 
ونعشها لكربلا قصيده 
أم البنين الاربع شهيده  
@@@
علي أحمد الحمود 
١٢-١٢-٢٠٢٤
وفاة أم البنين ع 

وين اهلها .. ماتت الحره الوفيه 
وين اهلها .. گوموا من الغاضريه 
وين اهلها .. وين اهلها 
@@@
ناعي من ارض المدينه 
زلزل الطف ابونينه .. ابدمعته ايدور 
ام لبنين ابچفنها 
ولاحسين ولا ابنها .. بين لحضور 
رغم ما هالليوم منّه 
من كثر نوحه وي ونّه .. چنه عاشور 
الاحيت ابدمعه الشعيره 
 جسد واتمدد سريره .. وگلبه مفطور 
…
بالمصيبه .. وگفت الدمعه اعله خدها
وعالتريبه .. ولا ضنه يحضر يمدها 
في اجلها  .. وين اهلها 
@@@  
طارش وجايب رساله  
للولي وراعي الكفاله .. وجهه لونين  
ومن وصل للطف تألم 
عالخبر لمن تحزم .. طافح العين 
ناده باعله صوته داعي
الكم ابهالجيه ناعي .. ام لبنين
الاجل لمن غلبها  
ماتت وحسره ابگلبها .. لمصرع حسين 
…
ماتت اليوم .. ناعيه ماكو مثلها 
شايله اهموم .. للچبد فتت وصلها 
الما مثلها .. وين اهلها 
@@@
اول اوصوله ابذلوله 
للنهر خله نزوله .. وسرجه مايل 
صد الى شاطي الشريعه 
ونادى يا حامي الوديعه .. وياللي كافل   
الشالتك تسعه ابطنها 
وما لهت حتى ابوهنها .. وهيه حامل
وانته مو عاق ولا جافي  
ماتت اشتنطر يوافي .. يابوفاضل 
…
وين لچفوف .. رجع الچف اعله زنده 
ومن على الشرف .. اسحب السهم التعده
واگصد إلها .. وين اهلها 
@@@
للمدينه يابوفاضل 
عالنعش لا لا تسايل .. شكله معروف 
نعشه مشيول ابميوله 
والعبي بس اللي حوله .. ابرايه ملفوف
مو شرط موجوده چفك 
اركض وشيله اعله چتفك .. ابليه لچفوف

غطي صوب النعش عينك
ولف لعمامه ابجبينك .. لا لها اتشوف 
…
نادي يمه .. ونزل النعش ابترابه 
ومن تلمه .. لا ترويها الاصابه 
ولحظه خلها .. وين اهلها 
@@@
لمن اينزلوا نعشها 
الباريه تحت افترشها .. وصف لبطال
خوتك ولكبر وجاسم
وذيك لصحاب الضياغم .. نعمه لرجال 
وعالنعش نادي بولكبر 
للصلاة جثه ابلا منحر .. مگطع اوصال 
خل يكبر خنصر ايده 
ويقره من حزة وريده .. خامس الآل 
…
يكبر حسين .. وباللحد تالي يمدها 
ويقره تلقين .. ع اللي ضحت كل ولدها 
كل املها .. وين اهلها 
@@@
علي أحمد الحمود 
١١-١٢-٢٠٢٤
وفاة ام البنين ع 

يالله يولاد النبي وياهل الرساله 
شيلوا نعش الوافيه وام الكفاله 
@@@
بني سيد المرسلين .. الطيبين الطاهرين 
يا عمايم اشرق الكون ابفخرها 
امن المدينه لكربله .. خبر عاجل نرسله 
الموت ام عباس هالليله حضرها 
…
گوموا ياصفوة علا رب الجلاله 
شيلوا نعش الوافيه وام الكفاله 
@@@
المابطل منها النحيب .. تبچي عالشيب الخضيب
بيتها خالي من ليوث الحريبه 
كل بنيها امذبحه .. الروس منهم طايحه 
بعاشر لعاشور وطفوف المصيبه 
…
الخاضوا الحرب ابشجاعه وكل بساله 
شيلوا نعش الوافيه وام الكفاله 
@@@
ماتت ابدمعة ألم .. عالچفوف وعالسهم 
وعلى راس الشالته ارماح آل اميه 
اشگد شعايرهم حيت .. لين ماهيه گظت
ابكل صباح ابحرگه تنعي وكل مسيه 
…
ما نشف خدها ابدمعها من تلاله 
شيلوا نعش الوافيه وام الكفاله 
@@@
بالمدينه ام البنين .. حيل تلطم عالحسين 
وا شهيد او وا غريب امگطعينه 
ولعد گبر ام الحسن .. هناك تتفجر شجن
اتصيح وا مذبوح فضخوله جبينه 
…
وا شهيد وجسمه مطشر وصاله 
شيلوا نعش الوافيه وام الكفاله 
@@@
وين عباس الكفيل .. لأُمّه مايحضر يشيل
وين كافل زينب المعروف جوده  

مو عذر چفه انگطع .. حتى ما الها رفع  
خل يشيل النعش بچتوفه و زنوده
…
مو عذر من گطعوا ايمينه وشماله 
شيلوا نعش الوافيه وام الكفاله 
@@@
لا تناموا ابكربله .. بهالمصيبه الحاصله 
شيعوا مكسورة گلب ياهل الموده 
الها ناحل هالجسد .. من عظم فگد الولد 
وين ابنها مايجي ابلحده يمده 
…
رادت حسين اليلقن مو بداله 
شيلوا نعش الوافيه وام الكفاله 
@@@
علي أحمد الحمود 
٩-١٢-٢٠٢٤
وفاة ام البنين ع