❇️ ابوذيات لولادة الامام الحسين عليه السلام

يليث اصرعت شر اعداك يا سد
يسور بوجه سيل الجور يا سد
صبح گبرك صرح يحسين يا سد
على كل مجد ساكن بالثرية
-------------
عقيل الكاظمي

❇️ ابوذيات لولادة الامام الحسين عليه السلام

يتاجي وسيدي بدنياي ملكاي
أريدك لو حضر بالگبر ملكاي
هناك تصيح هذا العبد ملكاي
وعلامة حبك بروحي هويه
------------
عقيل الكاظمي

❇️ ابوذيات لولادة الامام الحسين عليه السلام

العشگ بس الك وحدك من قريته
الحرف لجلك كتبته من قريته
الشعِر فلّاح هاجَر من قرِيته
لمدينة حكمتك بالغاضرية
--------
عقيل الكاظمي

❇️ قصائد ولادة آية الصبر والعفاف زينب صلوات الله على صبرها
وحي الصبر
-----------
صوت الحزن صاح بإذنهه اليمنه = وحي الصبر كبّر بِذِنهه اليسره
اصبحت اكبر من كيان الاحزان = ولهاي سموهه العقيله الكُبره
من گبُل ما عالدنيا يسطع ضيهه = وجور الحياة اعليهه يطلع فجره
عالم الارحام الذي گيّدهه = غذّاهه دم حريه طلعت حُرّه
شكلين الهه امن الرضاع اتعيّن = من صدِر امهه وجِفِن امهه ودَرّه
صدر امهه غذّاهه ابحليب العِفّه = والجِفِن غذّاهه بدمع من سِرّه
اوسِر الدمع ظل كامِن ابمُقلَتْهَه = وانكشف، يوم حسين گطعوا نحره
ما گمّطوهه بثوب ابيض لاچن = ربّ العفاف اعليهه أنزل خِدره
ابسِتر الله محجوبه وكِذَب كل من گال = يوم الطفوف الگوم سِلبوا سِتره
مفتوح چفهه امن المهد ما ينسَد = لچف الكفيل اعلى العهد تنتظره
مِن گبُل ميلاد الكفيل العباس = ابفِكر العقيله انولد، أروع فِكره
تتبسّم امن تشوف هيبة حيدر = لاچنهه تتخيّل براسه الطبره
تضحك اذا أزهر جمال الزهره = وتتخيّل الضِلْع او تِنوح لكَسره
اتشوف الحسن، تشعر بلوعة سمّه = تشوف الحسين، تشوف گَطْعة نَحره
حفّتهه أفراح الأهل لاچنهه = ما بين افراح اوكِدَر متحَيْره
مولود ويّاها اوصُبَح توأمهه = والَف مشاعرهه الحزن من زُغره
وتربّه بحشاها وكُبَر وتعلم = منهه، اوصُفَت امّ الحزن عالفطره
حتى الفرح هم تختلف ألوانه = بعيون زينب لونه لون الحسره
حتى الدمع يتغيّر ابوجَنتْهه = دمعتهه بيضه اليوم، باچر حَمره
حتى الحلم بيه الصور مختلفه = اوگاع الجنان البيه تصبح صَحْره
حتى الألم من المهد للمرقد = يتجدد واسبابه صارت كَثره
بس الصبُر ما يوم عنهه اتخَلّه = عالمُرّه عاش وياها واعلى المُرّه
والامل صار اويه الصبر عون الهه = ليوم الظهور بهالأمل تنتظره
------------
عقيل الكاظمي
لا تنسوا والدتي واخوتي بالدعاء والفاتحة يرحمكم الله

❇️ قصائد استشهاد السيدة الزهراء عليها السلام

سجل البسمار * عالضلع تذكار
لحيدر حنه ضلوعه * وظلت من ادموعه
عالضلع تذكار
------------
اجه بحقده وظلامه وجاهليته تفور
عُبَر كل الحدود لحد ملاذ النور
البسمار وطلع من عنصره مذعور
لمن شاف طوفان الضوه المهدور
تتصاعد النار * بمنزل الكرار
والزهره مفزوعه * وظلت من ادموعه
عالضلع تذكار
------------ 1
غفه البسمار فوگ الضلع المهشّم
والمحسن غفت عينه اعلى نار ودم
ابگلب حيدر على الزهره الحزن غيّم
صفه بموسم لهيب اجروحه يمطر هم
آلامه أمطار * وجروحه انهار
بجفونه مجموعه * وظلت من ادموعه
عالضلع تذكار
-------- 2
عاشت فاطمه الزهره بضلع مكسور
وحيدر عاش ويّاهه ابصدر مجمور
اذا صاحت ، ابچفه ذولفقاره ايثور
واذا ناحت ، تمر بي لهبه من عاشور
بروحه الجرح صار * خيمه بوسط نار
واختنگت شموعه * وظلت من ادموعه
عالضلع تذكار
-------- 3
بنه بيت الحزن الهه ابّگايه الحيل
حتى اتهل مدامعهه ابنهار وليل
تودع الشمس وتبات اويه نجم اسهيل
اويواسيها علي وعبراته شبه السيل
دمعاته احبار * وجروحه اسفار
للحزن موسوعه * وظلت من ادموعه
عالضلع تذكار
--------- 4
نشف منهه الدمع ساعة نزاع الروح
مثل موت النده بزهرة عمر مذبوح
دفنهه بليل ، شاف العالم بلا روح
رجع وبگلبه أيوب المآسي ونوح
اومن ليل الافكار * ما يطلع انهار
ساعاته مفجوعه * وظلت من ادموعه
عالضلع تذكار
--------- 5
الچان بنظره من عينه يشلّ احروب
الچان بعدله يقلع للمظالم بوب
عليه صار الحزن طول العمر مكتوب
مكسور الگلب بس ماتمه منصوب
وبسمع الاقدار * بغياب الانوار
آهاته مرفوعه * وظلت من ادموعه
عالضلع تذكار
------ 6
عقيل الكاظمي

❇️ قصائد استشهاد السيدة الزهراء عليها السلام

كعدة

انصر جروحك ولا تطلب مناصر
واكتب احزانك قصيدة بقلم شاعر
شما تعاني من وضع * كلهه من يوم الضلع * والمناحر
------------
شما تعاني من مصيبه كلهه من مصيبة الباب
كل غدر بالدنيه اصله فرع من غدرة الاصحاب
دفعوا اعلى الزهره باب اندفع بيهه اعلى الزمن باب
واللي تعلّم عل غدر * ميهمة خاطر ينكسر
ميهمه لو يطحن صدر * حتى لو گلب النبي انصاب
هذا واقع بينه كل لحظه نعيشه
شما جمع ظالم على المظلوم جيشه
ولو تعده اعلى الشرع * كلهه من يوم الضلع * والمناحر
------------
ابگلبك تعيش المرارة ابعينك امن المدمع دهور
العصرت الزهره وصدرهه بيهه صدر الكون معصور
اختنگت الدنيه وضلعهه لحد هذا اليوم مكسور
من عدهه وتوالت محن * طبرة علي ، سم الحسن
وبسيوف غدّاره وفتن * بالطفوف انحزّت انحور
لولا ضلع الطاهره الما يطفه جمره
ما نزف دم الحسين وغاب فجره
وذاك نحره المنگطع * كلهه من يوم الضلع * والمناحر
------------
اول ارهابي تجرّأ وجّر النيران عالدار
منّه كل مجرم تعلّم ايروّع الاطفال بالنار
اوكل جنين ايموت صبرا على المحسن عينه تندار
وكل ضلع لمن ينكسر * يمّه الوديعه تنذكر
وكل راعي حگ من ينغدر * تنذكر محنة الكرار
اول ارهابي انولد يوم السقيفه
واصبح بكل مرحلة اينصّب خليفه
لهل جذر داعش فرع * كلهه من يوم الضلع * والمناحر
------------
من هِجَم جدّ الدواعش هناك بالدار الحشد چان
ابو ذر وابن ياسر وابن الاسود ويه سلمان
لاچن ابيَدهم وصيه چتفتهم عن الميدان
ولهالسبب داعش فِتَك * من شاف خالي المعترَك
كسروا ضلع غصبوا فدك * ما رعوا حرمة الانسان
صاحوا اصحاب المفاسد والمطامع
يا علي لو نمحي بيتك لو تبايع
صوت لسّا ينسمِع * كلهه من يوم الضلع * والمناحر
------------
انتفض حشد الله ابزمنّه ايحارب بكل الميادين
شافوا ابكل جرح زهره وكل يتامه حسن وحسين
نصروا دموع البراءه أمّنوا ورد البساتين
للتضحية رسموا صور * تتخلّد بطول الدهر
ولو ردنه نحفظ هل اثر * هل اثر يحتاج تدوين
عدنه اقلام وندوّن هل مسيره
حتى لا ينسى الذي بايِع ضميره
بالوهم من ينخدع * كلهه من يوم الضلع * والمناحر
------------
هذي محنتنه وجرحنه وابد ما ننسى الذي صار
دموعنه التجري قصايد نكتب التاريخ باشعار
حتى لا يخفي الحقيقه ظالم وحاقد وغدّار
حتى لا ينسى الزمان شلون عالزهره الظلم دار
حتى لا تنسى مهجنه اشظلت ابمهجتهه آثار
حتى لا ننسى ابمتنهه من سياط الحقد تذكار
لازم انذكر العالم باللي طاح ابعتبة الدار
يمكن امن الرعب روحه طلعت بعالم الاخطار
لو عدل بس ما تحمّل ايشوف امّه اگباله تنهار
مات الجنين ابحسرته
وروحه اطلعت وي غيرته
وفضه اجت وتلكته
ابصدره شافت اثر بسمار
--------
عقيل الكاظمي

يهدى ثوابها الى روح والدتي و الشهيد السعيد #درة_لبنان_الساطعة

❇️ قصائد الاربعين

آه من گلب زينب آه
آه واحنه نصرخ وياه
آه يا جرح ما ننساه يا مظلوم
-------------
اجينه وعدنه لهفه تسابگ الريح
وشوگ البينه ما يحتاج تصريح
وصلنه لكربله وجمرتنه تلهب
بلكي نشوف ضعن الحره زينب
اوشفناها وسمعنه صوتهه يصيح
جيت جبت الاحزان وجيت
جيت امن الدمع ما مليت
جيت وما نسيتك والله يا مظلوم
-------------
فتحنه صفوفنه لركب السبايه
نشوف الضعن وين يصير رايه
ابكثر ما بيه من هيبه وقداسه
رجع رغم اليسر مرفوع راسه
لاچن للحزن رافع الرايه
راد هل ضعن يمك راد
راد ذكرياتك تنعاد
راد لمرقدك يتعناه يا مظلوم
--------------
تعنت ليك نبراس الهواشم
ابملامحهه الدهر من حزنه راسم
يمك هاجت اعليهه المواجع
وبدت تنعاك وتهل المدامع
وبدينه وياهه ننصبلك مآتم
نوح وارتفع صوت النوح
نوح وكل گلب بيه جروح
نوح لمذبحك ظل ينعاه يا مظلوم
---------------
وگفنه ابين ناعي وبين شاعر
نصبنه للحزن لجلك منابر
وبدت تتناثر حروف المصيبة
دمعه اعليك دمعه اعلى الغريبه
وابد ما طابت جروح المشاعر
هام كل حرف باسمك هام
هام بالحزن والالام
هام يللي جرحك سواه يا مظلوم
-------------
سكتنه وكل گلب گال اليريده
لحد ما بالشعر خلص رصيده
اوردنه نشوف زينب لمن تنعاك
بسمك صاحت ومن حان ذكراك
بدت تنعاك كل دمعه بقصيده
راح كل فرح بعدك راح
راح ولا أمل عگبك لاح
راح وانت فگدك أرداه يا مظلوم
--------------
حزينه وعل مناحه تعلم النوح
غريبه وللجروح تزيدهه جروح
آ يحسين صاحت واعتله الصوت
ونت ونَّه حلّ اگبالهه الموت
حضرهه الموت بس ما طلعت الروح
مات صبري من بعدك مات
مات أنسى جرحك هيهات
مات گلبي لو ما ذكراه يا مظلوم
-------------
عقيل الكاظمي / بغداد

❇️ قصائد الاربعين

زور الحسين بدمعة سچابة
واصرخ بصوتك اه يحسين ومصابة
---------
شيل الجرح بالروح وتعنه
لسيد شباب وشمعة الجنة
بحسرة ونحيب ومدمع اونه
بدمعك على العطشان خل يرتوي ترابه
---------
إگصد لبو اليمة بجمر نوحك
وبّاب گبره طشر جروحك
ومثل الخيم خل تلتهب روحك
وتذكر المظلوم من حرگوا اطنابه
---------
إگصد لابو اليمه بگلب يلهب
وخلي الدمع مثل المطر ينصب
واذكر مصاب ام الحزن زينب
بغربة وگلبها انهار من فارگ احبابه
----------
إگصد لابو السجاد بالحسرة
واقسم عليه بفاطمة الزهره
يا من لكسر الخاطر تجبره
گلب المحب ناداك بيدك دوه صوابه
-----------
زاير اجيتك معتني لدارك
عبدك انه واحسبني خطارك
يل ما ترد بالخيبه زوارك
ابابك لگيت الخير ساجد على اعتابه
----------
يحسين اجيتك مذنب ونادم
حلفتك بخوة گمر هاشم
مولاي اقبل عبدك الخادم
عاني لمضيفك جيت لا لا تسد بابه
----------
عبدك يبو السجاد اخذ بيده
يا من خدمتك مأتمه وعيده
خل يبقه باسمك نابض وريده
وبالحشر من يمناك خل ياخذ كتابه
-----------
عقيل الكاظمي

❇️ قصائد الاربعين

#رئيسية

رجعتي من اليسر لارض المدينه
ودليلچ ما طفت جمرة ونينه
بگلبچ يل عقيله هموم من فگد الاهل لليوم
دليلچ ما طفت جمرة ونينه
---------
رجعتي لديرتچ يا زينب من الشام
وما خمدت بگلبچ جمرة الآلام
طلعتي امن الوطن محروسه بالاكرام
لچن من عگب اخوتچ دارت الأيام
ورجعتي بروحچ جروح المصيبه
يزينب واسمچ الحره الغريبه
وعليچ النايبات اتحوم من فگد الاهل لليوم
دليلچ ما طفت جمرة ونينه
---------
يمن بيچ الخدر يا زينب اتخدّر
ومعاني العفة باسمچ أصبحت تفخر
حتى الريح چان بثايتچ لو مَر
برماح الهواشم چان يتعثر
عجيبه ودارت اعليچ الليالي
وصفيتي بغربتچ من غير والي
وحيده والگلب مهضوم من فگد الاهل لليوم
دليلچ ما طفت جمرة ونينه
---------
شفتي من اليسر ما شفتي من شدّات
وحملتي يل عقيله ابدنيتچ لوعات
واشد محنة يزينب نظرة الشمات
حملتيهه وجذبتي من الهضم حسرات
رجعتي وشفتي الديار الخليه
عليهه انرسمت علوم المنيه
ابمبانيهه الحزن مرسوم من فگد الاهل لليوم
دليلچ ما طفت جمرة ونينه
---------
لديار الاهل رديتي شتشوفين
لا بدر الهواشم لا اخوچ حسين
من عگب اخوتچ هم بعد تغفه العين
بالهم والمناحه اعلى اهلچ تظلين
اوتگضّين العمر بالحسره والنوح
وانتي اللي كتمتي بگلبچ جروح
دموعچ تظهر المكتوم من فگد الاهل لليوم
دليلچ ما طفت جمرة ونينه
---------
كتمتيهه ومثل صبرچ ابد ما صار
حبستي دمعة عيونچ عن الأنظار
وبگت عبرات صدرچ مثل جمر النار
نزفتيهه يزينب عد مباني الدار
حبستي دموع عينچ حدر الضلوع
ولاچن من جرت ما صبّت دموع
صور عن محنتچ وعلوم من فگد الاهل لليوم
دليلچ ما طفت جمرة ونينه
---------
جريتي دموع من دلالچ وهضمه
لمّن شفتي دارچ موحشه وظلمه
ذكرتي حسين ظل بكربله جسمه
وهذا الحال اصبح عگب اليمه
مظلمه الدار من بعد الاماجد
وتظل لخيالهم عينچ تشاهد
مسهره وما لفاهه النوم ** من فگد الاهل لليوم
دليلچ ما طفت جمرة ونينه
---------
عقيل الكاظمي

يا حسين الناس تشجي كروبها
ابساعة الشدة لعد محبوبها
--------
يا حبيب كلوبنه نشجي الهموم
من هضمنه وما لعد غيرك نروم
سيدي عُذّالنه بينه تلوم
بيك نردعهه ونسد ادروبها
-------
نفخر وبسمك نباهي كل لئيم
ونهتدي ابنهجك الحق المستقيم
تربتك بيها الشفه لعلة السقيم
أو حضرتك للدعه انفتحت بوبها
---------
يا أملنا وانت مفتاح الأمل
يا بطلنه وانت اعظم كل بطل
يا علمنه اليخفج بهام الدول
يا إمام الكون يا مهيوبها
--------
بحضرتك يحسين تتهاوه الكلوب
او حدِرِ كُبتك تنجلي كل الكروب
ابثورتك تعترف أقطاب الشعوب
وعلِّمَت ثورتك كل شعوبها
--------
نوّرِت يحسين أفكار المله
نهضتك نهضة أحرار بكربله
ثورتك سرّت گلب عقد الوله
اوجدك المختار يا مندوبها
--------
انطبع منهاجك يبن حامي الدخيل
بالضماير وانت مشعل كل دليل
يا دليل الناس يالتشفي الغليل
من شمال الكون لاقصى اجنوبها
-------
موقفك للدين مو لجل الطمع
موقفك ضد المظالم والجشع
موقفك بي حاربت اهل البدع
واللي شنت عالشريعه احروبها
--------
ابد ما تنساك أجيال الدهر
صمَمِت نهضتك يا نور البصر
لجل تحرير العوالم والبشر
ولأمَية افضحِت كل عيوبها
-------
شاعر الكاظمية ملا حسن الكاظمي