ياسيد الاكوان يالمصطفى
بفقدك على الحياة العفى

يبن اشـرف عشيره وعمه ابوطالب
وابن عمـــــــك مقاتل خيبر الغالب
الك ڪل هالعرب رفتــلك الشارب
والك بالمصحف الباري بقه يخاطب
أَلَمۡ نَشۡرَحۡ لَكَ صَدۡرَك وَوَضَعۡنَا عَنكَ وِزۡرَك
بحرُ الندى رمزُ العلى والوفا
بفقدك على الحياة العفى


يخـــــــــاتم الانبياء وســـيد العالم
ابــو الڪـــــل آدم وانت ابو آدم
الكرم بسمك يصير ومو بسم حاتم
يمن بالرحمه ݘفـــك للخلگ سالم
لَعَلَىٰ خُلُقٍ عَظِيمٍ قَالَهَا رُب عَلِيمٍ

وذكرك للداء صار الشفا
بفقدك على الحياة العفى

ابمحبتك رضّعتنه امن الصغر امنه
وترانه ابخلــقـك وخُلقـــــــك تعلمنه
محمـد يـــامحمـد انتـــه مُلهــــــــمنه
الصلاة اعليك تجـــري سيدي ابدمنه
ارسل الله نبينا رَحْمَةً لِلْعَالَمِينَ

قد انزل الله لك المصحفا
بفقدك على الحياة العفى

اذا يم يوســـــف انجـوم السمه سجدت
الگمر لجله انحـنه ويمه الشمس ركعت
الك كــــل هالخلايق يالنـــــــبي صلت
وضمايرنه الخـــــدمتك تعرف اتشوگت
شوقنا بالقلبِ يبقى لرسول الله نلقى
كشوق يعقوب الى يوسفا
بفقدك على الحياة العفى


كلام الله نزل يالمصطفى لجلك
لَهُمْ لَوْ ڪُـــنْتَ فَظًّا ربك يگلك
غَلِيظَ الْقَلْبِ لَانْفَضُّوا مِنْ حَوْلِك
عليهم رحمة الله انت وي اهلك
اية التطهير انتم بالعلى والخلد فزتم
للدينِ صار اسمك المسعفا
بفقدك على الحياة العفى


وليد المندلاوي

خـدامك مشـايه
مـاتنزل هالرايه
֍֍֍֍
جينه نركـض ونتسابق
بلكي ابخـدمتك نتــــوفق
ابهل خدمه أَستثمر وياك التجاره
افـديك ابعـافيـتي وأقبلـها الزياره
طينــاكم لحچايه
مــاتنزل هالرايه
֍֍֍֍

خيـرك واصل الحد راسي
عطرك عــايش ابـــأنفـاسي
اندلك من صغري ودوني الضريحك
ولو شايف مـا وفّي عــذراً استميحك
ابهل چلمه وفـــايه
مـــاتنـــزل هالرايه
֍֍֍֍
ربي لُمي نزل رحـمه
هـيّه علّمتني الخـــدمه
وامحـرم من يوصـل يوليـــدي تگلّي
في بيتك ڪون اسـود لحسينك تخلّي

يا يمـه والغـايه
ماتنزل هالرايه
֍֍֍֍
أَدعي يُمـه الله يرحمچ
يمــها الزچــيه اتضمچ
وابأبنچ افتخري ماعاف الخدامه
ماأنساچ أبگبرچ حـد يوم القيامه
عالخدمه اموصايه
مــاتنــزل هالـــرايه
֍֍֍֍

اهـلي علّموني فعلن
خـادم قـالباً وقلـــباً
من اني ابكـاروكي الاسـود لبّســـوني
اه يحسين امصابه ابصغري سمّعوني
واجدامي عنّــايه
مـاتنــزل هالرايه
֍֍֍֍
امشـي والطم اعله امصابك
تـدري مـــــا أدگ بس بابك
عبــدك يابو الاكبـر ماريـدك تعتقني
مديت ايدي ورايــد بالمدمع ترزقني

ياروحي واضوايه
مـاتنـزل هالــرايه
֍֍֍֍
ربـك واعله جدك صلّه
حبـك يعــني نعـــمة الله
رايد منك حـــاجة واگضيها يغالي
كـون ابحب هالخدمة تتعلم جهالي
وهاي احلى تربــايه
مـــــاتنـــزل هالـرايه
✿✿✿✿✿✿✿✿✿✿✿✿✿✿✿✿✿✿
وليد المندلاوي

يابويــه اشســووا بيه
خمس اسنين ومسبيه
مو مال احبال اچفوفي وافـراگك زيّد خــوفي
حسين حسين حسين حسين
֍֍֍֍
يبو ادفه حضن وينك شوكت يالغالي ترجع
اريدن چلــمة ابنيتي يبويه ابصـــوتك اسمع
ابغيابك روحـي مختنگه ونبض گلبي تگطّع
چنــت لمدلله وهسه گمت مـــن امشي أُوگع
فجعـني غــيابك
ڪتلني مصابك
دورتك بين اجـروحي
والگيتك ماخذ روحي
يالماخذ مني شوفي وافراگك زيّد خوفي
حسين حسين حسين حسين
֍֍֍֍
اخذ من عندي كلشي وبس دفو احضانك اطلب
يبـــويه ابغيــــبتك حقــده عليّه المجــــرم يصُب
چفوفه اچبيره واخـدودي صغيره وبيها يضرب
ابد ماعنده اي رحــــمه الطفـــوله حقها يغصب
شلعــلي التراچي
وشبعني بــواݘي
مــاعنده رحــمه وغيره
يضربني وطفله صغيره
لمراكض هد اݘتوفي وافراگك زيّد خوفي
حسين حسين حسين حسين
֍֍֍֍
ركضت من الخيم للبر واجه الطاغي وضربني
التراچي مني من جـرهن يبويه وشگــــلي اذني
وبقه بجـــدامه يرفســـــــني وابـــد لا مارحمني
ابرقيق الصــوت اصيحـنّـك ردت تسمعلي وني
اصيحك يغالي
اريـــدن دلالي
ادعي من ربي يردك
مكسورة خاطر بعدك
الله اليعلم بظروفي وافراگك زيّد خوفي
حسين حسين حسين حسين
֍֍֍֍
اميــره ابيا وڪــت انــي اطـــــبن للخرابه
على صدرك چنت اغفه واصيحك بابه بابه
ابعـــباتي اتلفلفت هسه وانــــام اعله الترابه
انـــام واحلم ابحضـــنك شلع گلــــبي غيابه
انه لو اشوفك
ابد ما اعوفك
بالصـــحوه وابأحلامي
صورت وجهك جدامي
يالما فارگت اطيوفي وافراگك زيّد خوفي
حسين حسين حسين حسين
֍֍֍֍
اصيحك بويه حاچيني عفتـني وگلبي محروگ
خذوني والحـــبل بيدي السبي للطــــفله ميلوگ
عباتي امتربه وامشي الفرح من وجهي مبيوگ
ابرجل مچويه تاليها اطـــب مهضمومه للسوگ
ابغيابك اجوني
سبـــيه خذوني
من حضنك غاب وعفته
شوفــــوني المــاشايفته
گالوا للوالد عوفي وافراگك زيّد خوفي
حسين حسين حسين حسين
֍֍֍֍
رقـــيه بنتـــك اللـــيله القصــرهم بـــويـه طـبت
يجيبولي ابطشت راسك حضــنته وعيني وشلت
ابگلب ملهوف انه اشبگتك لحد ماروحي طلعت
ابد مـــاعفتك ودعتــك عليـك انفــــاسي خلصت
اخذني اويه روحك
اداوي جــروحــك
قصـــة هـــالاب وبنته
من مات وماتت سكته
اصرخ من عمقي وجوفي وافراگك زيّد خوفي
حسين حسين حسين حسين
✿✿✿✿✿✿✿✿✿✿✿✿✿✿✿✿
وليد المندلاوي

كل سنه وكل عام اصغر الخدام
هيچي خليني اعله حالي
اصغر الخدام
֍֍֍֍
تضل دعـــواتي اسمي لا ترفعه
اريدن حالي يبقالي اعله وضعه
مـــدام ابنيتي يابـــــو اليمه دمعه
اريد اصغــر اسم اسمي توضعه
يابو عبدالله ما اريدن جاه
هاذي امنيتي يغالي
اصغر الخدام
֍֍֍֍
تضل هالخدمه بيها البخت والحض
يمن اسّـــودك ســــوه وجهي ابيض
يمن صدره ابحــوافرهم ترضرض
حنانك سيــدي اعلـــــــــــينه تفيض
خدمتك يحسين دمعه وسط العين
علمت تبقه عيالي
اصغر الخدام
֍֍֍֍
محبتك بالگلب يحسين فطره
مُلك مـــاريد رايد اني نضره
فقير ابقه اريــــدن يبو العتره
اعرفنك تحـــــب وادم الفقره
هيچي ابقه اوياك ابكل مكان الگاك
هالاسم كلش حلالي
اصغر الخدام
֍֍֍֍
منو مثلك يقــــــــدر الي يخدمه
خدمتك نعمــــة الله واحلى نعمه
طعم بيها الي يصبح خادم اسمه
وهنيئاً للذي صــــــــدره يلـطمه
شكراً وممنون چي صرت مجنون
كون ابقالك موالي
اصغر الخدام
֍֍֍֍
يالمغرّگني مـــن خيــرك وزايد
يمن صيتي يضل بسمك الماجد
غيرڪ مانطــــاني قيمه واحد
ممنونڪ بعــــد ڪلشي مرايد
ابقه يمك كون خادم اصغيرون
انقبل يبقه سؤالي
اصغر الخدام
֍֍֍֍
إمام الخادم اتصـير وصديقه
اريد اتعاهد واڪـــتب وثيقه
اريد ابني على نهجك طريقه
لأن كلها چذب وانت الحقيقه
علمتني اعليك وليه طيت ايديك
وآنه ابقالك يغالي
اصغر الخدام
✿✿✿✿✿✿✿✿✿✿✿✿✿✿✿✿
وليد المندلاوي

زينب اتصيح صاحب الثار يالمهدي لا تتأخر
֍֍֍֍
ابكهف گلبي يمهدي عايش اويايه
يعـمه وغيبتك شـو طـولت اهوايه
يبو صـالح واضــنّك تعـرف ابهايه
عله الشــاطي الگمر عافالك الرايه
اخر النور بالگلب نار وينك يشبل القسور
֍֍֍֍
وحگ جدك وحگ كل طگه من ضلعه
أنــــه مــــــن الســـبي ادعـــــيلك وانعه
يشهــــــــــدولي يعمه النــــدبه والجمعه
گبـــــل لا تنـــــولد ادعيــــــــلك ابدمعه
يبن البدور گلبي محتار يمتى اشوفك تثأر
֍֍֍֍
اسولفـــلڪ عله الي صار ياعمه
سلام الله على جــــدك ابــــو اليمه
سلام الله على اجروحه ونزف دمه
سلام الله على صدره وكسر عظمه
يبن الايات ابن الانوار ذبحوله شفت المنحر
֍֍֍֍
يعمه الاعــوجيه ڪسّــــرت صدره
وعلى راس الرمح شفته نزف نحره
وثلث تيام جسمه مرمي عالغـــــبره
وتلم بعـــــياله ضـــلت عمتك الحره
يلي محجوب تعرف اشصار بين المچاتيل اعثر
֍֍֍֍

بعد عين الحُسين احتـرگت اخيامي
وگمت ارگض والم اطفالي وايتامي
غريبه يسّــــروني وذبحوا الضامي
وعلى راس الرمــــح ينشال جدامي
طال الغياب يبن الاحرار يمتى الگلب يتبشر
֍֍֍֍
النوى وين استقرت بيك يالمهدي
تنــــادي ابصوت ياللـــثار يا جدي
أطالب بالدمــــاء اليوم اجيت ابدي
يعـــالم راية العــــباس وسط ايدي
ابقه انخاك شبل الابرار الچفك يتاني خيبر
✿✿✿✿✿✿✿✿✿✿✿✿✿✿✿✿✿✿✿
وليد المندلاوي

يامحرم شهر الاحزان
يامحرم موعــدك حان
ضمه ونوح وسبي وخيمات محترگه
֍֍֍֍
شايل ابشهرك جرح ومصحف الله اعله الرمح
دموع واطفال وذبح مناحر
اشگد يتـامه عطّشت اشگد شفـــــــايف فطّـرت
ويلي واشگد اكسرت خواطر
يا محــرم بينه واشخــــليت ڪافي
چم طفل من دون والد يمشي حافي

وابهلالك مات چم حيد
وابهلالك منـــي شتريد
طفل بگمــــــاطه ذبلان ويبس حلگه
ضمه ونوح وسبي وخيمات محترگه
֍֍֍֍
ابصدري دخـان وألم ابراسي مرسومه الخيم
ابعيني دمعه وبيها دم چـــــوتني
اشعر ابلـــــوعة طفل ابچفــــي آثــــار الحبل
واشعر ابســوط النذل اعله متني
كل وجع بالطف گمت باحساسه اشعر
گمت احس ابچـف اديّه ابلايه خنصر

والحوافر تهجم اجموع
والحوافر تهشم اظلوع
احس اخيول داست صدري واتسحگه
ضمه ونوح وسبي وخيمات محترگه
֍֍֍֍
كلشي بعـيوني اختلف عالنهر رحت ابلهف
چنها ايدي ابلايه چف وگطيعه
من اصد الڪـــــربله ابلا ڪفيل العايله
يعني صــارت معظله وفجيعه
شفت الحسـين انكسر عالشاطي ظهره
يعني راح اخيول اميه اتدوس صــدره

مات كلشي والله يانـــاس
مات كلشي ابموت عباس
ابوفاضل صــــريع اعيوني ممصدگه
ضمه ونوح وسبي وخيمات محترگه
֍֍֍֍
جايب اوياك السبي اگلوب محروگه وعبي
وتمشي عائلة النبي غريبه
عيـــــــالهم متسلّبه حلــــــــوگــهم متيبّسه
حـــــــافيه وامتربه مصيبه
وام گـلب محروگ تمشي گوه گوه
اخ يا عـــباس وينـــــــك والله بلوه

اتصيح زينب حــامي الخدور
اتصيح زينب اشسوه عاشور
بناتي امتــونهن مــــن الظرب زرگه
ضمه ونوح وسبي وخيمات محترگه
֍֍֍֍
الاسود ابروحي انفرش وعايش ايام العطش
ابگلبي عاشـورك نهش ذبحني
وين ياخــــــذني الگلب طفله نامت عالترب
موقف اهـــوايه صعب جرحني
ارحل ابأيامــــك الذيچ الخرابه
چم طفل مرعوب وينادي ييابه

چم سبيه دامــعه العين
چم سبيه اتريد الحسـين
أنه غير المــــأسي ابهل شهر شلگه
ضمه ونوح وسبي وخيمات محترگه
֍֍֍֍
كلشي بهلالك شفت راس الحسين ابطشت
ابداله ڪونك ذبّلت شفاهي
طفله عالاب دورَت شبگت الراس وبچَت
عالطـشت واتيبسَت الـــهي
وچانت اكبر فاجعه ابديوان اميه
مــــات ابو ارقيه على بنته رقيه

مااريدك كلك اجــروح
مااريدك عوفني وروح
بيك اتنفست حـــزن اويه كل شهگه
ضمه ونوح وسبي وخيمات محترگه
✿✿✿✿✿✿✿✿✿✿✿✿✿✿✿✿✿✿✿
وليد المندلاوي

يمته الثار يمهدي يمته الثار
֍֍֍֍
الك جيش يغـايب
على النار وگف وامتاني كلمة ظهر
والجنــود مواكب
بالامـــال بقــت منتظره منـــك خبر
يلطمــون الـى ان
يسمعــون ابو صـــالح لجلهم حظر
يمـــوعود أمـــاني
يخــــدمون ابلواء الخــدمه يالمنتظر
بيهم نار يمهدي يمته الثار
֍֍֍֍
الــك ثـــار نـريده
يمولاي بدايـت ثـــارك ابڪربله
والاصوات تنـادي
بالدمــــوع وأين الطالبُ ابدم هله
يمحجـــوب حُسينك
بقه ايلوب شفت يبن الحسن مقتله
والجـــروح چــثيره
والخدور وسف ربطوهن ابسلسله
يالمختار يمهدي يمته الثار
֍֍֍֍
نخـــــــت بيك علـــــيله
غبت وين بعــدني انتظرهم هلي
مـــن الشــــام رقـيــــه
تنــاديك على راس الابــو مقتلي
ومن ام اعون تصيحك
توصـيك ترف بيدك علم ڪافلي
للجـــــيــــوش تطــــبها
وبالچفوف يرد فقاره جدك علي
شنهو الصار يمهدي يمته الثار
֍֍֍֍
اخو حسين گمركم
الك عاف چفوفه ورايه صوب النهر
على الشاط تركهن
امــــانات يريــــدك تستلـــمها الگمر
خبـــــر راد يسمعه
من سنين تره المهــدي طلع وانتصر
والاعـــــداء تردها
والاخبـــار تگول الحــق يناس انتشر
سيفك غار يمهدي يمته الثار
֍֍֍֍
ينصـــرون قضيتك
يمولاي علي السيستاني جهز حشد
والك صاح امر من
ابوحسين نطــاني الفتوه هوه ابمجد
يصـــيرون يميــنك
على الموت الف مره يطب مستعد
ابعزيـــــات تربــوا
فــــدائين يجـــون ولا يهمـــهم لحد
صوت انصار يمهدي يمته الثار
֍֍֍֍
متى الصوت نسمعه
لقد جاء اخير اولاده حامي الحمه
نضل طـــول عمرنه
بالامـــال على الجمعه يبن فاطمه
من اتصـــــير يمهدي
عالاڪوان زعـيم الدنيه بالخاتمه
تشڪــــــلون حكومه
للاسلام المقر الڪوفه والعاصمه
حامي الجار يمهدي يمته الثار
✿✿✿✿✿✿✿✿✿✿✿✿✿✿✿✿
وليد المندلاوي

دون المجـالس ميتين
                          لطم الصدر يحيينا
֍֍֍֍
آنه الحچه بجنوني حتى الاخرس
ما تـرهم الشــذره اذا مــو محبس
هيچ احــنه بس يوم العــزه نتنفس
والله اشكثر محتاجين
                          طور ونعي يبچينا
֍֍֍֍
عاشگ خدمتي ابهل العشگ لتناقش
واحــدنه جوه الخــدمه روحه فارش
وآنـــــه على قـيـد المجــالس عـايش
نخدم نضل ممنونين
                          بالموڪب اتربينا
֍֍֍֍
رايد هـــوه المجلس اشم خلوني
اعقــل اذا ڪلش يزيــد اجنوني
بحسين موتوني ابحُسين احيوني
لقبونا بالمجنونين
                        ڪلش تلوگ اعلينا
֍֍֍֍
مشروعي ارضي فاطمه مشروعي
ومـن اللطم اكـسر علـيها اضلوعي
يم الحسن وفقيني اجـــري ادموعي
يالزهره ادري اترزقين
                       ابفيض الدمع رزقينا
֍֍֍֍


عشرت عمر ويه المجالس عندي
ارتـــاح اذا صدري الطمه ابأيدي
يا فاطمه غيـــــر الدمو؏ اشعندي
ڪلما نضل مخنوگين
                        نشتم هواڪم جينا
֍֍֍֍
شلّه ابحـــياته المـايواسي الزهره
ميّت احســـاسه الماتنخگه العبره
وخيعونه كل واحد يحصل نظره
لال الرسول الغاليين
                        حتى النفس ضحينه
֍֍֍֍


ڪلش علينه ايلوگ لبس الاســـود
ابهـــــاي الحســينيه الخــدم تتوحد
للبحر مـاصـرنه جزر صرنه المد
خدامهم للطيبين
                           ياربي اشهد لينا
✿✿✿✿✿✿✿✿✿✿✿✿✿✿✿✿✿✿✿

وليد المندلاوي