Oduu: “Nagaa biyyaatiif jennee qawwee keenya gadi qabnee waliigaltee taasisne” - Sanyii Nagaasaa

Tibbana mootummaa waliin waliigaltee araaraa mallatteessanii kan galan qondaala Waraana Bilisummaa Oromoo (#WBO) duraanii Sanyii Nagaasaa, waliigalteen “dhimmoota nageenyaafi hiree waraanaa irratti xiyyeeffata” jedhan kun guyyoota lama booda hojiitti akka seenu ibsan.

Marii mootummaa waliin taasifameen waliigaltee keeyyatoota 13 qabu mallatteeffamu eeruun, “waraanni waggootaaf dirree #Oromiyaa irratti taasifame ummata nagaa miidhuu malee faayidaa waan hin qabneef” gara waliigalteetti isaan geessuu himan.

https://addisstandard.com/Afaanoromoo/?p=5243

Seerri Aadaa hawaasa #Somaalee hambaa kiliyaa addunyaa ta’uun galmaa’e

Seera Aadaa “Heer Isee” jedhamu, kan hawaasni Somaalee biyyoota #Itoophiyaa, #Somaaliyaa fi #Jibuutii keessa jiraatan ittiin tajaajilaman hambaa kiliyaa addunyaa ta’uun galmaa’uu ibsame.

"Heer Isee" seera aadaa hawaasa Somaalee gosa #Isaa yoo ta'u, walgahii 19ffaa Dhaabbata Barnoota, Saayinsii fi Aadaa Dhaabbata Mootummoota Gamtoomanii (UNESCO) Paaraaguwaay keessatti gaggeeffame irratti hambaa kiliyaa addunyaa ta'ee galmaa'eera.

Hambaan kun akka galmaa’uuf Itoophiyaa, Jibuutii fi Somaaliyaa waliin ta’uun gaaffii akka dhiyeessan ibsameera. Itoophiyaa bakka bu’uunis Itti aanaan Pireezidaantii Naannoo Somaalee Ibraahiim Usmaan Faaraah walgahii kana irratti hirmaataniiru.

Oduu: Namoonni waraqaa eenyummaa 'Faayidaa' baafatan miliyoona 10 gahuu ibsame

Namoonni waraqaa eenyummaa dijitaalaa 'Faayidaa' fudhatan miliyoona kudhan gahuu Sagantaan Waraqaa Eenyummaa Biyyaaleessaa beeksise.

Hogganaan Biiroo Sab-qunnamtii Sagantaa Waraqaa Eenyummaa Biyyaaleessaa Obbo Abeneezar Fallaqaa waraqaan dijitaalaa “tajaajila hunda hammataafi amansiisaa” kennuuf fayyada jedheera. “Hojimaata seeraan alaa ittisuufi tajaajila ammayyeessuu” keessatti gahee qabas jedhame.

Kana malees, waraqaan eenyummaa dijitaalaa kuni gara fulduraatti dhaabbilee hedduu keessatti akka ulaagaatti kan tajaajilu ta’uu himameera.

https://www.facebook.com/AddisstandardAO/posts/pfbid0n3ER89mFVmvPERrscWg23HuArpgY8z3FeZ7Mvh3ZcuLD1tKQC9tEPurHf5TMFtpGl

Oduu: Jubaalaand loltoonni Somaaliyaa guyyaa 15 keessatti akka bahan akeekkachiifte

Pireezidaantiin #Jubaalaand Ahmad Maadoobee loltoonni #Somaaliyaa guyyaa 15 keessatti Jubaalaand gadhiisanii hin bahan taanaan "tarkaanfii cimaa" akka fudhatu ibse.

Ahmad Maadoobee haasaa Masjiida Kismaayootti argamutti taasiseen, loltoonni Somaaliyaa iddoo qarqarqa Keeniyaatti argamtu Raaskaamboonii jedhamtu keessa buufatanii jiraachuu eeruun guyyaa 15 keessatti gadhiisanii akka bahan akeekkachiiseera. Guyyaa 15 keessatti hin bahan yoo ta'e "gatii kaffalu" jedheera.

https://www.facebook.com/100072136776579/posts/pfbid0t85zvKqNBWb7ADmcdryE4wft8DBpgcHkb2UDTGpGTeQ51xMzQPrFaSMzFAoxxno2l/

#Booranatti namoonni dubartii tokko mukatti hidhanii reebsisan hidhaa hanga waggaa 7 irratti murtaa’e

Godina Boorana Bahaa aanaa #Waacileetti namoota dubartiin haadha ijoollee sadii taate tokko abbaa warraasheetin gara jabinaan akka reebamtee miidhaa qaamaa cimaa akka gahu taasisuun himataman hidhaa cimaan adabaman.

Viidiyoon gocha kana mul’isu ji'a tokkoon dura miidiyaarratti qoodamuu hordofee namoota yakka kanaan shakkaman himatamtoonni 1ffaa Galgaloo Waariyoo [abbaa warraa miidhamtu], 2ffaan Jaarsoo Boruu, 3ffaan Galgaloo Jaatani fi 4ffaan Dhibaa Goollicha jedhaman to’annoo jala oolaniiru. 

Himata irratti dhiyaateen miidhamtuun waldhabbii ishiif himatamaa 1ffaa (abbaa warraashee) gidduu jiruun himatamtoonni 2ffaa fi 3ffaan jaarummaan taa'uun miidhamtuun akka mukatti hidhamte abbaa warraatin reebamtu taasisuun miidhaa qaamaa cimaa irraan gahuu ibsameera.

https://www.facebook.com/100072136776579/posts/pfbid0PKPbLgG29N6BJaNV4sgqLsUPVVmLNnsUWYXfWAMLPgpSmeh59uudpBsb6AzaBsc4l/?app=fbl

Bulchiinsa #Kibbaa_Itoophiyaatti barsiisonni 60 ol mindaan jalaa muramuu morman hidhaman

Naannoo Kibba Itoophiyaa godina #Koree aanaa Sarmalee keesaa barsiisonni 66 fedhii isaanii malee mindaan irraa cituu mormuudhaan hojii dhaaban hidhamuu maatiin isaanii VOA'tti ibsaniiru.

Barsiisonni hidhaman kunneen poolisootaan reebicha irra gahuu fi kanneen miidhaa hamaa irra gahee hanga ammaatti wal'aansa dhorkaman jiraachuu maatiin himan. 

Pirezidaantiin Waldaa Barsiisota Kibba Itoophiyaa obbo Amaanu’eel Phaawuloos, barsiisonni hidhamuufi reebamuu isaanii ilaalchisee akka gabaasni isaan qaqqabe ibsaniiru.

Osoo mariin irratti hin taasifamin mindaa barsiisotaa kutuu fi warreen morman hidhuun sarbiinsa mirga namoomaa akka ta’es dubbatan.

Bulchaan aanaa Sarmalee obbo Goshuu Getaachoo, "barsiisonni kunneen kan hidhaman barsiisonni biroo akka hin barsiifnee dhorkuu waan yaalaniifi" jedhan.

https://www.facebook.com/100072136776579/posts/pfbid02ywkzjQBLsTrNoZ7Y6sTJ8ErUqQzUymKisBp5AP4XhG6eXEYMsRRdsKxz5JEAhYPAl/?app=fbl

Gurgurtaa humna elekrikii irraa baatiwwan sadi keessatti galii Birrii biiliyoona 15 ol argame

Humni Elekrikii Itoophiyaa baatiwwan sadan darban gurgurtaa humna biyya keessaaf dhiyeessarraa galii Birrii biiliyoona 8.7 ol argachuu beeksiseera.

Dabalataan humna elektirikii Daataa Maayiniingiif dhiyaaterraa galiin Doolaara Ameerikaa miiliyoona 59.4 (Birrii biiliyoona 7 ol) argamuu gamaaggama raawwii hojii kurmaatan 1ffaan ibsameera.

Bara baajataa kana piroojektoonni anniisaa meegaa waattii kuma 7 fi 200 ol maddisiisuu danda’an 5 ijaaramaa jiraachuu ka’eera.

Kurmaana 1ffaa darbe keessaa humna saa’aatii giigaa waattii kuma 6 fi 501 maddisiisuun danda’amuu dhaabbatichi ibseera.

Oduu: Abbaan Taayitichi dhaabbitni siivilii #CARD “gochaalee dantaa biyyaa miidhan irratti hirmaate” jechuun uggure

Abbaan Taayitaa Dhaabbilee Siivikii Federaalaa dhaabbatni siivikii Giddugala Dagaagina Mirgootaa fi Dimokiraasii (CARD) "siyaasa irraa walaba ta'uu osoo qabuu, kaayyoo isaatiin ala socho'uun gochaalee dantaa biyyaa miidhan irratti hirmaate" jechuun uggure.

Uggura kana hordofee dhaabbatichi ibsa baaseen gochaalee uggura kanaaf akka sababaatti eeraman “dhugaa irraa kan fagaate” jechuun ibseera. Murtiin kennamees “hojimaata seeraa barbaachisaa ta’e hin hordofne” jedhe.

https://addisstandard.com/Afaanoromoo/?p=5158

Hojjettoota miindaan jiraataniif gibirri hojii akka hir’ifamu gaafatame

Pireezidaantiin Konfedereeshinii Waldaalee Hojjetoota Itoophiyaa Obbo Kaasahuun Foolloo, hojjettoota miindaan jiraataniif gibira hojii hir’isuu dabalatee tarkaanfiiwwan biroo akka fudhatamu Ministira Muummee Abiy Ahimadiin xalayaadhaan gaafachuu isaanii ibsan.

Pireezidaantiin konfedereeshinichaa Kaasahun Foolloo VOA'tti akka himanitti, gatiin birrii gadi bu'aa dhufuu irraa kan ka’e hojjettoonni miindaa murtaa’e argatan rakkoo jireenyaa cimaan isaan mudachaa akka jiru ibsaniiru.

"Keessattuu hojjetaa galii xiqqaa qabu guyyaa hojjechaa halkan halkan hoteelota irraa nyaata hafe kadhachaa bulaa jira" kan jedhan Pireezidaantichi, dhiibbaan jireenyaa keessumaa kanneen paarkiiwwan industirii keessatti qacaramanii hojjetan irratti akka hammaatu eeraniiru.

https://www.facebook.com/100072136776579/posts/pfbid0QDhDsXGFiiYHeWgDgHeiHwkxVT8jGpWxxLTgHncWV1ns4k7gWa1bAGuZpJ7vaEzdl/?app=fbl