دك بابي يمسلم ساعة الضيج
اصيرن ماي الك من ينشف الريج
تعال وشوفني شلون اشربك ماي العيون

انه طوعه وعجبك حيل نشميه
ويامسلم وبيه اطباع بدويه
بنت شيوخ يعني انه شيخيه
الك افزع يمسلم فزعه عربيه

بت خير واحبن جلمة الضيف
واذا نكرم يمسلم نكرم بكيف
كلشي بجيتك ايهون اشربك ماي العيون

انه بنت الحموله وفخر للحشمه
وبنت الينطي ضيفه لو كصد هدمه
تصح حزمت زلم ماعدها اي جلمه
وتصح عندك مره تعادل الف زلمه

زلم وشكد زلم ماعدها غيره
ويامسلم مره تعادل عشيره
اذا همه يخونون اشربك ماي العيون

تعال العطش شوف بحالك شسوه
العطش واهل العطش يرحولك فدوه
انه اختك يمسلم واهل للخوه
انخاني علي تلكاني بالنخوه

انه ابنيت عرب والنخوه ثوبي
شنهي الكوفه فنه الوصل صوبي
وحقك مايكدرون اشربك ماي العيون

انه اربات المظيف الما رجف عزمي
بالضيج الكلافه ادور عله اسمي
انه بنيت ابوي وادري بي نشمي
الك خدامه اصيرن من تجي يمي

سفير حسين وانه انجن بالحسين
دك بابي تعال افرشلك العين
كلبي بحبه مفتون اشربك ماي العيون

اذا بيبانهم سدوها لا تهتم
الك مفتوح بابي وكلبي اتقدم
اذا شح مايهم خل يشح وتبسم
وعلي مسلم اصيرن راح الك زمزم

يامسلم تعال وشوفني اهواي
اصيرن مشرعه ومن عيني اخذ ماي
تعال وخل يشوفون اشربك ماي العيون

من طوعه يمسلم كلشي اتوقع
اكض سيفي وهدن هدت الانزع
بالف فارس تعدني وعلي من اطلع
مثل ما يفزع العباس الك افزع

طوعه ومن تعدني جن تعد جيش
اذا ازعل يمسلم هالزلم بيش
مره وبجيش يدرون اشربك ماي العيون

تمت
ميثم العمري

بالضيج تعرفهم زين الاصحاب
ياهو الذهب منهم ياهو التراب
عندك خوش صحبان معدنهم ذهب بان

مو كل صاحب ايكولون صاحب عنه حاسب
اكو صاحب عمر يفديك واكو ماعنده صاحب
اكو ما يحمي ظهرك يوم واكو عنك يحارب
من كصته تعرفه الزين تعرك من تعاتب

يكولون الصديج اتعرفه بالضيج
ماي ايصير الك من ينشف الريج
لجلك يبقى عطشان معدنهم ذهب بان

موش بكثرت الصحبان وياهو اهواي عنده
يصح واحد يساوي اهواي من يوكف بشده
الصاحب مو تحشم كون يفزع ليك وحده
ويستاهل حبيب اليوم من ربعك تعده

بالشده تعرف صويحبك زين
كبل لتكله وينك كال بالعين
جلمه والها برهان معدنهم ذهب جان

حيهم صاح ابن ظاهر وين العنده غيره
امشونه انطمن اخت حسين يم شيخ العشيره
وألها نعتني جوكات وبهوسه جبيره
ويم باب العقيله انصيح حي عله الاميره

طمني وكمت بالخيمه اراقب
هذا الصدك عنه تكول صاحب
عزمهم هز الاكوان معدنهم ذهب بان

خويه اسمعهم ايهوسون والهوسات حلوه
خيعونك بهيج اصحاب كلبي ارتاح توه
حيهم صاحو عله الموت وي حسين يسوه
تعال الخوة العباس شوف شلون خوه

كلبي ارتاح من كامو يهوسون
شحده اليوصل الزينب يصيحون
واحدهم شهم جان معدنهم ذهب بان

يبين معدن الصحبان واليوفي الصديقه
ومثل صحبان اخوي حسين مامر عالخليقه
زلم تتسابك عله الموت عرف كلمن طريقه
وبدمهم الطاهر ذاك بزغ فجر الحقيقه

فزعت عرب فزعو كلها غيره
ورايتهم بجف شيخ العشيره
غيارى ويومهم حان ومعدنهم ذهب بان

وكفو عالمنيه بزود ذوله اهل الحميه
وكفت كربله بأجلال وخذت الهم تحيه
صاحو من عشكنه حسين عشكناها المنيه
مو انصار خل خدام تسجلنه الزجيه

عهد عشاك بالدم وقعيناه
ابد والله مانترك حسيناه
نظل للصحبه عنوان معدنهم ذهب بان

تمت
ميثم العمري

يحسين بالطف لاتهم ربيتلك اربع زلم
كلهم وفه وحنيه تربات ام بدويه

الله رزقني بأربعه ذيج الوجوه الحلوه
وربيتهم ذاك الربه وبيهم زرعت الخوه
ماشفت برباهم تعب والتعب الهم يسوه
غيرة علي ونخوة علي خضرت بيهم نخوه

شبان كلهم مرجله ايرفعون راسي بكربله
ادعيلهم يوميه تربات ام بدويه

عن كربله وعن الخيم وياهم حجيت اهوايه
آنه امهم وأم الوفه وطلعو علي وفايه
يحسين دكولي الصدر ومنهم خذيت حجايه
وشمحله بجفوف الگمر باجر رفيف الرايه

معدل وأمه معدله ولو زعل زعله شيحمله
طالع اوليدي عليه تربات ام بدويه

وصيتهم يا ابو علي اگبالك يدنگون الراس
سيدهم انته وسيدي اتراب جدمك ينباس
ولخيام زينب بالغرب ايصيرون الهن حراس
وعباس بالطف كشختي صاح ونعم من عباس

ربيتلك خوش اربعه والموعد عله المشرعه
وعالشاطي يسطع ضيه تربات ام بدويه

يا ابو علي اول درس علمته الهم حبك
والثاني حب ام الخدر ويمشون دوم بدربك
وعالتضحيه وبذل النفس ويبقون اريد بقربك
وعباس لو مرك عطش من ماي عينه ايشربك

وصيتهم بيك اشكثر وگلولي نفديله العمر
وارواحهم ثوريه تربات ام بدويه

محظوظه يحسين شكثر حظي ييمه شكبره
وفقني الله وخادمه صرت العزيز الزهره
يالخدمتك اعظم شرف وخادمك ترفع قدره
وتتباها دوم بخدمتك ام البنين الحره

كلش جبيره محبتك وشرفنه الله بخدمتك
ووجوهم قدسيه تربات ام بدويه

تمنيتهم عشره الولد عشرتهم افديهم راح
لجلك واكولن قصرت ما طعنته جسمي ارماح
وياك كون بكربله وتسحگني خيل وارتاح
ومثلك اطيح من المهر ويحز وريدي الذباح

وبصدري مثلك انرفس وهناك انامن بالشمس
وامشي ردت مسبيه تربات ام بدويه

تمت
ميثم العمري

من ثنيات المخيم للحرب فارس تقدم
طلع طلعت بدر تام بجماله ماكو جسام

عيونه وخزرته ومن رفعت الحاجب
امبين هالفتى من آل ابو طالب
نزل نزلت علي وملثم وغاضب
شحلاته بثوب عرسه طالع ايحارب

مشيته وطوله وكشخته جن علي راكب مهرته
علي جنه باللثام بجماله ماكو جسام

اذا كلهم ظلم وبراسهم ابليس
انه براسي علي وجدي علي قديس
آنه اول فتى طب للحرب عريس
لجيب السمه العمي مو عرش بلقيس

كربله اخسفها بيهم والسمه اطبگها عليهم
وادم هايه ظلام بجماله ماكو جسام

اذا طر البحر موسى وجره بكيفه
يطر جسام رايح كربله بسيفه
اذا حاتم بفرسه من كرم ضيفه
كرم برگابهم جاسم وخذ حيفه
شگد كريم وصيته شايع وعله ابوه الحسن طالع
تشهد اله الايام بجماله ماكو جسام

الهواشم غيرة الله وبالطلابه اثگال
زلم گدها واهلها والزلم افعال
امبين من مهرته هالفتى خيال
بحيث ارجال گام ايذبها فوك ارجال

فارس ايعادله ميه ركض اجيوش ال اميه
يحصد بالزلم گام بجماله ماكو جسام

غيور وبالحرب ما ينثني عزمه
مثل حمزه وعلي كل جيش ميهمه
بيهم صاح واشر عالسبط عمه
ماعدنه وسيله غير ابو اليمه

هوه ابوي وهوه امامي وآنه نازل عنه احامي
شحده اليدنه الخيام بجماله ماكو جسام

عمره زغير بس بالمرجله شكبره
طب ليهم وخله اوجوهم صفره
رابي بمدرسة عباس شيگدره
شحلاته من طلع بعمامته الخضره

صفنت الدنيه بجماله واحله مرتين بقتاله
ناصر سيفه الاسلام بجماله ماكو جسام

تمت
ميثم العمري

للقتال برز بعيونه الغضب
للقتال جنه قتال العرب
للقتال محكمه بالطف نصب

الاكبر اجاهم من ثنيات الخيام
تبسم تلثم وجنه حيدر باللثام
بخزرته رعبهم وختصر سيفه الكلام
خبصه صارت بالمعسكر والشهم يلگونه شارد
ياهو يبرز صاحو اول واحد ايذبها عله واحد

وينه صاح الفارس الگدها وشهم
وينه صاح وضمت الروس الزلم
وينه صاح موتهم بالطف گرب

شجاعة بسالة علي حماي الحمه
تعنه بمهرته ونحنو يم صارمه
اسمعو حكمكم وآنه قاضي المحكمه
صدرت حكمي النهائي وهالحكم ما منه رجعه
مايظل واحد قراري وللسمه اليشرد اتبعه

ما يضيع إليفر يرجع الي
ما يضيع ثار طلابه علي
ما يضيع والمثل بيه انضرب

جبيره الطلابه وذاك من ذاك العبر
گصدهم سمعهم بكربله ضاع المفر
اركضو اجاكم او واحد بواحد عثر
والله صارت عمله بيهم بمهره نص الجيش داسه
هذا سوه روحه ميت وذاك ضم من عنده راسه

بحيره ذاك وذاك كله تورطت
بحيره ذاك وهذا گله تقشمرت
بحيره ذاك وذاك شافاه وگلب

عجيبه محمد لو علي هذا البرز
تصور مثلهم هيج بالحومه ارتجز
تغير تحير الجيش من عنده وعجز
علي ينعد بألف فارس الغيرته ما يوصل احد
عنه گامت كلها تنشد هذا حيدر لو محمد

هو صال ترادمت خيل وزلم
هو صال ظل يطش بيها ويلم
هو صال علي وبثاره طلب

تحزم عليهم جنه شيال اللوه
كضاهم فناهم مر عليهم كالضوه
ابرزو القتالي صاح كل عشره سوه
شجابكم وشورطاكم وياهو كال الحرب لعبه
اترس الطف راح بيكم وابن غانم مات احسبه

ما يهاب جيش وبكثرت عدد
ما يهاب صاح ياحيدر مدد
ما يهاب فارس وللحومه طب

تمت
ميثم العمري

لا تسافر افراكك صعب يا اغله الأحباب
لا تسافر وتتركني وحدي ودمعي سجاب
تاذيني برحيلك // لا ترحل دخيلك

آنه يابويه العليله الجنت خيمه ألها وأمان
وين اروحن عكب عينك وانطي وجهي اليامكان
عشت يابويه بحنانك ويسوه عندي الدنيه جان
ومن كلت وياك اخذني خوفي افكد هالحنان
خوفي ترحل وبويه رحلتك خايفه أطول
خوفي ترحل خليني أمشي وياك شتكول
لا اندل وجيلك // لا ترحل دخيلك

ارحمني بويه ولا تسافر الخاطري اجل السفر
خافن الرحله طويله وماشي بدروب الخطر
كامت اشباح المنايه ترسم بعيني صور
ناس تحرك ناس تنهب وعمتي حيرها الدهر
بلايه خيمه وعن اليتامه تشكف اصياط
بلايه خيمه ورم متنها والكلب شاط
زينب تشتكيلك // لا ترحل دخيلك

انته بس وياك اخذني بالسفر تلكاني ريح
التركض وتتعب رجلها خلها بالطف تستريح
أرد اشيل اصياط عنهن ونطي ظهري وما اصيح
وياهن أرد أمشي سبيه بلكي من الناكه اطيح
وياك اخذني اتجوه اريد بنار الخيام
وياك اخذني اعجن الحنه بعرس جسام
وامشي وي عليلك // لا ترحل دخيلك

بكربله اجيوش ال اميه بويه اشوفن حاوطوك
وحدك وذبلت اشفافك من العطش بس ما رووك
وين جا عباس أخيك احزام ظهرك وابن ابوك
جن اشوفك بويه طايح والعده بخيل اعتنوك
بويه اشوفك مرمي يغالي بحر الشموس
بويه اشوفك الخيل اعله صدرك كامت ادوس
العسكر معتنيلك // لا ترحل دخيلك

رمله سوت عرس جاسم بخيمته وتجري الدموع
مادرت مذبوح ابنها خل تطفيها الشموع
وذاك يمكن علي الأكبر انطبكت بظهره الضلوع
جن محمد بويه مرمي واجه يمه يون يسوع
مكطعينه يوسف زمانه وعين عباس
مكطعينه بجدي محمد أشبه الناس
مكطع من يشيلك // لا ترحل دخيلك

ذاك ياهو العل شريعه مرمي وبعينه السهم
هذا يمكن عمي بويه الطايح بصفه العلم
وذاك عبدالله أشوفه للسهم نحره ابتسم
وذيج جنها عمتي زينب عليها حركوها الخيم
ايناغي أشوفه عبدالله رايد يشرب الماي
ايناغي أشوفه اتكله اشرب ماي عيناي
امصابه فت دليلك // لا ترحل دخيلك

تمت
ميثم العمري

ما صار عرسك هيهات يجسام ييمه
متروس جسمك طعنات يجسام ييمه
ابني عرسك وتعبي ضاع
ابني ليش نايم عالگاع

مدري نايم مدري ميت يمه اگعد تعبتني
ليش ساكت فدوه احجي آنه امك عذبتني
يايمه افتح عيناك
مابيه حيل الفرگاك
ضيعتك وضاع ارباك
جسام اموت بلياك

ما ادري من عندي اتروح يجسام ييمه
لو بيدي اضمك بالروح يجسام ييمه
ابني رحت عن عيني بساع
ابني ليش نايم عالگاع

يمه اگعد خل نسولف اهدوم عرسك حضرتهن
وياي جانت يمه زينب واعله طولك گدرتهن
يبني البس اهدومك گوم
ما يصلح عليك النوم
وارحم دليلي المحروم
هذا العرس ما مقسوم

نايم يبعد امك ليش يجسام ييمه
گلبي اليحن يصبر بيش يجسام ييمه
ابني للحزن صرت اشراع
ابني ليش نايم عالگاع

الحنه يبست كوم يمه ارد احني بيدي جفك
الخيمه يمه زينتها وحلوه صارت خل ازفك
بالخيمه حضرت اشموع
وتاليها صارلي ادموع
صوت المدامع مسموع
وگلبي يجاسم مشلوع

يايمه مو ماظل حيل يجسام ييمه
مسحوك صدرك بالخيل يجسام ييمه
ابني رحت من دون اوداع
ابني ليش نايم عالگاع

يمه تدري الولد غالي صعبه عالام من تفگده
الفرگه تكتل وموش سهله الراح ابنها اتموت بعده
لو طول عليها اغياب
تگعد تنطره عله الباب
گعدت الفاگدله احباب
وتصير بفراگه اتراب

فگد الولد يبني آلام يجسام ييمه
ماتشفي جرحه الايام يجسام ييمه
ابني دمعتي ونوحي امتاع
ابني ليش نايم عالگاع

مگطعينك يمه جاسم ارد حضنك وارد اشمك
حيرتني اشلون اشبگك منين الزمك خاف ألجمك
ابجسمك اشگد اجروح
اتلجمك وروحي اتروح
المن تظل بعد الروح
ويايمه اشوفك مطروح

اشيوجعك گلبي ايصيح يجسام ييمه
وكلما شلت وصله اتطيح يجسام ييمه
ابني گلبي متروس اوجاع
ابني ليش نايم عالگاع

ها يجاسم فارگتني بديره غربه ضيعتني
ارحم امك ياهو الها لوعفتها حيرتني
يايمه مو وكت افراك
من هسه احس صدري ضاك
امك حنينه وتشتاك
حلم العمر مني انباك

جابوك اليه مذبوح يجسام ييمه
ويمه عله طولك مجروح يجسام ييمه
ابني انته ياحلو اطباع
ابني ليش نايم عالگاع

تمت
ميثم العمري

ليش ما خذتوني ياهلي وعفتوني
تعبني الغياب وعيوني عالباب

ما تنام عيونه كلمن فارك اعزاز الگلب
وعنه لو طول سفرهم تظل عينه عله الدرب
وانه راحو عني كلهم ودمعي بجفاهم يصب
اختنك كل مغربيه خنگت العاش بغرب

افراكهم هد حيلي وما انامن ليلي
اتنطر اجواب وعيوني عالباب

الباب يندك وآنه اركض ركضت الفاگد اخو
المثلي هسه ابين اهلها وانه لا ام لا ابو
راح ابوي وفارگاني وحيل فرگاه مو حلو
وحيل مشتاگه الحنانه حسين اليعوضه منو

هجره عذب حالي وشيعوضه الغالي
مليت العتاب وعيوني عالباب

ارد اكلكم مر هجركم لا تطولون الغياب
تعبن عيوني بجفاكم وگلبي من الفرگه ذاب
عليه يابويه اليالي تمر مثل مر السحاب
وگمت اصيحن ارجع ارجع مارجع منك جواب

طوليت اغيابك وروحي ورده ابابك
ذبلها المصاب وعيوني عالباب

جيتك اركض ياحبيبي وركضت احلامي وراي
بالسره كلهن صحتهن وانه منتظره سراي
هسه اكول ايصيح بسمي وگمت اشم گوه هواي
ليش بويه ماصحتني وليش ماگتلي تعاي

ما گلتلي اتروحي وآنه طلعت روحي
بدلالي الصواب وعيوني عالباب

يا عزيز الروح ريض وارحم بگلبي الحزين
آنه ادري شگد تحبني وگلبك ادري شگد حنين
بويه وياكم اخذني عليك امشي ام البنين
وي رقيه خل اروحن گالت ويانه تجين

خل اروح وياها اختي مر فرگاها
جا شنهي الاسباب وعيوني عالباب

أبغيابك ضاع عمري وعشت بين الذكريات
كاعده وايدي عله خدي وتلعب اگبالي البنات
ويانه صاحن گومي العبي وضاگت بعيني الحياة
تذكرت بويه خواتي وآه يا فگد الخوات

هدني حيل اجفاهن ما خذتني وياهن
فارگت الاحباب وعيوني عالباب

تمت
ميثم العمري

جنها لحظات بسرعه مرت ذيج عشرتنه الطويله
جنها لحظات رحل عني ونكسر گلبي برحيله
فاركاني وضاع عطره وحتى ما خلالي ذكره

منين اجتني المشرعه واخذت اخيي
وبعد فيك يا ابوفاضل بيش افيي
خويه حرت ابفركتك مدري شسوي
اعتنيلك لو ارد بخيامي اطفي

خويه عباس تحيريت وحيرتي كلش جبيره
خويه عباس كام شتم زينب الما عنده غيره
انكسر گلبي شيجبره وحتى ما خلالي ذكره

خويه مشتاكتلك بكد رحمة الله
طحت جم مره لجن هالطيحه غفله
خويه محد كالي زينب اسم الله
الزمت متني والرباب اتكلي بله

زركه المتون هيه شافتهن وكامت تلطم العين
زركه المتون بدمعه دارت عينها العباس وحسين
بحالتي ياخويه ادره وحتى ما خلالي ذكره

يامن ايوصلني الك واكعد وحاجيك
وبيدي اطلع السهم من عينك وداوييك
خويه اشرلك عله امتوني وبجيك
وبعباتي من الشمس عباس اغطيك

اعتني ليك خويه اسويلك عزه يم الشريعه
اعتني ليك هذا اخيي وذني جفينه كطيعه
مگطع عله الشاطي انظره وحتى ما خلالي ذكره

مو كلت مافاركج شو فاركتني
ومو كلت ما عوفج وشو هالعفتني
كتلي كومي وياي امشي ورافگتني
وگدت بيدك ناگتي وللطف جبتني

كتلي بحماي وانه اجيت بهيبتي بزودك يعباس
كتلي بحماي العدها اخو مثلك تظل مرفوعة الراس
راح اخوي وانه انطره وحتى ما خلالي ذكره

حسين لازم ظهره رد والخيمتك طب
وصاح خويه وجر عمدها وكام ينحب
طاح للكاع ونده عينيني زينب
حسين ياعباس تدري عليك شيب

رد للخيام حسين اول مره اشوفن ظهره محني
رد للخيام وصاح اخوي عله الشريعه راح مني
شفت اخيك لزم ظهره وحتى ما خلالي ذكره

التمو عله حسين وعيوني تنظره
بصدر اخيك خويه سحكن خيل عشره
والشمر كاعد شفت خويه عله صدره
وشفته حط سيفه بركبته وكطع نحره

شايل الراس وهذا اخيج صاح يازينب انظريه
شايل الراس اكبال عينج عالرمح رايح اخليه
شفته لمن رفس صدره وحتى ما خلالي ذكره

تمت
ميثم العمري

مصيبة علي الاكبر جبيره للخيمه جابوه بحصيره
تگطع وصل وجروحه تاذيه وحاير ابوه يمه ويلم بيه

شافه طاح من المهر وناس اجت يمه شكثر وصار بالكيف
هذا يطعن بالرمح وذاك يلجم بالجرح وهذا بالسيف
حاوطوه ومنين ما دارو يطبروه
وآخ بويه ايصيح صدري شما يطعنوه
للخيم يرجع يريد وما يخلوه
راد ماي وكلها صاحت لا ترووه

نام عله وجهه بحضن الاتراب ومن عنده سلبو حتى الثياب
محد يجيه وميه ينطيه وحاير ابوه يمه ويلم بيه

جروح جسمه منترس ونايم بذيج الشمس ويدور افياي
علي عالگاع انفرش ويبس گلبه من العطش وتعذب اهواي
منين ما دار الوجه طعنوه بالرماح
وجسمه من كثر السيوف اتگطع وراح
الطعنه فوك الطعنه وشگد ياعلي صاح
عمت عيني عليه ماخلوه يرتاح

ياناس حيره امصاب الاكبر شيلمه جسمه الي تطشر
ومن الشمس ياهو اليغطيه وحاير ابوه يمه ويلم بيه

دمه عالكاع انثر مثل زخات المطر من دارو عليه
حالته اتگطع الگلب شلون نايم عالترب ومتوسد ايديه
گطعوه وگامو بجسمه يطشرون
وحركو گلب حسين بالاكبر يصيحون
كون من جسم ابنه كلشي ماتخلون
حتى ابوه يحتار يجمع مهجته شلون

گطعوه وسحكوه بالحوافر وحسين خلوه بأبنه حاير
صاير وصل عالغبره يلگيه وحاير ابوه يمه ويلم بيه

المصرعه حسين اعتناه عالوجه مرمي لگاه ومهشم الراس
رمه بروحه من المهر تمدد بطوله ويجر بالگوه الانفاس
ظل يشم بيه وگعد يم جسمه حاير
يلم بوصاله ويطشرون العساكر
علي يبني بيك شمسويه الخناجر
اهواي من جسمك خذت ذيج الحوافر

من جسمك اشكد ياعلي ضاع وطشوك مثل الماي عالگاع
ياجرح من عندك اداويه وحاير ابوه يمه ويلم بيه

حيلي يابويه انهدم شلون ارجعك للخيم وانته عله هالحال
اشلون اشيلنك حرت وانته يبني توذرت ومن عندك شظال
منين ماشيلك كتر من عندك ايطيح
وآخ بويه منين ما لزمنك اتصيح
بيدي لميتك وخاف تنثرك الريح
ومثل دمك راح دمي عله الثره ايسيح

جبت الحصيره وكمت الم بيك وماعندي شربت ماي ارويك
ابيا گلب لخيامي اوديه وحاير ابوه يمه ويلم بيه

تمت
ميثم العمري