انا الذليت عدواني
انا المحد تعداني
رفعة راس من عباس
والزهراء عنواني

**

انا الشديت ظهري ابيرغ الخوه
خذت من الكفيل الغيره والنخوه
توهم داس گاعي ومبتلي بلوه
عرفني ويا السواتر عشرتي حلوه

اكف الموت بذراعي يزهراء
ابد ما تنسحگ گاعي يزهراء

انا اول ما صرت ثاني
انا المحد تعداني

----------------------

ثارج ما نسيته بچفي رديته
بصدرهم والفشگ بالضلع دگيته
الغصب حقچ يزهره اليوم عرفيته
عزلته من الجثث بالنار حرگيته

واضح شارك بظلمچ يزهراء
ما ضاع وبرد دمچ يزهراء

ترد ثارات خواني
انا المحد تعداني

-------------------

مثل عباس من صال وگصد ليهه
دخل للمشرعه وغير معانيهه
هذاك الجان خزرة عينه تگضيهه
تطيح ارگابهم ما نعرف شبيهه

چان يصيح مظلومه يزهراء
من الدنيا محرومه يزهراء

اگص اليوم ذرعاني
انا المحد تعداني

--------------------

بعد ميضيع حگ العتره وعيونچ
اسبيهم يزينب وسفه يسبونچ
احنه الرجعينه الثار لمتونچ
عونچ يلعظيمه نصيحلچ عونچ

زينب هاي ديرتهه يزهراء
يم حسين گعدتهه يزهراء

خادم للعقيله اني
انا المحد تعداني
----------------

نطيح وعلسواتر نرفع الرايه
دمنا يگض ظهرنا وهو تچايه
هو الموت يسهل ظلت حچايه
تمنينا. بمحرم نحضر قرايه

نبچي ونلطم بلوعه يزهراء
على الما سلمن ضلوعه يزهراء

حسين انسان سواني
انا المحد تعداني

كلمات / رعد الفريجي

(جاوب يسلمان)

بيدي أدفنت روحي  **  اشلون احمل اجروحي

جـاوب يـسـلـمـان   **   جـاوب يـسـلـمـان

----------------------------------------------*

قصت جراحاتي ابتدت للموت اعيش اوياهه
الترست اعيوني صوور تصعب عليّه انساهه
دافـنـهـه مكسورت ضلـع بـاچـر شـگـل ألطـٰه
استعجل اتراب الـگـبـر بـعـمـر الورد غطاهه

المايدري خل يدري  **  ألهه انكسر ظهري

------------------------------------------*

هاي الوديعـه فاطمة خـدهـه بـتـرب خليته
جاوب يسلمان بعَجل اشحال الدفن عافيته
ايحقله تـنـزل دمعته الماتت عليله ام بيته
الفاگـد ايجرحه الـهـوه لـمـن يـطـب الريته

خليني أبّث حزني  **  شال النعش متني

--------------------------------------------*

اثمنطعش عـمـر الـورد وتراب اخلي اعليهه
عافتني بثياب الحزن وألهه الدموع اجريهه
دنيا التغيّب فاطمة اشباقيلي واطمع بيهه
اتمنه وياهه الاجل كلمه بصراحهه احچيهه

الكسرت ظهر حيدر  **  صعبه الدفِنهه أكدر

---------------------------------------------*

ياهو اليلومه الحسرته اليدفن عزيزت روحه
بگد ذكرياته ومدمعه ايحس تصير اجروحه
والمثلي فاگدله غصن واجب يضل ابنوحه
ماعوفن الدمعه أبـد وبـكـل وكت مسموحه

زهره وعَلّي تبعد  **  خليني يمهه أگعد

----------------------------------------------*

اشلون اعيش ابدنيتي والزهره عني ابعيده
أتـنـطـر الموتي صـرت هـذا الـعـمـر ماريده
اليبقى وحيد بـغـربـتـه حتى الصبر ميفيده
ايسولف بطاري المشه وأسم الحبيب ايعيده

تدري انهدم حيلي  **  ويخلص سهر ليلي

-------------------------------------------------*

✍خادم الزهراء ع
الشاعر رعد الجريخي

تروحين وتضل روحي بهضمها
زغيره إني ودمعتي شلون اضمها
تعالي البيت خالي ... زينب والليالي

ياباب أمن اشوفك روحي تحتار
خذيت الزهره منه واحنه ازغار
يانار الـتشب بضلوعي هالنار
بصدر أمنه اثر ضل باقي بسمار

ماتت والجنازه من خذوها
گمت اركض وره إلي شيعوها
ياهو الي بقالي ... زينب والليالي

علي مشيع نعشها وضهره مكسور
يروح المقبره زاتوت مجبور
ضلمه البيت يمشيع نعش نور
راحت أمنه والحسره بالصدور

عافت بيتها وسكنت لحدها
العزيزه أمنه اثر سطره اعله خدها
يتامه نصير تالي ... زينب والليالي

درب المقبره مغير ألنه الألوان
خل نتوادع اويه أمنه يدفان
تروح بهل السهوله أبالي ماجان
التموت أمه يضل يتمنه الاكفان

الموت أهون ولا افگد حنانج
اطب البيت بس خالي مكانج
شلونج كل سؤالي ... زينب والليالي

الحسن وحسين بعدج مالهم حال
ونين الفاكد ايهز حته الاجبال
ركن البيت كله بغيبتج مال
صفناتي بغيابج صارن اثگال

بعمر ثمنطعش منه تروحين
جرحج طاب لوبعدج تونين
وضعج شغل بالي ... زينب والليالي

يجيني الليل بهمومه وضلامه
أسِيّر عالمجان البيه علامه
اشم ثوبج وليلي شلون انامه
يم حسين من بعدج يتامه

اگصد للمكان البيه تنامين
وينج يمه اصرخ يم الحسين
لبنيتج تعالي ... زينب والليالي

وراي الطف سبي ونيران الاخيام
القدر كاتبلي بس اوداع والآم
باجر ابنج يكسروله الاعضام
ذبيح وعينه تنضرلي والايتام

تعالي يم حسن اصرخ بالطفوف
مذبوح الحسين وحضنته سيوف
وراسه برمح عالي ... زينب والليالي

علي محسن الفرطوسي

(القصيدة لليالي الفاطميه)

كلشي من عندج..........نعمتي وخيري
وانه حس روحي .....هواي تقصيري

يا زهراء ___يازهراء

كلشي  من   عندج  صبح  ياسر حياتي
لو نسيت الزهره  احس نقصت صلاتي
انتي  تسبيح   الفرض  كل ركعه  ذاتي
بيج احس كلشي اكتمل دربي ونجاتي

بجاهج اتوفق ........دمعتي ابليلي
وشكبر حظي .......الزهره تدعيلي
  يازهراء ____يازهراء

اشكبره حظي لورضت عني الزجيه
خادم   اتباها   صرت   اجمل هويه
فاز   كلشي   بدنيته   وجنه  هنيه
هناك  صوت الرافضه نحيي العزيه

نظره من عندج........ هوايه مولاتي
المجلسج اسعى....... اجري دمعاتي
    يازهراء _يازهراء

دمعتي  عاشور   صارت   كلي   مأساة
صاحت  الزهره  اعد   يا  ملا   الابيات
وانه ادعي بحضرتج تكضيلي  حاجات
خادم  وعندج   صرت  رهن  الإشارات

احلى بالدنيا.........  عايش أمنيتي
عالگبر خادم......... كاتب اوصيتي
   يازهراء ____يازهراء

عمري خلص بالمجالس  اني منذور
ما خلص  عندي محرم ودمه ايفور
عدنه عاشوراء  ثاني  باقي منشور
اتصير ايام  الزجيه    چنهه عاشور

صدري خليته............بالطم شاره
عودت روحي.......... ما ألي جاره
     يازهراء ___يازهراء

هوايه   يزهره   دعائج  احنه   نحتاج
انريد  عاشور  الزجيه  ايصير  مناهج
مانهم ننطي   نفسه   وحتى   الاوداج
خدمتج بس احنه ننجه وبيها الافراج

اني ما خايف .......حققت صيتي
خادم  الزهره............تعلم  ابنيتي
   يازهراء ___يازهراء
**
وجهي باچر   ابيض   وتلكاني  عابس
جنون بالخدمه صرت شوك  المجالس
صار  تسبيحي  الزجيه وعندي واهس
اسمي  صاير   خادم   وأكبر   منافس

ادعي يزهره........بكلشي توفيقي
عاشك الخدمه....... .بيها توثيقي
     يازهراء ___يازهراء

تمت بعون الله وبركاته
ش...يوسف الفتلاوي

قال الإمام علي ع
أصعب من الموت فراق الاحبه

فراق الزهراء ع

يل ساكنه بروحي     عينج عله جروحي
شمعه ويخلصني الليل.   مابيه لفراگج حيل

****

انتي روحي    وانه من دونج جَسَد
نبض گلبي    ومااعيشن لو بَعَد
كل حياتي     جنت اشوفنج مدد

هو العمر بيج ابتده وانتي النهايه
ثوب وكشخ بيج العمر من البدايه
اول شهيدة الدافعت عن الولايه

يعصرني بغيابج      كلما شفت بابج
گصبه ويعت بيها السيل   مابيه لفراگج حيل

__

صبح مظلم   والشمس عطشت ضوه
الدنيا خنگه   والهوه يدور هوه
الفرح بعدج    وي الفراش انطوه

عالباب اطيحن والشمع  من يبجي سكته
أيذَكرني بالباب الجفن   كلما طبگتَّه
شلون ابتسم وانه العمر بيدي دفنته

والفاگد اعيونه.     لا تسأله اشلونه
شالوني من گبرج شيل    مابيه لفراگج حيَّل

_

الراحه انتي    ويمج ايروح التعب
عاشت ايدج  عالخبز مو عالذهب
ونعم منج     إمعلمه الطيور الأدب

يم بيتي من رحتي بقه مظلم عليه
واباب فرگاج انعصر كل مغربيه
السافر يعود وسَفرِتّج مابيها جَيَّه

جيتج خبر كانه.     يمته اجيج انه
ماظل صبر واحمل ميل  مابيه لفراگج حيل

__

بعد عينج     تارس اعيوني الحزن
وگلبي صاير  مثل حيطان السجن
بيش اسكته  اليفز من نومه ويحن

عن عيني غبتي وبالگلب ثابت مكانج
يل ماكو بالدنيه مره تشبه حنانج
غير الهلا والهاك اخذ ماكو بلسانج

يم الهلا ابدونج     صاير مثل لونج
رحتي وذبل عطر الهيل  ما بيه لفراگج حيل

-_--_

ها يروحي.    خافن ايطول العمر
عيني تغمض   من أَشتَم اتراب الگَبر
كلشي بيه.    مثل ضلعج منكسر

الموت راحه الكل گَلب  فاگد خليله
يذكر كعدته والصور     تمرد دليله
ويرادله حيل البجي   ومابيه حيله

والفاگد اعزازه.      اترد روحه الجنازه
واليطفح ابروحه الكيل   مابيه لفراگج حيل

___

فيصل المياحي

ليش ما عندچ گبر

ليـش مـا عنـدﭺ ﮔبـر مـولاتـي
كريم الحاج فليح
ونسألكم الدُعاء

مـن يسـألـونـي أنقهـــر .. مـولاتــي
ليـش مـا عنـدﭺ ﮔَبــــر .. مـولاتــي
لا منــايــــر لا صَحَـــــن * وشعَجَــب يَــــم الحَسَـــن
ليـش مـا عنـدﭺ ﮔَبــــر .. مـولاتــي
ـــــــــــــــــــــــــــــــــــ
هـالســؤال المــؤلـــم أشمــا مَـــر عليــه
تـاكــل الحَســره أبـدليلــي و مـو بــديــه
ليـش مـا لـُــــم الحَسَـــن ﮔبـــر وبِنيَّـــــه
وينــه ﮔبــر الطـاهـره الـزهـره الـزﭼيـه
روحـي تتـلاهــب جَمــر .. مـولاتــي
أمنالبـﭼـي عيونـي حُمـر .. مـولاتــي
ﮔلبي أحس من وحده وَّن  وشعَجَـــب يَــــم الحَسَــن
ليـش مـا عنـدﭺ ﮔَبــــر .. مـولاتــي
ـــــــــــــــــــــــــــــــــــ
لجلـــﭻ الكـــون أنخلـــق والله عَجيبـــــه
تـالـي هُمَّـه أهلـه صفـوا وأنتـي الغريبـه
آه  يــا أم  والـــــدﭺ مـــن هــالمصيبـــه
حـاربـــوﭺ وأنتـــي للــهــادي الحبيبـــه
ليـش خَـــدِّﭺ ينسطــــر .. مـولاتــي
ذبحــوا أجنينـﭻ غَـــدر .. مـولاتــي
عشتــي بـالهَـم والمحَـــن  وشعَجَـــب يَــــم الحَسَــن
ليـش مـا عنـدﭺ ﮔَبــــر .. مـولاتــي
ـــــــــــــــــــــــــــــــــــ
أمحَـــزم أبحقــده هـــذاكَ مـــن أجــالــﭻ
ﭼـــان يتمنـــه النَـــذل يهظــــم دلالــــﭻ
مُنيِّتــه ﭼــانــت يشـاهـــد بَــس خيـالــﭻ
ويِّقهــر الكــرار بـالسطـــره وعيـالـــﭻ
أمخطـط الهَتــك الخِـدِر .. مـولاتــي
حتــى حيـــدر ينقهــــر .. مـولاتــي
عشتــي بـالهَــم والمِحَــن  وشعَجَـــب يَــــم الحَسَــن
ليـش مـا عنـدﭺ ﮔَبــــر .. مـولاتــي
ـــــــــــــــــــــــــــــــــــ
أدري ﭼنتــي واجـــده أعلــه الـنـاصبيـه
الهالسبـب ﭼـانـت ألــﭻ هــاي الـوصيــه
أخفـي عنهـم ﮔبـري يـا حـامـي الحَميــه
وأحنـه ﭼــا شنهــو ذنبنــه الجعفــريـــه
حيـن وصيتـي أبصَبُــر .. مـولاتــي
أخفـي ﮔبـري أمنالكفـر .. مـولاتــي
مــا رِدت دَفنــي عَلَــــن  وشعَجَـــب يَــــم الحَسَــن
ليـش مـا عنـدﭺ ﮔَبــــر .. مـولاتــي
ـــــــــــــــــــــــــــــــــــ
لعنــــةُ اللهِ علــــى ذاكَ السطــــرهـــــه
ال وَّرَه الـبـاب أبحقــد عمـداً عصـرهـه
آ يـالضلـوع الشـريفــه اللـي كســرهــه
ونَبَـت البسمــار يـا ويلــي أبصـدرهــه
ومَهَــد الجعـده وشمُــر .. مـولاتــي
السَـم ولِـدهــا وللنَحِــر .. مـولاتــي
بيهــــم الـﮕلـــب أمتحَـــن ** وشعَجَـــب يَــــم الحَسَــن
ليـش مـا عنـدﭺ ﮔَبــــر .. مـولاتــي

((ملح العشگ))

ملـــح العــــشگ من عتبتچ .. يافاطمه
الخدمه الصدگ من نضرتچ .. يافاطمه
يافاطمه
يافاطمه ...
"""""""""""""""""""""""""""""""""""''''''''''

يـــريعان الـــموده الشيمتني
بــخـــدمتها الـــزجيه كبرتني
وبــــالرئفه الحنينه وشملتني
ومن ايدي المجالسها خذتني

عـــزيز وأهـمل العين
وصرت بدفتر حسين
عفـــت الـناس للناس
وخذاني حب الحسين

دام الــــوفه مــــــن خـيمتچ .. يافاطمه
الخدمه الصدگ من نضرتچ .. يافاطمه
يافاطمه
يافاطمه ...
"""""""""""""""""""""""""""""""""""''''''''''

ألــــچ ممنون كل صبح ومسيه
ألــــچ مــديون يــــايمه الزجيه
فهمت الخدمه مو غايه وقضيه
الخدمه الـــوحدي بدمعه سريه

عشــگ النـيه تسديد
اليخدمچ هذا شيريد
المــــهم يافاطمه ويآ
وبــيدچ ماسكه الايـد

كـــل القـــصـص من قصتچ .. يافاطمه
الخدمه الصدگ من نضرتچ .. يافاطمه
يافاطمه
يافاطمه ...
"""""""""""""""""""""""""""""""""""''''''''''

يـــمـــولاتي بديـــچ الدنيا كلها
وأمـلاك الســمه هــيه وأهــلها
أنـــه بــس دمـعه جايبلچ اهلها
وأحس الدمعه خدمه وما أملها

أملن دمعتي شلون
أملن لــطم المتون
نخيتچ يأم الحسين
أريـدن ابچي عيون

تبــچي الســمه مـــــن ونتچ .. يافاطمه
الخدمه الصدگ من نضرتچ .. يافاطمه
يافاطمه
يافاطمه ...
"""""""""""""""""""""""""""""""""""''''''''''

ألچ طشــيت يايمه سنيني
وبيدچ كون ريت تحزميني
ومن هذا وهذاك اتبعديني
ومن حسين ريـت اتقربيني

بـــعد يــايـمه أقرب
عـــليچ بخدر زينب
عليچ الماشرب ماي
وألــ بـدمه تخــضب

هـــــذا الــــطلب من رئفتچ .. يافاطمه
الخدمه الصدگ من نضرتچ .. يافاطمه
يافاطمه
يافاطمه ...
"""""""""""""""""""""""""""""""""""''''''''''

يسالوفةْ محنه بمـاي جاري
الــمايدري بحنانچ آنه داري
أريد بخدمتچ ماتـطفه ناري
هيچ آنه ردت هــــذا قراري

أريـــدن نار تلضه
مثل مولاتي فضه
وأضلن دوم وياچ
وبـالنضره أتوضه

اصـــل الـــكرم من حضرتچ .. يافاطمه
الخدمه الصدگ من نضرتچ .. يافاطمه
يافاطمه
يافاطمه ...

عبد زينب
محمد الابراهيمي

نزلة لمولاتي فاطمة الزهراء عليها السلام

تنزف جروحي. عذبوا روحي. يموعود
والله أذّوني بچّوا عيوني. يموعود
٠٠٠٠٠٠٠٠٠٠٠٠٠٠
فاطمه امك يمهدي تدري بالصار
هجموا علية يغالي وحركوا الدار
دفعو الباب عله صدري انصاب بسمار
يمته تظهر يا حبيبي وتاخذ الثار

اظهر لثاري. ما طفت ناري. يموعود
يبني ظلموني. بچّوا عيوني. يموعود
٠٠٠٠٠٠٠٠٠٠٠٠٠٠
لذت خلف الباب يبني وضلعي مجروح
ومن عصرني الطاغي بيده شاغت الروح
طاح يالمهدي جنيني ودمي مسفوح
وأثر سطرة أيده هذه يبني متروح

سطرته بعيني. نار تجويني. يموعود
ضربو امتوني. بچّوا عيوني. يموعود
٠٠٠٠٠٠٠٠٠٠٠٠٠٠
ما صحت وينك يحيدر ظلعي مكسور
مچتف بأمر الوصية. ادري معذور
صحت يابويه مّحمّد ضربو النور
اكشف ترابك وعاين وجهي مسطور

ادري تكليفه. ما يسل سيفه. يموعود
لهالسبب جوني. بچّوا عيوني. يموعود
٠٠٠٠٠٠٠٠٠٠٠٠٠٠
لا تظن ضلعي يطيب واشفه ورتاح
لحدما تظهر يمهدي دمعه ونياح
ادري عندك يبقه ثاري ثاري ما راح
ثار ضلع امك يمهدي ومحسن الطاح

انتظر تظهر. يا شبل حيدر. يموعود
ثكله خلوني. بچّوا عيوني. يموعود
٠٠٠٠٠٠٠٠٠٠٠٠٠٠
فاطمه امك يمهدي حقي مغصوب
يمته يبقه يابوصالح گبري محجوب
عَجّلَ اللهُ ظهورك گلبي مكروب
اظهر وزيح الضُلامه وشفي لگلوب

بيدك الرايه. سيفك الغايه. يموعود
تدري هضموني. بچّوا عيوني. يموعود

سيد زيد الفحام
٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠

نزله لمولاتي فاطمة الزهراء عليها السلام

ثار الزجية وثار محسنها
بيد الامام المهدي ضامنها
٠٠٠٠٠٠٠٠٠٠٠٠٠٠٠٠٠٠
بيدي الامام المهدي من يظهر
ثار الزجية فاطمه وحيدر
وثار الجنين المحسن الاطهر

اسمع خبر يالناشدت عنها
بيد الامام المهدي ضامنها
٠٠٠٠٠٠٠٠٠٠٠٠٠٠٠٠٠٠
لا يفرح الاذّاها والظالم
ما تبقى تبجي للأبد فاطم
يشفي الظلع من يظهر القائم

وهل السقيفه ينتقم منها
بيد الامام المهدي ضامنها
٠٠٠٠٠٠٠٠٠٠٠٠٠٠٠٠٠٠
من يظهر المهدي ويسل سيفه
ياخذ امن الصاب الضلع حيفه
يرضي الزجية المهدي تكليفه

مرقدها يعله ويزهي موطنها
بيد الامام المهدي ضامنها
٠٠٠٠٠٠٠٠٠٠٠٠٠٠٠٠٠٠
ثاراته بالشيخين يبديها
منّ الدفعها وعتده عليها
يبدي القصاص وامّه يرضيها

كشف العصابه وكل بواطنها
بيد الامام المهدي ضامنها
٠٠٠٠٠٠٠٠٠٠٠٠٠٠٠٠٠٠
حق الزجية يرجع بچفه
يكشف كبرها والضلع يشفه
يملي الأرض بالرحمه والرئفه

ارض وسمه قادر يوازنها
بيد الامام المهدي ضامنها
٠٠٠٠٠٠٠٠٠٠٠٠٠٠٠٠٠٠
ميخلّي ظالم عايش وحاقد
يفني النواصب ما يضل واحد
تصفى النفوس بدولة القائد

ناس التعيش وياه يطمّنها
بيد الامام المهدي ضامنها

سيد زيد الفحام
٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠

السان حال عن مولاتي زينب ع
عندما رجع علي ع من الدفن

وين أمي وين أمي
يابويه راجع خالي
موفطرت دلالي
٠٠٠٠ ٠٠ ٠٠٠٠
زغيره بعدني عله اليتم وضيم اليتم شيحمله
يابويه اطلبنك طلب الباب كون تميله
مسمار كاسرله ضلع وشلون ذيج النبله
والمثلي امه تفارگه بهذا العمر موسهله

بعدني بسن طفوله وشابت عيوني
شفت منظر ذهلني ونخطف لوني
ياجلمت  يتيمه الخضرت بالبيت
اواسي اخوني لوهمه اليواسوني

الدمعات عالخد سالت
زهرة زماني انشالت
وين أمي وين أمي
٠٠٠٠ ٠٠ ٠٠٠٠
ابجي عله حالك ياعلي مدري  ابجي انه الحالي
الجناز ياخذ والگبر مايوم رجع غالي
فراگ الحنينه بكل وكت جتالك وجتالي
شمعت ليالينه نطفت من الدنيه راح هلالي

امي هاي يل ماكو بمحنتها
الله يعين روحي شلون شافتها
طاحت جنه ميته من عصرها الباب
ومحسن طاح من شوغات طيحتها

انشد واصيح شلونك
بويه الدمع بعيونك
وين أمي وين أمي
٠٠٠٠ ٠٠ ٠٠٠٠
شلون گلبك طاوعك بالحد فاطم تنزل
منها الضلوع مكسره الشيل الثره ماتحمل
يل جايني مصوب حجي وعينك وكلبك يهمل
شافوك شمات شكثر وعين الشماته التكتل

بظلام اليل ياحيدر تشيعه
وعن هاي البشر رادت تضيعه
الحارك دارهه وعاصرها عله الباب
تخاف من الحد باجر يطلعه

صاح الحسن بدموعه
زغير وحناها ظلوعه
وين أمي وين أمي
٠٠٠٠ ٠٠ ٠٠٠٠
بويه الورد مو للگبر ابستان كون وينشم
عطر النبي جوه الثره من هالظلم يتألم
وبياذنب من الزغر حسين وحسن يتيتم
بذهانه صورت جمر من عدها ابد مانسلم

دخيل الله ودخيلك بويه ياكرار
بدايتنه ظلع وحايط وبسمار
اخذني للحنينه وشلي بيها الروح
هاي النار باجر بويه نفس النار

باجر أصعب المنظر
اصيح وگلبي يتفطر
وين أمي وين أمي
٠٠٠٠ ٠٠ ٠٠٠٠
هوه الهضمني ياعلي راجع وضهرك محني
محتار من الفاجعه بيا فاجعه اتصبرني
كل خطوه بويه بمشيتك بيوم الطف تذكرني
هم مثلك ابقا الوحدي وخيل العده تعثرني

عله زينب ياعلي يتكرر المشهد
الهيب النار بخيامي حزن يصعد
افر من الخيم وركض الخوي حسين
وشوف حسين بخيول العده مفرهد

لاخنصره ولانحره
واركض واصيح الزهره
وين أمي وين أمي
٠٠٠٠ ٠٠ ٠٠٠٠
خادم اهل البيت ع
فلاح طالب الماجدي