جبار رشيد

صوتك ندهني ومو حلم
وفزيت من نومي
وگلت
مو صدگ لايمكن صدگ
والروح ويّ صوتك مشت
وناديت
والخطوه بعدت
والصوت ويّ مشي الجدم
من ينلحگ ما ينلحگ
وعالأثر نمشي اعلى الأثر
والشوگ سابگنا سبگ
والگلب لم روحه واجا
ودگاته احسها بلا وعي
مو مثل يوميا يدگ

ويم بابك وياحيرتي
مدري شندهني وجابني؟
وحتى نسيت شلون
عالباب من ادگ

ظنيت ما اشوفك بعد
من شفت ضويات الدرب
يطفونها شما تعتلگ

ومن شفت شتلات الفرح
مات الفرح
وملثمة
والحزن صار سنين ياكل بالعرگ

رادوني مااشوفك أبد ضمّوا تصاويرك عليّ
واعلنوا لازم نفترگ
اهلي وهلك واشتم هلي
لازم ملازم نفترگ

وشالوك حتى من الحلم!
وحلمك يجيني بلا صور
وبلا خلگ

ولمن أفز يبجي الحلم
واثنينّا اعلى الروس نتگابل ندگ
ورادوني مااشوفك ابد
والعين مثل ام الولد
وانت الولد
لمن إجت ماشافتك
الجفن صار الزيج
گامت بيه تشگ
خليني اسولفلك بعد
ويا حال من بعدك عشت
غصن وخذوني من الشجر
وذبوني يم نار الهجر
واليوم باجر احترگ

وعشت بطرگ
روحي وسوادين العشگ
واسأل عليك وتيهت
واسأل منو
وبيمن اثق؟

وانسدن بوجهي احس كل الطرق
والگا الأسأله وكيفت
والگاهن الچلمات ويضيع الحلگ

وخلني اسولفلك بعد
ياواهسي وغيرك منو؟
والروح اجت مسودنة
واشبگها وي روحك شبگ

لاتبچي اطيح ويه الدمع
والروح اسويها نفس
ومناشغ اشهگني شهگ

وابريّتك يا ريّتي
ولمن اصيرلّك نفس
لاخنگك ولا
اختنگ

This song is killing me

وَلي فُؤادٌ إِذا طالَ العَذابُ بِهِ
طارَ اِشتِياقاً إِلى لُقيا مُعَذِّبِهِ
يَفديكَ بِالنَفسِ صَبٌّ لَو يَكونُ لَهُ
أَعَزُّ مِن نَفسِهِ شَيءٌ فَداكَ بِهِ

_البحتري

?

الليل شبعني سفر وانا بمكاني

دخيل الحسين

توها بردت وانتِ مريتي رصاصة