‏يا ليت الزمن طيرٍ يعوّد على الملواح
‏بردّه ولا ادري ويش اردّه على شانه
‏- فلاح القرقاح

يا ليتني في بعض الاشياء مخيَّر
‏وأضحّي لـ بعض الأوادم بدمي
‏في رحلة الأيام كل شيء تغيّر
‏إلا السماء والأرض والشمس.. وأمي

معك واشتاق لك وشلون وانا بعيد
‏المشاعر ضوامي غصب تنساق لك

‏كل ما ابطت بك الأيام شوقي يزيد
‏شف جنون الغلا عقبك وأنا عاقلك

‏فيني شعور أحسّه نابع من الوريد
‏من يلوم الخفوق إن صار توّاق لك؟

‏ريف قلبي ومرباعه وشوفتك عيد
‏انت مثل الهوا وارضي والافاق لك!

الحاجه اللي دونها منّة الناس / لو هي دوا عيني تنازلت عنها*

"لبست ثوب الصمت واختصرت الكلام
لو أنه في صدري مثل.. دبك الخيول"

‏جعل ماجانا من الوقت كفارة ذنوب
‏وجعل طربات اللّيالي تجي متخاويه

‏مازلت أنا المشّاي فالدرب الطويل
‏و مترامي الأطراف ..ماخِلته طرف
‏
‏هزايمي ما كانت بعيني قليل
‏أشوفها مثل إنتصاراتي؛ شـرف

"واحدٍ ما يستريح إلا محارب
‏لو تسولف له عن الراحه جرحته"