السلام عليكم كيف حالكم جميعاً، حابة نشارك معاكم شوية في هالايام الصعبة لبعض من الطلبة

أولاً نحب نهني جميع الطلبة اللي تم تنسيبهم للكليات حسب رغباتهم وان شاءالله ربي يوفقكم وهاذي ما هي إلا نتائج جهود وتعبكم 🌟

ثانياً نحب نشد ع ايدي الطلبة اللي صارلهم إحباط بعد التنسيب للكليات المرغوبة وما هذا إلا امتحان من رب العالمين وتذكروا ديما انه الخيرة فيما اختاره الله بس هذا ما يعنيش سكوتكم عن حقوقكم بالعكس ارفعوا صوتكم وطالبوا مرة واثنين وعشرة ورد بالكم تأيسوا لانه وللأسف هني حيبان الفشل، انتم مش فاشلين لانكم جبتوا معدلات اقل من غيركم وهذا مكتوب ولكن الفشل الحقيقي لو سكتوا عن حقوقكم، وصلوا صوتكم بكل الطرق اللي تشوفوها تنفع واللي ما تنفع ما تهزوش عليا، دام قبلوا العدد الكبير هذا ولقو مكانات وحلول شتى باش يقروكم ( حتى وان كانت الحلول اللي داروها في يوم من الايام تعبتكم) هذا يعني الجامعة تقدر حتى توا تلقى حلول للعدد الكبير اللي قبلاته وهاذي هي مشكلتهم مش مشكلة الطالب اللي نجح وعنده طموح، خاصة ومع احترامي للجميع التخصصات ومنها تخصصي ولكن كلنا نعرفوا اي طالب ممكن انه يتخصص في اي تخصص في الحياة حتى لو ما كانش رغبته المهم يتخرج ويفتك إلا الطالب اللي تكون رغبته طب بشري هذا يكون طالب خاش بقناعة تامة ويكون هذا حلمه لهذا دافعوا عن أحلامكم.

وبالنسبة للطلبة اللي تم تنسيبهم، اني عشت معاكم جميع المواقف ممكن اللي عشتوها مع بعض كدفعة وشفت كيف انكم تساعدوا في بعض وقت القراية والامتحانات، لهذا هذا ما يمنعش انكم توقفوا معاهم توا وتمشوا معاهم وتساندوهم وبالعكس وقت تحسوا انهم فقدوا الامل تكونوا انتم في الصفوف الاولى معاهم قدام الجامعة كلها عشان يتغلبو ع يأسهم ويعرفو انه فيه ناس قرت معاهم حاسة بيهم. صح حيكون تعب عليهم بس كل شي بأجره وهاذو خوتكم ساندوهم وخاصة الشباب ولو حتى تنسقو فيما بيناتكم.

اني للاسف والله ظروف خدمتي ما تسمحليش نجي نوقف معاكم ونطالب معاكم بحقوقكم بس اني من هني نقوللكم اني مستعدة نساعدكم باللي نقدر عليه، من توصيل صوتكم او انه نكلم مراسلي قنوات، لو فيه أوراق رسمية او غير رسمية تبي طباعة وتنسيق واي شي يخص الطباعة اني مستعدة استعداد تام واي شي تحسوا انه اني نقدر عليه اني مستعدة نقدم معاكم.

لهذا اي شي تقدروا تتواصلوا معاي بس خلوكم ع كلمة وحدة وأهم شي النظام ما تكونوش عشوائيين.

صدقوني الإدارات ما يحبوش الاحتجاجات وما يحبوش انه الرأي العام يتأجج عليهم، لهذا انتم امشو للطرق هاذي، وسائل التواصل الاجتماعي مؤثرة جداً جداً ركزوا عليهم

نتمنى انه كل طالب منكم يكون في المكان اللي يبيه وحتتيقنوا مستقبلاً انه التخصص اللي حيحطك ربي فيه هذا مكانك وحتبدع فيه

والسلام عليكم ورحمة الله وبركاته

الحمدلله الذي بنعمته تتم الصالحات

ألف ألف مُبارك لكل الناجحين وان شاء الله تخشوا التخصصات اللي في بالكم وحظ أوفر للراسبين

لعند امتى التوتر هذا!!!!!

من التمهيدي الطبي تسمع الجديد، مافيش حاجة في الكمبيوتر اسمها دبل كليك بزر الماوس الأيمن ?

كيف كان امتحانكم اليوم؟

⁣? وصلتك رسالة جديدة ⏱ وقت الرسالة: 2024/07/22 - 10:55:57 PM ---- كيف يحسن الذكاء الاصطناعي عمليات الرعاية الصحية ؟ ممكن تشرحيه! هوا فاهمته هكي! لكن كلام الشيت ! متلا شن معناها قواعد البيانات السحابية ؟ وشن معناها :يمكن للذكاء الاصطناعي تجاوز حدود هذا الأمر…

⁣? وصلتك رسالة جديدة
⏱ وقت الرسالة: 2024/07/22 - 10:55:57 PM
----
كيف يحسن الذكاء الاصطناعي عمليات الرعاية الصحية ؟ ممكن تشرحيه!
هوا فاهمته هكي! لكن كلام الشيت !
متلا شن معناها قواعد البيانات السحابية ؟
وشن معناها :يمكن للذكاء الاصطناعي تجاوز حدود هذا الأمر بسلاسة العمليات عبر مجالس إدارة مجالات الرعاية الصحية ؟
----

كيف كان امتحانكم اليوم؟