Bolajon o‘zbekmiz

Meni o‘ylantiradigan narsa shuki, butun dunyoda bola qalbi asraladi, u ulg‘ayguniga qadar uning oldida yomon so‘z, keskin muloqot qilinmaydi, er-xotin gaplashib olishi kerak bo‘lsa, bolani boshqa xonaga chiqarib, so‘ng gaplashiladi.

Bizda esa, aksincha, hamma tomosha shu murg‘ak bolaning oldida ro‘y beradi. Biz yana nega bolalarimiz qo‘rs, jizzaki, hayotga kulib qaramaydi, yaxshi o‘qimaydi, deb noliymiz. Aslida bola maktabga yaxshi kayfiyat bilan borishi kerak! Avval ruhiyat, keyin ta'lim beriladi. Aytmoqchi edimki, biz bolajon deganda, bolani sevuvchi, uni ardoqlovchi emas, ko‘p bolalilikni bolajon deb tushunishimiz kerak, aks holda oilada, maktabda bola qalbini jarohatlamagan bo‘lar edik.

@hamroyev_g

Ta'lim aybdor(mi)?!

Taraqqiyotga to‘siq bo‘layotgan omillar aslida bizning xarakterimizda, tasavvurimizda ekan. Bunga, avvalo, oila keyin ta'lim aybdor, deb o‘ylayman.

Ta'lim jamiyatdagi, oilalardagi muammolarni, shaxs ruhiyati, ong-u shuuridagi kamchiliklarni aniqlab, shunga mos ta'lim mazmuni ishlab chiqishi kerak!

Jamiyatda, oilalarda, bir insonda qanday qusurlar bor?!

Masalan, bugun yolg‘onchilik, faqat o‘z manfaatini o‘ylash, ayniqsa, manmanlik, o‘zini ko‘z-ko‘z qilish, xo‘ja ko‘rsinga yashash, soxtalik kabi salbiy illatlar avj olgan, bunga ta'lim ham, jamoatchilik ham alohida ahamiyat berayotgani yo‘q.

Bu muammolar, avvalo, ilmiy tekshirib ko‘rilishi, yechim topilishi, zudlik bilan hal etilishi kerak! To‘g‘ri, xalq tabiatiga singgan salbiy odatlardan birdaniga xolos bo‘lishning iloji yo‘q, ammo bosqichma-bosqich amalgan oshirib borish, ta'lim tizimi orqali risoladagidek bir avlod shakllatirilishi kerak!

@hamroyev_g

Avval sifatli o‘qituvchi tayyorlanishi kerak!

Maktab ta'limini rivojlantirish bo‘yicha kerakli ishlar qilina boshlangan. Dastur va darsliklar yangilanmoqda.
Muhimi, maqsad aniqlashgan, ammo vazifalar va uni amalga oshirish mexanizmlari hali oxirigacha ishlanmagan. Bu haqda aniq tasavvur yo‘q hali.

Biz birinchi navbatda sifatli kadr -- o‘qituvchi tayyorlashni yo‘lga qo‘yib olishimiz kerak, ularni tayyorlaydigan ta'lim mazmunimiz yaroqli emas, tubdan o‘zgarishi, kamida 60 foiz fanlar metodikaga xos bo‘lishi zarur (amalda 15-20 foiz metodikaga oid ).
O‘qituvchilarni o‘quvchi bilan samarali ishlashini ta'minlash uchun ularni psixologik tayyorlashga urg‘u berishimiz kerak.
O‘qituvchilarning bugun sinfdagi asosiy muammosi o‘quvchi bilan muvaffaqiyatli aloqa o‘rnata olmayotganidir. Muloqot o‘rnatilsa, shundan keyin ta'lim sifati ko‘tarila boshlaydi.

@hamroyev_g