**گوزلریوه

سئویرم گوز تیڪم او ، نازلے باخان گوزلریوه..
جانے قربان الییم ، جانے آلان گوزلریوه

همے گویچڪ همے نازلے ، همے آهو باخیشے ...
گرڪ عالمدہ دییم ، سیرّ نهان گوزلریوه،

او گوزل گوزلرینن،  باخما گوزوم مست اولوری....
من ڪیمم نغمہ قوشام ، نغمہ قوشان گوزلریوه،

اورگیمدہ اوقدَر قوشما واریمدے گوزووہ ..
یازا بیلمیر قلمیم ، شرح وبیان گوزلریوه

حایل اول گوزلہ ، گوزل  گوزلریوہ گوز وورولا ...
گلمسین  درد و بلا ‌، ماہ نشان گوزلریوہ ،

ڪیمہ اظهار الییم گوزلریوین صحبتینے ...
نہ دییم سوزلرینہ ، او سوز اتان گوزلریوہ ،

آفرین خالقہ اولسون ، نہ گوزل گوز یارادیب ...
قالمیشام مات و معطل ، او یامان گوزلریوہ ،

گوزلیرن قدرینے بول گوزلہ گوزونن گوزلیم ...
جانے قوربان دمیشم ، نازلا باخان گوزلریوہ ،

منے عفو اد گوزلیم آنلامیرام ڪے نہ یازام ...
بو ڪیچیڪ قطرہ نہ یازسین ؟ او روان گوزلریوہ ،

گرچہ لایق دیییرم جانیمے قوربان الییم ...
راحیمین عهدے بودور تا ورہ ، جان گوزلریوہ ،**

گلمه قارانیق گجه لر
طاقتیم بوخدور گجه لر
گوزلریم توکسه یاشینی
دریادن چوخدور گجه لر
طاقتیم یوخدور گجه لر
گجه لر اوزون گجه لر سس سیز
سحرین عطرین نینیرم سن سی
آغرییر قلبیم گوزلریم خسته
یاتا بیلمیرم گل منی سس له

وفالی چیرکینه جان قوربان ائیله
وفاسیز گوزلین گئتمه دالینجان
قوی سنی دوغراسین قیرتلی دوشمن
به تعسیب فامله دالدالانینجان
چتیندی دؤز گئدن یولوندان چاشا
حبس یئره چالما میخ گتمز داشا
سوبای قال دونیادا آروادسیز یاشا
بی قیرت کیشینین قیزین آلینجان
زیارت اتمگه کعبه گوزلدی
اینسان چاتا او مطلبه گوزلدی
سونسوزلوغون مین مرتبه گوزلدی
بئیار قیزین بئفر اوغلون اولونجان
عومور امانتدی مناف بیلگینن
چالیش دوز اینسانلا اولفت قیلگینان
أئل اوز بودونیادان ییخیل اؤلگؤنن
دانناغ آلتدا میننت آلتدا قالینجان

گؤزلریم ابدی گؤزونه حسرت
قولاغیم بیر شیرین سؤزونه حسرت
اوزوم بو دونیانین اوزونه حسرت
نه یاخشی سن وارسان، سئویرم سنی

بیلمیرم گؤزلرین نئجه‌دیر سنین
ساچلارین بیر ظولمت گئجه‌دیر سنین
بیلمیرم یاشینی نئچه‌دیر سنین
نه یاخشی سن وارسان، سئویرم سنی

چتین یوللار کئچدیم، یامان یورولدوم
سئوگی بولاغیندان ایچدیم، دورولدوم
من سنی گؤرمه‌دیم، سنه وورولدوم
نه یاخشی سن وارسان، سئویرم سنی

سن هاردان گلیرسن، یولون هارادیر؟
بلکه ده اوره‌یین-قلبین یارادیر
بلکه طالعییم‌تک ساچین قارادیر
نه یاخشی سن وارسان، سئویرم سنی

بیرجه یول اوزونو گؤرمه‌سم ده من،
یولوندا بیرجه گول درمه‌سم ده من،
کؤنول آچیب، کؤنول وئرمه‌سم ده من،
نه یاخشی سن وارسان، سئویرم سنی

دونیا داغیلماز کی، سن منیم اولسان
گلیب اوره‌ییمی، کؤنلومو آلسان
بلکه بیر یوخوسان، شیرین خیال‌سان
نه یاخشی سن وارسان، سئویرم سنی

خلقین ایمانینی گر مکر ایله شیطان آپاریر
او پری‌چهر ه‌‌ نه‌دندیر کی بس ایمان آپاریر

ای کمان قاشلی منی یارله‌دی غمزه‌ن اوخو
زلفونو باس یاراما قویما منی قان آپاریر

دل چکر جانی سر کویینه ذبح ائتمک اوچون
سانکی حجّاج منا داغینا قربان آپاریر

عشقدیر الدن آلان دین ایله ایمانی ولی
خلقدن تهمت بیهوده‌نی صنعان آپاریر

زاهد اؤل زلفده رخسارینی گؤردوکجه دئدی
بو او هندو بِچه‌‌دیر مکتبه قرآن آپاریر

کیمسه کیم گئیمه‌یه میدان محبتده کفن
اونو معشوق ازل محشره عریان آپاریر

چکمه‌یین سیّد لامذهبی میخانه‌ ساری
کافری کعبه آرا هانسی مسلمان آپاریر

سید عظیم شیروانی

دونیا بیر مئشه دیر اینسان اودونچو
چوخلار اودون ساتیر کؤز آلیر گئدیر
نه ساتان یورولور نه آلان دویور
آخیرده بئش آرشین بئز آلیر گئدیر

ظلم کار آغادان بیر قول یاخشیدیر
چؤرکسیز وارلیدان یوخسول یاخشیدیر
کیم دئسه هر جایی چوغول یاخشیدیر
ایماندان پایینی آز آلیر گئدیر

بیری تخته چیخیر اولور ظلم کار
بیری یالتاق اولور بیلمیر غیرت عار
بیری ده دردینی دئیه نمیر آشکار
عزیز تک الینه ساز آلیر گئدیر

عزیز شهنازی

بو دونیانین داشین ایندی آتمیشدیم،
سندن قالان خاطیره‌لر یاشادیر.
تورپاقلارین قوجاغیندا یاتمیشدیم،
سندن قالان خاطیره‌لر یاشادیر.

قلبیریم ده الگیم ده اله‌نمیش
یوللاریما دومان چؤکموش قار ائنمیش.
منه قالسا ناغیللیغیم توکه‌نمیش،
سندن قالان خاطیره‌لر یاشادیر.

سن اؤیرتدین یئرییم من اوچام من ،
اوشاق کیمی کوچه‌لری قاچام من...
حاققا دورساق گرک ایندی کؤچم من،
سندن قالان خاطیره‌لر یاشادیر.

سن آغلادین شعیرلریم آغلادی،
گولومسه‌دین دویغولاریم اوینادی.
بیل !منی، ای دؤرد فصلیمین یاز دادی!
سندن قالان خاطیره‌لر یاشادیر.

علی رشتبر قاییب

اينسانا روح وئرن گؤزل دونيادا
بير درين كمالين اولسا ياخشی دير
ظلمی له اوجالماق اوچماق دئمک دیر
ایشیقلی ایقبالین اولسا یاخشی دیر

نامرد خائن اولار مرد دوز چؤره ك لی
دوغرو سؤز بير شاهدی قيزيل ديره ك لی
وارلی خسيس اولار كاسيب اوره ك لی
بير آز پولون مالين اولسا ياخشی دير

زحمتدن ساچلارا دوشن دن گؤزل
باهاردا بالاجا بير چمن گؤزل
نه چيركين اولاسان نده أن گؤزل
بابانجا جمالين اولسا ياخشی دير

آزافلی ديل آچدی سؤز باهاريندان
خسته شفا اومار داغلار قاريندان
دنيا شهرتيندن دنيا واريندان
ساغلام جانين حالين اولسا ياخشی دير

ميكاييل آزافلی

اوستاد نامه

نامرد سنین قوللوغوندا قول اولار
اوز ایشی دوزلیب بیته نه کیمین
أییشه أییشه گولر اوزونه
الی بیر طرفه یتنه کیمین

دوستونو تانیماز نادان سرسری
بو إلین سوزودور نواختان بری
قوی سللر اپارسین نانجیب لری
باخ دالینجان گوزدن ایته نه کیمین

خوریاتین اوخ سوزو قلبیمه دیدی
بوکوب قامتیمی قددیمی أیدی
بیلدیرچین پاییزدا بیر ایلیق بگدی
داری سونبولوندن یتنه کیمین

شمشیر گرک مرد أوجاغین قالاسین
هرکس چکر اوز دیلینین بلاسین قوی سنی شیر یسین شیر پارچالاسین
تولکو کولگه سینده یاتانا کیمین

[«آیریلیق دردی یاماندی!»

گتیر اؤپوم دوداق دوداق
اوره‌یینین یاراسیندان
یاراسی یار یار دئینده
سن دئ اؤپوم هاراسیندان

کؤنول داغیندا بوراندی
هاواسی چندی دوماندی
آیریلیق دردی یاماندی
آیریلیق، گلمه آماندی!

باشیما کدر تؤکولور
اوره‌ییم غمدن سؤکولور
یاشامین آغیر یوکوندن
بئلیمین بئلی بوکولور!

اؤلوم دوشمور یاخامیزدان
هرگون کئچیر آرامیزدان
درد چکیریک سوسا سوسا
قان سیچراییر یارامیزدان

اوره‌یین وئر اوره‌ییمه
باخ گؤر نئجه آغی دئییر
بولود بولود هارای چکیر
داغ اوستونده داغی دئییر!

میر_حسین_دلداربناب](https://t.me/hasangopuz)