- رغم مابيني وبينك من الإحباط والإفلاس
أشوفك في محطات السفر ترحالي وحلي -

يهون المدى، برده، هجيره معي، ماهنت
ياعيدي القديم، وطيش ذنبه وطيب أجره

عجزت أحصرك في صدري الممتلي بك، وأنت
حصرت الندى، والنور، والشمس، في حجره !

أنا يوم خبتّك الستاير وراها كنت
غريبٍ يدوّر في غياهبك عن فجره .

‏خمر ! ولا شهد ! ولا ماء سحابه !
‏ريقك يرد المقفّي عن دروبه

‏ أبرد مْن المزن في وقت إنسكابه
‏وأكثر مْن الجدول الجاري عذوبه

‏يفقد الضامي على عدّك صوابه
‏أنت بس اللي تفّز الروح صوبه

‏كيف أتوبك وأنت لأسئلتي إجابه ؟
‏كل تايب ودّه أنّك من ذنوبه .

https://t.me/saaar77

Telegram

سّـارح

نيّل المراد مني لايعني بالضرورة إنقضاء التيه

منعزل عن كل جرح وكل حزن وراس مالي
‏وجهك اللي في ليالي وحدتي لا زال شارق

‏قلت أسافر خافت الخطوة وعاتبني ظلالي !
‏قلت أببقى مالقيت لذكرياتي غصن وارق

‏يوم قلبي صار مسمارٍ على جدار الليالي
‏ليه أنتي والسنين القاسية صرتوا مطارق !

"ولا يابو العيون اللي هدبها للعيون .. ظلال
‏خطاك السوء من جرح الزمان وكثر تلويعه".

شاركوني أجزل الأبيات وأَحبَّها عليكم : @i6imr

على الله يا أول دروب المساري وآخر المشراف
تحت ليلٍ تغشاه الملام .. وعبّر بـ نوده

يدف من الجروح اللي تحرك كل وزن وقاف
ويرشد كل كلمه تايهه وتروح مقصوده

من سيوف الكلام الحاد والموجع ماكنت أخاف
وصرت اللي لو يمره كلامٍ عادي .. يكوده

لا ضاقت في عيون المنجرح مترامية الأطراف
تساوت عنده أيام الزمان بـ بيضه وسوده

يانوره وأن تغنى نايح الورقا على الصفصاف
لقيتك في زوايا البال مشكوره ومحموده

تماديتي على قلبٍ تحسبينه ماهو بـ إعاف
بعد ما أسقاك من وافر أحاسيسه ومن جوده

- لقاك أحلى محطاته وحلمه وأول الأهداف -
وعرف قيمة حياته في يديك وقيمة وجوده

تغرّب معك وأروى في تواجدك الشعور الجاف
وتغرّب عنك وجف شعوره ومات وذوى عوده

لو أن مابيننا بُعد، ومشاريه، وزعل، وخلاف
مصير المغترب لا أبطت عليه الغيبه العوده

أثر الأرواح جند مجندّه للكره والميلاف
أحايلها وهي في دبرة الرحمن معقوده

أحبك وأكره التهميش، والتقليل، والإجحاف
أحبك والشعور أبعد من التعبير وحدوده

ذكرتك بالدروب اللي ماجرى خوضها الخواف
ونسيتك يوم يقبل لك بـ مأذونه وبـ شهوده .

لي الظلمى وليلٍ في عيوني كان
تجلّت عتمته حتى على حلمي

كأني نجمةٍ تفهق دجى وتبان
أو أني جرح في وسط السماء مدمي

صحيح أن المعاني مالها ألوان
وأحاسيسي هي الفارق حسب علمي

يقولون البصيره جوهر الإنسان
وأقول أن القلوب المبصره تعمي

يمر أبسط سؤال ويكسر الوجدان
أنا للحين عايش في بطن أمي

رغم كل الحذر هذا بلا إطمئنان
مدام أصغر حصاة مْن الحجر خصمي

توشحت العصا ياقسوة النسيان
ودربي ذكريات .. وخطوتي همي

مسافه ماعلى خوفي حسافه أحيان
أخاف من العدم فـ عيونهم عدمي

ونبرات الوجيه أصواتها ميزان
ملامح في يدي وإحساس في دمي .

أنا شاعرٍ وجهه حياوي .. وقلبه حي
خذا الشعر من راحة ضميره كثر ما أعطى

على أدنى سبب يسهر خرز سبحتي بيدي
- ويجي ياقلادة عنق .. ياحيةٍ رقطا -

أعالج به اللي عارضٍ صابره للكي
وأعاتب به اللي كل ما أدرك غلاه أخطى

شعور مْتناقض .. كل يومين يلبس زي
تسلى به السمّار وتدوره لا أبطى

ويقولون روف بقلبك الغض بعض الشيء
وأقول العروق الخضر ماهي عروق أرطى !

لا صار بين القلب والعقل طق عصيّ
أبـ أكرر الأخطا لو أصحح الأخطا

من يفوت عمره وأمنياته مثل ماهي
عرف حسرة المحروم من فرحة المعطى

حسبنا سنين العمر تمشي شوي شوي
وأثرها تسابق طق الإبهام للوسطى !