يا والله اللي تغيّر صدق منهاجك واصبحت عقبي وسيع الدين والذمّه لاتحسب اني ليا من غبت بحتاجك مايبلش الا رديّ الراس والهمّه

يا والله اللي تغيّر صدق منهاجك
واصبحت عقبي وسيع الدين والذمّه

لاتحسب اني ليا من غبت بحتاجك
مايبلش الا رديّ الراس والهمّه

تعد الصدق ولا ماتعدّه ياردي الراس
تجي وتروح ولا ماتجي وتروح مستويه

نطيب وندمح الزلات والخمله بدون قياس
لو ان الكبد من زلةّ رفيق العمر مكتويه

الا يالله بحظٍ منك ماهو من يدين الناس
يجي بعزومنا العليا مهو بدروب ملتويه

الا يابو العيون الناعسه لو منته بنعسان
ترفّق وانتبه لاتلحق الاول مع التالي

تحسب اني سنينك فالعمر ياسخيّف الذرعان
انا لي منزلٍ عند النشامى نايفٍ عالي

تلاعب في مشاعرنا مثل ماتلعب الغرّان
وانا متحفّظٍ ماودي انه يطيح منزالي

تبي مني وانا ابي منك جعل الله يحلّ الشان
الا ياواهنيّ اللي ضميره دالهٍ سالي

هقوةٍ ماهيب في مثل الحويّر
كبّها والناس لاتبحث خفاها

اتعبتني طيبةٍ عيّت تغيّر
والسنين اللي قفاها ماقفاها

يوم جنّبت العرب ياخو نويّر
رايتي بيضا وعلمي مايضاها

اعترض لي واحدٍ ماهوب خيّر
كنت احامي سمعته وادرى علاها

كثّر الجيّه واحسب انّه مسيّر
واثره يبحّث علومٍ مانباها

احسب انه حصانها واثره خضيّر
زلّتك يابو الحميدي خذ جزاها

عقب ماكان الكبير اصبح صغيّر
هقوةٍ ياعزّتي للي هقاها

الرفيق اللي سواليفه تحيّر
والوجيه اللي تبيّن لي رداها

والمغرر به وابو شبحٍ قصيّر
لعنبو من حطّني في مستواها

عقّب صبيٍ تختلف فيه الاشوار
في كل يومٍ له طبوع وجماعه

مشتتٍ مابين ربعه ومحتار
يخيب لك يومين ويطيب ساعه

وان جيت تنصح قاصر المعرفه ثار
حطّك عدوٍ له وخان الوداعه

وان سقت له فزعه تنكّر تنكّار
لو تردف المعروف معروف باعه

تبذل عشانه وان بدا لازمك بار
من كل ناموسٍ قليل البضاعه

ان قلت غدّارٍ مع الناس، غدّار
وان قلت سوّاها لكاعه، لكاعه

ياعزتي للي رضا فيه واختار
يبشر بصدمات الجفا والقطاعه

وانا احمد الله يوم تاريخنا صار
بين العرب ماينكرون ارتفاعه

برّقت فاحوال العرب بين الاقطار
ماشفت مثل علومنا ياجماعه

جينا على الهقوات من عادنا صغار
والله عطانا المرجله والشجاعه

واكرام لو قلّت مداخيل وادرار
نفني قليل المال قبل اجتماعه

نقضي عليها قبل ماتدخل الدار
لاصرّها اللي قطّعته الجشاعه

نتعب على كسب النواميس والكار
ونبذل له اللي غيرنا م استطاعه

صبينا لامن بغا المجد ماحار
تغنيه عن كثر الطلايب ذراعه

وشيباننا اللي ماشكى منهم الجار
ريف الضعيف اللي حدته المجاعه

ساقوا على طيب النبا وقت واعمار
وحطّوا لنا ذكرٍ جميل ومناعه

على الرفيق اطيب من العود لادار
وعلى الردي مثل السيوف المشاعه

سمحين واجزال ومطاليق واخيار
سُنَّه وتوحيد وكرامه وطاعه

فضلٍ من المعبود علّام الاسرار
ملاذنا يوم الحشر والشفاعه

للمسرف اللي قارف الذنب غفّار
لو ضاق فيه الكون عقب اتّساعه