شما اصبر يفز جرحي واذكـر سوالفكم
لحكلولي يهاشم اخ وصلو كبـر اخيتكم
خوفي يرجع الماضي وينعـاد السبي بيه
كافي يهلي مو مليت ترجعوني دوايركم

ردوني يهـلي اي ردوني
كافــي مو دوم ابقى غريبه
كوموني يخوتي كوموني
حيل ماضل واحمل مصيبه

والحجي نفسه رجع
زينــب غريبه
العلته وسط الكلب
وين اليطيبه
………………………………………………
مني شعدها هالوادم تـروح وترجع اعليه
حتى بموتي لحگوني يهلي بموتي مسبيه ق
ماكـــو هالسنه زايــر لا خدمه ولاموكب
ولا لمة خــــدم بالباب لا لطمة دخوليه

وتاليها وحدي تاليها
ماكو لا خـــدام و مـواكب
خلصته والمضه خلصته
وتالي هم ردتلي المصايب

والحجي نفسه رجع
زينب غريبه
العلته وسط الكلب
وين اليطيبه
…………………………………………………
ضلمة ووحشه هالمره واتانيكم حلم يرجع
صفيت بلا حجي لاراي صفيت اتنطر اليفزع
شيرجعه عطر عباس بهدوم الخــدم كلهم
هم عنده علم عباس وخوفي بيه لا يســمع

مايرضه خيي لا مايرضه
انشلع كلـبي ويدري بعذابي
مايرضه خيي لا مايرضه
گـــوه قانع هــوه بغيابي

والحجي نفسه رجع
زينب غريبه
العلته وسط الكلب
وين اليطيبه
………………………………………………….
الكم جيه لو ماكــو اناطر مـن سنه لأخــره
تعـــالوا تعلعت روحـي وهيه بالسنه مــره
تعالو حضرت غربــه وباب اخضـر لجيتكم
وين اللهفه والركضه ويـن اسوالف الفطره

خدامي وينكم خدامي
ليش عفتوها امكم وحيده
خدامي وينكم خدامي
ويــن ذاك المدمـع اريده

والحجي نفسه رجع
زينب غريبه
العلته وسط الكلب
وين اليطيبه
………………………………………….
✍️/ديار الحساني

انه زينب قصتي ايســـولفها دمعي
من الطفوله وشيبت وانه علوضعي
كسرو ضلوع امج اول شي سمــعته
ومنها خليت ايدي خاطر احمي ضلعي

نار اشردي.. وديري بالج.. طفلة واسمع هل كلام
ماتت امج.. طاح محسن.. وجلجل علينه الضلام

المغرب ضيجت خلگ الوادم
وتخيل أمك مكسوره.. وصار المغرب
جا مو حگك من ما تصحى
حگك من تمشي وتتعثر.. من اتشيب
.........................................................
من حرگ باب امي حدما ضاع كلشي
بدت قصتي الصعبه تبدي وبيه تمشي
ومن خشب لقماش خيمه النار دارت
وجان كلشي يصيحلي بالطف اعطشي

ساعه اگعد.. ساعه اوگف.. او بيـــه ترجــع ذكريات
بهاذه وضعي.. وصوت اجاني.. عمه زينب كلشي مات

مو راسي مشيب لا أكثر
واصل شيبي لحشمة رمشي .. وحزني اتعده
ماي اندور حگنه اندور
من اتبدة الكافل علشط.. كلشي اتبده
....................................................
كلها ماتت ياهو منكم ضل لخيته
عدله واحجي بكل شموخ وانه ميته
موتي اهون لو صدك ميته انه كون
وكون كل الشفته ماشفته يريته

هذا صوتي .. وين اخوي .. طاح اخوي وموش وكته
كوه امشي .. وامشي واعثر .. هلبت يحن كلبه لخته

الفاكد غربه وضيم ايامه
وانه شكم واحد فاركني ...وماضل واحد
حسين وعباس الكافلنه
فدوه يروحلهم عون ابني ...والله الشاهد
..........................................................
من خيمنه وتالي مكيوده لخرابه
وساعه عمه تصيح بتك ساعه بابه
موش اليه الحك بناتك يالحنين
احنه مو سلعه ونكض للسوك بابه

هاي زينب  .. ذيج زينب .. كله بسمي الشام صاح
بلايه كلبي .. وامشي سكته .. كلبي يمك خويه طاح

تشكي المن واليل يخوف
وادم لاذمه ولا غيره .. آه يالفاكد
لانمت ولا هود ليلي
محتاره المن نطلع باجر ... آه يالفاكد
.......................................................
✍️/ ديار الحساني

كسر ضلعي يهون كبال الحسين
مفرهد يمه يبني بنــص ميادين
كلت يايمه أمنـــــي يمي عباس
عمت عيني تلكه سهامــه بالعين

اجـــر انفاسي واتذكر
شلون وليــدي مايكدر ... حسين

النفس ماينحمـــل بيه
وليدي رسومه مجويه ... حسين

اضل يمه لــــــو أمشي
شيب وكتي مو رمشي ... حسين

آه الطف نهبني
آه مايرحم ابني
آه الطف نهبني
............................................
بسمـــــار بضلع بس هوه برماح
منين يديره راسه كباله ذبـــــاح
وكفه انه وطحت يايمه يحسين
شلع كلبي ييمه من المهر طـــاح

متت لمن خذو حيدر
وكلبـي بضيمه يتوذر ... حسين

وهوه جم اخـو عافه
كباله ينذبح شـــــافه ... حسين

ومني مـــا سلب احد
وهوه عايله تفرهـــد ... حسين

آه الطف نهبني
آه مايرحم ابني
آه الطف نهبني
............................................
جان بحضني يصحه وليدي وينام
جنت بجفي احضنه وهسه الاسهام
كبل بأسم الله اركض لمــــن يطيح
هسه يطيح حيــــــل تصيح الازلام

طاح وفزعت عياله
وركضو ليهن جماله ... حسين

بناتي فزعوا عليهن
حيره وماهو واليهن ... حسين

يمهن شككو هدمه
منظر خوف الاعمه ... حسين

آه الطف نهبني
آه مايرحم ابني
آه الطف نهبني
.................................................
خلصت روحي وصلو يم الاخيام
شنو شيردون منهـــــم كلهم أيتام
رقيــــــه تصيح بويه تسلبت كوم
زينب عشرة شبجت جايها الشام

بنيتي الحره محتاره
اخوها ضاعت اخباره ... حسين

يعينج الله يبنيـــــتي
وحيده بحيره ضليتي ... حسين

محدبه ياصبر هاشم
محدبه والكمر نايم ... حسين

آه الطف نهبني
آه مايرحم ابني
آه الطف نهبني
...................................................
✍️/ ديار الحساني

اللهم عجل لوليك الفرج...?

ياخويه جا وين تروح
المثلي عاشت بجروح
لحكولي .. فزعولي .. زينبكم انه بيا حال

ضيم الخرايب لو شام
شحجيلك الماهو ولام
تعبانه .. ياخويه .. فوكاها مربوطه حبال

ها خويه طبينه .. وبحيره ضلينه
سوك وقصــر ماينحمل والهضمه ديوان
عنك يسألوني .. رادو يهضموني
ضحك وحجي واتشمتوا ماعدها خوان

جاهو وضعي ينحمل
جتالك وذيج الهـــزل
بيه تميل وماصفت يالكل شـــي منهم ما سلم

عـــــدك اخت ام الخدر
من عطفك لضيم الشمر
ارجعلي يبن امي متت ارجعلي لو صوره بحلم

(حسين خويه حسين)
.....................................................
يالساكن كبــــال العين
حرموني منك يحسين
لا خوه .. خلوها .. ولا ذكــــره منك وياي

ام عون بس اطلب عون
تشوفوني لو مــا تدرون
عرفونا .. يبن امي .. لا حسبه ضلت لاراي

يبن امي صاحولي ... زينب يكلولي
ماتنحمل اسمي انكشف كــدام الاجناب
انــــه يبعد انه .. من كل شي تعبانه
ودموعي الك ماتنحسب يابعد الاحباب

حاجيني مو محد الي
حاجيني ياريحة هلي
يابعد اهلنه مو سهل هيج انه اضل بـهالوضع

عنـــدي يتامه بركبتي
بيهن احيـــــــر بعلتي
كل خطوه اليه بلا اخو تكسرني وترك بالضلع

(حسين خويه حسين)
...............................................................
اغفـــــه وازفزن وكفه
ذبح وسبــــــي ما كفه
يردوني .. ياخويه .. اتعذب ومـــا ارتاح

فاتني ذيــــــج الايـــام
وياك انه ارسمت احلام
بعيوني .. وبروحي .. تاليها عافاني وراح

حلمي ابقه وياكم .. والمغرب الكاكم
وهم ننجمع كلنه ســـوه ولا صاير الصار
طايح انه شفتك .. والخيل ماخذتك
وتهَدِمَت كل الصور وانــــــه اركض بنار

شحمل بعد كلبي انجوه
زادوني جرح ومــو دوه
كلهن جزن واتحملت ضيم المأسي بلا جـزع

بتك على الراس انحت
سكته و ابــــد ما بينت
يبن امي بتك شافتك ماتت عليك من الوجع

(حسين خويه حسين)
.............................................................
رديتلك بــس شــــــلون
لا حــــــال ضل ولا لون
رديتلك .. بالخوه .. بعد البعـــــــد والايام

تعرفني مــــو متغيره
جا ردت اموت بحيره
رديتلك ... تلكاني .. احجليك شسوه الشام

وللكافل امشيله .. وبحركتي اشكيله
بس خوفي يسألني الكمر ياهي انتي ومنين
هاي انـــه زينبكم ... متغيره اخيتكم
هاي انه زينب بت علي انطــر حيلي نصين

لون العبي بلون الدمه
ومتوني جن لون السمه
هاي التضل بلا اخو تتعب يخويه وتنولي

ميته اني من يوم الطحت
من مهرك وكالو متت
ويوميه اموت بفركتك ياربي صبر بت علي
...........................................................
✍️/ ديار الحساني

اللهم عجل لوليك الفرج...?