Yomg‘ir yog‘sa, umid gulday unar bo‘lsa,
Kemtik ko‘ngil xalqobdayin to‘lar bo‘lsa.
Yo‘l chetida yomg‘irpo‘shsiz turgandir deb,
Ketgan yoring qaytishiga ko‘nar bo‘lsa.

Ko‘lob yo‘llar yag‘rinida yo‘l ko‘rsatib,
Yolg‘izlikning azobini mo‘l ko‘rsatib.
Pinhon tutgan sog‘inchini etib oshkor,
Boshlab kelsa ro‘molchasin ho‘l ko‘rsatib.

Nigohidan yomg‘ir yuvgan so‘z taralsa,
Ifor sochib barmog‘ingda soch taralsa.
Peshonangga bitgan taqdir bo‘lib mulzam,
Ul yor bilan bir ketgulik yo‘l yaralsa.

Xovuchida gulgun gulob quyib bersa,
Tag‘in yomg‘ir tinmay battar quyib bersa.
Tosh ko‘chada chopsalaring qo‘l ushlashib,
Oh, bu dunyo o‘z holingga qo‘yib bersa.

Olib borsang, qo‘rg‘oningda issiq tancha,
Ostonada oyoq ilsa rafiq kecha.
Derazadan borligini etib isbot,
Yomg‘ir tinmay yog‘aversa jon chiqquncha.

Bir tong kelsa avvaliga o‘xshamayin,
Yengillashib borsang quyosh chiqqan sayin.
Yomg‘ir tingan dunyosiga etak siltab,
Uchib ketsang ul yor ila bir bug‘dayin.

Yomg‘ir yog‘sa...

©Najmiddin Ermatov

@oshiq_qalb_ovozi

KOMILLIK

Xohlaysan, barchaga barobar yoqsang,
Holbuki, bu ishga chora yo‘q hech ham.
Har qanday odamga sinchiklab boqsang,
Ayon bo‘ladiki, ozroq joyi kam.

Ozroqqina kamlar ko‘pdir olamda,
Hangoma bu bilan bitmaydi biroq.
Hatto eng mukammal degan odamda,
Ayon bo‘ladiki, bir oz ortiqroq.

Xudoyim, ne uchun qilmading karam,
Nechun komil emas aqlim, yuragim.
— Agar sen mukammal bo‘lsayding, bandam,
Unda qolmas edi mening keragim.

Abdulla Oripov

@oshiq_qalb_ovozi

Shumi insondek yashash?

Bugun oy chiqqanda seni sog‘indim,
Xayoling oy bo‘lib ovutdi biroq.
Yonimda bo‘lsayding, ayriliq shomin
Qo‘lni qo‘lga berib quvardik yiroq.

Boshimga mushkullar tushdi - daf'atan,
Do‘stimga aytmadim - araz bo‘ldi g‘ov.
Qoshimda sen bo‘lsang, kulfatmidi tan,
Qo‘lni qo‘lga berib yengardik ikkov.

Mana daftarlarim - nursiz, surursiz,
Qishki dalalardek yaltiroq, yobon.
She'rimga kirardi qaldirg‘och, yalpiz,
Sen kirib ohista qo‘l berganing on.

Emish, ishq faslida hamma zor yashar,
Hamma ham izlarmish Baxtni shundayin.
Bizdan mujda kutib turganda bashar,
Nahot, qo‘l bermog‘ing shu qadar qiyin!

© Omon Matjon

@oshiq_qalb_ovozi

#hikmat

O‘lmaguncha jon talashish nihoyasiga yetmaydi. Narvon tugamaguncha tomga chiqa olmaysan.

© Mavlono Jaloliddin Rumiy

📔,, Qalb ko‘zingni och''

@oshiq_qalb_ovozi

#tushungan_tushundi

U ham ulg‘aygani sari birini ikki qilishga harakat qildi. Bu ko‘proq uning yuzida aks etdi...

@oshiq_qalb_ovozi

#nazm

Ko‘rmay desam, ko‘zlar ko‘r emas.
Yurmay desam, oyog‘im butun.
Ammo qalblar ortiq jo‘r emas,
Xayollarga bo‘laman tutqun.

© Mirtemir

@oshiq_qalb_ovozi

Hech narsani yuragingga yaqin olma, yaqin olsang o‘sha narsani asrab qolmoqchi bo‘lasan. Bu dunyoda hech narsani mangu asrab bo‘lmaydi.

© Remark

@oshiq_qalb_ovozi

Shamol bo‘lsang, men tomonga es
Yomg‘ir bo‘lsang, yog‘gin bag‘rimga.

@oshiq_qalb_ovozi