Кlорге хьежаро тlоьхлахьдерг хьул до,
Гена хьежаро тахана гlулч йоцуш вуьту.
Сатуьйсуш леларо хьан дахар дац до,
Ойланера кхачано кийра меца буьту.

•Солихь Дишно 02/2025

Керла шо-
Шира дагалецамаш.
Йиц ца ло,
Цlий lенна хенаш.

•Солихь Дишно 31/12/2024

Цхьадерг кхочуш ца хилахь а,
Йу вайна йелла ваlда.
Хlицца иза кхочуш ца хилахь а,
Хилаза lийра йац и— lожалла.

•Солихь Дишно 2020

• ваlда- обещание.

Табиlийна, Саlида кlанта Мусаиба зудчо аьлла:

Оха тхайн цlийна-Дайшца, аш шайн паччахьашца санна (лераме) дора къамел.

Хильйат аль-Ауилийа 5/168

Цкъа-а хира дацчу хlумане хьежа хала ду,
Хала ду дагалецамашца сатуьйсуш ваха.
Хlара доцу денош мехаза дlаоьхуш ду,
Хьежаро дац дина дуьненан дахар.

Кханенан ойла йеш дlайаьлчи тахане,
Кхана а сатуьйсуш дlа дера ду де.
Сатийсам ша цхьалха мостагlчул а зене,
Ког а боккхуш сатийса лушволчу Деле.

•Солихь Дишно 2019

Хьайна луург де,
Лаахь, лаьхьа санна текха.
Кхочур ду lожаллин де,
Цуьнах хьо хlицца кхета.

•Солихь Дишно 2019

Ас доьху со кхоьллиначуьнга,
Доьху ас халонехь а, аттонехь а Цуьнга.

Хьашт вац со йукъарлончах, со хеза Далла,
"Хьо бе кхин Дела вац"— доlанехь аьлла.

Сан лазам доlанца Цуьнга дlабелла,
Ас доьху халонехь а, аттонехь Цуьнга.

•Солихь Дишно 11/2024

Хьан даьсса къамелаш суна доьвза,
Суна хезна уьш.
Хьуна шера аренаш йеза,
Суна лекха лаьмнаш.

•Солихь Дишно 2017

Сан къолам соьга ладугlуш бац,
Ца хlуттуш ойланаш йозане йаха.
Сел аьрха и хилча дан хlума дац,
Кlордина дехарца "йазйе-хьа" баха.

Ойланаш йозане ахь йохуш хилча,
Тlулг башош сингаттаме хир йара уьш.
Къахетта цкъа мукъна а ас бохург дича,
Хlора а хир вара сан ойла гуш.

Могlаршца ойланаш йийца со воьлча,
Сан къолам кехатца тарлуш ма бац.
Дог дуьллий кехатна гена со ваьлча,
Ойланаш хьийзавеш, синтеме вац.

Сан къолам соьга ладугlуш бац,
Бу-те и адамах къахетта сецна.
Сан цlийзар адамашна оьшуш ма дац,
Къоламан аьрхаллех хlинца со кхетта.

•Солихь Дишно 10/2024