مەولەوەی لێرەیا دەڵێت:
ئەگەر دەربەسی قیامەت و شەرمەزاری خۆت نایەیی، بیرێ لەوە بکەوە لەو ڕۆژەیا ئەو سەروەرە ﷺ دێنن دەڵێن: ئەمە سەر بە ئوممەتی تۆیە ئەم هەموو تاوانەی هەیە؟!
ئەویش بە شەرمەوە سەر دادەخات لەبەر خراپی و زۆری تاوانم، کە منیش ئەوە دەبینم لە حەسرەتان ئاخۆ کام قوڕ بکەم بە سەری خۆما!

لەم دیو:
لەبەر بارانیت و شەستە دەکات. تەڕ دەبیت و خۆت دەکەیت بە دوکانێکا، یان ژێر پاساری دیوارێکا، یاخۆ خۆت دەکەیت بە مۆڵێکا و دەست لێک ئەخشێنی تا وزەیە گەرمیت پێ بگەیە.
چەترێ دەکڕی، یان خێرخوازێ پێتی دەدات و دێیە دەرەوە.

بە هەشتتاو بەرەو ماڵ دەکەوییە ڕێ. ڕێت دوورە و باران و سەرما تەنگت پێ هەڵەچنن؛ کزەبا بارانەکە یاری پێ دەکات. گیانت تەڕ دەبێت. خەمی پارە و مۆبایلەکەتە و بەرزی دەکەیەوە؛ دەرقاچە تەڕ، پێڵاویش کامل بۆیاخ، خۆم خۆش—با هەر تەڕ بێت، گرنگ خۆمە و ڕێبڕینە.
خۆت لە چڵکاو و قوڕاو نابوێری. پێی تێ دەخەیت و مل دەنێیت. لەڕێیا تەکسییەک «دید»ێکت بۆ دەکات و، بێسەلام و نرخ پرسین، خۆت دەکەیت بە ژوورا. ئاهێ هەڵەکێشی و سەلام و پاشان: کاکە! تا فڵانە شوێن بمبە!

هەمووی سووچی ئەم بارانە و سەرمایە. کردووتی بە شۆڕەبی تەڕ، تەڕ-تەڕ بوویت و کاری لەپێشینەت پاراستنی خۆت و جلک و مۆبایلتە. هەڵوەداتە تۆزێ زووتر بگەیە ماڵەوە و خۆت گەرمکەیەوە. خۆ ڕێ بەر ڕێدار ناکەوێت؛ هەمووی حاڵی بە حاڵی تۆیە.
گەشتیت و بێ یەک و دوو، کرێی ڕێت دا (کە ٢ هەزار لە ڕۆژانی ئاساییی زیاتربوو.)

خۆت کرد بە ماڵدا و چەترت فڕێدا.
یەکسەر: ئا ئەو هیتەرە پێکەن. دوو کڵۆ دۆینەش بخەنە سەر! چایەکەش دەمکەن.
خۆتگۆڕی و سەروملت هیشک کردەوە و دانیشتیت لەپاڵ هیتەر و دەنگوباسی ڕێت دەگێڕایەوە بۆ ماڵەوە؛ دایک و خێزانت و منداڵ. مۆبایل دەر دەهێنیت و «کرت-کرت...»؛ کاکە چۆنی؟ ئەھ ماشەڵڵا چ بارانێکە؛ کونەی سەردەمەوخوارە!
دووبارە ملی لێ دەنێیتەوە و بە بزە و حەنکەوە، بەزمی تەڕبوون و خلیسکان و هەڵلەرزینی خۆت دەگێڕییەوە!
سناپ و ستۆریەک و «باران بارانەی» کاک ئەحمەدی موفتیزادە، دوو کەوچک شۆربا دۆینەی و چایە ڤڕ دەکەیەت.

____
لەو دیوەکەی تر:
بارانێکە تۆز ئەکا!
بە شەلەشەل بەبەر بارانا ئەڕوا. خواخوایەتی بگەیەتە ئاوەدانییەک. بوخچەیەکی لەشانە؛ بڕێ شڕوشیتاڵی تیایە. مۆبایلێکی لە گیرفانە؛ خۆ ترسی تەڕبوونی نییە. چون کاری پێی نییە!
ستارەی خانوویە، بەلەکۆنەیە، شوێنپاسێک، شتێک نییە خۆی بخزێنێتە ژێری. خۆ سەرما کاری خۆی هەر دەکات.

باڵاخانە و خانووی چی برا؟! هەموو بووە بە سووتەک! ئاداری بەسەر پادارییەوە نەماوە!
خۆیو بەختی، پارچە لایلۆنێکی دۆزییەوە، دایە سەریدا؛ چەتری چی! ترۆمبێلی لیمۆزینیشی ناگەیە.
برینی قاچی هەر دەکولێتەوە و کزەی دێ؛ بارانەکە نەرمی کردووەتەوە.
بیری کەوتەوە تۆزێ پارەی پێیە، دەستی دایە، هەموو تەڕ و لۆچ و لکاو. خۆ سوودیشی نییە زۆر، پێخۆرێ پەیا ناکا بەم ئاوی بارانەوە بیخۆی!

تینی دایە خۆی و هەنگاوی زیاتر نا، تا زووە بگەیەتە جێ. هیچ نەبێت بەشکوو نانێ گەرمی دەستکەوێت.
دڵی داخورپا! خەمی ماڵەوەیەتی. ڕەنگی زەینی شێوا بێت.
بەخوا ڕەنگە هێندە باپێچ کێشابێتی بە سەروچاویا، هێندەی نەکێشابێت بە ڕووی دوژمندا؛ دڵنیام لە خۆی دەپرسێت، تۆ بڵێی ئەم ئاو و هەوایە، منیان لێ گۆڕابێت و نەمناسنەوە؟ بە بێگانەم بزانن؟
خۆ ئەبێ جارجارە سەیرێ بەرپێی بکات و تا ئەژنۆ قوڕاوییەکەی ئەبینێت، وەلێ گرنگ نییە! ملی لێ دەنێت و گرنگ گەشتنە.

ڕێ چۆڵە. تاک و ترا لە دوورەوە ئەمئاسا ڕێی ماڵیان گرتووەتە بەر.
وا نزیک بوویەوە و ڕەشایی ماڵی دیت.
ئەوا گەشت؛ خوایە شوکر. چمکێکی ڕەشماڵی هەڵدایەوە و چوویە ناوی. هەر بە بێدەنگ جلی خستە ئەولاوە. ناشوکری نەبێ شتێ نییە بگڕێ. سرتە و خورتەیە لەماڵیش نایە؛ هەموو بە بۆمب و هاژەک، یا تۆقیون و یان پارچەپارچەبوون.
لەوەشە لەژێر داروپەردوودا گیانیان دەرچووبێت؛ خۆ دوور نییە.

جلی قوڕاوی گۆڕی بە جلێ شڕ و سێ چوار ڕەنگ.
سەیرێ دەرەوەی کرد، باران تۆزێ خۆشی کردووە. لە هەر لایە دەڕوانێت، هەر دراوسێیە و حاڵی بە حاڵی ئەم باشترە، یان خراپتر. خۆ ژێر چادریشیان پێ ڕەوا نابینن. ناهێڵێن لێرەش بحەسێنەوە.
بۆ نانێکی گەرمیش مەپرسە! عەشتەبا شک نابەن.
خۆ تەلفوونیش سوودی نییە، پەیوەندی بە کێوە بکەن؟ کەس ماوە جا؟!
زرم! ئەوەش شێوا!

ئەو دیمەنانەی لە غەززە و، شوێنەکانی تری جیهان دووبارە ئەبێتەوە بەردەوام لەم زستانە.

#فەلەستین
#یەک_ئوممەت
#پایە
@payekurd

د. عەبدولکەریم بەککار لە دوای ٧٣ ساڵ تەمەن و، ٤٠ پەڕتووک وا دەڵێت.
باش وایە ئێمەی گەنج لە ئێستەوە دەست پێ بکەین و ئەوەی ئەو فەرمایشتەی ئەو جێبەجێ بکەین.

”بەشی زۆری تەمەنم تێپەڕیوە، گەلێ دونیام دیوە؛ چێژیم نۆشیوە و ئازاریم هەڵقوڕاندووە. خۆشییەک نەماوە تامی نەکەم، کەچی نە خۆشییەکان مان، نە ناخۆشییەکان. نە ناوبانگ سوودی هەبوو، نە شانوشەوکەت؛ نەمدی شتێک تا سەر بمێنێت! وەلێ لەم دونیایەم ئاتاجییەکم ماوە: دڵێکی هۆشیار…

سێ ساڵه له زانکۆی سۆران له بەشی سیاسەت و پەیوەندییە نێودەوڵەتییەکان وانەی مرۆڤایەتی و تاک سەنتەریی و پاراستنی مافی مرۆڤ و یاسای نێودەوڵەتیی و هاوکاری نێودەوڵەتیی و پاراستنی ژینگه و ... هتد دەخوێنین، کەچی نەمبینی هیچ کام له مامۆستاکانمان هەڵوێستێکی بچووکیشیان هەبێت له سەر پرسێکی جیهانی که تێیدا پێشێلکردنی مافی مرۆڤ و کوشتنی بێسنوو و بێپاساو وەک ڕەنگی زەردی زانکۆکە دیاره!

- لە كاتێكدا ئەو کارەساته له پرسێکی ئاینیی و نەتەوەیی و ئایدۆلۆژیی تێپەڕیووه—گەر جیاوازیی بیروبۆچوون
بیانووییان بێت. بەداخەوه ئەو دژیەکیی و بێ هەڵوێستییه نیشانەی پرسیاری خستۆته سەر ئاستی زانستیی زانکۆ و
مامۆستاكانیش.

هەردی عیماد، خوێندکار لە زانکۆی سۆران

#پایە
#فەلەستین
@payekurd

ڕۆژی هەیینی باشترین ڕۆژی حەفتەیە. چاکترین کردەوەیەکیش لەم ڕۆژەدا سەرقاڵبوونە بە باشترینی مرۆڤایەتییەوە؛ پێغەمبەری نازدارمان ﷺ.
سەرقاڵبوون پێیوە بە خوێندنەوەی ژیانیی، جێبەجێکردنی سوننەتەکانی، پاشان سڵاوت لێدان لەسەری.

سەڵاواتدان کارێکی کەم نییە، بەڵام لەو گەورەتر هەیە؛ سەرقاڵبوون بەو زاتەوە لە ڕۆژێکی حەوتەدا، بەرەکەتێکە لە ژیان و پێزانینێکە بۆ ئەو زاتە ﷺ.
ئاشنابوون بە پەڕەکانی ژیانی، سروشتێکی هێمن و نەرم دەدات بە مرۆڤی موسڵمان، سینە فراوانتر دەبێت، وریاتر، بەرچاوڕوونتر و بەهێزتر لە باوەڕ و پێڕەوی ژیانیدا.

ئەوەی کە زانایان دەفەرموون: «گەر هاوەڵای خودی پێغەمبەریان ﷺ نەکردبێت، هاوڕێیەتی هەناسەکانیان کردووە.» خوێنەری ژیاننامەی پێغەمبەر ﷺ، هاوڕێییەتیی هەناسەکانی دەکات؛ لەگەڵ پێکەنینی ئەودا پێدەکەنێت، لەگەڵ گریانیدا دڵی تووند دەبێت، لە تووڕەیی ئەودا پەست دەبێت...

هەتا تەجللی خوا لە عالەما بکا زهوور
بە ئاگری گوڵی چەمەن، چیا ببێ بە کێوی توور
فریشتە وا دەمی بڵێن، هەتا ئەبەد لە خوار و ژوور
سەڵاتی حەق لەسەر شەهێ، کە شەق ئەکا قەمەر لە دوور
سەلامی حەق لەسەر مەهێ، کە ئەسپی خۆر لە غار ئەخا...

@payekurd
#سالاری_مەدینە ﷺ
#پایە

«بووژانەوەی ژیانی ئافرەتانی (پیاوانیش) ئەمریکاییی لەم سەد ساڵەی ڕابردوودا، لە بنەڕەتدا دەگەڕێتەوە بۆ پەرەسەندنی ئابووری، نەک بۆ چالاکییە کۆمەڵایەتییەکان. هەموو ئەوەشی مێگەراکان (فێمێنیزمەکان) کردوویانە بۆ ژنان لە سەدەی ڕابردوو، بەقەد دروستکردنی ئامێری جلشۆرێک سوودی نەبووە!»

نیکۆڵاس دەیڤدسۆن، کەموکورتییەکانی دیدی مێگەراییی، ل٥٧.

@payekurd
#مێگەراییی
#پایە

شەوی ٢٣ ی ڕەمەزان ناسراوە بەشەوی ئەهلی مەدینە چونکە خەڵکی مەدینە باوەڕیان وابوو کە ئەو شەوە شەوی قەدرە .
پێغەمبەر ﷺ تەنها سێ شەو نوێژی تەراویحی بەجەماعەت ئەنجام دا بۆ سەحابەکان، ئەم شەوەیەکێکە لەو شەوانە .

وە مەزهەبی هەندێک لەسەحابەیە کە ئەم شەوە شەوی قەدرە، لەوانە بیلال،
عبداللە ی انیس جهنی: نوێژی عسری بکردایە دەر نەدەچوو لەمزگەوت هەتا بانگی بەیانی، دایکە عائیشە مەزهەبی وابووە دەی فەرموو پێغەمبەر ﷺ لەم شەوانە خەبەری دەکردمەوە، وە ابن عباس دەی فەرموو شەوی قەدر ٢٣ یان ٢٧ .

ئاممان لەدەستی خۆتانی دەر مەکەن