ОНА СИЗДЕК ДЎСТ ЭМАС

Кўзим нури бебаҳо,
Сиз дунёдаги танҳо,
Қанча доно ва даҳо,
Она сиздек дўст эмас.

Беради юзга солиб,
Яна қайтариб олиб,
Қанчаси турар нолиб,
Она сиздек дўст эмас.

Тишлаб гўштим узганлар,
Кўп режани тузганлар,
Тинч оилани бузганлар,
Она сиздек дўст эмас.

Қайси тошга урай бош,
Ишонганим тўкди ёш,
Қанча-қанча қалам қош,
Она сиздек дўст эмас.

Одам деб узатсам қўл,
Киссамга солдилар йўл,
Айлантирмоқ иши чўл,
Она сиздек дўст эмас.

Хизматига шай турдим,
Қанча савдони кўрдим,
Вақт ўтиб бошни урдим,
Она сиздек дўст эмас.

Гулмира Шокомолова
26.1.2025
17:08

@Gulmira_Shokomolova

СЕНГА БОҒЛИҚ
Савдолардан чарчади дил, чарчади дил,
Меҳр қайда?
Чорлади гул,
Чанқади дил,
Дилбар, сендан сўрамасман қиймат, қадр,
Юракни бир ипи қолди, узма энди.

Айтган эдим -
кўклам гуллар очди, мана,
Ҳатто, қуёш илиқ нурлар сочди, мана.
Қанотида қалдирғоч хат ёзди, мана,
Юракни бир ипи қолди, узма энди.

Юракни бир ипи қолди, сенга боғлиқ,
Юрагимдан юрагингга умид тортиқ,
Яна қайдан топарсан бу ишқни ортиқ,
Юракни бир ипи қолди, узма энди.

Шуҳрат ТОҲИР,
            Ёзувчилар уюшмаси аъзоси

20.01.2025 й.

САЙҚАЛЛАНМАГАН САТРЛАР

Отнинг охуридан ўт еган эшшакка ўз охуридаги беда хасдай кўринади.
ххх
Булбул сайраган гулзорда қарға гўнг титяпти. Қачондир эшшак оралаб кетган маконга нафсига эргашиб қарға ҳам келибди.
Асли ҳам шундай - ҳар ким мақсадига қараб ризқига етишади.

Ўзгаларга нафи тегмайдиган амалдор дарахтнинг қуриган шохида ўтиргандай гўё. Қуриган шохга сув югурмаса, куртак очмай, барг ёзмай, мева бермай, кўп ўтмай синиб, ерга қулаши табиий.

Дўстлардан оқибат кетиб, улар ўртаси бегоналик девори билан тўсилганида, сирлар ва ҳаё пардалари кўтарилади.

Бугун бахтнинг қадрига етмай ёшланмаган кўзлар, эрта бахтсизликнинг аччиқ тутунидан ёшланишга маҳкум.

Кўкдан пастга шўнғиганни йиқилди, дема. Балки сен ўша шўнғишнинг ўлжасидурсан?!.

ФАХР
Ёмғирли кун.
Ўғли олий ўқув юрт талабаси бўлган ота бозор томон шошиб кетиб боряпти. У фарзандига янги туфли харид қилмоқчи.
Отанинг қалбидаги фахр шу қадар улканлигидан оёқ кийимидан сув кириб, оёғи шилта ҳўл бўлганини сезмасди.

ДИЛ
Силкиниб-силкиниб титради елка,
Чеҳрада кўзёшдан шаффоф бир кўлка,
Дудоқдан таралди нозик оҳ сўнгра,
Ишқнинг азобидан, ишқ саробидан.

Нигоҳга кўринди аввал хазонлар,
Тонгда шивирлашиб айтди азонлар.
Туманли, ёмғирли... маҳзун ҳар онлар,
Ишқнинг ҳисобидан, ишқ китобидан.

Шунча ғам не учун керак эди, дил,
Дил берсанг чаманлар очмасмиди гил?!.
Энди мангу сайра бўлиб бир булбул,
Ишқнинг бисотидан, ишқ хитобидан!..

Шуҳрат ТОҲИР,
Ёзувчилар уюшмаси аъзоси

4.11.2024 й.

СОДДАЛИК
Соддагина уйим бор эди:
Тандир, печка, танча ва ўчоқ.
Деворлари бўлган пахсадан,
Бўғотида лолақизғалдоқ.

Соддагина тўйим бор эди:
Мўйсафидлар бўлар эди жам.
Фариштадай момолар гўё,
Болажонлар қувнарди ҳуррам.

Соддагина ўйим бор эди:
Жим ётардим ёрнинг ўйида.
Бахтли эдим ойдин оқшомлар
Ой шуъласининг қўйнида!..

Соддагина бўйим бор эди...

Шуҳрат ТОҲИР,
          Ёзувчилар уюшмаси аъзоси

29.10.2024 й.

#Ilk_qadam

DIQQAT!!! ⚡️ EʼLON!!!
⛳️ Aziz ustozlar! Qadrli yoshlar!

✍️ Parkentda Yozuvchilar uyushmasi Toshkent viloyati boʻlimi qoshidagi "Ilk qadam" ijodiy toʻgaragi faoliyat boshladi.

Toʻgarak maqsadi iqtidorli yoshlarni aniqlash, isteʼdodini namoyon etishga koʻmaklashish, ijodkor, kitobxon yoshlarni tarbiyalashdan iborat.

Mashgʻulotlarda taniqli shoir, yozuvchilar, jurnalist va madaniyat xodimlari ishtirokida adabiy kechalar tashkil qilish rejalashtirilgan.

Hurmatli ota-onalar, ustoz-murabbiylar!
Sheʼriyatga, nasrga, jurnalistikaga qiziqadigan, adabiy davralarda oʻzini namoyon etishga ishtiyoqi baland yoshlarni toʻgarakka taklif qilamiz.

? Manzil: Parkent shahri, Barkamol avlod bolalar markazi kutubxonasi.
Moʻljal: 1-maktab
⏰ Mashgʻulotlar har hafta seshanba (14-00) va chorshanba (9-00)da boʻlib oʻtadi.

Murojaat uchun:
@Faol1
+998944255530

Toʻgarak aʼzolari
O‘zbekiston xalq shoiri Erkin Vohidovning "Vatan, to tanda jonim bor" nomli sheʼrini oʻqidilar.

https://t.me/Yoshlarga_qanotmiz

ШОИР

Ҳар замонни ўз шоири бор,
Замонида эътироф этинг.
Сен зўрсан денг, кўкка кўтаринг,
Қўлларига битта гул тутинг.

Сўранг, нима дардда юрибди,
Қувончдами ёки бир ғамда.
Қаранг ҳамон ҳомуш турибди,
Кўзи қачон ёшланди, намда.

Уни қийнар қайси бир иллат,
Ёзаяпти, китоб қилолмай.
Зиё аҳли шоир бор миллат.
Кимлар кулар назарга илмай.

Бугун содда шеър ёзиб қўйди,
Замирида ётар улкан иш.
Ўзи ёзди дард билан куйди,
Унга келган илҳомдан эмиш.

Шеърларида яшайди ҳар кун,
Замон узра маконлар узра.
Бу дунёда йўқ тўкис бутун,
Шоир қалбин тилмангиз сира.

Яна бугун уйқудан қолди,
Яна уни қийнади ҳаёт.
Қаламини қўлига олди,
Битта шеърни ёзди бўлиб шод.

Гулмира Шокомолова
31.10.2024
8:31

t.me/Gulmira_Shokomolova

БАНДАСИГА КУНИМ ҚОЛМАСИН

Умр ўтар сездирмай, сезиб,
Вақт кетмоқда юракни эзиб,
Баъзан қолдим дунёдан безиб,
Бандасига куним қолмасин.

Либосимга беради баҳо,
Ичидаги билсангиз даҳо,
Яшасам ҳам майли мен танҳо,
Бандасига куним қолмасин.

Кеча мени тузимни еган,
Бугун ортдан кўзимни еган,
Сирти яхши ёмоним экан,
Бандасига куним қолмасин.

Чўп берсалар устун бердим дер,
Увоқ бериб бутун бердим дер,
Қишим яқин ўтин бердим дер,
Бандасига куним қолмасин.

Ямоқ деманг тўним ғурурим,
У кўрганда бахту сурурим,
Замон сизга эй замон зўрим,
Бандасига куним қолмасин.

Ердан ҳали оёқ узмадим,
Кетишга ҳеч режа тузмадим,
Сўзланг, тинглаб гапни бузмадим,
Бандасига куним қолмасин.

Гулмира Шокомолова
26.10.2024
17:56

t.me/Gulmira_Shokomolova

СЎЗЛАРИМДА ЯШАГИМ КEЛАР

Дунё кезиб шамол сингари,
Бахт омадни ошагим келар.
Кетар бўлсам дунё юзидан,
Сўзларимда яшагим келар.

Қушдек қанот қоқарман бир кун,
Кўкдан ерга боқарман бир кун,
Сизга ёқмай ёқарман бир кун,
Сўзларимда яшагим келар.

Гул япроқдек тўклишим бор,
Чок-чокимдан сўкилишим бор,
Ҳозир катта мухим ишим бор,
Сўзларимда яшагим келар.

Гулмира Шокомолова
25.10.2024
9:00

t.me/Gulmira_Shokomolova

ЭРКАК ПУЛСИЗ ҚОЛМАСИН

Қолмаса киссада пул,
Очилмас экан бир йўл,
Аҳволингдир ночор қул,
Эркак пулсиз қолмасин.

Боланг кутар йўлингда,
Кўзи турар қўлингда,
Тоғу дашту, чўлингда,
Эркак пулсиз қолмасин.

Дўст деганинг чойхона,
Хаддан ошса майхона,
Қарз сўра кўп бахона,
Эркак пулсиз қолмасин.

Жигаринг дер бой акам,
Олиб берар ой акам,
Кетса омад, ҳой акам,
Эркак пулсиз қолмасин.

Ёринг бўлса тушунган,
Бахт омад шунда унган,
Фақат рухингдир сўнган,
Эркак пулсиз қолмасин.

Бир кун гадо, бир бойсан,
Асли тупроқ бир лойсан,
Пулинг бор жўшқин сойсан,
Эркак пулсиз қолмасин.

Гулмира Шокомолова
22.10.2024
21:56

t.me/Gulmira_Shokomolova