ما بتقدر، ما بتتفهم، ما بتحافظ، ما سوي نفسيًا، ما تلوم شخص على تصرفاتو معاك ولا تزعل لما يمشي، أقعد مع نفسك وشوف قصرت في شنو.

#رنا_نادر.

لو عندك الشخص ده، أدخل قول ليهو:
شُكرًا لأنك ما اسأت فيني الظن في الوقت الكل القريبين لي ساءو الظن، شُكرًا لأنك اتميزت 💛.
ولو ما عندك ربنا يجبر بخاطرك أنا بقول ليك شُكرًا لأنك إنت المميز***💛***.

#رنا_نادر.
#جرعة_حب.

اللهم هون ثم هون ثم هون
على قلوبًا لا يعلم حالها إلا أنت.

أسوار القمر

في ليلة كَثرُت غُيومها في السماء، اختفت النجوم، وبرق القمر كاللؤلؤِ المَنثور على خيوطٍ زرقاء اللَون، اختفى الضَباب وهبّت رياحُ الحُب، الحُب الذي جعلّنا كالعصافير نُحلق عاليًا، بِطلاقةٍ، بَشَاشةٍ وخِفة، أقِمنا حيثُ الظلام تُحاوطنا أسوارُ القمر، نتناول ملامِح بعضِّنا الآخر، ثم نحتسي كوبٌ مِن مياهِ الحُب، إن احتجنا لِسُكر! فالسُكر عيناه، عيناهُ الساحِرة التّي أنظرُ إليها بِحُبٍ ولهفة، كُلمَا أرَدْتَ أن ألتفت تَذهَبُ مِني عينايّ هَربًا إليهِ، لم يكُن لديهِ جانبٌ أسود حتى عيناهُ العسلية، تعكِسان هدوء السماء! تبادلنا الأحاديث الحنونة وترانيم الهُيام، يُدندن لي بالكلمات التّي أحبُها، حينها شعرتُ بِالبرد، حتى غفوت كالطِفلة على صدرِ أبيها، نِمتُ بِعُمقٍ تام لأستيقظ وأنا وحدي! أكنتُ أحلم؟ أم أحنُ إليه؟ وأحنُ لنفسي عِندما كُنت بِصُحبته، لِضحكته ولفرحتي التّي كانت مَعه! لا أحبُ الريح، لا أعرفُ لماذا! لكنّي حين أتمشّى أشعرُ كما لو أنّها تقتلع أشياءً مِنّي، أقصدُ: الأشياء التّي أُحبها تتركني وحدي على حافة الجسر.
بِاشتياقِ وحنين مُبالغ، طرقتُ الباب لرؤيته فلم أراه! سألتُ الطير فأجابني: لم يأتي اليوم، لقد أصبح قمرًا في السماء!
أكتبُ إلى القمر، أو إليه ليس هُناك فرقٌ كبير: أحبك، حاضرًا كنت أم غائب، بجانبي أو حتى إن لم تكُنْ، سأظل كذلك مهما حدث، أكنت ذاهب؟ دعني أُخبرك: أنت ‏قمرُ مدينتي، تُنير كظلالِ النورِ على القمر، فَيخبو بريق الآخرين.
#رنا_نادر.
#وجدان.
#ركن_أنامل_قلبي.

نفسي العالم وبذات السودانين يهتموا بقضية السودان ذي ما يهتموا بقضية البقية، نفسي والله.

فكُلنا مسلمين، وكلنا عرب، وكلنا أرواحٌ لها دماء، للهِ درُ السودان.

#رنا_نادر.
#كونوا_أنتم_الصوت_للسودان.

إنسانٌ أنت لست صنمًا
فاقرأ وتفاعل وقدر جهودي

إنَّ التفاعلَ ميّتٌ فتفاعلوا
كي لا أجرّب سُلطتي ونفوذي🙄🔪.

#رنا_نادر.
#عايزين_الدق.
#حأعمل_إضراب.
#ماف_تفاعل_ماف_نصوص😔🔪.

يامدني الريـد !

الريــد المن بعدك
ما بقى ريد
ولا بعدك شُفنا
الحنية
حنضل ضقناهو
وشبابنا!
بالمُر عشناهو
وإتخيلو إنو كان
نزوح وأسيــة

يامدنــي!
أخبارك ياخي وأحزانك
وألامــك!
قَّلتّ وخفتّ؟
ولا لســه
بتنتح وبتعاني!

روحنا بتطلع وليكِ
تنـــادي
شايفنك هنــــاك
في العــالي
لا بَعدك شُفنا مثيلك
ولا نقدر غيرك نسكن
تانــي

يامدنــي !
ردي عليا
وأرجعي عشاني
أنا
وكل أخواني
الشوق هَد كياني
وأهلي وخِلاني
برضو إتهدو!

برضو إتهدو
وما قدرو يِعَدو
أصلو فراقك ما بتعدا
ما بتعدا ونحن خلاص حيلنا إتهدا
وبعدك عني
شديد زَّلاني

أبقي قوية
خليكِ صامدة ومتماسكة
إنتِ قوية إنتِ حنينة
وتقدري
تتخطي الفارغة
حتتخطيها، هي
وكل المأسي الحاصلة

ما شغالين بيهم
هم القالو:
تستاهل مدني الجاها
ما بتستاهل جوة عيونهم
بارو ظنونهم
وظلموكِ

إنتِ، مدنيــنا
حقتنا وحِمانا
أرض المحنة ولا للمحنة
ونحن بس العارفين أحوالا
وكل أقوالا
وكل الفيها وماضيها
يخصنا نحن برانا

غصبًا عنم
أي بالميم
غصبًا عنك إنت التحكيم
غصبًا عن كل سياسي
ونازح ومغترب ومقيم
غصبًا مدني هترجع
يكفي إنها
مدني

يكفي جدًا إنها مدني
وسط ومدينة
لولاية الجزيرة ست الـ200 ميتين
عارفنهم؟
رحمة ونور تغشاهم
شهدائنا جميعًا

مدني الصامدة!
الجزيرة!
صاحبة الجثث الخامدة؟
مليانة حروب ودموم وأذية
ولسه جميلة!

لكم أن تتخيلو؟
حضنت وإحتوت ألاف الناس
غرباء وناس لي مدني كانو أساس
خلوها بي قرض التطوير
وجوها راجعين
كايسين الحـِمى والأمن والإستقرار

عاشو فيها قُرابة السِتة شهور
سكنو وشربو وأكلو
وإشتغلو
ولبسو و والله جد كانو مبسوطين
والمفروض
يكونو حامدين وشاكرين
للمولى

كفاية غرور
وكفاية شرور
مافيها منو الأولى
ومنو الأحسن ومنو الأفضل
ومنو الأقوى!

المفروض
إننا كلنا وطنًا واحد
ما يهزو لا عدو لا قوم
عشان سودانا ذاتو يقوم
نغير ذاتنا ونتماسك إيدًا واحدة

ربنا ذاتو يبارك فينا
ويدينا
الفرحة وراحة البال
ونرجع ونقول:
مدني مافي ليها مثيل
بَعدها ياما شُفنا وعِشنا
بس العملتو مدني !
لي الله أمانة
ما بتتجازى

ولاياتنا كلهن واحد
وفيها الشين وفيها الزين
لكن!
والله دي خَانة ما بتتجازف
بي غير مدني
ولا بنساها
ولا بقدر ولا عايزة
غيرها أحب تاني
وأفضل أعاني
وأكتب وأهدي حروفي وأحزاني
لحد ما نرجع
بإذن المولى
هنرجع

وكُل من يقرأ
في البتفق وفي الأصلًا ما حيقرا
كل الحُب بلا تفرقة
لكن
النص دَ
أو القصيدة دي
لي حبيبتي مدنــي

وناس مدنـــي
وهُواة مدني وعُشـاق
مدنــي
وأنا أولهم
من هواة مدينة ود مــدني
لا وكمان
مواليد مدنـي

وإنتِ يامدني جنة الدنيا ودلالا
بكرة ترجعي لا محالة
يا أحلى شيتًا غنو لي
ليكِ الدلال إدللي
أبقي البحر بدلى لي وأبقي
السما
بطلع علي

قلت لي مدني؟
ومِن مدني؟
ياخي يا أجمل خبر ?.

#رنا_نادر.
#كوني_بخير
#حتى_نلتقي_بإرادة_الله.
#أشعار_وقصائد.
#رسائل.
#ركن_أنامل_قلبي.

| الثلاثاء، 11 Jun 2024.
4:05.