ГЎЗАЛ БЕГИМ
"БЕДАНА САЙРАТЯПМИЗ"...МИ?

Ўзбек адабиётида Хосият Рустамова каби дунёга чиққан, ўз ижоди орқали ўзбек адабиётини жаҳонга тарғиб қилаётган ижодкорлар нечта, деб ўйлайсиз? Бир, ўн, эҳтимол юз нафарми? Менимча, жуда кам, бироқ гап сонда эмас, балки асл адабиётнинг дунёга чиқаётганидадир.

Бугун Хосият Рустамова шеърияти тимсолида чин адабиётимиз дунё адабиёти ва китобхони билан қўл бериб кўришди, ачомлашди.

Дунё эшигидан кириб-чиқиб юрганлар кўп бўлиши мумкин. Лекин уларнинг ҳар бири Адабиётимизни дунё адабиёти юрагига тута оляпти дея олмаймиз.

Хосият опа шеърлари охирги йиллар ичида 50 дан ортиқ давлатларда чоп этилди. Ва қатор мамлакатларнинг Адабиёт соҳасидаги мукофотларини қўлга киритди.
Хусусан, Озарбайжон республикаси томонидан Давлат мукофотига сазавор бўлиши Халқаро миқёсдаги улкан совриндир. Ҳарқалай, Хосият Рустамова "шону шавкатинг" қабилидаги шеърлари учун эмас, адабиёт соҳасидаги гўзал ва сазавор меҳнатлари учун қардош мамлакатнинг Давлат мукофотига муносиб кўрилди.

Хўш, ўзимизда шоиранчиқибинг бу хизматлари қандай тақдирланяпти, дерсиз. Ўзимизда эса, сукунат тайм(time), кўриб -кўрмасликка, билиб-билмасликка олиш тайм( time)! Давлат мукофотини-я!!! Яъни бир олимпиадачига, ёки қайсидир спортсменга қаратилган эътиборнинг бир бўлаги Шоирага қаратилиши мумкин эди-ку! (Ҳолбуки, Хосият опа бунга муҳтож эмас!) Биз ўзимиз, ҳа, ўзимиз, қаторасига Халқаро мукофотлар олаётган шоирани тақдирлашимиз мумкин эди! Фақат эди. Бу боришда шоира эртага Нобел ОЛИБ келсаям олдин ўзимизнинг мукофотни олсин, деб ўтираверишимиз аниқ.

Жуда кўп мамлакатларга бориш, шеърларингни юзлаб тилларга таржима қилдириш мумкин! Бироқ, булар шеърларингнинг бошқа тилда яшаб қолишини таъмин эта олмайди. Худога юз ва ҳоказо марта шукурки, Хосият опа шеърларининг магнити, истеъдод деган оҳанрабоси бор. Кўз ташлаган одамни ўзига тортиб олади. Ва бу жараён давом этмоқда.

Яқинда Албаниядаги марказий нашрлардан бири Хосият Рустамованинг сувратини ўз муқовасига қўйиб чоп этди. Бугун журналлар Илон Маскни, аллақандай отарчию, кучишлатар - спортсменнинг сувратини ўз муқовасида нашр этяпти. Эртаси бор миллат билаги зўрларга эмас, мияси ва юраги зўрларга эътибор қаратиши, таяниши, тансиқ туҳфалар бериши Албания мисолида бизга ибратдир!

Зотан, Хосият Рустамованинг баҳор ҳавосидек дил жимирлатар шеърияти ўзбек адабиётининг тоғу боғларидек қалбга фароғат бахш этади, руҳиятимизни тўйинтиради. Биз шеърият мисолида "хола-хола" ўйнмаётганимизни, жадид боболаримиз ва жадид момоларимиз каби УЛУҒ бадиий-миллий ғоялар билан дунёга боқаётганимизни англайдиган замон келганига аааанчааа бўлган-ов! Ёки жадидимиз айтмоқчи ҳалиям "бедана сайратяпмиз"ми?

3-феврал 2025 -йил

Гўзал, менинг бебаҳо Дўстим, қадрли Шоирим, катта раҳмат!

Менинг ДАДАМ

Мен Дадамни ҳеч нарсадан қўрқмайдилар, деб ўйлардим. Ва менинг назаримда, ҳеч кимдан ҳам қўрқмас эдилар. Мен буни баланд овозда гапирганларидан билардим. Қоронғудан қўрқмай кўчага чиққанларида ёки кўчадан келганларида, “мени Дадам дунёдаги энг қўрқмас одам”, деб ғурурланардим, ортларидан ҳавас билан қарардим. Дадам ҳеч нарсадан қўрқмас эдилар. Ҳеч кимдан ҳам. Ўртоқларим билан урушиб қолсам, “ сани Дадамга айтиб бераман “, дердим. Ўртоғимнинг юраги чиқиб кетганга ўхшарди менга. Аммо барибир қўлидаги нарсасини менга бермасди. Мен бу ҳақда ҳеч қачон Дадамга айтмасдим, кейин ўйнашга рухсат бермай қўйишларидан қўрқардим. Менинг Дадам дунёдаги энг қўрқмас одам эдилар. Ўшанда тўртинчи синфда эдик. Ўқув йили энди бошланган, мактабдаги таъмирлаш ишлари ҳали тугамаган эди. Кимдир менинг сумкамга бир дона сариқ ғишт солиб қўйибди. Мен ҳам уни уйга борганимда кўрдим. Дадамнинг олдиларига қўлимдаги ғишт билан йиғлаб чиқдим. Мени хаёлимга яшин тезлигида урилган фикрдан хурсанд ҳам эдим. Ўша кундан бир кун аввал Фазилат дарсга дадаси билан кириб келди. Дадаси Фазилатга, “ Қани кўрсат сени урган болани? “ деди. Фазилат синфдан кимнидир қидира бошлади. Ўқитувчимиз қўрқиб кетганларидан Фазилатнинг дадасини ташқарига чиқиб гаплашишни таклиф қилардилар аммо, Фазилатнинг дадаси кўнай демасди. Хайриятки, ўша куни Ҳусниддин дарсга келмаган экан. Биз болаларнинг хаёлимизда, агар Ҳусниддин дарсга келганда, аниқ, Фазилатнинг дадаси уни ўлдириб, доскага осиб қўярди…Аммо ўша кундан кейин Фазилатга ўғил болалар тугул, қизлар ҳам қаттиқ гапирмай қўйдик.
Мен ҳам Дадамни худди шундай синфимга бориб, ҳамма ўғил болаларни доскага қатор қилиб қўядилар ва бир бошдан ҳаммаси билан савол-жавоб қиладилар, деб ўйлаган эканман…
- Ойиси, эртага бу қизни духтирга бир кўрсатайлик, дедилар. Мен қўлимдаги ғиштни секингина дераза раҳига қўйдим.
- Кимдир сумкасига ғишт солиб қўйсаю, оғирлигини билмай уйгача кўтариб келган қизни бошини яхшилаб бир текширтирмасак бўлмайди…
Шундан кейин мен Дадамга ҳеч нарсадан шикоят қилмадим… Аммо, Дадамнинг қўрқмас эканларига шубҳа ҳам қилмадим. Чунки, Дадам қўрқмас эдилар. Мен Дадам ҳақида шундай ўйлардим… Менинг Дадам жуда кучли эдилар. Уйимизга энг оғир нарсаларни ҳам бир ўзлари кўтариб келардилар. Мен бор кучимни сарфласам ҳам жойидан қимирлатолмасдим. Мен Дадамга жуда ишонардим. Ўлмайдилар, деб ўйлардим. Яна ўйлаяпман, менинг Дадам ўлимдан қўрққанлари учун ўлмадилар, уни хижолат қилмаслик учун ўлдилар…

Кундаликдан.

Хосият РУСТАМОВА

@Xosiyat_Rustamova

Сени соғиняпман!

Ич-ичимдаги жимликдан ёрилиб ўлмасайдим! Қонталаш руҳимни ёриб ёруғлик қидираман, Сени соғинаман Худойим! Елкамдаги оғирдан-оғир думалоқ бошни кўтариб чексизликларга термуламан, киприкларим нигоҳларимга санчилади ва бир лаҳзада сукунат жон талашгандай қайгадир ғойиб булади. Нега Сен ҳакингда олдинроқ ўйламадим? Осмондан дарвоза қидирган тунларим ҳам менга яқин эдингку, нега билмадим? Сенга бориш учун ўлиш шарт деб ўйлаган кунларимда ҳам Сен мен билан эканлигингни нега билмадим? Ақлим шу кадар қисқамиди? Мени Сенга фақат Ўлим олиб боради, деб ўзимни ишонтирганимда менга раҳминг келганини энди тасаввур қила оламан! Ўлмасимдан кетаман Сенга! Бу муҳаббат, бу соғинч билан узоқ қололмайман бу ерда, мени кечир! Мени кечир, юрагим титраб турибди ҳозир, кўзим тўла ёш. Йўлга чиққан одамни ортига қайтарма, илтимос. Ўлиб қолишим мумкин!

Кундаликдан

✍️ Хосият РУСТАМОВА

Катта раҳмат, ўзимнинг Раъно Опажоним! Ҳар сафарги эътиборингиздан бир қалқиб тушаман, кўзимга ёш келади…

@Xosiyat_Rustamova

МеҳриНоздан шеър ўқинг…

Шоир оғам Мансур Жумаевга

Одамизод аслида завол ичра яшайди,
"Нега" деган улкан бир савол ичра яшайди.
Оға, ҳеч ким кутмаган фаслни кутганмидинг,
Дардни мисқоллаб йиғиб, ичингга ютганмидинг?

Ахир Орзудан Бунёд бўлганди-ку ҳаётинг,
Бехос осмон гумбурлаб, синди икки қанотинг.
Қара, гул-гул баҳоринг кул бўлди, кузак бўлди,
Бу ҳол очиқ ярамга сепилган туздак бўлди.

Жўраларинг зулматда сарсон тушдек кўринди,
Отанг ёмғирда қолган митти қушдек кўринди.
Нечун ўлимга қарши боролмайман, оғажон,
Волидангнинг кўзига қаролмайман, оғажон.

Қачон бунча ожиз-у, чорасиз қолар шоир?
Миллатнинг мусибати ортганда ўлар шоир.
Кетар чоғда шодмону, хотиржам эдинг, балки,
Мансури Ҳаллож каби "Анал-Ҳақ", дединг, балки.

Булутлар бўзраяди, йиғламоққа ҳоли йўқ,
Мезон тўзғин сочини йиғмоққа мажоли йўқ. Юрагим тугаб қолди, қуриб битди кўзларим,
Бошқа ўлманг, дўстларим, бошқа ўлманг, дўстларим…

✍️МеҳрHоз

Ассалому алайкум!
Фаридуннинг ушбу ноласи неча йиллардир менга хамроҳ! У қўшиқ айтмайди, у йиғлайди… Дам олиш кунингиз яхши ўтсин!

@Xosiyat_Rustamova