الله الله

تضحك واخذت القصيدة من ملامحها

اروح لوين ؟
اذا اشتد الحنين وعزتي ترفض
اروح لمين ؟
ياللي صعب تتعوض
شسوي بوحدتي بالله !
انا مليت من شكل الندم لا احتد في صوتي
انا تقتلني الذكرى
وما ابالغ انا مليت من موتي
هنا ضحكه
هنا ربكه
هنا كان الدفا بيديك
هنا زعلتك بقسوه
وهنا قدمت لك عمري عشان ارضيك
ويا الله
انادي له وصوتي تاه
ويا الله
له بكل الوجيه اشباه
ويالله احس ان الليالي سنين
اروح لوين ؟
اروح لمين ؟
انا مالي وجود الا وانا وياه

خالد الكيادي

في قلبي كلام وكنت ظالم وانا اختصره
‏كثير اللي اقوله وانا اسألك شاخبارك

‏على كثر ماكنت اتمناك كنت اكره
‏طواريك وانا اعرف دربك ومشوارك

‏انا ليه اشيل بخاطري ولا ليه اشره
‏وهذي هي اقداري وهذي هي اقدارك

‏الى الحين احبك حب لو تعرف شكثره
‏بتندم على بعدك وتضحك على اعذارك

‏بقى الليل في يدي وانا الوّح وعبره ..
‏في صوتي تلوّمني بعد ما خلت دارك

‏خذ العمر في غيبتك لا تقول لي بكره
‏انا مسيّر بحبك .. انا صبري اختارك

موسيقى من بعيد بذاكرة غربة وريحة بن
وليل يطول والوحده رياح تهب في بالي

بقى لي وجه واحد في المرايه .. تنكسر وانجن
شحوب اللي يمد ايديه من روحي الى ظلالي

ملامح ما تعيش بذاكره لو تنمحي أحسن
شعور يموت من زله وش اللي يجيبه قبالي ؟

نسيت اللي تناسوني .. تناسوني عشان احن
حرصت وما نفع ياليتني مخذول بإهمالي

تعبت اطارد المجهول يجوز اني ادور عن ..
أحد يعرف وش الغربه و ما يتركني لحالي

احس ان الخلاص انسان مدري وين مدري من
مثل ما الله خلق للناس ناس تحب .. عقبالي

ليلة اخترت غيري ثارت الريح
انكسر غصن مورق وانمحى ظل

ليتها كلمه انقالت بتجريح
او زعل ليل لا جا الصبح ينحل

اذكر اني تعبت اقوم واطيح
ما امتلا كثر قلبي يومها غل

والله ان العيون تعيي اصيح
فيك والله حرام الدمع ينهل

كيف بنسى خطاك شلون بزيح
عن عيوني خيالك كل ما طل

وش يضرك لو مفارق بتلويح ؟
ليه حتى فراقك ماهو بسهل ؟

خالد الكيادي

ودعيني لا تموت بكفك التلويحة