عظّم الله لكم الأجر باستشهاد بِنت خيرِ خَلْقِ الله
و بنت أفضل أنبياء الله ورسله
الممتحنة الصابرة الطاهرة المعصومة فاطمة الزهراء (عليها السلام) 💔**
.......... ........... ...... .........
ميمر يا فاطمة

عندي وصية امن النبي وهل دمعج
لو لا الوصية احضر الج ميدفعج
ريت الضلع ضلعي انكسر مو ضلعج
وانه اصفگت جف اعل جف وتحسر

شيّبت انه بحجة كبر يا كبري
فكدج سبب شيب الطلع من زغري
نمتي ابلحد يا مزغره وهد صبري
وآنه الضگت كاس الصبر يا كوثر

ميته وعتب ظل اشكثر يم بالي
أعتب لأن ما گلتي كلشي اگبالي
ومن العتب يا فاطمة انشل حالي
گلبي شكثر يحمل عتب واتكسر

كاسرني ضلعج بالغسل شفته انرض
يا فاطمة ومن عدها اطيح وانهض
ومن الهضم بَيَّن باصابيعي العض
ووجهي انملى احزان وبده يتغيّر

كل مغربية اتمر علي حيلي انهد
ويا بير الأحجيله الحزن ظل ينسد
ولهذا السبب حافر أنه ابيار شگد
وبير الجفن دمعه انملى وزاد أكثر**

ضياء ستار الفرطوسي

#فاطمة_تشبه_ابنها *?*

هاي المصيبة ٠٠ فاطمـة تشبــه ابنــها
هاي المصيبة ٠٠ تشبه حسين ابحزنها

نفس الدفعو باب اعلى الزهره
‏كسرو ضلع امن حسيـن بعشره

----------------------------------

لا من گبر لا من فدك
ضاعن تره بســاع بســـاع
ضيّع كبر فاطم علـي
ومـا تنعـرف ويـــن الكـاع
اهل النبي راحوا لجن
كـلمن الـه وحــده اوجـاع
بنت النبي ضاع الكبر
سبط النبي جسمه الضاع

ضاع الگبر جن خنصر اعلى الهيمه
الضم الگبـــر ريتـــه يضـم الخــيمه

عاشت غريبه ٠٠ وهيه مدفونه بوطنها
‏عاشت غريبة ٠٠ چنها الحسين بدفنها
‏
‏حيدر لمن يدفن شاف الكسـره
‏كسروا ضلع امن حسين بعشره
‏
----------------------------------

مثل الشبه چـــن كربـــله
يا فاطمه الچنها حسين
اليدفن علي وبالطف علي
نفس الاسم بـس اثنيـن
هـو بثــرى وهيــه بنعــش
مامش صياح امشيعين
خلت يتامـــاها ام حســن
ماشبعو امن امهم زيـن

لمّن دره بحال الضـــلع واويـــلاه
حيدر ندب يازهرتي وكض مگفاه

هيه الهظيمه بالدفن حيــدر حـضنـها
هيه الهظيمه حس اكو اضلوع آلمنها

چنها ضلوع ابني يكـول بحــسره
كسروا ضلع امن حسين بعشره

----------------------------------
بـــالام شبـــه وي الابـــن
شوفتها الاخيره النـــار
شاف الخيم من تحتــرك
بس فاطمه شافت دار
هناك الرمح كاسر ضلـــع
وهــنا بداله المســمــار
بالطف يتامى اشكد بقت
وهنـــا يتامـــاها ازغار

هنــا حيدره مكيـد والازلام تعيـــل
هناك الجرح كـيّـد جفوف ال اعليل

هيه الرزيه ٠٠ امصايب الطف الاجنها
هيه الرزيه ٠٠ بحرگ المخـيـم عيشنها

وچانت تاذي حسين يشوف العصره
كسروا ضلـــع امن حسيــن بعشـــره

----------------------------------
الحيره اصبحت نفس الوضع
محتاره العيال تعـــــوف
وهيه بوضع ما ينحســـد
ماتگدر اتحــرك چفـــوف
هم رادت تگـوم اوگعــت
چنها الذي اطيحه سيوف
كلما نوى ايگـوم و وگــع
مسبيه العيـــال يشـوف

كلما نوه بحرگـته حـــاول يگـــوم
يوگع ثجيله سهامه وبصدره دموم

يشبها چنه وهيه نفس الحــال چنها
يشبها چنه خافي ونه اتگـول ونــها

نفس الخلوا عين اتغمض حمره
كسروا ضلع امن حسين بعشره

----------------------------------

اخر شبه اخـــذ الاهـــل
ما تگـدر تكــوم، اطــيـح
منظر يهد حيل الصـــبر
(خلّوا ابن عمّي) اتصيح
حسين برمح يتبع هله
والمنذبــح يـمته ايريـح
يصيح بدمع خلوا هلي
والدمعه ينگلها الريــح
‏
‏ريح الخذت دَمِعْته شالت جروح
‏ولهسه تنشر دَمْعِته الشيعه تنوح

اتفضل علينه ٠٠ نحيي الدمعه بشجنها
اتفضل علينه ٠٠ يخلق الله شيعه منـها

و لازم نتبرى امن الكسرو ظهره
كسرو ضلع امن حسين بعشـره
‏
----------------------------------#یا_فاطمة ?
تشبه حسین بحزنها ?

ضياء ستار الفرطوسي**

#انا_المسمار ?

يا فاطمة الزهراء ?
----------------------

عادتي امن اسنين بالحيطــان أسكن
شــغــيّــر الاقــدار صاير فوك محسن

حاولت اقـاوم عـالاجو اهاجـم
وادفعوني الها طيـحوها فاطم

اريد اعذار انا المسمار يا حيدر

٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠

جماد وثابت امچاني
عــلـــى البيـبــان خلـــوني
انخلقت انه ولا بيدي
وگـع محســن على عيوني
يحيدر مستحي منك
عليــها الزهـــره دفعـــوني
توسطت الضلع عذراً
واريـد اطــلع يعصـــروني

اتنازف الحيطان هاي ادموم حمره
التمت النســوان حيدر هاي زهــره

وافت المنيـه روحي والزجيه
آنه يدفعوني لاكو شــي بديه

احركتني النار انا المسمار يا حيدر

٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠

فلا ادري تجي الــدفعه
على وجهي بضلـع نـــومه
وكع محسن سبب مني
تطشر چـــن نده دمـــومه
انه اتأذه بكثــر فاطــم
واحسّــن بيـــها ملچـــومه
تره الدگـــات البراســي
عتب چي روحي مهضومه

كثــرت الدكـــات صوتي يصيح وسفه
اخفي بالصيحات محســن جـاي يغفه

دَفعت الحرايـم هظمه ع الهواشم
طالع اعل فزعة محـسن اللي نايم

اعرفت اسرار انا المسمار يا حيدر

٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠

الدفع رجلــه علــى ظهــري
انه اول من غـدر بيــه
واجه الثاني دفـــع فاطـــم
لجنها طاحـــت اعلـيه
اغمضت عيني وحك عينك
لان سترك مهو اشويه
تســـامــحــني ردت منــــك
لان كاتـل على النيـــه

سامح المظلوم محسن موش دربي
انه هم مهمـوم هـــم مكســور گلبي

سيد المكارم تكـرم اعل وادم
اكرم انت ليه سامح انه خادم

الفداك اندار انا المسمار يا حيدر

٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠

انه استــاهل حـرك لـنّـي
حركت اشجم گلب صافي
شفت گيدك يشل چفــك
شلت محسن على اجتافي
ولاجن مدري بي جتــفي
يطيّــح محســـن الغـــافي
خجل كلي احس صوجي
علي بيتـك صبـــح طافي

بيتك المحروك وانه النار جنــي
كلبك المخنوك يمكن سبب مني

بيتك المسالم ينگلب ملاحم
ذنبي هذا كله ينملــي مــآتم

طفيت الدار انا المسمار يا حيدر

٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠

جنــت ناوي ارد فاطـــم
لمن وصلت الي الدفعــه
ايا وسفة الضـعف منـــي
خشب يدفعني مارجعـه
اريـــد اتكفّـــر ذنــوبـــي
واردلــك بـالـف فــزعــه
انه برمضان اكض هدمك
اذا نــاوي علــى الطلـعه

طبرت المحـــراب تاخذ مني جنه
استذكرت لمصاب دمها البيه حنه

شاهدت علايم ردّت المـــآلــم
چلَّبـــت لان لا أخسر المراحم

يحامي الجار انا المسمار يا حيدر

٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠

#انا_المسمار?

ضياء ستار الفرطوسي
٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠

لاستشهاد الامام الحسن العسكري (عليه السلام)?**

يا أبا المهدي سلام
--------------------------

طلب ماي ونوه يشرب
كبل لا تخلص انفاسه
وكع منه العذب لنه
ذكر جده العطش جاسه

يذكر حسين وتبده امن ايده الماي
يعاين روحه طايح بس بـ الافياي
يكول شلون دفني ونحري وياي

يبچي انهظم نحره سلم
ويشرب نوه ابلا ذباح

يا حسرته ابلا ذبحته
نحره انهظم دون ارماح

يبچي وينوح جريه ادموعه
لوعة الشام چبيره اللوعه
دمعه يجريه اعل ضلعه السالم
تسلم شلون يهاي ضلوعه

سلام يا ابا المهدي سلام

-------------------------

وگع منه العذب ناده
على المهدي يجي راده
وتذكر من ابو الاكبر
يصيح وطايحه اولاده

خمس اسنين عمره امگابله اينوح
يشوفه بگد رقيه ابطلعت الروح
فرق شافت ابوها بطشته مذبوح

شالت حمل مو للطفل
اجبير العمر بيه ايموت

تحچي بتعب بويه شعجب
ليش بطشت مو تابوت

بحسرته ايكول لصدره ايناظر
صدري موجود ولا من حافر
بهضمته يصيح حسافة عمري
يبچي ويكول سبگني العاشر

سلام يا ابا المهدي سلام

-----------------------

يعاين دمعه يتبده
يجيبون الچفن عده
تهضمه قماش اليكفيه
(و)بحصيره ينجمع جده [واو خفيفة بالنطق]

ميت بيته عامر سالم الدار
ولا ركضت ازغاره بلهبة النار
ولا ابنه عليل وبالسبي احتار

ايحس واسته بس چبدته
چبده انمرد چي مسموم

وجده بضمه اسهام نرمه
چبده انمله كله ادموم

ايواسي مطروح طريح امچانه
والحسن چان تعينه اخوانه
ابأول ايام ولا ظل ثالث
بعده ما مات واجت عوانه

سلام يا ابا المهدي سلام
‏
‏--------------------------
‏
‏بعد ما عاتب ابضلعه
‏خلص عمره وبقه دمعه
وعلى اچفوفه ركز شوفه
يشوف العشره مو تسعه

مات وعلى الچف امفتح عيون
يحس مطلوب للطف چفه مديون
انهظم ما گيدوه ابگيد الاضعون

بطاري الضعن مات الحسن
و وي دمعته اطيح خيام

عينه ارسمت جربه انملت
اتبدت لچن بيها اسهام

الشام چتال شريچ بموته
وچان مسموم يودع قوته
ماطلع صوت تحبسه الونه
چلمة الشام تگطع صوته

سلام يا أبا المهدي سلام

--------------------

يا ابا المهدي سلام ?
ضياء ستار الفرطوسي**

" مولاي السجاد (عليه السلام) يروي ما حصل
بعد خروج الظعن للسبا ? "
[ بويه اعيالك ، ثگيل ]

٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠
 المستهل
٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠
بويه اعيالك      تمشي بهيمه
اخلافك بويه   مامش خيمه

وكلمن يِحير بجرحــه
راسك يماشي ابرمحه

بويه اعيالك

٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠

مشه حادي الظعن بينه
              ومشيت انت برمح عالي
هده الليل وسچن روعه
              واشــوف اهلالك ايـلالي

الليل اجه وغيّم ظلامه   
      وبيه سكن حتى الهوه
وما سچن نوح الثچاله    
      چي مشن دون الـلوه
كلشي أظلم بويه وانته    
       راسك ايشع ابضوه
الناگه هزله وتلوي بينه    
     ورمحك اويانه التوه

تشوف اشفاهك   وتبچي العيله
الله ايعدي      هاي الليله

ونتاني يطلع صبحه
راسك يماشي برمحه

بويه اعيالك 

٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠

ظعـن خالي زلـــم وآنــه
               عليـــل وحيـلي ما باگي
شربنه احنه العذب لـٰچن
               بقيت انته وبقى الساگي

الضعن يمشي وماي عدنه
    وعدنه جربه تلوگ الك
انبدّي ماي بصف خيالك
     ما گدرنه نوصـــلك
شما نگلهم ريضوا ساعه
      بويه تعبانه هلك    
ما وچب حادي الضعينه
      ولا ينزلك شايلك

بويه الحسره   تكبر عدنه
كلما رمحك     يوصل يمنه

ونحرك دماه امسبْحَه
راسك يماشي برمحه

بويه عيالك

٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠
يبدر اهلي وضوه الممشه
             جزينه بكـــل شـــبر عايــل
يبو رمح المشه ومحــني
              تظل محني اعلى ابوفاضل

من مشه الحدّاي واطرگ   
      طر متربات الفله
 كلها كامت عنه تسأل    
     لمن هاي القافله
 شو زلم ماكو بمشيهم
   بس عليل وعايله
وشافوا انحور وحچينه
   هايه عملة كربله

گالت عمتي     وكلنه ابچينه
امن امعاينهم   (قَد خُزِينه)

وصَفّونَه مثل السبحه
راسك يماشي برمحه

بويه اعيالك 

٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠

وصل شام الـسبي بينـــه
             اعلى باب الساعه هم عاشر
الفرق ذبح النحر بالسيف
            وهـــسه اليـــذبح الـنــاظـــر

تعرگ ادري ابـمستحاتك
    وعالرمح دم عرّگت
انت دمك طاهر ادري
       من نزل دم رتلت
وللقصر طبينه شفتك
     بالطشت واتحيرت
تريد تفزع ماكو جسمك
   وانت بالدم فزّعت   

بنيتك جتك     شافت طشتك    
تبجي وسكتت    ماتت بنتك   

والموت عدها الفرحه
راسك يماشي برمحه 

بويه اعيالك

٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠

بويه اعيالك?
محرم الحرام ١٤٤٦ هـ

ضياء ستار الفرطوسي

**مولاي السجاد (عليه السلام) يروي ما قاسته عمته الحوراء من المآسي والآلام .

--------------------------------

يا حسرتي لعمتي اشجره زينب غريبة
طلعـت غــريبـه امـأسـره زينب غريبة

دَوْرَت بگايه الحيل ما تلگه شوف بليل
فارگها نجم اسهيل زينب غريبة

--------------------------------

آنه المشت عمته سبي
للشام من طف كربله
عافت جسد من لا جسد
لا مندفن لا گبر اله
عافت وراها اشكد حجي
وعافت بچي بنص الفله
اذاها موقف من مشت
نبله بطفل من حرمله

اذاها من شافت سهم حز بركبته
حته العطش زاد الالم حز بركبته

محد يجينه يعين هذا الطفل مسكين
لو چي ابوه حسين حز بركبته

يا حسرتي لعمتي شجره ...

__

تصعد على التل تنتظر
صوت الـ اهلها وماحچو
تنزل شجاعه و صابره
و تكسرها الايتام البچو
انطلقت مسيرتها بحزن
من لمت اطفال البقو
من عاينت جابو هزل
سألت ، اخوتي ما اجو؟

محد اجاها اوي السبي محد اجاها
لصعد الهزل بنت النبي محد اجاها

والصعدت النسوان عمتي تريد اخوان
كافلها طايح جان محد اجاها

يا حسرتي لعمتي شجره ...
__

عمتي مشت بس تستحي
فـــوگ الهزل هلّت دمـــع
الما واصله البـــاب ابأمــس
وصلت لحد بـــاب السمع
تخطب على التل اصبحت
‏ شافوها من تمشي الجمع
‏عمتي انســبت مـــن كربله
‏ ياهو الرضا بهذا الوضـــع

حته السبي بنوك الهزل هاي المصيبه
طول الدرب كيد وحبل هاي المصيبه

عدها اليتامى ازغار ايصير الظهر تحتار
ماعدها ظلت دار هاي المصيبة

يا حسرتي لعمتي شجره ...
__

تحچي بعتب گالت شكو
كلمن احبه ابلا جسد
نحمل درب مــن نينـــوي
للكوفه بس عبروا بلد
عبد الله كالت ستشر(ست اشهر)
گبل السنه ومات الولد
جاهوه ليش اعلى الرمح
ما ضايع وعدنه المهد

عدنه المهد ليش برمح صارت منيته
عبدالله ما يحمل ذبح صارت منيته
‏
ليش برمح مذبوح شنهي الذنب ويروح
ذنبه العطش وينوح صارت منيته

يا حسرتي لعمتي شجره ...
__

دخلت الى قصر الحقـد
گالتله ما تمحي الذكـر
كل ظنك نموت برمـــح
لو ظنك انموت بشمـر
باجر تصير النه اضرحه
وانت التظل ابلا گبـــر
كالت يزيد امـن الدمــه
مو بالحكم من تنتصر

عمتي الفخر كل الفخر دين ودرايه
عافت گمر يم النهر دين ودرايه

عافت حطام ضلوع خلت يتامى تلوع
وصوت النسه المسموع دين ودرايه

يا حسرتي لعمتي شجره ...
__

يا حسرتي?
ضياء ستار الفرطوسي**

**ماظل شي تجيني اتكحل العيون
هســـه اتــرد اگولن للينشــدون
ولا طارش اجالي
ولا غيرك حِــلالي
يمهدي يمهدي

•••••••••••••••••••••••••••••

شكد صابر والخاطر
مكسور ابأثر وكفاتي بالمسجد
والمعروف كلماشوف
شيبة رجل بعمامته يكعد
بالمجمل أتخيل
چن انته امامي التركع وتسجد
امشيلك واحجيلك
نويت اشكد واشوفك مني تبعد

ثاري ذنـوبي هايـه اوياك التعيـل
وآني الشيب اجاني وعدك دخيل

بس شوفك دلالي
ولا غـيـرك حِـلالي يمهدي

•••••••••••••••••••••••••••••

من اجلس بالمجلس
واتناظر يميني ويسرتي عنك
ما أحجي بس أبجي
وبلچن بالنواعي و ينسمع ونك
لو شوفك ماعوفك
بعيوني دمع بجفوني اضمنك
محبوبي بذنوبي
الچمك ، هسه تايب ما الچمنك

اتوب اشلون الچمك عازتك هاي
درب غيرك عطش وبدربك الماي

انه انتظرك يغالي
ولا غيرك حــلالي يمهدي

•••••••••••••••••••••••••••••

شگد خادم ما نادم
عالخدمه ابد لو احضر قرايه
لَن ادري باليجري
تحظر يابو صالح شايل الراية
من امشي اسمع شي
خطوه ادريك انت وياي مشايه
اترافكني تصاحبني
يا أول صديق ابلايه اي غايه

محلى الصحبه لمن تخلي الذنوب
اجمل صاحـب انته تريد اليتــوب

مكانك يمي عالي
ولا غيــرك حلالي يمهدي

•••••••••••••••••••••••••••••

يا غالي هنيالي
ابمحبتك واليحبك لازم اتعوضه
وعيونك بشلونك
قانع لو تگلي شلونك انه ارضى
بالجنه اتهنى
والمهدي يصلي وياي احس فرضه
يا حُبّك وي ربك
والعافو حبيب الباري بس مرضى

كلمن تـرك اسـمك عافك وراح
عسن لا طلع صوته ولاهو يرتاح

دونك ما اوالي
ولا غيرك حلالي يمهدي

•••••••••••••••••••••••••••••

باحلامي جن ضامي
اشوفك واعتنيلك وانت بالهيمة
جن نصطف صار الطف
اعاين جم يتيمه تلوذ ب ايتيمه
صار الصار من النار
حرم تركض واشوفن طارت الخيمه
فوگ الهَم منظر دم
يغطي حسين واطشر مثل غيمه

حيل وحيل رايد منظر ادماه
حيل لشوفه كون وحيل مبجاه

عسن گطعوا وصالي
ولا غيـــرك حــلالــي يمهدي

•••••••••••••••••••••••••••••

[ هسه اترد ? ]
ضياء ستار الفرطوسي**

**زينب الكبرى(عليها السلام) مخاطبة والدها أمير المؤمنين(عليه السلام) :

لا تذهب يا أبي فهناك إوزة ترفرف نحوك
وهناك يتيم على وشك نفاده من الخبزِ
وهنالك شخص نائم نوم الشياطين ، احذر منه !
اعلم انك تعلم وتخبرني بالأمان كأنك لا تعلم
تشبثت أقدام المسمار على الباب ورأسه تشبث بقباءك ،
هذا المسمار لا يريد أن يخسرك أنت أيظاً ،
أظنه يقول : كفاية من تأنيب الضمير ! ...
ذهبت الى الصلاة وهدّمت اركان الصلاة ،
لم تكن تقصد ، لكنهم يقصدون!
جاءت يتاماك بأغلى ما ملكت غيرك
انه (الخبز) يصنعون منه بلسم لجُرحك الميئوس
بدأت تهرول الايام وانت تنزف
لا الصبر يُدرَك من الوقت ويُستنجد
ولا الدم يَدرِك الجرح فلا يسقط .
سكونك يهاجمني بعاصفة الصمت وأشباح سارقة الالوان .
لا أظن السيف من يحدد موتك اذا كان هنالك موت لك !
لا طاقة للأرض على سيرك فوقها فطلبت منك الخلود ساكناً .
في حيرتي هل سيأتي شهر رمضان دونك؟
انا واثقة أنه كريم جداً
لكن هل سيكرمني برؤية وجهك ؟
أصبحت أيامنا خريف بعدك !...
ففي كل خريف تتساقط اوراق الشجر ليغدو جمالها
وتذهب أيام الربيع الماضي ...

الدنيا بِرُمّتها لم ترد لك الجميل
فالشمس دنيوية ، ارجعتها حينما غابت ،
ولم ترجعك عند غيابك.
يبدو أن عيناك تحكي لنا قصة صبر طويلة
ونحن لا نجيد كمال الصبر من دون عينيك .
*_

عظّم الله لك الأجر يا رسول الله
عظّم الله لك الأجر يا صاحب الزمان
عظّم الله لكم الأجر يا شيعة أمير المؤمنين
بفقد أمير المؤمنين ?***