އިންސާނާ މަތިވެރި ވަނީ ޖާހާއި މަންސަބުގެ ގޮތުންނެއް ނޫނެވެ. މާތް ﷲގެ ޙަޟްރަތުގައި އިންސާނާ މަތިވެރި ވަނީ ތަޤްވާވެރިކަމުގެ ގޮތުންނެވެ. ތަޤްވާވެރި އަޅަކަށް ވެވޭތޯ މަސައްކަތްކުރާށެވެ. ފައިދާއެއް އޮތީ އެކަމުގައެވެ.

ވަފާތެރި ރީތި މަޑުމޮޅި ކިޔަމަންތެރި އަނތްބަކު ލިބުމީ ނިޢުމަތެކެވެ. އެފަދަ އަނތްބަކު ލިބިއްޖެ ނަމަ އޭނާ ހިތުގައި ނުޖައްސާށެވެ. އޭނާގެ ލޮލުން ކަރުނަ އަންނާނޭ ކަމެއް ނުކުރާށެވެ. އޭނާ އެކަނިވެރިކޮށް ނުލާށެވެ. އޭނާ ބާކީކޮށް ނުލާށެވެ. އޭނާއަށް ހިތްހަމަޖެހުމާއި އުފާދޭށެވެ. އޭނައާ އެކު ރަނގަޅު އުފާވެރި ދިރިއުޅުމެއް އުޅޭށެވެ.

ހަމަ އެ ގޮތަށް ހެޔޮލަފާ އޯގާތެރި މުރުއްވަތްތެރި ފިރިޔަކު ލިބުމީ ވެސް ނިޢުތެކެވެ. އެފަދަ ފިރިޔަކު ލިބިއްޖެ ނަމަ އޭނާއަށް ކިޔަމަންތެރިވާށެވެ. އޭނާއަށް ވުރެ މައްޗަށް އެހެން މީހަކު ނުނަގާށެވެ. އޭނާއަށް ޓަކައި އޭނާގެ ގެއަކީ އަރާމާއި އުފަލުގެ މަންޒިލަކަށް ހަދާށެވެ. އޭނާއާ އެކު އުފާވެރި ބާއްޖަވެރި ދަރިފަސްކޮޅެއް ބިނާކުރާށެވެ.

ޙަދީޘްފުޅެއްގައިވެއެވެ. އަޅާ އޭނާގެ އަޚާއަށް އެހީތެރިވުމުގައި ވާހާ ހިނދަކު، މާތްﷲ ވޮޑިގެންވާ ހުށީ އެ އަޅެއްގެ އެހީތެރިކަމުގައެވެ.

ނިޔަތް ވަނީ ހިތުގައެވެ. އެހެން މީހުންނާ ދިމާލަށް ދެއްކުންތެރިއެކޭ ނުވަތަ ތިޔައީ ދެއްކުންތެރިކަމޭ ނުބުނާށެވެ. އެ މީހަކު އެ ކަން ކުރާ ނިޔަތް އޭނާ ނުބުނާހާ ހިނދަކު ތިބާއަށް ނޭނގޭނެތީއެވެ. ޞަދަޤާތް ވެސް ދައްކައިގެން ކުރާން ޖެހޭ ފަހަރުފަހަރު އާދެއެވެ. އެއީ އިތުރު މީހުންނަށް ނަމޫނާއަކަށެވެ. އެއަކަށް ދެއްކުންތެރިކަމޭ ނުބުނެވޭނެއެވެ. އަދި މީހަކު މައްކާގައި ހުރެގެން ނަގާ ފޮޓޯއެއް މީސްމީޑިއާއަށް ލުމަކީ އޭނާއަކީ ދެއްކުންތެރިއެއްގެ ލަގަބު ދޭން ޖެހޭ ކަމެއް ނޫނެވެ. އޭނާގެ ނިޔަތެއް ތިބާއަކަށް ނޭނގޭތީއެވެ. އިތުރު މީހުން ޢުމްރާ ދަތުރަށް ހިތްޖެއްސުމަށް އޭނާ ލި ފޮޓޯއަކަށް ވެސް އެ ފޮޓޯ ވެދާނެއެވެ. މީހުންގެ ނިޔަތް ނޭނގި އެބައިމީހުންގެ ނިޔަތާ މެދު އަމިއްލައިން ގޮތް ނިންމުމަށް އަވަސްވެ ނުގަންނާށެވެ. އެއީ ވެސް ފާފައަކަށް ނޫނީ ނުވާނެއެވެ.

ޙަޔާތުގައި ހިތްދަތިކަމާއި މާޔޫސްވެރިކަމާ ކުރިމަތިވާނެއެވެ. އެހެނަސް ހިތްވަރާއި ހިންމަތާ އެކު ކުރިޔަށް ދާށެވެ.

ދަރުމަ މަޖައްލާ އެނބުރި އައުން...

ދަރުމަ މަޖައްލާއަކީ ދިވެހި ރައްޔިތުންނަށް ދީނީ މަޢުލޫމާތު ފޯރުކޮށްދިނުމުގައި ވަރަށް އިސް ދައުރެއް މީގެ ކުރީން އަދާކޮށްފައިވާ މަޖައްލާއެއް ކަމަށް ވަރަށް ގިނަ ރައްޔިތުން އެއްބަސްވާނެ...

މި މަޖައްލާގެ އެނބުރި އައުމަކީ ކުރިއެކޭ އެއްގޮތަށް ރާއްޖޭގެ ޖައްވަށް ދީނީ ގުލްޝަނުގެ މީރު ހުވަނދު ފަތުރާނޭ ކަމެއް ކަމަށް އުންމީދުކުރަން...

ތިރީގައި އެ ވަނީ މަޖައްލާގައި ޝާއިޢުކޮށްފައިވާ އަޅުގަނޑުގެ މަޒުމޫނެއް...

ނޯޓު:
"ދަރުމަ" މަޖައްލާގެ 2ވަނަ އިސްދާރު އިފްތިތާޙު ކުރުމުގެ ގޮތުން 3 މަސް ވަންދެން ހިލޭ މަޖައްލާ ޑައުންލޯޑު ކުރެވޭނެއެވެ.

ތިރީގައިވާ ލިންކަށް ވަންނަވާ!
https://dhivehifoiy.mv/books/dharuma-january-2025

https://www.facebook.com/share/p/1DLStXAUb3/

https://t.me/Dharuma_Majallaa/7

ޙަސަދަވެރިކަމަކީ ވަރަށް ނުބައި ނުލަފާ ފާފައެކެވެ.

އެއްވެސް މީހަކާ މެދު ޙަސަދަވެރި ނުވާށެވެ. އޭނާއަށް ހެޔޮ ދުޢާކޮށް ދޭށެވެ.

ﷲގެ ކަށަކުޅަދުންވަންތަކަން ހިތް މައްޗަށް ގެނެސްގެން ކައުނާ މެދު ހިންގާ ފިކުރަކީ ވެސް ވަރަށް މާތް މަތިވެރި އަދި އެހާމެ ބޮޑު އަޅުކަމެކެވެ.

ދަތުރެއް ކުރާ ނަމަ ކައުނާ މެދު ވިސްނާށެވެ. ބޯ މަތީގައި އޮތް ތަނބެއް ނުވާ އުޑަށް ނަޒަރު ހިންގާށެވެ. ފެތުރި ތަނަވަސްވެގެންވާ ބިމަށް ބަލާށެވެ. ފުން މިން ނޭނގޭ ފުން ކަނޑާ މެދު ވިސްނާށެވެ. ކޮންމެ ކަމަކުން ވެސް ފެންނާނީ ކަށަކުޅަދުންވަންތަކަމުގެ އިންތިހާއީ ޢަލާމާތްކަން ޔަޤީނެވެ.