ކޮންމެ އިންސާނަކު ވެސް ދުނިޔެ ދޫކޮށްފައި ދާނީ އޭނާއަށް ލިބޭން ހުރި އެއްޗެއް ލިބި ނިމިގެންނެވެ. އެހެންކަމުން އެ ކަމާ ނުވިސްނައި، ތިބާގެ ޢަމަލުތައް އިޞްލާޙުގެ މަގުން ކުރިޔަށް ގެންދިޔުމަށް މަސައްކަތްކުރާށެވެ.

އެކުވެރިޔާއެވެ! މާތްﷲގެ ޙަޟްރަތުގައި ތިބާގެ ދަރަޖަ ހުރީ ކިހައި ހިސާބެއްގައި ކަން ތިބާއަކަށް ނޭނގެއެވެ. ބޮޑާވެ ނުގަންނާށެވެ. އަނެކާއަކީ ދެރަ މީހެއް ކަމުގައި ނުބަލާށެވެ. އޭނާ މާ މަތިވެރި ވެދާނެއެވެ. ބޮޑާވުމަކީ އިބިލީހުގެ ސިފައެކެވެ. އޭނާ އިލާހީ ރަޙްމަތުން ބޭރުކުރެވުނީ ބޮޑާވެގަތުމުގެ ސަބަބުންނެވެ.

ދުނިޔެވީ ދަޅަތަކަށް ނުހެއްލޭށެވެ. އިސާހިތަކު ފިލައިހިނގައިދާނެއެވެ. އޮންނާނީ ކުރި ހެޔޮ ޢަމަލެކެވެ. އާޚިރަތާ މެދު ވިސްނާށެވެ. އެއީ ދަޅައެއް ނޫނެވެ. އަނދައަނދާ ހުރި އަލިފާނެވެ. ނޫނީ ބަގީޗާތަކުގެ ސުވަރުގެއެވެ. ނަގާނީ ތިބާއެވެ. އެ ވެސް މިއަދެވެ. މާދަމާ މާ ލަސްވެދާނެއެވެ. ރުއިމަކުން ފައިދާއެއް ނުކުރާނެއެވެ. އެފަދައިން ވިޔަ ނުދޭށެވެ. ބޭނުންވަނީ ކުޑަ ހިތްވަރެކެވެ. ކެތްތެރިކަމާއި ޢަޒުމެވެ. އިލާހީ ރަޙްމަތް ހީކުރިއްޔާ ހީކުރިވަރަކަށް ވުރެ ތަނަވަހެވެ. ބޭނުންވަނީ ފުރަތަމަ ފިޔަވަޅެވެ. އެއަށްފަހު އިލާހީ ރަޙްމަތް ތިބާ ވަށައިލާނެއެވެ. އުންމީދު ކަނޑައިނުލާށެވެ. ދޮރުތައް ވަނީ ހުޅުވައިލެވިފައެވެ. ވަނުން އޮތީ ތިބާއަށެވެ. ފަހަށް ނުޖެހޭށެވެ. ނޫނީ ދެ ދުނިޔެ ގެއްލިދާނެއެވެ.

ބައިނަލްއަޤްވާމީ ފުޓުބޯޅަ މުބާރާތްތަކުގެ މެޗުތައް ކުރިޔަށް ދާއިރު ކުރީގައި ވަރަށް އާންމުކޮށް ފެންނަ މަންޒަރެކެވެ. ސަޕޯޓަރުންގެ ތެރެއިން ބައެއް މީހުން ސެކިއުރިޓީންގެ އަތްދަށުން ދެމިގަނެގެން ދަނޑަށް އަރައި، ދުވެ، އޭނާ އެންމެ ތާއީދުކުރާ ކުޅުންތެރިޔާއާ ސަލާމްކޮށް ހަދާ މަންޒަރެވެ. އޭނާ ފަހަތުން ސެކިއުރިޓީން ދުވާ މަންޒަރެވެ. އެ ކަން ވެަފއި އޮންނަނީ ވަރަށް މަޖާ ވެސް ކަމަކަށެވެ.

އެހެން ނަމަވެސް، މިހާރު މީހަކު ދަންޑަށް އަރައި އެ ގޮތަށް ދުވެ ހެދިިޔަސް އެ މަންޒަރެއް ޓީވީން ނުދައްކައެވެ. ކެމެރާއިން ދައްކާނީ އެހެން މަންޒަރެކެވެ. މީގެ އެއް ބޭނުމެއް ކަމަށް އަޅުގަނޑަށް ފެންނަނީ އެފަދަ މީހުން ބޭނުންވާ ކަންތައް އެބައިމީހުންނަށް ހާސިލުވިޔަ ނުދިނުމެވެ. އެބައިމީހުންގެ އެންމެ ބޮޑު އެއް ބޭނުމަކަށް ވެފައި އޮންނަނީ ޓީވީން އެބައިމީހުންގެ އެ މަންޒަރު މުޅި ދުނިޔެަށް ފެނިގެން ދިޔުމެވެ. އެބައިމީހުންގެ އެންމެ މަޤްބޫލު ކުޅުންތެރިޔާއާ ސަލާމްކުރާ މަންޒަރު މުޅި ދުނިޔެއަށް ފެނުމެވެ. މިފަދައިން މި މަންޒަރުތައް ދައްކާތީ ދަނޑަށް އަރާ މީހުންނަށް ދަނޑަށް އެރުމަށް އިތުރު ހިތްވަރެއް ލިބެއެވެ.

އެހެން ނަމަވެސް، އެ ދޮރު މިހާރު އެ ވަނީ ބަންދު ކުރެވިފައެވެ. އެފަދަ މީހުންގެ މުރާދު ހާސިލު ނުވާ ގޮތަށެވެ.

ދަންނަވާން މި އުޅެނީ އެހެން ވާހަކައެކެވެ. ފޭކު އައިޑީތައް ހަދައިގެން ދީނަށް ފުރައްސާރަކުރާ މީހުންގެ ވެސް އެންމެ ބޮޑު ބޭނުމަކީ އެބައިމީހުން އެ ލިޔާ އެއްޗެހި މީހުން ފެތުރުމެވެ. އެބައިމީހުންގެ އައިޑީތައް ވައިގައި ހިފުމެވެ. މަޤްބޫލުވުމެވެ. މަޝްހޫރުވުމެވެ. މުސްލިމުން ހިތުގައި ރުޅިވެރިކަން އުފެއްދުމެވެ. މުސްލިމުން އެަބއިމީހުންގެ އަމިއްލަ އަތުން އެ އެއްޗެހި ފެތުރުމެވެ.

އެހެން ނަމަވެސް އަޅުގަނޑުމެން އެބައިމީހުންގެ މި މުރާދު ފުރިހަމަ ވިޔަ ދީގެން ނުވާނެއެވެ. އެބައިމީހުން ލިޔާ އެއްޗެހީގެ ސްކްރީންޝޮޓު ނަގައި އެ އެއްޗެހި ފެތުރުމުގެ ބަދަލުގައި އެ އެއްޗެހި ކަމާ ބެހޭ ފަރާތްތަކަށް ރިޕޯޓު ކުރާށެވެ.

ފިލައި ތިބެ ފޭކު އައިޑީތަކުން އިސްލާމްދީނަށް ފުރައްސާރަކުރާ މީހުންގެ ޓްވީޓްތައް ސްކްރީންޝޮޓް ނަގައިގެން ނުފެތުރުމަށް އެދެމެވެ. އެބައިމީހުންނަކީ ފަލޯވަރުން ތިބި ބައެއް ނޫނެވެ. އެ އެއްޗެހި ސްކްރީންޝޮޓް ނަގައިގެން ފެތުރުމަކީ އެބައިމީހުން އެންމެ ބޭނުންވާ ކަންތަކެވެ. އެ ކަންތައް އެބައިމީހުންނަށް ކޮށްނުދޭށެވެ. އެ ކަހަލަ އައިޑީއެއް ފެނިއްޖެއްޔާ ފުލުހަށް އެ އައިޑީ ރިޕޯޓުކުރާށެވެ.

އަޅުގަނޑުގެ ކޮރު ޚިޔާލު:

ޢީދަކީ އިސްލާމްދީނުގެ މަތިވެރި ޝިޢާރެކެވެ. ނަމާދު، ޒަކާތް، ރޯދަ އަދި ޙައްޖާ ގުޅުން ހުރި ކަންކަން ސަރުކާރުގެ ފަރާތުން އިންތިޒާމުކުރައްވައި ބަލަހައްޓަވަނީ އިސްލާމީ ވުޒާރާއިންނެވެ.

އަޅުގަނޑު ދެކޭ ގޮތުގައި، ޢީދު ފާހަގަކުރުމުގެ ކަންކަމާ ބެހޭ ސަރުކާރުގެ އެންމެ އިސް ފަރާތެއް ކަމުގައި ސަރުކާރުން ހަމަޖައްސަވަންވީ ވެސް އިސްލާމީ ވުޒާރާއެވެ. އެއަށްފަހު، ދެން މި ކަމާ ގުޅުން ހުރި ބައެއް ވުޒާރާތައް، މިސާލަކަށް ސަޤާފަތާ ބެހޭ ވުޒާރާއާއި ކުޅިވަރާ ބެހޭ ވުޒާރާއާއި ޒުވާނުންނާ ބެހޭ ވުޒާރާ ފަދަ ވުޒާރާތައް އިސްލާމީ ވުޒާރާގެ އިރުޝާދުގެ ދަށުން ޢީދުގެ ކަންކަން އިންތިޒާމުކުރައްވާ ވުޒާރާތަކަށް ހެއްދެވިދާނެއެވެ.

އިސްލާމީ ވުޒާރާއާއި މި ދެންނެވި ވުޒާރާތަކަށް، ސިޓީ، އަތޮޅު އަދި ރަށު ކައުންސިލްތަކާއި އެ ރަށެއްގައި ޙަރަކާތްތެރިވާ ދީނީ، އިޖްތިމާޢީ އަދި މަދަނީ ޖަމްޢިއްޔާ ޖަމާޢަތްތަކާ ގުޅިގެން އިސްލާމީ ޢަޤީދާއާއި އާދަކާދައާއި އަޚްލާޤިއްޔާތާ އެއްގޮތްވާ ގޮތުގެ މަތީން ތަފާތު ގިނަ ކުޅިވަރާއި މުނާސަބާތުތަކާއި އިވެންޓުތައް ރާއްވައި ހިންގެވިދާނެއެވެ.

މިސާލަކަށް، ރަސޫލާ صلى الله عليه وسلمއާއި ޞަޙާބީންނާއި ޚުލަފާއުއްރާޝިދީންގެ ސިޔަރަތާއި އިސްލާމީ ޙަޟާރާތްތަކާއި ކުރިއެރުންތަކާއި އިސްލާމީ ޘަޤާފަތާ ބެހޭ ވާހަކަތަކުގެ މައްޗަށް ބިނާކޮށް ތަފާތު އިވެންޓުތަކާއި ކުޅިވަރުތައް ތައްޔާރުކުރެވިދާނެއެވެ. މަދަޙަ ކިޔުމާއި ދީނާއި ޤައުމިއްޔަތާ ގުޅުން ހުރި ޅެން ކިޔުމާއި އެފަދަ އެތައް ކަމެއް ކުރެއްވިދާނެއެވެ.

ހަމަ ޔަޤީނުން ވެސް ޢިލްމުވެރި ތޫނޫ ބުއްދިތަކެއް ގާނައިލައިފިއްޔާ ކުރެއްވިދާނޭ ކަންކަން ވަރަށް ގިނައިން ފެންނާން ހުންނާނެއެވެ. ބޭނުން ވަނީ ސަރުކާރުގެ ބެއްލެވުމުގެ ދަށުން އެންމެން ގުޅިގެން އެ ކަންކަން ދީނީ ތަރަހައިގެ ތެރެއަށް ވައްދައިގެން ކުރުމެވެ. އޭރުން މި ފެންނަ ދީނާ ޚިލާފު ވަރަށް ގިނަ މުންކަރާތްތަކެއް ނިމިހިނގައިދާނޭ ކަން ކަށަވަރެވެ.

މިއީ އަޅުގަނޑުގެ ކޮރު ވިސްނުމަށް އައި ޚިޔާލުތަކެކެވެ.

ރިޒްގަކީ ހަމައެކަނި ލާރިފައިސާއެއް ނޫނެވެ. އަދި ހަމައެކަނި ކާބޯތަކެއްޗެއް ވެސް ނޫނެވެ. ދުޅަހެޔޮ ޞިއްޙަތަކީ ވެސް ރިޒްގެވެ. އަޅާލާނޭ އާލުންނާއި ޔާރުންނަކީ ވެސް ރިޒްގެވެ.

މީހުންނަށް ޙައްޤު މަޤާމާއި ޤަދަރު ދިނުމަކީ އެ ދޭ މީހެއްގެ ބުއްދީގެ ފުރިހަމަކަން ހާމަވެގެންދާ ކަމެކެވެ. މީގެ އިދިކޮޅު އޮތީ އިދިކޮޅަށެވެ.

އަޅުތަކުންނަށް ވަނީ މަސައްކަތްކުރުމެވެ. އެއަށް ފަހު މާތްﷲގެ ނިޔާފުޅަށް ރުހުމެވެ. އެއަށް ވުރެ، ހިތަށް ފަސޭހަ ގޮތެއް ނޯންނާނެއެވެ.