ولادة الامام الحجة عج

يالعايش بدلالي
كل عام وانت الغالي
""""""""
يالماكو اغلى من غلاتك عندي
ويه الورد روحي لجنابك اهدي
بميلادك اتقبل محبتي وودي
كل يوم وانت بالگلب يا مهدي
يا فرحتي وامالي
"""""""""
يا كعبة الحب جينه حته نطوفك
بحنية وبلهفة نرتل احروفك
عيدية حلوة ردنه من چفوفك
يالمهدي عيديتنا يوم نشوفك
ها يا گمرنه العالي
""""""""
كل عام منك الله لا يحرمنه
وبخيمتك يابو الحنان تلمنه
ندعي الله كون بجيتك يكرمنه
والجمعة هاي الجاية انت يمنه
كل جمعة تتراوالي
"""""""""
بس غالي واحد عدنه ومتانينه
عالموعد احنه لمولده اتعنينه
جينه نريد انگله يا غالينه
كل عام وانت بخير يا مهدينه
يالما تفارگ بالي
"""""""""
هالليله يابو صالح شمحلاها
بالفرحة والبهجة سوه عشناها
گد ما فرحنه ليلتك وياها
ليلة حبيب الگلب سميناها
بس انت بس تحلالي

انيس الخفاجي الكربلائي

ولادة الامام المهدي المنتظر عج

من تجي سيدي .. يوم المبارك
بالفرح والورد .. تلگه انصارك
هله يا مهدينه
""""""""
سيدي وكل جمعة .. احنه منتظرينك
انت ما ناسينه .. واحنه ما ناسينك
شيعتك مشتاگة .. يابو صالح وينك
يالحبيب انشكرك .. تنظرلنه بعينك
وبرغم غيبتك .. بس تعاينه
ننتظر عالجمر .. بس تعال إلنه
سيدي اشتاگينه .. هله يا مهدينه
"""""""""
الشيعي يا مهدينه .. انت بس موضوعه
شايلك نُص گلبه .. انت بين ضلوعه
بانتظاره وحبه .. ولهفته وادموعه
اللوائح داخت .. وداخت الموسوعه
لحُبنه يالمنتظر .. ما لگوا أي حل
شيعتك ماخذه .. المركز الاول
غالي والله اعلينه .. هله يا مهدينه
"""""""""
عدنه لو عنوانك .. والله لو نندلك
بموكب المشاية .. سيدي نوصلك
وتدري اول كلمة .. شنهو راح انگلك
نحبك احنه هوايه .. فدوه رحنه لجلك
والعمر والاهل .. فدوه لعيونك
والمهم ما نظل .. احنه من دونك
انت بس حبينه .. هله يا مهدينه
"""""""""
ولـيشك بجيتك .. هذا اسود گلبه
من سجلها الزهرة .. شي اكيد تشطبه
ولـيگول نعوفك .. هايه اكبر چذبه
ماكو غيرك واحد .. انت بس لـنحبه
ننتظر لو عُمر .. غيرك شـعدنه
عجل بطلعتك .. ها يـوالدنه
انت منه وبينه .. هله يا مهدينه
"""""""""
يابو صالح اغلى .. واحلى واجمل لحظه
تسوه كل الدنيا .. شوفتك لو نحضه
ندعي دوم لربنه .. انت عنه ترضه
ونندعي للمهدي .. يا الهي اتحفظه
لطلعتك سيدي .. ندعي يوميه
تنبني بجيّتك .. دولة شيعيه
للظهور ادعينه .. هله يا مهدينه

انيس الخفاجي الكربلائي

ولادة علي الاكبر ع

كل الهله .. يا علي الاكبر
من الضوه .. وجهك تصور
"""""""
الله باجمل صوره .. خالقك من نوره
وخله وجهك سوره .. بي تفنن
بحسنك والطافك .. تيّهت باوصافك
ساعد الله الشافك .. ما تجنن
نقطة ببحر .. وصفك اتفسر
""""""""
نورك الرباني .. ووجهك النوراني
شما اوصفك اني .. ما اغالي
لو اسولف عنك .. ما اخلّص منك
سيدي لن حسنك .. شي خيالي
حِسِنك تره .. عالبشر ما مر
""""""""
انت يا رجوايه .. عيني هايه وهايه
آيه حسنك آيه .. هاشميه
آيتك قدسيه .. يعني لا شرقيه
ويعني لا غربيه .. حيدريه
شما اوصفك .. ابد ما اگدر
""""""""
الغالي ابن الغالي .. مولدك يحلالي
يابو وجه يلالي .. الدنيا ضوه
يا هله بانوارك .. روحي صارت دارك
عاين لخطارك .. بلله فدوه
ما ردنه بس .. نظرة مو اكثر
"""""""""
انت وصفك ديره .. بالحِسِن والغيره
شگد عظيمة السيره .. انت عندك
انت قالع خيبر .. انت ساقي الكوثر
بكلشي تشبه حيدر .. علي جدك
طبق الاصل .. انت من حيدر
""""""""
يا علي حبيتك .. بالگلب ضميتك
بمولدك ناديتك .. يا هلابك
انت ساكن عيني .. فدوه كل سنيني
خادمك خليني .. يم جنابك
ارض وسمه .. مولدك نوّر

انيس الخفاجي الكربلائي

لمولاتي ام البنين ع

صاحت ام البنين
نورَ عيني حسين
"""""""
يا ناس يم الغالي بس ودوني
باخر نفس من عنده لتحرموني
ميتة وتصد لكربلاء اعيوني
اخذوني يمه وبالصحن دفنوني
حيل هزني الحنين
نورَ عيني حسين
""""""""
باخر نفس گلبي الصبر ميفيده
مشتاگه عيني للحسين اتريده
معقوله اغمض وانه عنه ابعيده
ومعقوله نعشي ما يحمله بأيده
بدمعة ابقه وونين
نورَ عيني حسين
""""""""
حسره اشوف الغالي ظلت حسره
اتمنه گبري ينبني يم گبره
باخر حياتي رايده اشتم عطره
ياريت صدري الهشموا مو صدره
لابني گلبي حزين
نورَ عيني حسين
""""""""
من راح ابو اليمه اخذ عافيتي
وي روحته طاح وتهدّم بيتي
امنيتي چانت لو متت تاليتي
چانت دفنتي بحضرته امنيتي
هو وين انه وين
نورَ عيني حسين
""""""""
محرومة من عنده وعشت مالومه
وحته بمماتي راح اظل محرومه
ما انسه ابو اليمه ومصابه ويومه
ويلي عليه امسلبين اهدومه
وخاتمه امسلبين
نورَ عيني حسين
""""""""
يالـبُعده جمرة وتستعر بحشايه
اخذوني يمه عندي بس حچايه
يبريلي ذمتي ارد اگله بهايه
وبحقه انه امقصره احس اهوايه
برگبتي يبقه دين
نورَ عيني حسين
""""""""
باخر حياتي بدمعتي السچابه
اتمنه والله ايشيعوني ببابه
واتمنه يسجد نعشي يم اعتابه
وهناك جسمي يندفن بترابه
اه من السنين
نورَ عيني حسين

انيس الخفاجي الكربلائي

مولاتي ام البنين ع

باچي على حسين شكثر .. بس الله يعلم
جيتچ يمولاتي وجبت .. دمعة محرم
ما عندي بس هالدمعة تدرين
تگضيها ادري وما تقصرين
""""""""
بيه تدرين .. انه مو راعي مُلُك بس راعي دمعه
بحرگة ابچي .. لو سمعت الناعي آ يحسين ينعه
نحر الحسين .. الطم اعله الراس لو طاريه اسمعه
لزمي ايدي .. اقسم اعليچ بگطع نحره واصبعه
بنحر ابنچ الضامي اسألچ .. مولاتي نظره
واعرف الچ يام الوفه .. شگد غالي نحره
نظريني بلله بداعت حسين
تگضيها ادري وما تقصرين
"""""""
هيچي طبعي .. عادتي بابچ ادگ من عندي شده
بالشدايد .. انتي باب الله الچبير الـدوم اگصده
براحة اشعر .. اگعد ببابچ واسولف وحده وحده
اُّم احسّچ .. والله ما اخجل إلچ چفي أمده
مي وجهي اذبه وعرفچ .. طيبة وكريمه
وتگضيها لن تدريني ابو .. فطرة سليمه
عالحاجة انتي بس توقعين
تگضيها ادري وما تقصرين
""""""""
ادري طبعچ .. لو نطيتيني واذا ادگ بابچ اردود
شگد كريمة .. لا ولا مرة لگيت الباب مسدود
ولو فرضنه .. الجود چان بهيئة الانسان موجود
چا لگينه .. يگدي يومية اعله بابچ واگف الجود
گالوها من اهل الكرم .. تأتي المكارم
وانتي علي متفضلة .. ممنون وخادم
مشكورة فوگ الراس والعين
تگضيها ادري وما تقصرين
""""""""
دوم والله ..لو قريت الفاتحة واهديها لسمچ
الحوائج .. الصغيرة والچبيرة تگضي يمچ
ابقه انه .. خادمچ فدوه رحت لتراب جدمچ
وما اگلچ .. بس اگلچ هالله هالله بالـيخدمچ
حاجاتي انه اتعودت .. اطلبها منچ
ويومية أدعي الله لا .. يبعدني عنچ
ولا مرة اطلب گلتي بعدين
تگضيها ادري وما تقصرين
""""""""
بالنوايب .. ادري واندل زين إلمن اشكي حالي
الحاجة اسأل .. عن طريقچ للسمه يصعد سؤالي
خالي ارجع .. والله ما يخطر ابد مرة اعله بالي
منچ ادري .. مال ارد خالي فلا اترديني خالي
دگيت بيبان شكثر .. وجربت ميفيد
بس ادگ بابچ واندعي .. الگاها بالايد
باب الله بابچ يام الابنين
تگضيها ادري وما تقصرين
""""""""
ارد احلفچ .. بداعت الما ضاگ مي بالغاضريه
ارد احلفچ .. بللي سحگت صدره خيل الاعوجيه
ارد احلفچ .. بذاكه راسه الـشبگته وماتت رقيه
ارد احلفچ .. بالحسين اتوسلچ نظرة إليه
يللي فزعتي باربعة .. رايدلي فزعه
عندي طلب ريت الطلب .. چفچ يوقعه
لاهل الحوائج ما تعوفين
تگضيها ادري وما تقصرين

انيس الخفاجي الكربلائي

الليالي الفاطمية
شوط كربلائي

على حب فاطمة نبقه اهل دمعة واهل فطره
احنه بصاية الزهره سلام الله على الزهره
"""""""""
يسألونا عن الزهرة شكثر وشگد تحبوها
بسؤال احنه نجاوبهم نِعَم الله تعدوها ؟
نحبها گد نِعَم الله اظن هسه عرفتوها
نِعَم ربنا فلا تنعد
نحب مولاتنا هلگد
نحبها هلگد وأزيد
حبنا بالحقيقة اكثر لكن ردنا نختصره
"""""""""
ندور بالعيون نريد عيون امن البچي ابيضت
ندور بالصدور نريد گد ما لطمت انرضت
ندور بالگلوب نريد گلوب لفاطمة حفظت
تشبهنا ندور ناس
تبچي اعله الضلع باحساس
وتلطم عالصدر والراس
وينه المحترگ گلبه لـعالزهرة يرض صدره
""""""""""
عشنه وليعيش يشوف اشكال القصص وانواع
كلشي يشتره وينباع الا الدمعة ما تنباع
دمعتنا على الزهرة لو نزلت ترج الگاع
مو كل دمعة يا وادم
دمعة تنحسب لازم
بس الچانت لفاطم
هاي الدمعة صدگية ما تنباع ولا تشره
"""""""""
مرات الحسد ينراد وآنه اشرحلك المقصود
من تنحسد عالخدمة هنانه هالحسد مريود
يهنياله الف مرة خادم فاطمة محسود
رزق من الله هالخدمه
خادمها تره برحمه
بـنُص الخير والنعمه
مثل خدمتنا ما موجود خُم العالم ودوّره
"""""""""
شـيسموكم ايسألون ومنو انتو يسألونه
نجاوب وبفخر ونگول خدم فاطم يسمونه
دون الناس طينتنا بحب الزهرة معجونه
سؤالك احنه جاوبناه
وعنوان السكن گلناه
بمجلس فاطمة تلگاه
يبقه يصيح يا زهراء حتى الميت بگبره
"""""""""
ناس تگول وين الله بهاي الخدمة ينقبلون
وآنه الزهرة قبلتني اخدمها اويه ليخدمون
وجه وگفه ابوس ايدي ولها شاكر وممنون
لهذا الدرب جابتني
هي بأسمي طلبتني
وخادم إلها حسبتني
عين الزهرة نظرتني والله شـكبر هالنظره

انيس الخفاجي الكربلائي

ولادة الرسول الاعظم (ص)

يهادينه .. يغالينه
الك منه تحية حب ولائية
"""""""
ابعث لك تحية ويه احلى احساس
ماي العين انت وانت تاج الراس
مو احساسي هذا احساس كل الناس
جدمك ويه ايدك كون هم ينباس
يهيبتنا .. يخيمتنا
ندز ويه الورد قُبلة حسينية
"""""""
نبعثلك يبو الزهرة سلام اهواي
گد السمه گد الارض گد الماي
يا مولاي انه وكل هلي وياي
نشكر الله دزك النه يا مولاي
صدگ رحمه .. صدگ نعمه
وجودك سيدي نظرة الهية
"""""""
مجتمعة بمحبتك سيدي الاراء
كل شيعة علي اتحبك بلا استثناء
وياك احنه بالسراء والضراء
گول وفعل احنه وتشهد الزهراء
نواليكم .. نوافيكم
من عدنه اخذهه كلمة شيعية
""""""
بايدك حلوة كلش راية الاسلام
الله اختارك الهه والثلث تنعام
انت الـتشفعلنه وبايدك الاختام
تختم بايدك انت صفحة الخدام
على حبنه .. شهد ربنه
شيعتكم تره كلها فدائية
"""""""
كل شيعي يصلي اعليك ليل انهار
اللهم صلِ عالنبي المختار
منعوف الصلاة اعليك مهما صار
عد عيناك احنه شيعة الكرار
وحگ عينك .. على ايمينك
حُطنه وباهي بينه الكرة الارضية
"""""""
يابو الزهرة اشهد النه دنيا ودين
شيعة علي احنه وعالعهد باقين
هي حچاية وحدة وما تصير اثنين
ما عدنه ولي الا ابو الحسنين
ندانه ايظل .. علي الاول
غصباً عالنواصب والوهابية

انيس الخفاجي الكربلائي

استشهاد الامام العسكري ع

البُگه براسك يمهدي بالامام العسكري
تعزية كل جعفري
بالنوايح .. يابو صالح
تعزية كل جعفري
""""""""
ما نگول الله ايعوضك بيمن ايعوضك نگول !
واللي فاگدهم يمهدي إثنعش ويه البتول
ولو نعدهم .. للـتودهم
ويه جدهم .. تلطعش ويه الرسول
والدك هالليله يرحل منهو يبقالك بعد
لا ابو ولا من ولد
نواسي جينه .. يا ولينه
تعزية كل جعفري
""""""""
هالمصيبة تچوي گلبك تختلف عن كل مصاب
هالحبيب انت الـتدفنه وبايدك اتهل التراب
بهم وحسره .. اتنزله گبره
وتلقي نظره .. تدفن ايات الكتاب
والدك گبره ترشه بدمعك وماي الورد
وللبُعُد يلله استعد
كل سنينك .. تبچي عينك
تعزية كل جعفري
""""""""
اخر احبابك يمهدي شفته صح بالسم يطيح
وابو اليمه انذبح ضامي وسلبوا ثياب الذبيح
بلايه رحمه .. يجري دمه
وابنه يمه .. بنحره نبلة ودم يسيح
حسين راسه برمح عالي وراس عبد الله برمح
منذبح يم منذبح
شگد مصايب .. آ يغايب
تعزية كل جعفري
"""""""""
سيدي صبراً جميل انذكرك بزينب نريد
الشمر گلها سبية آخذچ الا لـيزيد
يسروهه .. وشتموهه
وچتفوهه .. حالها حال العبيد
صاح شدوا حيل اديهه ولا ترخون الحبل
يلله صَعدوها الهزل
بمحنة اهلك .. نعتذر لك
تعزية كل جعفري
""""""""""
العسكري بالسم تشوفه وعمتك اهناك شتشوف
الشمر راواهه عمداً راس مگطوع وچفوف
وبيسرهه .. شگد قهرهه
تصد گمرهه .. بجثته اثار السيوف
بلا يمينه ولا يساره بعينه نبلة حرمله
وزينب اتعاين إله
شكُبره صبرك .. شكُبره قهرك
تعزية كل جعفري
"""""""""
والدك يالمهدي تالي اتشيع بگبره اندفن
وجدك المذبوح عاري بلا غسل وبلا چفن
وبالصحاري .. وبالظهاري
جسمه عاري .. ضلوع صدره اتهشمن
علي السجاد بحصيرة تالي جسمه يلملمه
يلملمه ويبچي دمه
بغربة جدك .. وانت وحدك
تعزية كل جعفري
""""""""""
شيعتك كل جمعة ندعي يعجّل الله باللقاء
ننتظر بالكوفة تحضر واللقاء بكربلاء
يمته يمته .. تظهر انته
الشيعي ونته .. تعتلي صبح ومساء
چفك الطاهر نبوسه (ألعجل يبن الحسن)
كافي مو طال الزمن
صحنه كلنه .. يا املنه
تعزية كل جعفري

انيس الخفاجي الكربلائي

وصول السبايا للمدينة

آ يخويه .. شلون طبتي للمدينه
آ يخويه .. وتلتقي ام عباس بينه
آ يخويه .. لو تگلي حسين وينه
"""""""""
زينب اتودع اعز اخوان إلها
سلمت اعليهم ودمعتها تهلها
للمدينة تگول ضعني لو وصلها
عنكم ام عباس لو سألت شـگلها
حيرة والله .. خويه لو سألت عليكم
حيرة والله .. والشمر شمخلي بيكم
حيرة والله .. شـرد اجاوبها الحنينه
"""""""""
اعليك يحسين اسئلتها تبدي وياي
ليش ابو اليمه حبيبي اوياچ ما جاي؟
الخيل مو مرة شـگلها داسته اهواي؟
لو اگلها انذبح ضامي وما شرب ماي؟
شنهو ردها .. لو درت خيالة عشره
شنهو ردها .. صدرك تسحگه وتطشره
شنهو ردها .. والرداء امسلبينه
""""""""""
طبتي يحسين المدينة اه منها
گلب ما عندي المصايب احچي عنها
تموت ام عباس من شدة حزنها
لو درت بالرمح شالوا راس ابنها
وشرد اگلها .. چفك اصبع منه ضايع
وشرد اگلها .. بس بقن اربع اصابع
وشرد اگلها .. بكربله گطعوا وتينه
"""""""""
والعليلة شلون لو سألتني هيه
شو رقية وياچ ما ردت سويه؟
شرد اگلها اختچ اخذوها سبيه؟
وعله راس حسينها ماتت رقيه
من رقية .. اخذوا الغالي ابوها
من رقية .. والتراچي سلبوها
من رقية .. بقت ذكراها الحزينه
"""""""""
بالعليلة شلون لو سألتني اكثر
لو تگلي وين اخويه علي الاكبر
راح اجاوبها وجوابي ادري يقهر
لا علي الاكبر اجه ولا علي الاصغر
هاي هيه .. راح اگلها ذبّحوهم
هاي هيه .. ذبحوهم مثل ابوهم
هاي هيه .. ما اجوا ويه الضعينه
"""""""""
عن گمرها حيرة لو امه اسألت وين
طاح اگلها اعله الوجه ما عنده چفين
وبالعمد مهشوم راسه ونبلة بالعين
هنانه بس انكسر ظهري وظهر الحسين
راح اگلها .. حسين من ذبحوا عضيده
راح اگلها .. على ظهره خله ايده
راح اگلها .. گطعوا ايساره ويمينه
"""""""""
خايفة لام الگمر آنه من اوصل
وجهي ما تتذكره وياهو انتي تسأل
راح اگلها امن الشمس وجهي تبدل
شحال اخت عباس مچتوفة اعله هزّل
زينب انه .. چنت مهيوبة واميره
زينب انه .. صرت مسبية واسيره
زينب انه .. تالي ما تالي رهينه

انيس الخفاجي الكربلائي

استشهاد الرسول ص

هي لـتفارگ ابوها شلونها
فاطمة الله يكون بـعونها
"""""""""
راح طه وراح مو بس الامان
راح وياه شكو بالدنيا حنان
چان ابوها وچان اخوها وكلشي چان
هاي اول مرة يمشي بدونها
"""""""""
كل ابو لابنيّته خيمة وسند
وابو الزهرة والله ميعوضه احد
فاطمة شلونچ منو يگلها بعد
راح غاليها وسندها وعونها
"""""""""
بچت اهوايه باذنها من همس
رايح لوجه الله لتحزنين بس
انتي بنتي وانتي روحي والنفس
محنة شيّبت راسها وجفونها
""""""""
حچايه گلها اتبسمت ودمعت العين
امن اهلي انتي يمي اولهم تجين
وويه ابوچ ابنيتي باچر تلتقين
حچاية بچّه فاطمة مضمونها
""""""""
يساعد الله فاطمة بهذا الجره
وجه ابوها وضحكته تحت الثره
روحها طلعت بچي بالمگبره
الفرگة صعبة حگها لـتلومونها
"""""""
عينها عالباب تنتظره يعود
راح اعز انسان إلها بهالوجود
ولايام الحلوة ما ترجع اردود
راح طه وغاب عن عيونها
""""""""
الـمات ابوها بجيته تبقه حالمه
شگد صعب احساسها لـميتمه
مات طه مدري ماتت فاطمه
الموت ريته ايخيبلها ظنونها
"""""""""
هاي محنة تبدي من عدها المحن
وينكسر بالباب ضلع ام الحسن
وذبح ابو اليمه وخواته ينسبن
وتستمر ما لا نهاية شجونها

انيس الخفاجي الكربلائي