'' وأنا على عهدك ووعدك ما استطعت ''

في دعاء سيد الاستغفار.. جات الجملة دي.. عشان تورينا وتخلينا نقر بإنو 'الضعف' حاجة مركبة فينا.. والخطأ والتقصير جزء من تكويننا.. هكذا وردت '' ما استطعت ''.. يعني يا رب حيجي وقت ما أستطيع فيه المواصلة على الطاعة.. بسبب مرض.. عجز.. غفلة.. نقص إيمان.. نسيان.. إنشغال.. عدم رغبة.. كسل وغيره...
كده خلقنا.. ما ممكن نوفي كل شيء.. مركب فينا العجز.. واللي هو جزء من تمااام بشريتنا.. وده ليه؟.. عشان بجد.. نحتاج لرب يكون معانا.. رب نرجع ليه لمن نعجز.. رب نستعين بيه لمن مااا نقدر.. رب بيقوينا لمن نتعب.. رب.. أجمل شيء ممكن يحصل لينا.. إننا نرتبط بيه.. رب.. مما يحبه من عبده إنو يلجأ ليه..
رب.. بس عايزك تقول : يا رب.. ويقول ليك : لبيك عبدي 😊.. ما قدرت على شيء.. قول : يا رب! 😊😊

#بوست_الأربعاء 🩵
إسراء الريح

مما يجعلك تطمئن لقدرك ..
أنه آت من رب العباد لا من غيره !

كل اللي حصل ليك في حياتك ، والحاصل هسي ، واللي حيحصل مستقبلا" .. كله مسطر ومكتوب ، وكاتبه رب العالمين 💕

مهما كان صعب ، مهما كانت غير محتملة .. هي نازلة منه سبحانه .. فأكيد بقدر وحكمة ..

لمن يترسخ الأمر ده في قلوبنا ..
تاني بنعاين للأمور من منحى تاني خاااالص! ..
بنتقبل أقدارنا بهدوء ، وروية ..

وبنعرف إنها من حكمته ..

كل حاجة حصلت ، كان لااازم تحصل ، وزي ما هي بالمللي!
ولو رجع الزمن ، واتعادت المواقف ، كان حيحصل نفس الحصل !! .. من غير تعديل ، من غير زيادة ، ولا نقصان!! ..

ده كله ، عشان الواحد مننا يسلم لرب العالمين 💕

#بوست_الأربعاء 💙
إسراء الريح

قدرة ربنا ، فوق كل شيء ..
فوق المنطق .. والمعادلات ! ..
فوق تصورك للأمور .. فأنت قاصر النظرة غير محيط بكل جوانب الأمور ! ..

يدهشك أمره حين ينزل ..
غير المعهود ، وغير المتوقع ! 🩷

حين ينزل أمره ،
يجبر كل كسر ..
يرمم كل جرح ..
يمسح على كل حزن ..
يبدل الحال من حال إلى حال ، في لحظة ! 💙
من شدة اليأس ، إلى سعة الفرج ! 💛

لأمره ميقات معلوم عنده سبحانه ،
لا يتقدم لإستعجال مستعجل ..
ولا يتأخر لفقدان أمل آمل !! ..

دقة في الترتيب .. وحكمة في التقدير .. وعظمة في التدبير ! 💚

ولا يقدر على ذلك إلا الله 🩶

ولمن تسأل نفسك : كيف بعد الزمن اتحررت مدني ؟! ..
تكون الإجابة : "إنما أمره إذا أراد شيئا" أن يقول له كن فيكون" 🩵

#بوست_الأربعاء 💙
إسراء الريح

أتوكله أمرك ، وتظل قلقا" بعدها ؟!

لو زول خبير في حاجة ، أو زول شغال في مؤسسة وإنت مشيت ليهو عشان يعمل ليك حاجة هو ممتااز فيها .. وقال ليك خلاص بنجزها ليك ..

بعد شوية .. جيته قلت ليه : صحي قادر تنجزها ؟
أو قلت ليه : كدي أشوف بتعملها كيف ؟
أو قلت ليه : كدي لو ما بتقدر قول لي عشان أتصرف أمشي لزول تاني ..

هل حيرضى ؟!
هل حيحرص على إنو ينجزها ليك ؟
هل قلقك ده ، حيشجعه يعملها ليك ، ولا بالعكس ممكن يخليه يوقف تماما ويقول ليك ما بعملها ليك !!

ولله المثل الأعلى !!
نحن القلق ده ما بنعمله مع البشر ، فما بالك برب البشر ؟!!!
الذي هو قادر على كل شيء ..

ربنا وعد بشيء ، فهو أقدر عليه ..
فلمن تدعوه وتسأله ، ما تقعد تفكر في الكيفية خاالص ..

ولا تقلق بالموضوع تاني ..

وكمان بيقول ليك : تخلي قلبك من الموضوع الشاغل بالك تماااما" .. ترفعه كده قلبيا" لله ?
الحاجة دي لو جربتها مرة ، حتدمنها ?

مرات زول صاحبك لمن تحكي ليه مشكلة حاصلة ليك ، بيقول ليك ما تفكر فيها كتير .. خليها بس بتتحل براها ..
وإنت يمكن ما تقدر تعمل الحاجة دي عشان بتقول كيييف هي ما اتحلت وأنا ما أفكر فيها ؟!!

بس مرة كده ، ما تفكر فيها ، وفي نفس الوقت أوكلها من قلبك لله ? ، كده يا دوب حتقدر ما تفكر فيها كتير وإنت مطمن ? لأنك جعلتها بين يدي من يملك حلها والتصرف فيها !

فبيبقى بالك رايق منها ، وفي نفس الوقت بتدبر من مستوى أعلى منك ومنها ، تدبر من الأعلى ? سبحانه ..

"ده جاي من الله" .. ??

أثناء ما واحدة من العيانين بتجهز عشان تدخل العملية ، وأقاربها بيجهزوا فيها خلاص ..
وهي بسبب المرض بقت عمياء ?
فلمن جات تدخل غرفة العمليات وعشان ما شايفة حاجة زعلت وبكت ??
فبقى أهلها بصبروا فيها .. فواحد منهم قال ليها الجملة دي "ده جاي من الله" .. ????

في إشارة لإنو .. قدرك بالمرض ده جاييك من ربنا سبحانه وتعالى ..
مهما كانت صعوبة الموضوع .. وقسوته على النفس .. لكن ، لمن الواحد يتذكر إنها جاية من ربنا بيتغير تقبله ليها نهاااائي !!

ونحن كمان ..
أي حاجة صعبة علينا ..
وأي شدة جاية علينا ..
نتذكر إنها جاية من ربنا !
الذي يبتلي بالمحن .. ليهذب .. ويمحو الخطايا .. ويرفع الدرجات !!

وممكن كمان تجي منه .. عشان الحب ❤️
ايييوه ..
عشان هو بيحبك سبحانه .. ابتلاك ❤️ وفي الحديث "إذا أحب الله عبدا" ابتلاه" ..

ما في زول بيتمنى البلاء !! ولا في زول بيتمنى لنفسه الحاجة الكعبة !!
"سلوا الله العافية"

بس في نفس الوقت ، لمن ربنا يأمر ، وينزل البلاء بك .. تتذكر إنو ممكن يكون علامة حب منه ليك ?

كيف تعرف كده ؟
بإنك لحظات البلاء بتصبر ، ترضى ، تحتسب .. وتقرب منه تبارك وتعالى ..
وقلبك مطمئن وعايش في ظل تذكر نعمه وفضله ولطفه بيك ..

وكله .. حتشوف أجره بعدين .. في الجنة ! .. حيث لا صبر ولا وصب !! ??

#بوست_الأربعاء ?
إسراء الريح

وأنا مارة في السوق كده ، كان في مجموعة من الباعة واقفين مع بعض الصباااح بدري .. قام واحد فيهم قال ليهم إنو لمن يبدأ يومه من الصباح بيقول : يا الله رزق الطير ، يا الله رزق الطير !! ????

حاجة كده ، ملكت قلبي ?
كيف قدر الزول ده ينتبه للمعنى ده ، ويصيغه في دعاء ؟!

في الحديث "لو أنكم توكلون على الله حق توكله لرزقكم كما يرزق الطير تغدو خماصا" وتروح بطانا" ..

يعني اللي بيتوكل على ربنا توكل صحيح .. بيرزقه زي ما بيرزق الطير .. واللي هي كائنات لا عقل لها ولا فكر لها ولا تدبير !!

كل العليها إنها بتآخد بالسبب ، وبتتحرك تمشي تفتش للأكل ..
فبتمشي وهي جوعى ، وبترجع وهي شبعى !! ..

دي من قدرة ربنا والله ?
هو الذي خلقها ، وهو الذي يرزقها ?

هي التي لا تملك التصرف في نفسها ولا شأنها !!

فيجب أن نكون بتوكلنا مثلها !!

كيف ؟

"حق توكله" :
يعني أن نأخذ بالأسباب ، كما تفعل الطير تماما" ! .. كل حاجة من شأنها تديك النتيجة اللي إنت عايزها ، تعملها !!

و ..
يكون قلبك ، وعقلك مطمئنين لإنو ، إنت زييي الطير !! لا تملك لنفسك نفعا" ولا ضرا" !! .. ولا بيدك تدبير أمر نفسك من دونه سبحانه !!
أنت في ملكه ، كالطير !!
كلانا عبيد ومخلوقات ، ميزنا نحن بالعقل لنسأل فيما بعد !!
ولكن ما كان بيدنا أن نملك إحضار الرزق لأنفسنا !!
وما وكل لنا ذلك !!
ولا يسألنا عنه سبحانه !!

بل تكفل لنا هو سبحانه بذلك !!

إن وقرت هذه في القلب ، ما ضرك عسر أتاك !!
ولا أظلمت الدنيا بوجهك لشيء فقدته !
ولا قلق قلبك لرزق آتيك في الغد ، ولا عن كيفية وصوله إليك !!

هو الآمر .. أن "كن" .. "فيكون" ?

#بوست_الأربعاء ?
إسراء الريح

في أيام الجامعة ، كان في دكتور صعب جدا" ، ويوم امتحان العملي ، بنمتحن في محطات ، بنقيف قدامها لحد ما الجرس يضرب عشان ندخل نمتحن ..
وأنا واقفة كده ، فجأة يجي الدكتور ده ، ويقيف قدام المحطة حقتي!!
قلت في نفسي يمكن واقف ساي !!
بعد شوية ، يقوم يدخل في المحطة زاتها ، ويبدل الدكتور اللي كان قاعد !!
يعني شنو !! يعني أنا حيمتحني الدكتور الصعب ده ??

بس ، لحظتها ، اتذكرت فيديو حضرته قبل الإمتحان بيوم ، بيتكلم عن معنى "لا إله إلا الله" ، هل نحن محققنه فعلاً في حياتنا ؟!
يعني بنقولها بلساننا ، لكن هل فعلاً مؤمنين بإنو الفاعل الحقيقي هو الله ، وليس أي شخص آخر في الحياة !!

اتذكرت المعنى ده ، وقلت يلا ، ربنا هو المتصرف في الأمور ، ولو كاتب ليك حاجة ، ما في من يمنعها عنك !!

دخلت ، اتعامل معاي بكل رحابة صدر ! ، سألني كل الأسئلة بكل هدوء !! ما كأنه المعهود منه!
وحتى لمن سؤال ما فهمته ، قام مسك ورقة وقلم ورسم لي المطلوب شنو عشان أفهم السؤال وأجاوبه !!

وطلعت وأنا متفاجئة تماما" من التيسير اللي حصل !!

الأعجب في الموضوع ، إنو أول ما طلعت من المحطة طلع وراي !!
يعني ما امتحن زول من الدفعة غيري في اليوم داك !! ????

وقس على ذلك !
فكم من خير يريده الله لك ، يأتيك من باب كنت تحسبه شرا" !!
وكم من شر آتيك من جهة شخص ، يصرفه الله عنك بل ويبدلك عنه خيرا" من ذات الشخص !!

الدليل ، كم من ناس ، بتحكي مواقف مذهلة مع ناس الدعم السريع ، اتعاملوا فيها معاهم بعكس ما تعوده الناس منهم من أذى وشدة !!
فما آذوهم ، بل وأحسنوا إليهم !!

اللي سخرهم منو ؟
واللي كفى شرهم منو ؟!
واللي الواحد مفترض يكون مؤمن تماما إنو ما حيصيبه من أي من كان مكروه إلا بإذنه ، هو منو ؟!!

هو ذاته ، الذي حفظ موسى عليه السلام ، اللي كان فرعون بيقتل أبناء بني إسرائيل كلهم عشاان منهم يقتل موسى اللي حينهي ملكه ..
ويبقى فرعون زاااتو ، هو اللي حفظ موسى ورباه في حجره وتحت عينيه ورعايته !! ?? !!

#بوست_الأربعاء ?
إسراء الريح

الشدة اللي إنت فيها هسي دي ،
لو حكوا ليك قبل كم شهر ولا سنة إنو بعد فترة كده حيحصل ليك كده وكده وكده ، أو حتفقد كده وكده ، أو حتتعب شديد بسبب كده ..

لحظتها ، حتذهل !!
وتقول : لاااااا ما حأستحمل الحاجة دي !! الحاجة دي كبيرة شديد ، وقوية شديد !! .. أنا ما قدرها !
ممكن أفقد صوابي لو حصلت لي !!
ما حأقدر أعيش كده !! ولا من غير الحاجة اللي حأفقدها دي !!

وتمر الأيام ، وتحصل ليك نفس الحاجة اللي كنت خايف إنها تحصل ليك!! ..
تنزل عليك كبلاء من رب السماء ..
بحجمها ، وشدتها ، وضيقها !
وفجأة ! تلقى روحك ماري من خلالها عااادي ! ..
صابر ومحتسب .. ومتعايش ، ولسه عايش !! ما زي ما قلت إنك حتموت لمن يحصل كده !!

طيب ، كيف الكلام ده ؟!!

ده ، اللطف اللي بينزل مع البلاء ?

فتبتلى ، قدر إيمانك بالضببط !

فلا تبتلى بشيء ، يجعلك تكفر !!

وينزل لك معه من الصبر مثله ?

فتمر بك المصيبة ، برغم شدتها ! ، وإنت مستغرب في إنو كيف قدرت تستحمل الحاجة دي بالسهولة دي !!

وده ، اللي بيفسر ليك ، إنو كيف أهل فلسطين صامدين ، رغم اللي هم فيه ..
وبيوريك إنو أي زول حكى ليك قصته مع الحرب دي ، حكاها ليك وإنت مندهش إنو كيف قدر يعيش التجربة دي !! وهسي بيحكي ليك فيها عاادي كده دي !!

رحيم ? حتى في بلاءه ?

وكله ، بأجره ?
"لا يزال البلاء بالمؤمن المؤمنة في نفسه وماله وولده حتى يلقى الله تعالى وما عليه خطيئة" ?

#بوست_الأربعاء ?
إسراء الريح

"وكيف تصبر على ما لم تحط به خبرا" .. !!

لو حصل معاك حدث معين ..
وتعبك شديد !! ..
وأخذ زمن كتيير ! ..
وخسرت فيه خسارة كبيرة !! ..

بس قبل ما يحصل ، اتفتح ليك "اللوح المحفوظ" ، وعرفت إنو الحاجة دي حتحصل ليك في الوقت داك .. وبالطريقة ديك ..
وحتآخد زمن قدر شنو عشان تنتهي ..
والسبب والحكمة من حصولها زااتو شنو !
والعوض اللي جايك بعدها شنو وقدر شنو ! وحيجي كيف ومتين !!

تخيل بس .. إنك في أحداث حياتك ، بتلقى كتاب مفتوح ، مشروح فيه الأقدار واحد تلو الآخر .. وترتيبها وحكمتها .. والخيرية اللي فيها عشان تحصل ليك !!

طبعا" كان حتكون الدنيا دي حاجة سااهلة وتماااام !!
عارف شنو الجاي عليك .. قادر تتجهز ليه .. وتتفادى أضراره أحيانا" .. ومدرك أسباب حصول المصائب وعارف حتآخد معاك قدر شنو عشان تزول فبالتالي الصبر عليها محدد بمدة معينة ! .. حتى اللي حتستمر معاك مدى حياتك ، إنت عارف إنها حتستمر بالتالي حتتعايش معاها وتتقبلها سااهل وما تيأس !!
لو بتعلم كل ده ، لكان ظبطت أمورك بره وجوه "عمليا" ونفسيا" تماام التمام !!
"قل لو كنت أعلم الغيب لاستكثرت من الخير وما مسني السوء" !!

بس .. وين حيكون الإختبار إذن ؟!! ..
كيف حيكون البلاء ؟!! وامتحان الإيمان بقلبك ؟! ..
أن تؤمن بحكمة الله ، ولو بدت كل الأمور ظلاما" وشرا" !!
أن تؤمن بلطف الله ، ولو بدا أن الأمور تسير في الإتجاه الخاطئ !!
أن تؤمن بالفرج وأن مع العسر يسرا" ، وإن طاالت فترة البلاء !!
أن تصبر ، لأنك تؤمن بأن هنالك أجر ينتظرك ? وذنوب تكفر ! ?
أن تمنع نفسك من الجزع والتسخط ، لأنك تؤمن بأنك تحت رعاية الرؤوف الرحيم ?
أن تمضي في الحياة ، دون أن تدرك مستقبلك القادم !! فقط بتوكلك عليه سبحانه ! فهو وحده الذي يعلمه ?

هي صعبة جدا" !! ..
لكنها من أركان الإيمان !
أن تؤمن بالقدر خيره وشره !
الأمر ليس صلاة وصيام وصدقة فحسب !!
بل حتى أمور حياتك اليومية ، أنت مختبر فيها !! وفي تعاملك القلبي فيها !!

"وكيف تصبر على ما لم تحط به خبرا" ؟! .. تعجب من إمكانية الصبر ، مع تمااام الجهل بما وراء الأقدار ..

#بوست_الأربعاء ?
إسراء الريح

"وإن يمسسك الله بضر فلا كاشف له إلا هو وإن يردك بخير فهو على كل شيء قدير" ?

أكبر مثال لهذه الآية ، هو حال الحرب التي نعيشها الآن !!

نصيب الإنسان من كل حاجة حلوة ، مكتوب في اللوح المحفوظ ، بوقت معين ، وبيحصل كما كتب له ..
بغض النظر عن الأسباب ، والمسببات ، والأحوال ، والشدائد المحيطة ، وتكالب الأعداء ، وسعي الآخرين حولك بعدم حدوثه ! ..

"وإن يردك بخير فهو على كل شيء قدير" ?

كم زول ، اتفتحت ليه أثناء الحرب دي ، أبواب شغل ما كان متوقعها ؟

وكم زول ، جاه رزق كبير شديد ومستمر ، من جهات ظهرت فجأة ! مع الحرب دي ؟!

وكم زول ، طلع ونزح ، تاركا" داره وأهله ،، ولقى في الحتة اللي مشى ليها من التساهيل ما لم يكن يحتسبه !!

وكم زول ، طلع هاجر ، خلى السودان زاتو !! .. أو في الحقيقة ، خلى قلبه في السودان ?? .. غربة ما كان فاكر إنو حيضطر ليها ، وهجرة ماشي ليها مجبور ما فرحان بيها زي زمان ! .. فخلته في وضع مختلف ، ورزق ، وفتوحات ، وحياة جديدة ما كان فاكر نفسه حيمشي ليها يوم من الأيام !

كم زول ، مرض أو مرض ليه عزيز ، واتسهلت إنو يعالجه برغم الظروف الحاصلة ؟

كم زول ، فقد وظيفته وسكنه ، ولسه بطريقة ما ، قادر يعيش أسرته وأهله ؟

كم زول ، وبطريقة ما ، خطرت على بال مديري الجامعات الوقفت ، وبتساهيل ربانية محضة ، قدر يكمل جامعته واتخرج وشال شهادته في عز الحرب دي !

كم زول ، مع إنو بالمنطق مفترض يكون مستحيل ! قدر يكمل نصف دينه مع من اختار ، أثناء الحرب دي ؟!!

ومين كان يتخيل ، إنو أصحاب "الكارو" .. اللي كان بيكدحوا زماان عشان لقمة العيش .. يجي وقت في نص الحرب ، السيارات تبقى خطورة على صاحبها ، فيعطلها في البيت .. وتبقى الوسيلة الوحيدة للتنقل هي للكارو ! .. وبما شاء من فتح له بالمقابل !

ووالله لو كتبت لك شربة ماء ، أثناء الحرب دي ، ولو اتمنعت عنك كل مياه الدنيا بسبب الحرب ، حتشربها حتشربها !! ..
كيف ؟ .. دي ما حقتنا نحن ..
دي حقت ربنا سبحانه ..
دي للملك الحق ! ..
وما للعبد تدخل فيما للرب !! ..

#بوست_الأربعاء ?
إسراء الريح