ياواهـس حجي اعيـوني للملگه الگلب ملهوف
تـدري يحيـر ما يگدر يمسـح دمـعته المجتوف
انه ادري العذر مطـلوب بس للعاف مو معيوف
الجان يشوف بعيـونك بعد ياعين بيها ايشوف

ياخـويـه هـذا الـصـار بـيه
لو امـوت لـو تلحـگ علـيه
شتصير زينب ياخو زينب
تـفـتر بـقـت بـالـغـاضـريـه

ادورك عـود بلكي الگـاك ما الگـاك بس بـلكت
صح بجدامي ماضل حيل بس الروح ما ملت
اريـدك والزمـن ضـدي وانه اجفـوفي انـشلت
وراح الشـوف من عـيني من گد ما دمع هلت

تدري العتب مو من صفاتي
عـاذرتـك انـه لحـد مـمـاتـي
بس التـعب بايـگـلي حيـلي
مـن يـمته بالگـعـده صـلاتي

مادورتـك اعلـه الگـاع بنـص گلـبـي ادورنـك
انه ويـاك روح بـروح گلـي اشـلون اعـوفـنك
ماودي وحـگ عيـناك بـس گـوه رحـت عـنك
هيه الفرگه صعبه حسين ويلجم بلگلب ونك

مهضومه كلش خويه زينب
مو راسي من فرگاك شـيب
شاب الگلب بجفاك يحسين
التعوفه اخوته هواي يتعب

بجيت عليك چم دمعه وچواني فراگك الحراگ
مره ابجـي لان ميـت ومره ابجـي بواجي فراگ
يضل حته الهوه يغثه اليتـاني بحسرة المشتاگ
نشف دم وجهي الذابل عَليّ ضـيم البُعد ما لاگ

المتـعوب من يمـوت يـرتاح
يرتـاح من لويـات الاصـفاح
تعبن عيوني وگلبي متعوب
من الگضـه والـجـاي والراح

علي اسعد السعيدي

يا اول جـرح من بعـد النبي
ألبـاب و وإن ثاري ومطلبي
ماتگضي وتفض باجر كربله
حسـينج ينذبح بتج تنسبي

دخـلو عله دارج غصـب ـ ومن الضرب
محسن وگع
للـباري صـار وكـل هلـج ـ مو بـس الج
بـاب انـدفـع
صوت الهظم ضل ينسمع ـ حته الضلع
كسره انسمع

توه الهادي غمضها عينه
تبجيـن وتنعين وحزينه
والتمـو كل اهـل المدينه ـ اشباه الزلم

يردونج كل همهم بعيده
امة سوء وهـذا التـريده
لا همهـم دين ولا عقيـده ـ رادو ينهدم

تبجي للمصاب هاليله السمه
تبجيج وتگول ماتت فاطمه
كسـرولج ضلع اولاد الحرام
وتـشهـدلج بقـت آثار الدمـه

عليج الحزن مثل الجبال ـ صرتي خيال
امن الضلع
دمـج وگـع هـذا الصـعب ـ فوگ التـرب
والــدمــع
اتلگيتي باب وجـف سوه ـ ملگـه الهـوه
وي شـمــع

بس جرحج يستاهل حجينه
وبس انتي التسـتاهل بجينه
جـم عـام الـراح ومـا نسـيـنه ـ ماننسه الجرح

مـاننـسـه الـدار ولا مـصـابه
مانـنـسـه الـبـاب ولا عـذابه
من يـومـج حد يوم الخرابه ـ والطف والرمح

بابـج مـحتـرگ مـچـوية گلب
ومـدافـع زلم عـالبـاب الـغرب
محسن عالارض طايح يا افه
دمـه ينـسحـگ صايـر بلـدرب

زينب عگب عينج بجت ـ وتحسرت
للـحــصـل
لازم دربها شـجم حـزن ـ ضلت تون
محد وصل
خلص عمرها بس دلال ـ تالي حبال
بجفها يضل

زينب تبچي من فگد اخوها
هم باجـر راح يـروح ابـوها
وبحبال اهل الكوفه يجوها ـ يلجمها الحبل

حرگـو بابـج هـاي العـجـيبه
وبابج خلـف اعظـم مصـيبه
بت حيـدر مسـبيـه وغريـبه ـ وتصعد علهزل

حيدر ياعلي كبرت عـبرته
لاضله صبر يكتم حسـرته
مايـگـدر بـعد يم جـنازتـج
بانن بلوجه حزنه وكسرته

حيـدر علـي ضل منكـسر ـ گلـبـه جـمر
ماضل صبـر
ضل يوگف ويرجع يميل ـ وبلايه حيل
يگضي العمر
حـيله انثـلـم حگه احـير ـ كسـره جبير
ومـا ينـجـبر

اول مـره حـيـدر يـعــانـي
صار شكد ما نايـم ثـواني
يـومــيـه يـم بابـج يـتـاني ـ ضل بجيتج

مكسور ودمعاته عله عينه
لا يگطع لا يگـضي ونيـنه
تـعبـان يخـلـصـها سنـيـنه ـ يأمـل ردتج

علي اسعد السعيدي

يبن الحسن شو وحدك تنحب
حگـك اذا من محنتـك تتعـب
الليله تبجـي وباجـر
وحدك غريب وحاير
محتـار بيـن الحسـن لو زينب

محتار بيها دموعك هوايه ـ ماتفض هايه
المصيـبه الليله
ينعصر گلبه اليفـگد الوالد ـ واگف وگاعد
ومايعينه حيله

هذا عمرك موش گد هاي المـصايب
وانت عينك تبجي دم من الخرايب
العمـر عمر الطفـل بـس انت شايـب

اليـوم عـيـنـك تهـل مـرتيـن
مره عله ابوك ومره لحسين
ما الـك واحـد ناصـر
وحدك غريب وحاير
محتار بين الحسن لو زينب

ضليت وحدك والدمع سايل ـ غصنك الذابل
طاح محد شاله
ياسـيدي حمل اليتم يجرح ـ يجـرح ويذبح
حالتك مو حاله

تبجي دم بغربتك ماكو العينيك
لا اجتـك ناس وتسكـت ونيـنك
ليله ليـله للـفـرج تتـرجه عينـك

وبـكربلـه طلعـن حـرم ليـش
كدامهن ضل يعرض الجيش
جدك يدوسه الحافر
وحدك غريب وحاير
محتار بين الحسن لو زينـب

عشت اليتم من اول سنينك ـ گلي جا وينك
سـاكـن بـيا هـيـمه
ما اكدر اوصف حالتك صعبه ـ عايش بغربه
تچوي بيك الخيمه

عمرك اتخلصه بواجي عله الغريبه
تهـون وحده تعيش تاليها بمصيبه
سنين تگضـيها تنوح اشكد عجيبه

والضـيم بيك يـودي ويجيب
جا گلي ليمت جرحك يطيب
بيـن الشمـاته اتـكابر
وحدك غريب وحاير
محـتار بين الحسـن لو زينب

مولاي ليمت تفرج وتظهر ـ گلبـك اتفطر
من بواجي عيونك
ادري زين بحـالك اشلونه ـ الما يفگدونه
لا اتـگـله اشلـونـك

يمـته يامـولاي تضـهر فـدوه يمته
جدك عله الگاع طاح وانت سكته
مو اعاتب لچن من كلبي وحرگته

لأجل العقيله مو لاجل ثاني
بلـشـام تـاخـذ ثـارهـا اتانـي
ثار السـبي والعـاشر
وحدك غريب وحاير
محتار بين الحسن لو زينب

علي اسعد السعيدي

لسان حال السيدة سكينة عليها السلام

بـتـك يـبويـه انـه وارد اشـكـي البـيـه
بدمـوعـي اسولـفلك جـرحي ومأسيه
خاف امن اگول اسمي اتگلي مو هيه
كبرانه سكنـه هواي يسمـوني مـسبيه

للضيم ضليت ـ اذاني طاري الهزيله
مليت وبجيت ـ اذكر ضعـنه وكفيله
بلعين تنـشاف ـ وسط العـدو عقيله

بويـه بتـك بعـدها تنـاطر تجـوها
النشد بيها يجرح يگلها عله ابوها
اختي عني لخرابه يويلي خذوها

عمري جزه الخمسين وعيوني گوه تنام
ابجي ويروح الحيل واذكر ليالي الشام
بنيـتك تريد تـمـوت وجـروحي ماتلـتام
تـانـيـنك انـه اهـواي بالـدنيـه والاحـلام

تانيت بلبيـت ـ بلكت تجـوني اتاني
گلبي مجروح ـ ويگلي راح ونساني
چـم اه ويـلاه ـ تعبنـي كلـش زماني

اكعد وابقه اناطر واعاتب بلعيون
كافي بلكي ينامن يعيني الجفون
راحـو ومـا أضـنهـم الـيـه يـردون

من تكـثر اسنـينك وهمـك يضـل يكـثر
تبـقـه تجـر انـفـاس واتـجـرها ماتـنجـر
يتعب يبويه اهواي هذا البشر من يكبر
تـلجـمـني حـد الـيـوم زينـب تـطـر الـبر

للـشـام ايــتـام ـ طبت تنـوح وتنادي
جا وين عباس ـ يفـزع يـرد الاعـادي
النوح مسموع ـ جتفوها كلها الايادي

كلفه كلـش نطب لقصـرهم جبيره
عمتي زينب هضيمه اسمها اسيره
تالي صـارت غريبه وبلايه عشيره

اذكرها كلش زين ذيج الخرابه اشلون
ضليـنه سهـرانين ما نامت النه اعيون
كلها تون وتنـوح وبيـنه تصبر ام عون
باجـر نرد لحسـين والدنـيا كلها اتهون

ونعود لحسين ـ وترابه يشفي گلبنه
بليـل والحـيل ـ فارگنه بويه بدربنه
احجي وابجي ـ كلش وحگك تعبنه

انه بويه امن اسولف اتعبها روحي
كلـها هيـنه وتعـدي قليله جروحي
ويبقه دايم عليكم يرافگني نوحي

علي اسعد السعيدي

كونك تعرف احساس اليفگدون
ثكيل وماتحمله اجتاف ومتـون
گلـت تكبـر واعلـگ بعيـنك امال
كفيل اتـصير ردتـك يمه لم عون

محـسن يمه يوليـدي ذبحت بموتك امالي
دمك شفته فوگ الباب هذا المارحم حالي

موتـك يهدم الحــيل
صعبـه وحشة الليـل
اخـاف اتـعيـش يـمه
وهم تسحگك الخيل

تمـنيـتك تعـيـش اشكـد تـمنيت
وگفـت هواي يم الباب وابجيت
ماشـفنـه ضحكـتـك لا بواچيـك
صعبه خلاف عينك طبت البيت

موتـك يختلـف كلـش مـن الضـلمـه للضـلمـه
تموت وماتشوف امك هاي الحرگه والهضمه

مـانامـت الـي عيـن
محد بينه ضل زين
واحد يشكي للثاني
زينـب وي الحسيـن

محسن يمه جرحك ماجزه وطاب
صـح ردتك تعيـش ومارضه الباب
بس هم لو عشت هم ترجع تموت
لو مسمـوم لو مرمـي اعله التـراب

هاي الدنيه واعرفها تضل تفرهد بولدي
يموتون واضل انه غير الدمعه ماعندي

مـوتـك كـلـش اذانـه
ومكـسـورة ضلـع انه
زايـد بلگلـب شوگـك
يمـته ايصـير ملگـانه

مـن الـبـاب ادري يمــه مخـنـوگ
مخنوگ انت وانه گلبي محروگ
اليفـگدلـه طـفل مايعـرف النـوم
مايرتاح لحضه وجفـنه مطـبوگ

وينك وين الموادع ماشفتك و اودعنك
گلبي ينعصر گوه لو زينـب حچت عنك

ماتـت اخـر احـلامـي
اضن ذني اخـر ايامي
ما اصـبر عله فراگـك
گلبي لشوفتك ضامي

علي اسعد السعيدي

رديـت بـس ياردتـي مكـسـورلـي حيـل وگـلـب
مخـنوگه واتنـفس وجع ياخويه خلصت الدرب
والعين هم صبت قهر مو بس دمع ضلت تصب

شوف عيوني
ضلت بجفـاكم بس تسـهر
وجروح الروح البس تكثر
مـا انــسـاكـم لا تـنـسـوني ـ اجيت

أتـلـگـونـي
يحسـين بدلالي الحسـره
تتكـسر جن ضلـع الزهـره
لا تسئل ياخـويه اشلـوني ـ نوليت

ولاني الماعرف اسمي يخوتي
طلعـت وتهـظم اهـوايه بلوتي

ياخويه شبقالي ـ ضلت بس بدمعتي
رديـت وانـوحن ـ رديـت بـحـسـرتـي

لمـن طحـت ياهـيبـتي من ضـاگ بلريه الـهوه
ضليت وحدي بغربتي ثمانين عمه اسمع سوه
ما لاوي زينبكم سبي وبالفرگه چم چف انلوه

ما لاويني
لا شام ولا سوگ الكوفه
تصـبر زيـنبـكم معـروفه
ذبلت بس ما ملت عيني ـ وتنوح

يلناسيني
اختك راحت فوك الناگه
راحت گوه بس مشتاگه
خلصن خويه كل سنيني ـ جروح

اجيـت ودربي خلـصته نعاوي
جبتلك ضيمي وضيم العلاوي

اشكيلك مصيبه ـ مخنوگه بعبرتي
رديـت وانـوحن ـ رديت بحسـرتي

لو تدري بعـدك ياشهـم الحال كلـش مو سهل
للشـام يبن امي افه زينـب تروح اعلـه الهزل
علناگه خويه واشتكي بس ما اسولف بلحبل

ما تعـبانه
من انـت كبـالي اتـحملـهن
بس بجفاك شلون اكدرهن
شـوگ وحسـره لگـبرك بيه ـ وعذاب

ضليت انه
اتـلـفـت بلـكـت تـلفـينـي
بس خافنك ها يحسيني
خـاف اتـللـگـهم مو هـيه ـ المصاب

اجتك الها غايه وغاية ام عون
تبلل گبـرك امن ادموع العـيون

بعدني علهزيله ـ واسولفلك كسرتي
رديت وانوحن ـ رديـت بـحـسـرتـي

ليكم وصلنه ياهلي ونطوف فوگ اگبوركم
ردينه ليكم بلهظـم وردينه روس انحوركم
الدنـيه مابيـها ضـوه السـيف بايـگ نـوركم

يلكـاسـرنـي
شبعت نسوانك بس غربه
والمثلي الله ايساعد گلبه
ما اقصد اجرح احساسك ـ والوم

فدوه اعذرني
ماجـبـت ابـنيـتـك ويـانـه
ماحملت ضيـمك واحزانه
ماكدرت من شافت راسك ـ تگوم

شُبگت راسك وهود حزنها
فوگ الحيره حيرني دفنها

شيحملها يخويه ـ ماتنضم هظمتي
رديـت وانـوحـن ـ رديت بحسـرتي

علي اسعد السعيدي

يبو محـمد مدحو وما وصفوك
شما عِلت اقلامهم صيـتك عِله
سيفك يشبع الزلم طك بلرگاب
وسفرتك يلحسن متروسه هلا
مايـوصـفونـك ولا منـك قلـيـل
انت شيخ اعله الكرم والمرجله

تفرض انت وتنهي انت بكيفك
ياكـريـم ومـا يـتيـهك ضـيـفك

واحـد انـت بهل زمن
دخيل عينك يلحسن

يامولاي دخيلك ـ يامولاي

بلـذبح سيفـين الك يابـو الثـكال
سيـف يـذبح خيـل والثـاني بشر
صيتك الچنه شمس وسط النهار
تارس الدنيـه وجـزه الدنيه وعبر
يلحـسن خيـرك جيـثر ومو قليل
وانت خيرك من يصب مثل النهر

يامـدح يكفيـك يابن حيـدره
الما يحبك خسر دنيه واخره

بيـك نجـزيها المحـن
دخيل عينك يلحسن

يامولاي دخيلك ـ يامولاي

مو غريبه اعليك لو گلنه كريم
ال هاشـم بل اصـل كـلهم كـرم
دوم ماكـو لا كريـم ولا شجـاع
كتب قبلك يلحسـن حبر الـقلم
ماتعبت وتعبن اشباب المضيف
شامخ ترفرف صرت مثل العلم

بلثكال تعزب وموش الخفيف
باب ماخليـت ينسد للمضـيف

عيوني بعيونك عمن
دخيل عينك يلحسن

يامولاي دخيلك ـ يامولاي

يلحسـن جازيها مرحلة الكمال
ياشمس للشمـس ياهوه اليصد
من وصل لحـسين ماكفـاك زاد
ولـلاخـو مـو زاد عزبـت بـولـد
اطيت ولدك للسبط ماحسبيت
كتله هـاك وكـون سـالم مايـرد

كـتله هاك حسـين كل العندي
فدوه الك يرحون كلهم ولدي

صرت لحسينك وطن
دخيل عيـنك يلحسن

يامولاي دخيلك ـ يامولاي

علي اسعد السعيدي