Матагов И

Ас хlумма ца лоьху,
ца доьху хlумма а сайна,
йа хlумма ца оьшу,
эшначохь ца хилларг сайна.
Ас лехнарг карийра
тоххарехь карийра
кхечунна,
хилира лехнарг ша,
цхьана шен са-беркъа, къиэчунна.

Ца лоьхуш ваций со-м
— хан тилла кхачий суо аьлла,
ца оьшуш ваций со-м
— гlан тилла набарах ваьлла.
Со-м тоъал кlадвелла,
гlелвелла дахарца къийса,
хlун дисна бlобуола,
де тола, хlинца сатийса?

«Хьовсийша воьжна со»
ца воллу мохь бетташ баха,
ца воллу «хlунда со
дуьненчу воссийна?» баха.
Реза ву кхолламна
цхьа «бакъ» ду даим а ала:
«хlокху сайн хьолехь а,
дика а вити со-м Дала!»

Матагов И

Цlе йайна кlур хьийзаш lийжабо бlаьргаш,
…и латон, сирник хьакха ботт а йу йоьхна,
Цlе летича-м кхе тийса хир йара гоьргаш-м,
Амма, …и латар кхин вайна ца доьгlна.

Дог дагац марзонан цlе йогуш хlинца,
Цхьа бутуо ша лаьтта дегнаш тlехь вайна.
Ца бисна хьан дашехь хьалхачух цинц а,
Мlаьргонаш геннара схьакъеда тайна. ________________
(2024-чу шеран лахьанан (ноябрь) беттан 18-гlа де (оршот — понедельник).

Матагов И

БӀарзвелла, къарзвелла,
къежвала ца туьгуш,
хебарша чкъуран куц сибатехь талхийна,
гӀелвелла шелвелла,
са дала ца туьгуш,
дахарехь сайн Далла къабала балхийна,
дехарийн жоьпаш а,
мостагӀийн тоьпаш а,
вовшашна гуш доцуш
къийсаме дуьйлучохь,
дехарна жоп хуьлуш,
гиначохь воккхавеш,
жоьпаза диснариг
жоьпанна хьакъ ца деш,
муьлххачу хьолехь а,
вайн Далла хастамбеш
декъачу куьйгашна
бодашкахь латтар деш,
буьйсанна цхьалхачу
лазамца висина,
дерриге ма доггах,
ма логгалц хӀоьттина
Ӏаш ву со кху буса,
кхин Ӏовжа хӀун ду сан?

2024-чу шеран эсаран (октябрь) беттан 7-гӀа де (оршот — понедельник).

Матагов И.

Сарралц кхуьйкхуш нӀаьна,
шело а хаалуш Ӏаьнан,
тӀеозийна куртка,
лоррий хьоьжуш куьрка,
оьхуш хьожа томе
хьаьжкӀийн буьртиг чоме,
кхоллий волуш чоьхьа,
цӀанйеш бедар боьха,
хенех хили, гена
дагалецам къена.

Курткин пхьуьйшаш къегаш,
шело уьдуш эгош,
со мичара кхечи
ас хӀун деана,
оцу хенийн
ден букъера веана?

2024-чу шеран эсаран (октябрь) беттан 7-гӀа де (оршот — понедельник).

Сайн дерг цкъа а лечкъийна вацара со, цхьа хьо йоцург!

Матагов И.

Хьо хазйаллалц кху дуьненан цхьацца хазаллашца бӀаьрг бузабора ас сайн, ткъа хьох сайн са ийначу хенахь дуьйна, хьох буьзначу бӀаьргашна кху дуьненахь кхин шайна куц-кхача ца ийши.

Матагов И.

"Шаддадан Ӏантар" — иза, гӀараваьлла Ӏаьрбийн поэт ву, шен майраллица вевзаш волу. Цкъа, цхьана бугӀанах (бык) ведда вогӀучу хенахь, хоьттучо хоьттура цуьнга: "Мичахь йу хьан майралла? БугӀанах кхеравелла хьо? Ӏантар вац хьо?!" — бохуш. Цунна цуо жоп делира: "БугӀанна ца хаьа со "Ӏантар" вуйла!".

Вай нохчий а доцуш, ваьш цхьана кхечу къомах долчух дош олуш санна дуьйцуш хета вай: "нохчийн мотт бийца", "нохчийн мотт уггар хьалха хаа беза", иштта дӀа кхин а...
"Вайн мотт бийца, ненан мотт бийца", "вайн мотт, ненан мотт" уггар хьалха хаа безаш бу"! Иштта олуш хилча бӀегӀийла ма хета суна-м!

М.И.