⚜️⚜️⚜️

عشق اولماسا

تو تقون آسمانین قارادير غم نن
سنی نئجه یازیم آبی قلم نن؟

گئتمه لی یم سیندیرام سیندیر مییام
کو لکلی دریانی سینیق بلم نن

بیر عؤمور دور اولوم‌نن اوز به اوزم
دریالار قورخوتماز منی عدم‌نن

دنیا، گؤزو داردیر هانسی بیر زادی
قییبدیر بیرینه آرتیق‌دان کم‌نن

داشا چالدی منیم‌ده جان شوشه می
دنیاکی آلمیشدی جامی‌نی، جم‌نن

سن‌دن گرک ال اوزماغی، کونلومه
نئجه ایناندیریم، هانسی قسم‌نن؟

من سن‌دن أل چکیب گئدیرم، آمما
خيالين أل چکمیر منیم یخه‌م‌نن

بیزیم عشق دن‌ده بیر اوخو عاشیق
بس‌دیر نه اوخودون «اصلی - کرم »نن

عشق اولماسا شعرین‌ده سسی باتار
يئل اولماسا شير يويورمز علم نن

۱۳۷۲ - اسفند آیی - زنگان

#استاد_حسین_منزوى
#دومان
#غزل‌لر

@poem_monzavi

⚜️⚜️⚜️

⚜️⚜️⚜️

خیال سوروشو

آی سسين روحوم دا، يئل كيمى أسن
اورک باغلامیشام عطیر لی سسَن

آی سن‌نن دانیشماق، باریشماق شوقو
قراریمی آلان ،صبریمی کسن

يالقوزلوق قیشی‌نی أریتماق ایچین
اومود باغلامیشام ایستی نفسَن

اما حئییف گنه ده من گئج گلدیم
بختیم دیمه‌دی کی گرک تله‌سن

ایندی سنی یاددان چیخاتماق ایچین
هارا گئدیم، نه ایش گؤروم گوره سن

سن اؤزون دئ گؤروم هانسی هاوانی
سور اقلی‌ییم کی دوشمویوم هوه سن

سؤزو چوخلو اؤزو یوخلو دئ گؤروم
خیال سان؟ یوخوسان؟ یوخسا نمه سن؟

آی منیم تای توشوم، دارداکی قوشوم
هایان‌دان یول آچیم سنین قفسن

خیالیندان سوروشور دو خیالیم
بیرگون اولور سنده بیزه گله سن؟!

۱۳۷۲ نین قیشی - زنگان

#غزل‌لر
#دومان
#استاد_حسین_منزوی

@poem_monzavi
⚜️⚜️⚜️

⚜️⚜️⚜️

اینجی

آی بو تون حسنوده لیلایه چکن ایلهامیم!
منی مجنون کیمی صحرایه چکن ایلهامیم!

آی منیم گؤزلریمین ذاتینا معنا یارادان
روحومو شورِ تماشایه چکن ایلهامیم!

آی قیزاردان ! اؤپوشوندن، گولوشوندن دوداغین
باخیشیندان گؤزونه سایه چکن ایلهامیم!

آی سنین دؤش‌لرین اوستونده چلیپا زولفون
منی تصلیبِ مسیحایه چکن ایلهامیم!

آی اوزون ، گول کیمی باغ‌لار یاخاسیندان چیخادان
منی بولبول کیمی غوغایه چکن ایلهامیم!

کیپریگیندن قلم آلمیش أله ، باطل خطی‌نی
گؤزلرین نرگسِ شهلایه چکن ایلهامیم!

آی سوتول آلمالاری آدمی یولدان چیخادان
وسوسه وئر مه‌ده ، حوّایه چکن ایلهامیم!

حُسن و عصمت‌ده داشان ، یوسفِ مصره یاراشان
عشق و جرأت‌ده زلیخایه چکن ایلهامیم!

آی منیم کؤنلومو -بو ورطه‌ده سینمیش گمی‌نی-
بیرده باش‌دان دَلی دریایه چکن ایلهامیم!

نازیلن قول و غزل ساحری - اؤز شاعرینی -
گنه‌ده شعرِ تمنایه چکن ایلهامیم!

آی پوزولموش کلماتی ، بو غزل‌ده تازادان
اینجی تک ، رشته‌ی معنایه چکن ایلهامیم!

۱۳۷۰ ین ، قیشی _تهران

#دومان
#غزل‌لر
#استاد_حسین_منزوی

@poem_monzavi

⚜️⚜️⚜️

⚜️⚜️⚜️

غزلین غزلی

آچ گؤزون قوی یوخودان گول‌لر اویانسین غزلیم
آچ گؤزون قوی باخیشیندان گون اوتانسین غزلیم

گؤره بیلمز گؤزه‌لیم، آی‌دا، اؤزوندن گؤزه لین
باخ آیا، قوی حسدیندن ، پارالانسین غزلیم

سن اولان یئر ده گولوم!گول نه‌دی؟دور گلشنی گز
قوی سنین باشیوا ، پروانه دولانسین غزلیم

چیخ چمن سیرینه ، مدهوش ائله سروری ، سمنی
قوی آدین عطر کیمی باغدا جالانسین غزلیم

گون نه‌دی؟آی نه‌دی؟اولدوز نه‌دی؟گؤیچک‌لر آدی
سن اولان یئر ده گرک‌دیر قارالانسین غزلیم

قالمیشام قاشیوی ، کیپر یک لریوی ، گؤزلریوی
قلمیم هانسی‌نی وصف ائلییه؟هانسین؟غزلیم

سنی آغوش چکنده اوره گیمدن دییه‌رم
اولا کاش دور زامان بوردا ، دایانسین غزلیم

یا دایانسین یا دا هر لحظه‌سی هر ثانیه‌سی
بیر ایل اولسون ، لیلی بیر عؤمر اوزانسین غزلیم

سنی هر کیم دیله چالسا ، گؤروم آغزی قوروسون
گؤروم آغزیندا ، عؤمورکن دیلی یانسین غزلیم

ائلیمین غم‌لری بس‌دیر منه، سن غم یئمه دای
قویما غم ، غم‌لریمین اوسته قالانسین غزلیم

آغلاما ، غم یئمه ، قوی گول‌لر آچیلسین ، بالاجان
ائله گول کی قوی آتان ، غم لری دانسین ، غزلیم

۱۳۵۷ نیم ، پاییزی _ زنگان

#دومان
#غزل‌لر
#استاد_حسین_منزوى

@poem_monzavi

⚜️⚜️⚜️

⚜️⚜️⚜️

نیسگیل «حسرت»

کسیر قیلیج کیمی،گول لری آیاز
هانی یاشیل دونلو چمن؟هانی یاز؟

طبیعت‌دن اؤترو اوره‌گیم کئچیر
گؤزل‌لیگی قانان ، منی قیناماز

هانی بولبول‌لرین آذان دیمه‌سی
گول بو تاسی یئر ده قیلاندا ناماز

گؤی‌دن قاطار _قاطار کئچن دور نالار
گؤل‌ده جوت _ جوت ایسکی گئدن اؤردک،غاز

باغین یاشیل پرده سیندن آسلانان
اوزوم‌دن شرابه ، هئیو ادان قوتاز

هانسی نرگس؟ هانسی یاس؟هانسی سوسن؟
بو تورپاق‌دا ، چال تیکان‌دا ، گول آ چماز

یئر دن ألو چیخیر ، گؤی‌دن قان یاغیر
بو باغ‌دا گول بیتمز ، بولبول یاشاماز

پاییز ، قیشی بیر فصیل اوزاخدیر یر
قیش گئدیر بیر فصیل پاییزا پئشواز

هله گون‌لر «کچل حمزه » لرین دیر
ایتیب «دمیر چی اوغلو» یاتیب «خان آیواز»

هانی اوغراش پاشالارین اوستو نه
«عرب آتی» چاپان ، «تانری تانیماز»؟

هانی «حیدر بابا» گدیگین آلان
ورندیلی چئگنینده «ملک نیاز»؟

بورویوب اؤلکه‌نی آغلاشماق سسی
هانی عاشیق؟ هانی «ماهنی» هانی ساز؟

شنلیک غمه چؤنور ، توی یاسا دؤنور
هله‌ده آپاریر «سارا» نی «آراز»

«دریالار مرکّب ، مئشه‌لر قلم»
شاعیریم! ائل اوبا در دلریندن یاز

۱۳۷۴_پاییزین آخیر آیی _زنگان

#دومان
#غزل‌لر
#استاد_حسین_منزوی

@poem_monzavi

⚜️⚜️⚜️

⚜️⚜️⚜️

دریا فانوسو

گولمه گوله ، گول اوتانیر
باخما گونه ألولانیر

زولفون أسیر ائله بیل کی
عطیر شوشه‌سی جالانیر

رف‌ده‌کی آینالار !؟سنی
قاف‌داکی آینالار تانیر

یول‌داکی گئتمک‌دیر ایشی
سنی گؤرنده، دایانیر

نئچچه کی قیسسالیر عؤمور
سنین ناغیلین ، اوزانیر

یای‌دا پاییز لامیش کؤنول
سن گول آ چاندا یاز لانیر

گؤزون دریا فانوسو تک
دومان‌لار دالیندا یانیر

لابُد اوتورور اوره‌گه
سؤز کی اورک‌دن قووزانیر

حسنیوی منجه کیم بیلیر؟
شعریمی سنجه کیم تانیر؟

۱۳۷۳_یای_زنگان

#دومان
#غزل‌لر

#استاد_حسین_منزوی
@poem_monzavi

⚜️⚜️⚜️

این بار تیر مرگ به افسونت ایستاد
وقتی که چشم های تو ،‌فرمان ایست داد

بوی کدام برگِ غنیمت شنیده بود
این باد فتنه،دست به غارت که می گشاد

شیرازه ی امید ،‌که از هم گسسته شد
یک برگ نیم سوز به دست من اوفتاد

نامت سیاه مشقِ ورق پاره ی من است
هم رو سفید دفتر سودا از این سواد !

تا کی هوای من به سرت افتد و مرا
با جامه های کاغذی ام آوری به یاد

در بی‌نهایت است که شاید به هم رسند
یک‌روز این دو خط موازی در امتداد

تا خویش را دوباره ببینم ، هر آینه
چشم تو باد و آينه ی دیگرم مباد

بر جای جای دشنه ی او بوسه می دهم
هیچم اگر چه عشق جز این زخم ها نداد

غمگین در آستانه ی کولاك مانده ام
تا کی بدل به نعره شود مویه های باد

#استاد_حسین_منزوى
@poem_monzavi